|
Eeci cibalo tacili ca WLC. Eelyo notubelesya zilembedwe aabalembi balaanze lya nkamu, tusimba buyo zyeezyo zyeendelana 100% a Bbaibbele a lusyomo lwesu cino ciindi munkamu ya WLC. Aboobo eezyo zibalo inga zyalanganyigwa kuti nzya nkamu ya WLC. Twakalelekwa kapati amulimo wabalanda ba Yahuwah banjaanji. Pele tatukulwaizyi ndinywe nobeenzuma kutalika kubala zyaalembwa abantu aabo. Eezyo nzibaalemba, twakazigwisya mumalembe eesu nkaambo kanjaanji zililubide akubaa tumpenda. Cintu cuusisya ncakuti tucilangaula mbungano yamilimo iitakwe kampenda. Ikuti konyandidwe nkaambo ka [zibalo/milumbe] iitali ya WLC, kobikkila maanu ku Tusimpi 4:18. Kuteelela kwesu nkwakuti kasimpe Kakwe kalazyokoloka, eelyo mumuni nuuyaa kumwesya munzila yesu. Tulakayandisya kasimpe kwiinda buumi, nkanko tulavwuntauzya kufumbwa nkokakonzya kujanwa. |
Kuli twaambo ku mabala aakuti "mazuba aamacaalizyo" mukuti, ngooyu mukonzyanyo, iBbaibbele lya ciindi ca Mwami James kanjaanji lyaamba "mazuba aamacaalizyo " aayo mabala aatajanwi mubusanduluzi bwa mazubaano. Kuyungizya waawo, tacisalazyidwe lyoonse kuti naa "mazuba aamacaalizyo" ciiminina ciindi cicili kumbelaa mazuba kweendelanya aa yooyo uulemba naa mazuba aali kumamanino kwa ziindi zyoonse, kumamanino aanyika. Amwi mabala aganta buzuba bukanwa muciindi nalemba uukanana. Kweelede kubambililwa notunjila mutumpango ooto tubelesya mabala aaya.
Kuli penzi limbi ndyotuswaanya muziindi zya mazubaano, cilakatazya kuyeeyela kuti balembi ba Cizuminano Cipya bakali kupona mu "mazuba aamamanino." Myaanda ya myaka yainda lino; hena kunooli ziindi nibakali kupona zyakali zya mamanino na? Tweelede kusalazya kuti zimwi ziindi balembi bakayoyelwa moza bakali kubelesya mabala aaya munzila yiindene kuli mbo twaabelesya. Kuli mbabo, icintu ciinda bulemu cakacitika mu kuboola kwa Yahushua Messiah munyika kuzyooleta lufutuko ku basyomi boonse. Eeci tiicakali cintu biyo akataa zimwi zya misela; ncencico cini cakali kulindilwa. Nkaambo ka ceeco Messiah ncaakacita, zyoonse zyakacinca. Kuzwa waawo kuya kumbele, nolilampa buti kusikila Yahuwah akainde akati akusimpa julu anyika mpya, Bantu bakali kupona mu "ziindi zya mamanino." Mazuba aayo nocikonzyeka kuti bantu basimpe lusyomo lwabo muli Yahushua Messiah akunjila mulufutuko lizwide ncintu cakasandula zyoonse kwiinda mazuba aakayinda kusikila ciindi eeco. Akali mazuba aaciindi cibotu, mazuba aayo bantu nibakali kubikka lusyomo muli yooyo waakankaminwa, waabuka kuzwa kubafu, Simalelo wakatanta kujulu akunjila mu lufutuko ndwaakazundila babisyi.
Mulembi wa BaHebulayo waambila baabo babala zyakwe kuti "mumazuba aamamanino aaya (Yahuwah) waakanana kuli ndiswe kwiinda mu Mwanaakwe" (BaHebulayo 1:2 ). Petulo waamba kuti Messiah "wakayubununwa mu ziindi zya mamanino eezi nkaambo kenu" ( 1 Petulo 1:20 ). Mutumpango tuli boobu cintu ciimininwa ncakuti kuli cintu caacitika mazuba aakayinda cakuti ciliimpene kapati ku zintu zyaacitika mumisela yakainda. Nanka mabala aakonzyene ayaaya alakonzya kutozya kumbelaa mazuba kuli baabo bayootambula mulumbe, eelyo notubala kuti, "mu mazuba aamacaalizyo inywe muyoobweeda kuli Yahuwah Leza wenu akumuteelela" ( Ciibalusyo 4:30 ), naa mu ciibalusyo kuli baabo bateelela kuti Yahuwah wakamupa manna munkanda "kutegwa amubombye akumusola kutegwa kumamanino zikamwendele kabotu inywe" ( Ciibalusyo 8:16 ).
Mulimo wa tumpango tuli boobu ngwa kusalazya kuti Yahuwah ulabeleka canguzu aawa acecino ciindi. Bantu bakwe beelede kwiibaluka kuti muli zyeezyo zicitika mumaumi aabo amumbali lyabo, Yahuwah ulabeleka makanze aakwe. Mumoza ngweenya ooyu, mwiimbi ulapaila kuti, "Nditondezye Ime, O Mwami, mamanino aabuumi bwangu amweelwe wa mazuba aangu; ndizyibye buumi bwangu mbobuyabaila" ( Intembauzyo 39:4 ), alimwi mu Tusimpi, tulajana kuti kutambula malailile njenzila ya kubaa busongo mu "muciindi ca macaalizyo" ( Tusimpi 19:20 ). Mukwiimpanya Bbabbuloni upedwe mulandu nkaambo ka kutaibaluka "ciindi ca macaalizyo" ( Izaya 47:7 ). Kwiinda mukuteelela eeco Yahuwah ncacita, bantu bakwe inga bayumyayumya mu lusyomo lwabo akukkomanina bupati bwa ziindi eezyo mobapona. Ncintu ciyandika kuti bantu ba Yahuwah kabatali balikke alimwi kabamvwisyisya mbwaabeleka makanze aabulemu ikuti biyo kabalaa meso aakuti babone.
Kanjaanji, ibbala lyakuti "cicaalizya" naa "camacaalizyo" akabelesyegwa kwaamba ziindi kutali mamanino azintu zyoonse. Bashinshimi inga kabaamba "buzuba" eelyo Mwami nayoocita cimwi, zimwi ziindi kusubulwa busofwaazi, zimwi ziindi kuleta zileleko. Tumpango tumwi twaamba "mazuba aamamanino," tugeme kumbelaa mazuba kakwiina kuganta ciindi cini. Mutumpango tuli boobu, cilakonzya kwiiminina "aakale mubweende bwa zintu zya cino ciindi," nkokuti, aakale mu buumi bwa muntu naa, kanjaanji, aakale kumbelaa misela ya nyika. Mucig citaanzi, tulakonzya kubona kucenjezya kuli mu Tusimpi kuti buumi bwakukkala cabuyamba caambilizya kuti unootongela "kumamanino aako" ( Tusimpi 5:11 ). Kubelesya mabala aayo munzila iimbi, Jakobo wakacita bana Bakwe kuti abaambile ciyoobacitikila "mumazuba aamacaalizyo" ( Matalikilo 49:1 ). Eeci caambilizya kumbelaa mazuba kulaale, pele kutali kumamanino aanyika. Aboobo cishinshimi ca Mozesi nilwakaindide lufu lwakwe, Isilayeli wakali kuyoozangila bululami nkaambo busofwaazi buyoobanjilauka "mumazuba aamacaalizyo" ( Ciibalusyo 31:29 ).
Mu Cizuminano Cipya, tuuli mubuzyo wa ciyoocitika masi munzila eeyo Yahuwah njabelesya makanze Aakwe mu cikombelo amu buumi bwa omwe-omwe akataa basyomi. Petulo waamba kuti kuboola kwa Muya Uusalala mu cikombelo civwanda wakazuzika cishinshimi ciyoocitika "mumazuba aamamanino" ( Milimo 2:17 ). Muuya ngweenya ooyu , tulabona kaambo kali mu BaHebulayo: Messiah "wakalibonya ciindi comwe kuli boonse kumamanino aamisela kuti agwasye cinyonyoono kwiinda mu kulituuzya lwakwe" ( BaHebulayo 9:26 ). Bupati bwa zintu eezi zijatikizya kuboola kwa Mufutuli akumanizya lufutuko zilijatene a "mazuba aamacaalizyo." Akwalo kulwanwa busofwaazi kufumbwa cibotu. Mumazuba aayo, "Moza ulisalazyide kuti bamwi bayooleya mu lusyomo akutobela miya yuunina azintu ziyiisyigwa aa madaimona" ( 1 Timoteo 4:1 ). Kuli maanu amwi aakuti icikombelo lyoonse cakali kupona mu "mazuba aamamanino."
Mutwe wamakani mukuyiisya kwa Yahushua wakali "bulelo bwa Yahuwah." Zimwi ziindi eeci cakali kulibonya aanga cintu camazuba aayo, zimwi ziindi mbuli ca kumbelaa ciindi. Cintu cipati ncakuti cijatene aa Yahushua lwakwe.
Cizuminano Cipya cilasalazya kuti kuboola kwa Yahushua Messiah cakali cintu ciyandika kapati. Lufu lwakwe lwakunununa bantu bwakali bwiinguzi bwa Yahuwah bwa mamanino ku penzi lya cinyonyoono ca muntu, nkabela mbucakamanina kucitwa eeco, kunyina cimbi cakacili mbweenya. Lino mulimo wesu cino ciindi, cintu ciyandika kapati ncakuti Yahushua wakaleta bulangizi bupya bwa zintu. Walo wakaleta cinunuzyo eeco cakapa kuti babisyi bakonzye kulekelelwa akunjila mu bulelo bwa Yahuwah akweelela kuyootola lubazu mu bulelo bwa Yahuwah bwa mamanino. Eeco cipa bulemu bwaandeene Ku ziindi zyoonse kuzwa akuboola kwa Yahushua, alimwi balembi ba mangwalo batondezya cintu eeci kwiinda mukwaambilizya zyoonse zyakatobela kuzwa naakaboola Yahushua kuti nzya "ziindi zya kumamanino" nokuba zikonzyanya azyeezyo.
Zimwi ziindi Cizuminano Cipya caamba mamanino azintu zyoonse kubee alaafwi kapati; zimwi ziindi, kulangika aanga kuli mundando wa ciindi cilamfu. Swebo tweelede kubikkila mumizeezo kuti "Ku Mwami, buzuba bomwe buli mbuli myaka iili cuulu, alimwi myaka iili cuulu ili mbuli buzuba bomwe" ( 2 Petulo 3:8 ). Tacili cuubauba lyoonse kuba masimpe kuti naa kampango kaamba mamanino aanyika eeyi abweende bwa zintu zyayo naa kaamba cintu cimwi ciyootobela kacitaninga sika ciindi eeco tweelede kubambililwa kabotu-kabotu kweenda munsaa tumpango tukatazya kumvwisyisya. Pele cintu cisalazyidwe kwaambwa ncakuti Yahuwah uyaa kubeleka makanze aakwe akuti eeco cijatikizya ciimo camamanino ca bweende bwa zintu oomo Walo luyando Lwakwe moluyoocitwa mubulondo bukkwene.
Zimwi ziindi balembi ba mangwalo bakali kulanga kumbelaa bweende bwa zintu zya eeco kulanga mamanino azintu nkabela bakali kubelesya mabala aakuti "mazuba aamacaalizyo".
Cilacitika eeci mucibalo cikondelezya muli Izaya a Micah oomo bashinshimi aaba mobalangila kulaale ŋanda ya mwami kuti iyooyakwa atalaa malundu alimwi masi manjaanji ayooboola kuzyooyandaula kuyiisya kwa Yahuwah kutegwa beendele mu milazyo yakwe ( Izaya 2:2-4; Mika 4:15 ). Cifwanikiso ciimpene cipedwe mu cishinshimi ca Ezekiya: mu "mazuba aamacaalizyo," Gogu, Silutwe wa nguzu zya busofwaazi, uyooboola kulwana Isilayeli pele uyookomwa (zyaandaano. 38-39). Eeci taceelede kulangwa kuti nkukazya zibalo zyakainda. Kuli zimbi zyaambilizya mamanino akuzanga kwa mamanino kwa nguzu zya busofwaazi. Eeco caambilizya kuti kumamanino, busofwaazi boonse buyookomwa mpoonya bulelo bwa Yahuwah buyoosimpwa kukabe kutamani.
Kuli zibalo zinjaanji zisalazya kuti kuyooba busofwaazi buyoo vwundumuka mumazuba aamamanino. Zimwi ziindi eeci caambilizya buumi bwaa buzuba abuzuba ku musyomi, mbuli leelyo Yahushua naamba kuti, "Bantu boonse bayoomucimwa nkaambo ka Ndime, pele ooyo wiimikila nji kusikila kumamanino uyoofutulwa" ( Mateyo 10:22 ). Pele busofwaazi buyooyungizya kuvwambukila kwiinda waawo, nkaambo "Kuyooba ziindi zya makatazyo mumazuba aa mamanino. Bantu bayooba basyaacivwule-mwangu , basimuyanda mali, basikulidunda" ( 2 Timoteo 3:1 ). "Mumazubaa mamanino kuyoosika basikunonga, bafubaazya akutobela micito yabo iisofweede" ( 2 Petulo 3:3 ). Mumulumbe amulundu wa Olivet kuli buyumuyumu kuba masimpe kuti naa zimwi zyaambidwe zyaambilizya buumi bwa musyomi akataa bantu batamuzyi Leza naa zyaambilizya mamanino aa ciindi, pele kakwiina kudonaika kwaamvwidwe mamanino eelyo Yahushua naamba kuti, "Bantu boonse bayoomucimwa nkaambo ka Ndime, pele ooyo wiimikila nji kusikila kumamanino uyoofutulwa" ( Maako 13:13 ). Aaka nkakaambo keni amubupanduluzi bwakwe bwa kaano kakuti, "Kutebula mamanino aamusela" ( Mateyo 13:39 ). Mbweenya buyo awalo Petulo naamba lufutuko kuti "kulibambila kuyooyubununwa muciindi camamanino" ( 1 Petulo 1:5 ). Tweelede kulangisya zyaambidwe aawa kujatikizya "manyongwe aacaalizya aali cilloba" ( Ciyubunuzyo 15:1 ; 21:9 ) aayo aamba mapenzi aa mazuba aamamanino.
Mu Mulumbe wa Johane, kulaa muzeezo wakuti Yahuwah uyoovwuna bakwe muziindi zya makatazyo eezyo. Yahushua wakainduluka kwaamba cijatikizya baabo Taata "mbaakapa " nguwe kuti walo uyoo "babusya mubuzuba bwa mamanino" ( Johane 6:39 Johane 6:40 Johane 6:43 Johane 6:54 ). Johane alikke ngo mulembi wa Cizuminano Cipya uubelesya mabala aakuti "ibuzuba bwa mamanino, " aayo aatondeka ku mulimo wa Yahushua kusikila kumamanino kwa musela ooyu kwini. Cilasalazya akuti Yahushua unoobambilila bantu bakwe kusikila muciindi coonse kusikila zintu zileta mamanino zikacitike. Lino kubbazu libi, ooyo muntu uukaka Yahushua a kuyiisya kwakwe uyoojana kuti ooko kuyiisya "kuyoomusinganya mubuzuba bwa mamanino" ( Johane 12:48 ).
Basyomi bayooswaanganya mapenzi mumisela yaanyika yoonse, alimwi eeco ciyoozumanana kusikila kumamanino kwini. Petulo waamba "mamanino aazintu" kuti "ali aafwaafwi " ( 1 Petulo 4:7 ). Kuboola kwa Messiah caambilizya kuti lufutuko lino lwasika, alimwi eeci cicinca zintu zyoonse. Pele balembi ba Cizuminano Cipya bakali salazyide kuti eeci cakali kujuzya bweende bwa Yahuwah kujatikizya mamanino aazintu, kulanganya aa buumi buteeli, kuti magolelo aazintu taakacili kulaale. Nkabela basyomi bayoonjila mu buzwide bwa "buumi buteeli" ( BaLoma 6:22-23 ).
Ziyume zitete masimpe ngwakuti buzuba bwa mamanino, bupati buyooleta kuzunda kwa Yahuwah. Eeci ncecaambidwe mu Cizuminano Cakale, mumukonzyanyo, mucibalo cipati oomo Joobo mbwaamba kuti, "Ime ndizyi kuti Munununi wangu ulapona akuti kumamanino uyakwiimikila atalaa nyika. Alimwi eelyo mubili wangu waakunyonyooka, pele mu buntu bwangu, Ime ndiyoomubona Yahuwah" ( Jobu 19:25-26 ). Kuli twaambo mu cibalo eeci, pele cilisalazyidwe kuti kuli bulangizi bwa kuzunda kwa Yahuwah. Kataninga zyalwa Yahushua, mungele wakaambila Maliya kuti ooyo mwana ngwayoozyala "uyoolela atalaa ŋanda ya Jakobo lyoonse alyoonse; bulelo bwakwe tabukamani" ( Luuka 1:33 ).
Ku balembi ba Cizuminano Cipya, kuboola kwa Yahushua Messiah munyika kuzyooleta lufutuko cakali cintu aawo aakaanzikidwe zintu mumisela yoonse yaanyika. Eeco cakatalisya bweende bwa zintu eezyo zyakali kuzyooleta lufutuko ku babisyi mpoonya mukuya kwa ciindi akubamba bulelo bwa Yahuwah, mbuli Ciyubunuzyo mbocisalazyide. Eeci tiicakali kwaambilizya kuti busofwaazi bulamanina limwi mpeenya aawo; malembe aa Cizuminano Cipya; abweende bwa Banakristu bulatondezya kuti busofwaazi bucizumanana. Pele cintu cipati mukulanganya kwa Bunakristu ncakuti mulimo wa kufutula ookwa Messiah wakacinca zintu zyoonse. Cinyonyoono kacakomwa cakuta bembeleka mumbali, alimwi basyomi bakanjila mu lufutuko. Nokulampa nokukwiimpa buti kumamanino aanyika eeyi, mbuli mbotupima ciindi, tupona muziindi zya mamanino mbuli balembi ba Cizuminano Cipya mbobaciteelede.
Eeci ncibalo citali ca-WLC cakalembwa aaba Leon Morris.
Twakagwisya mucibalo citaanzi mazina aabakomba mituni ngobayita Taata a Mwana, akubikka mucibaka cangawo mazina mataanzi ngubaapedwe. Kuyungizya waawo twakajokolosya mutumpango ntotulembulude akubikka mazina aa Taata a Mwana, mbuli mbwaakalembedwe kutaanguna abalembi bamu Bbaibbele bakayoyelwa moza. Nkamu ya-WLC