Hena Kuli “Zitondezyo” zya Kuboola Kwabili kwa Messiah

Eeci cibalo tacili ca WLC. Eelyo notubelesya zilembedwe aabalembi balaanze lya nkamu, tusimba buyo zyeezyo zyeendelana 100% a Bbaibbele a lusyomo lwesu cino ciindi munkamu ya WLC. Aboobo eezyo zibalo inga zyalanganyigwa kuti nzya nkamu ya WLC. Twakalelekwa kapati amulimo wabalanda ba Yahuwah banjaanji. Pele tatukulwaizyi ndinywe nobeenzuma kutalika kubala zyaalembwa abantu aabo. Eezyo nzibaalemba, twakazigwisya mumalembe eesu nkaambo kanjaanji zililubide akubaa tumpenda. Cintu cuusisya ncakuti tucilangaula mbungano yamilimo iitakwe kampenda. Ikuti konyandidwe nkaambo ka [zibalo/milumbe] iitali ya WLC, kobikkila maanu ku Tusimpi 4:18. Kuteelela kwesu nkwakuti kasimpe Kakwe kalazyokoloka, eelyo mumuni nuuyaa kumwesya munzila yesu. Tulakayandisya kasimpe kwiinda buumi, nkanko tulavwuntauzya kufumbwa nkokakonzya kujanwa.

Bamwi bantu babbejela kuboola kwa Yahushua kubee ncisobano. Hena Mateyo 24 ujisi zitondezyo zyeelede kwaambilizya kuzyokela kwa Messiah na?

Musela wa Cikombelo uzwide mikonzyanyo ya “bashimshimi” babujula aabo bakalaa mpuwo kapati akataa buleya kwiinda mukutaminina kuzyiba ciindi ca kuboola kwa Mwami.

Musela wa Cikombelo uzwide mikonzyanyo minjaanji ya “bashinshimi” baluulwa aabo bakabaa mpuwo kapati akataa buleya kwiinda mukutaminina kuzyiba ciindi ca kuboola kwa Mwami.

William Miller, ooyo wakaanza mbungano yaba Adventi, wakaambilizya kuti Messiah uyoosika mu 1843; nicakaalilwa kucitika eeco, kwakabambululwa makani mpoonya mwaka wa 1844 wakagantwa. Eeco “cishinshimi” acalo cakalezya kusika mpocizuzikwa.

Joseph Smith, uulaa mpuwo akataa ba Mormon, wakayiisya kuti Messiah uyoosika kufumbwa buzuba kusikila mu 1891, pele awalo wakainzya kulaale.

C. T. Russell, ooyo wakatalisya mbungano ya Watchtower, wakaambilizya kuti Kuboola Kwabili Kuyooba mu 1914.

Awumwi wakatamauka ciindi mazubaano ngu Hal Lindsey, mulembi wa bbuku lilaa mpuwo lyakuti The Late Great Planet Earth, wakasendekezya kuti “zitondezyo” zya Mateyo 24 zitondezya kuti Yahushua wakali kunoojokede a Nyika kusikila mu 1988.

Lindsey wakasika ambaakani eeyo kwiinda mukusendekezya kuti ooyo musela wakaba kamboni wa “kuyakulula” cisi ca Isilayeli mu 1948 uyooba kamboni wa kuboola kwa Mwami akwalo. Mbwaanga musela weelede kutola biyo myaka iili makumi one, Lindsey uzuunyene kuti Kristu uyoozyokela kuti azyoo “kwempule bantu kakwiina kufwa mukulaba kwa liso” (ooyu muzeezo uunyina bukwabilizi bujanwa mu Bbaibbele pe) kufumbwa buzuba kusikila mu 1988. Walo wakakosozya akuti mbwaanga kutolwa kujulu kakwiina kufwa kuyootobelana myaka iili ciloba ya “mapenzi aatanabwenwe”, Yahushua uyoolibonya ntongola meso kufumbwa buzuba kusikila mu 1995 kuti azyoozunde “Nkondo ya Armageddoni” alimwi aboobo kuzyootalisya bulelo bwakwe bwa myaka iili cuulu.

Mbuli mbutwaamba kale atalaawa, oobo bumboni butamininwa kuti Mwami uzyoosika kusikila mu 1995 nokuba munsimunsi lya waawo, bwakaambwa kuti bulajanwa muli Mateyo, cipati 24.

Mulumbe waku Oliveti ulaandaudwe muzibeela zyobile: mu citaanzi, Yahushua wakaambilizya kunyonyoonwa kwa munzi wa Jelusalema a “zitondezyo” eezyo zinokwaambilizya kuswena kwa ciindi eeco; muli cabili, walo wakaamba makani aa kuboola kwakwe kwa mamanino Pele kakwiina zitondezyo zyaambilizya ciindi eeco.

Eelyo Mwami naakayaamuka kuzwa mu Jelusalema (Mateyo. 24:1,2), basikwiiya bakwe bakamujatila maanu kutozya ku buyakwe bwaŋanda ya tempele. Mwami wakabuzya wakati: “Tee mwazibona zyoonse eezi? Ncobeni ndamwaambila kuti takukooyoosyaala aawa noliba bbwe lyomwe atalaa lyeenzinyina. Oonse ayookolomonwa.” Mufutuli wakali kwaamba kudilimuna Jelusalema ooko kwakali kuyoocitika mu myaka iili makumi one.

Eelyo nibaakkede atalaa Mulundu wa ma Olifa, basikwiiya bakabuzya Mwami eelyo “zintu eezi” noziyooba aceeco ciyooba “citondezyo” ca kuboola kwakwe a mamanino aa nyika. Kunooli bakali kuyeeyela kuti kukolomona tempele ziyooswaangana antoomwe a mamanino aa nyika. Messiah, mu Mulumbe wakatobela, wakasoleka kubalulamika mpubataamvwisyide kabotu.

Mulumbe waku Oliveti ulaandaudwe muzipaanzi zipati zyobile: cakutaanguna, Yahushua wakazubulula kunyonyoonwa kwa munzi wa Jelusalema ooko kwakali kuzyaa kuswena a “zitondezyo” eezyo ziyookwaambilizya ciindi eeco (4-34); cabili, walo wakabandauka makani aa kuboola kwakwe pele kakwiina kupa zitondezyo ziyoocitika kujuzya ciindi eeco (35ff).

Kakwiina kudonaika, ncintu cuusisya kuti bantu balibilikide kusungilizya cishinshimi ca Bbaibbele inga kabatamauka “zitondezyo” eezyo zijatikizya buyo kudilimunwa kwa Jelusalema wansiku akukakatila kulipa busanduluzi mazubaano bwa Armageddoni wa kulwanya madobbi!

Izitondezyo

Eezyo zitondezyo Mwami nzyaakaamba zijanwa muli Mateyo 24:4-14. Tatutiitole ciindi kubandauka zyeezyi mucibalo eeci. Nokuba boobu, cili kabotu kwaamba kuti comwe-comwe akataa zyeezyi cakazuzikwa mumusela wa myaka iili makumi one akataa mulumbe wa Mwami ku Mulundu wa Oliveti aciindi ca kudilimuna munzi wa Jelusalema mu 70 A.D. Atujuzye malembe mabotu oomo motujana bumboni oobu:

• J. Marcellus Kik, Matthew XXIV, Presbyterian & Reformed, 1948.
• Roy Deaver, “Matthew 24” mubbuku lya Premillennialism — True Or False?, Wendell Winkler, Ed. , 1978, pp. 105ff.
• Cecil May, “Matthew 24,” The Biblical Doctrine of Last Things, David Lipe, Ed., 1984, pp. 115ff.

Aaya mabbuku aayinda kubota kuswata mu ciiyo eeci.

Mu kuzubulula cibalo eeci Ime njanda kukosozyela limwi kutondezya kuti “zitondezyo” zya Mateyo 24:4-14 tiizyakali kukonzya kuzuzikwa mu kuboola kwa mamanino kwa Messiah.

Twaambo tuyumu nta tutondezya zitondezyo zya Mateyo 24:4ff tujatikizya kunyonyoonwa kwa Jelusalema mu 70 A.D.

“Ooyu musela tuukayindi kusikila ...”

Majwi aakuti “zyoonse zintu eezi” aambilizya zitondezyo eezyo Mwami nzyaakapa. Alimwi kwaamba kuti “zyoonse zintu eezi”—izitondezyo—zyakeelede kuzuzikwa kuutana yinda “musela ooyu”.

Kutaanguna, mu kampango kapati aaka kaganta “mwaandulula mupati” caandaano, Yahushua wakasalazya kwaamba kuti: “Ncobeni Ime ndamwaambila kuti, ooyu musela tuukayindi kusikila zyoonse zintu eezi zikazuzikwe” (34). Ikaambo kakwaamba kuti “zyoonse zintu eezi”, kajatikizya zitondezyo eezyo Mwami nzyaakapede. Alimwi “zyoonse zintu eezyo”—izitondezyo—zyakeelede kuzuzikwa kuutaninga gola “musela ooyu”.

Mubuzyo ngwakuti—ciiminina nzi kwaamba kuti “musela ooyu”? Aabo basyoma kuti cishinshimi cakazuzikwa bayandisya kwaamba kuti ibbala lyakuti “musela” lyaamba “musyobo wa bantu;” aboobo, basendekezya kwaamba mukowa wa BamaJuuda; alimwi mbokuli boobo, Mwami wakali kwaamba kuti eezi zitondezyo zyakali kuyoo zuzikwa muciindi eelyo mukowa wa BuJuuda niwacikali kukwabililwa (cf. The Scofield Reference Bible).

Nokuba boobo, ooyu muzeezo wakulanganya bbala lya “musela” ulakazyanya akubelesya bbala eelyo mu Cizuminano Cipya. Mu bbuku lyabo lisandulula mabala aa ciGiliki lyakuti Greek Lexicon, Arndt & Gingrich, baamba bbala lyakuti (genea) [“musela”] lyaambilizya “mweelwe wa bantu boonse antoomwe aabo bakazyalwa aciindi comwe, akutaaluka kusanganya bantu boonse bacipona aciindi cipedwe ca musela ooyo, bantu bapona aciindi comwe” (p. 153). Kuvwuntauzya zibalo zyongaye mu bbuku lya mulumbe wa Mateyo inga kwafwamba kuyumya kasimpe aaka (cf. 11:16; 12:39,41,42,45; 16:4; 17:17; 23:36). Cilisalede aboobo kuti, izitondezyo zya ciiyo caku Oliveti zyakali kugolela buyo mu musela mutaanzi.

Makani Mapati Aansiku

Nokuba kuti Lindsey abamwi bakazyanya kuti busanduluzi bwa Mateyo 24 busendekezya kupyopyongana kwa musela wa 20, kulanganya ciiminina zintu eezyo kuyubununa kuti Mwami wakalasazya kujatikizya bweende bwa nsiku abwa ciindi eeco.

Langanya twaambo tutobela waawa:

1. Wakasalazya kuti ooko kunyonyoonwa kwakali kuzyaa kuswena kuti kwakali kuyoojatikizya cooko ca tempele lya nsiku [“busena busalala” – 24:15] amunzi wa Jelusalema (cf. Luuka. 21:20).
2. Basikwiiya baku Judiya bakacenjezyegwa kuti “batijile ku malundu” (16)—aayo malailile aatakonzyi kumvwika kubaa maanu ikuti kwaboola nkondo yakulwanya madobbi! Nokuba boobo, kweendelanya ku bumboni bwa mulembi wa misela Eusebius, Banakristu bakatijila kubusena bwa Pella kujwe lya Mulonga wa Jordani niwafumpwa munzi wa Jelusalema aboobo bakeeleba kujaigwa kwa BamaJuuda.
3. Mwami wakacenjezya kuti: “Ooyo uuli aciluli ataseluki kuti akagwisye eezyo zili muŋanda yakwe” (17). Alimwi, malailile aali boobo taakonzyi nokuba aaniini kumvwika kubaa maanu ikuti Mufutuli naakaamba nkondo ya kulwanya madobbi. Pele akamvwika kubaa maanu nkaambo maanda aa munzi wa Jelusalema wansiku akali papalele aciluli alimwi akali gumene. Nkabela kweendelanya aboobo, Banakristu bakali kunga balubweza kutija kabayaa kusotauka atalaa “ziluli zya maanda aabo,” kabatozya kunjeleela ya munzi kutija (cf. Edersheim, Sketches of Jewish Social Life, p. 93).
4. Kukulwaizyigwa kuti, “ Amukombe kuti kutija kwanu kutakabi ciindi camupeyo” (20) nkulangila bube bwa ciindi eeco eelyo kweenda misinzo nikwakali kukatazya.
5. “Amukombe kuti kutija kwanu kutakabi... nikuba Buzuba bwa Kulyookezya butegwa Nsabata.” Aayo majwi aaguminizya kaambo kakuti milyango ya munzi wa nsiku yakali kunoojalidwe mu Nsabata (cf. Nehemiya. 13:19) aaka kasimpe, inzya, tiikakacilaa cikkelo niwaa kolomonwa munzi.

Ziiyo zya Yahushua zijatikizya Kuboola Kwabili

Zifwanikiso zya mikonzyanyo nzyaakajuzya Yahushua ku kulibambila Kuboola Kwabili, zilaandeene kuzwa ku zitondezyo zinga zyaambwa kuganta ciindi eeco.

Mu mikonzyanyo ya zifwanikiso zya misela yongaye, Mwami wakaambilizya kuti kunyina zitondezyo ziyoopegwa zitondezya Kuzyokela kwakwe; kunze lyaboobo, Buzuba bwa Lubeta buyoo bajanikizya kabatalibambide.

Mu mikonzyanyo yamisela mu zifwanikiso yongaye, Mwami wakaambilizya kuti kunyina zitondezyo zya ciindi zyeelede kupedwa Kuzyokela kwakwe; kunze lyaboobo, Buzuba bwa Lubeta buyoo bajanikizya kabatalibambide.

Langa twaambo tutobela aawa:

1. Mbweenya bantu bamazuba aana Noah mbubaazumenene kujata bubi “kusikila buzuba” oobo niwaasika muyoba, “mbweenya mbociyooba kuboola kwa Mwanaa Muntu” (38,39).
2. Bantu bansiku bamu Sodoma tiibakakubwene manyongwe aakali kuzyaa kuswena kusikila “buzuba oobo Loti naakalonga kuzwa mu Sodoma,” nokuba boobo, “munzila njeenya mbociyooba mu buzuba oobo Mwanaa Muntu nayooyubununwa” (Luuka. 17:28-30).
3. Messiah wakaambilizya kuti walo uyooboola natalangilwi, mbweenya mbuli mubbi mbwacita. “Ikuti simalelo wa ŋanda naakalizyi ciindi eelyo mubbi naakali kuboola, walo naakalangilizya akutalekela ŋanda yakwe kuti injililwe mubbi. Aboobo anywebo amulibambile; nkaambo mu woola ndyomutayeeyeli Mwanaa Muntu uyooboola” (43,44; cf. 1 Batesalonika. 5:2; 2 Petulo. 3:10).
4. Kaambo ka banakalindu muli Mateyo 25 kayiisya ncobeni ciiyo ca kulibambila lyoonse, nkaambo sibwiinga uyooboola aciindi citalangilwi [mu woola lya akataa masiku — ciindi cinyandya kusekelela mucado!].

Kunyina muli Mateyo 24 cigwasyilila muzeezo wakuti Messiah wakapa zitondezyo zimwi eezyo ziyookwaambilizya mamanino aanyika.

Mu majwi ookwa Yahushua eeni

“Pele oobo buzuba a woola kunyina uubuzyi, naba omwe, nobaba banjele ba kujulu, naba Mwana, pele biyo Taata alikke.” (Mateyo 24:36)

Kamwi kaambo kalaa maanu kapati mu kutondezya kuti Mwami taakapa zitondezyo zya kugantya nokuba kubalila ciindi ca mamanino kali mu cisyoonto 36. “Pele taakwe naba omwe uubuzi buzuba niciba ciindi. Bangelo na kujulu abalo tabazi, naba Mwanaa Muntu, pele Taata alikke nguuzi.”

Ooku kukazyanya kulapyopyonganya: nokuba kuti Yahushua wakapa zitondezyo zya Mateyo 24:4-14, naba nguwe taakazyi ciindi ca Kuboola kwakwe Kwabili nokuyooba. Aboobo ceelede kuba cintu cizyibidwe kufumbwa muntu (pele baabo bacengedwe cakumaninina) kuti zitondezyo zya Mateyo 24 tazikonzyi nokuba munzila iili buti kubelesyegwa kujana ciindi ca Kuzyokela kwa Mwami!

Hena taciboneki kunyandya kuti “bashinshimi” ba mazubaano balakonzya kubala Mateyo 24 a kwaambilizya mamanino aa nyika; kakuli naba yooyo wakaambilizya mulumbe taakali kukonzya kupampanuna makani aayo?!

Kunyina zitondezyo ziguminizya ciindi ca mamanino aa musela ooyu. Atukakatile, aboobo, lyoonse kukkala katulibambide ku Kuzyokela kwa Mwami, nokuba kufwa, kufumbwa cinga catutaangunina kusika.

---

Eeci ncibalo citali ca-WLC cakalembwa aaba Wayne Jackson.

Twakagwisya mucibalo citaanzi mazina aabakomba mituni ngobayita Taata a Mwana, akubikka mucibaka cangawo mazina mataanzi ngubaapedwe. Kuyungizya waawo twakajokolosya mutumpango ntotulembulude akubikka mazina aa Taata a Mwana, mbuli mbwaakalembedwe kutaanguna abalembi bamu Bbaibbele bakayoyelwa moza. Nkamu ya-WLC