|
Ijulu lilaa mulumbe uutilimuna myoyo kumusela wamamanino uuno: “Amumuyoowe Mwami Yahuwah.” Kufumbwa cibeela cabuumi bwamuntu, ciligumidwe eelyo muntu napona buumi bwakuyoowa Mwami Yahuwah. Kuyoowa Mwami Yahuwah ncecintu cibambila basaante kuti bakacingauzye Mufutuli aciindi ca kuboola kwabili Kwakwe, alimwi ncecibapa mulimo ngobeelede kucita mumawoola aamamanino aanyika aano.
|
“Koima!”
Busyu buli boonse bwakacenguluka akucenka nkwekwiila. Mwanaangu musimbi wakali kkede amulembwalembwa. Mukwabonyina musankwa wakanyonauna akuzambaila ntambo yakali kuleleenzya mulembwalembwa kutegwa imuzingulusye yanikuzambuluka ntambo eeyo. Lino naakali kuzinguluka kayaa kwiindizya kupilauka ciindi coonse kumwi kayaa kuswena munsaa musemo wakali mukkoce, mutwe wakwe awalo wakali kuyaa kuswena munsaa musemo comwe-comwe ciindi naakali kuzinguluka.
Naakamanizya, kwakaibaiba misyozi mumeso aakwe. Taakalicisa nokuba kuligunta kumusemo pe. Walo wakayoowede buyo kuti bazyali bakwe inga kabayoo munyemena.
Ime nsyeekakalala pe. Ime ndakayoowede buyo. Walo wakayeeyela kuti kuyoowa kwangu kwakali kukalala nkaambo kantenda nceekapozomokela boobo.
Bukandu nkanjaanji ncintu cilangwa aanga cipa muntu kweenkela. Kuyoowa kupandululwa mumabala aakuti: “kulimvwa kugwitila akubbaatikilwa nkaambo kakuti kuli cintu cilaa ntenda munsimunsi, icintu cisofweede, cikonzya kucisa muntu, azimwi zinjaanji.”1 Pele kuli kuyoowa kupa buumi bubotu. Kuti kakwiina kuyoowa, muntu inga kayaa kumwantauka kusikila waakulijana akataa ntenda, katakubwene cintu cikonzya kumucisa. Mwana muvwanda kunyina cintu ncazyi cikonzya kumucisa, aboobo eeco kusanganya antoomwe akubula luzyibo lwa buumi mbotupona buno, eeco ncecipa kuti bazyali bamwana ooyo bazwe mvwi kulibilika kuti mwanaabo inga kayoonjila muntenda! Bazyali nobalaa luyando, baambila mwanaabo zintu zilaa ntenda munzila yakumucenjezya ntenda eezyo acintu cinga camucisa.
Taata Yahuwah awalo ulaita. Uloompolola. Ulapozomoka. Kuleka kuti ulikalalide, pele nkaambo kakuti Walo uyoowede kuti inga yebo koyoonjila muntenda. Uliyoowede nkaambo kako. Walo ulizyi kuti ŋanda yakazekelo ilaafwi kujalwa alimwi bantu boonse kufumbwa nkobabede tabakubwene kuti aawo mpozyiimvwi ncobeni zintu cino ciindi. Mumajwi aakucenjezya ncobeni, Walo utumina mungele uujisi mulumbe uumvwika ncobeni kakwiina cuusinkilila:
Alimwi Ime ndakabona mungele awumwi kauluka akataa julu, kajisi mulumbe uutamani wakukambaukila baabo bakkala anyika, acisi cili coonse, amusyobo, amulaka, abantu,
Wakaamba mujwi lipati kuti, “Amuyoowe Yahuwah, akupa bulemu kuli Nguwe; nkaambo woola lyalubeta Lyakwe lyasika: alimwi amukombe Nguwe ooyo wakabamba julu, anyika, alwizi, atusensa twameenda.” (Ciyubunuzyo 14:6-7)
Malailile aakuyoowa Yahuwah akazinga banjaanji nkaambo amvwikaanga aayo malailile taayendelani aciimo cokwa Taata eeco ciyubunudwe muli 1 Johane 4:8: “Yahuwah nduyando.” Pele Awalo muzyali waluyando, muzyali uulibilika nkaambo kantenda kumwanaakwe, lyoonse ucenjezya mwana kuti atanjili cibaka cilaa ntenda. Alimwi kakwiina kulubizya aawa —musela wamamanino uli muntenda mpati itaambiki.
Mwaapositolo Paulu wakabona ntenda eezi kazitungana mulongo kuzya kumusela wamamanino. Mulugwalo lwakwe kubasyomi baku Efeso, walo wakaambilizya kuti basyomi inga beeleba buyo ntenda eezyo kwiinda muluzyibo lwa Mufutuli Yahushua.
Kusikila toonse twaboola akuswaangana mulusyomo, aluzyibo lwa Mwanaa Yahuwah, mwaalumi uuzwide bulondo, kusikila tweezyekwa ciimo cokwa Kristu uuzwide bululami: Kutegwa kuzwa cecino ciindi tuleke kuba bana beempauka ooku akooku, batonkaikwa alusyomo lwamusyobo uuli woonse, mubumpelenge bwabantu, abucenjezu, oobo mbobalindizya kuti bacengelezye bamwi. (BaLoma 4:14)
Nduzyibo, lwa Yahuwah a Mwanaakwe luvwuna muya wamuntu uuli woonse kuzwa muntenda zyiboolela zyalane lyamamanino. Oolo luzyibo lujanwa buyo mukuyoowa Yahuwah. “Kuyoowa Yahuwah ngamatalikilo aabusongo: alimwi luzyibo lwa Yooyo uusetekene nkokuteelela.” (Tusimpi 9:10)
Caamba nzi kuyoowa yooyo ngomuyandana limwi? Mbuli mbotuli bapati swebo, kanjaanji tuleeleba ntenda nokuba masena aalaa ntenda abantu mbotuyoowana limwi. Bana, nokuba boobo, balakomena kabazyi kale ncocaamba kuyoowa yooyo ngobayanda; kulemekezya, akumuyoowa, ooyo ngozyi kuti ulakuyanda webo.
|
Kuyoowa Yahuwah Kuyoowa: Kukonga, kutilimuka; kukankamukila, nanka kulemekezya, Kuyoowa nanka kulemekezya cabulemu. (Langa bbala lyokwa Strong's #5399) |
Wisi uleendelezya buumi bwamwanaakwe cakumaninizya. Aboobo, mwana musankwa inga wayanda wisi akukkazyika camba kuti wisi ulamuyanda, kumwi kalemekezya wisi, alimwi, inzya, akuyoowa nguzu zyawisi. Ooku kuyoowa inga kwapa kuti mwana kateelela nokuba kuti wisi katako amunzi.
Eeci cilongwe akataa muzyali amwana nceciliko akataa Mwami Yahuwah abana Bakwe baanyika. Paulu wakapandaula makani aaya mu BaGalatiya caandaano catatu acane. Swebo tulamuyanda Taata alimwi tulamuyanda katwaankamene akumulemekezya. Iswe tulizyi kuti Walo ulatuyanda aluyando lutakonzyi kutulekelezya. Pele nkaambo kakuti ngu Singuzuzyoonse, tulamulemekezya akumuyoowa nkaambo kanguzu Zyakwe.
Yahushua wakapandulula kuyoowa leza ooku muli Mateyo 10:28 eelyo Walo naakati “Mutayoowi baabo bajaya mubili, pele tabakonzyi kujaya muya: pele amuyoowe Yooyo uukonzya kujaya muya amubili mumulilo wakunyonyweeda limwi.”
Mufutuli wakalizyi kuti basikwiiya Bakwe bakali kuyootundululwa, mubulwani, akujayigwa. Walo wakabakulwaizya kuti batayoowi kufwida kasimpe nkaambo eeco ncobayoonyangwa mubulwani, Ooyo Uupa-Buumi uyoobajosyela alimwi. Nokuba boobo, muntu ncayelede kuyoowa ninguzu zya yooyo Uupa-Buumi. Eeco Walo ncaakapa, uyoobanyanga aabo bazumanana kweendela mubuzangi acinyonyoono. Aabo balaa nguzu zyakujaya mubili tabajisi nguzu mbuli Zyakwe ooyo ulaa nguzu zyakujaya mubili amuya mumulilo utamani kumamanino aalubeta. Lufu luteeli, kuleka buumi butamani bwakusubulwa lyoonse, mbobulumbu bwabo boonse bazumanana kuzanga. Aboobo Yahushua wakali kupandulula kuti, mutayoowi kumaninwa buumi oobu. Tee kayi mbuumi bwakaindi kasyoonto buyo oobu.
“Webo Koyoowa. Koyoowesya ncobeni.” Yebo weelede kuyoowa. Yebo weelede kuyoowa ncobeni. Kuleka kuyoowa Yahuwah, nkaambo walo ulakuyanda mbuli kuti kucinyina muntu muzumi uuciliko kunze lyanduwe atalaa nyika ooyo Walo ngwaakafwida akwaabila Mwanaakwe.
Amuyoowe kusweekelwa buumi butamani nkaambo kakuzumanana muzinyonyoono nzyomuzyibidwe kale.
Amuyoowe kulamatila zinyonyoono zyakusisikizya cakuti cibi caleka kumvwika kusofwaala.
Amuyoowe kuyumya myoyo yenu nkaambo eeco ncinyonyoono citakonzyi kulekelelwa; kutegwa Muya Uusalala ukombelezye myoyo yenu.
Amuyoowe kuti inywe, kwiinda mukuyumya nsingo akukaka kulyaaba ku Mwami Yahuwah, inga mwaalilwa kumuzyiba Nguwe nkaambo cino nceciindi cibotu cakumuzyiba.
|
Malailile aakuti “Kuyoowa Yahuwah” azyila kumuyanda wabbala liimpene (#5399) kuzwa kuli leelyo libelesyedwe waawa: “Pele bakandu, batasyomi, abaabo basofweede, bajayi, bacita bwaamu, balozi, abakomba mituni, abaabo boonse baamba zyakubeja, bayoolijana muzyiba liyaka mulilo asulufa: oolo ndolufu lwabili.” (Ciyubunuzyo 21:8) |
Ibbala lyakuti “kuzyiba” mu Mangwalo lyaambilizya zinjaanji zijatikizya kuyandana ncobeni mucilongwe kwiinda kwiide kulitondezya antangalala. Ibbaibbele lilembedwe kuti: “Adamu wakamuzyiba Eve mukaintu wakwe; mpoonya walo wakamita akuzyala Cain.” (Matalikilo 4:1)
Balikke aabo bayoowa Mwami Yahuwah mbabanolaa cilongwe caluyando cikamantene boobo cakuzyibana a Mulengi alimwi, akuzyibwa Anguwe. Kwakali mabala ongaye aamulaka waci Hebulayo aayo aakasandululwa kubelesya nzila yakusandulula yaci Hebulayo, mpoonya aawo kuyubunuka zinjaanji ziiminina bbala eelyo. Mabala aapanduludwe kuti “kuyoowa” inga apandululwa akuti “kwiiya.” Kampango ka Tusimpi 1:7 kasanduludwe kuti “Kuyoowa Yahuwah ngamatalikilo aaluzyibo.” Pele amulange mbocinga caba kuti eelyo bbala lyakuti “kwiiya” lyasekkelelwa mukaambo kamwi:
Tusimpi twa Solomoni…
Kuzyiba busongo akulaililwa; nkokuteela akumvwisisya majwi aakulaigwa;
Kutambula malailile aabusongo, busongo, lubeta, abululami,
Akupa cakulitolaansi kubacete, kumukubusi luzyibo a kululama.
Muntu musongo ulateelela, alimwi ulayungizya lwiiyo lwakwe: alimwi muntu uumvwisisya inga watobelezya kulaigwa kwabusongo:
Kumvwisisya kasimpe, abupanduluzi; majwi aabasongo, amasendekezya aabo.
Kwiiya Yahuwah ngamatalikilo aaluzyibo: pele bafubafuba balacimwa kulaigwa. (Tusimpi 1:1-7)
Kuyoowa Mwami Yahuwah caambilizya kwiiya zintu Zyakwe lyoonse kuzwa kuli Nguwe. Aboobo, “[Kwiiya zyokwa Yahuwah], oobo mbobusongo; alimwi kuyaamuka zisofweede nkokuteelela.” (Joobo 28:28)
Muntu wakali kwiinda busongo wakaponede anyika wakaamba kuti: “Atumvwe mamanino aamakani woonse: Amuyoowe Yahuwah, akubamba milawo Yakwe: nkaambo ooyu ngomulimo woonse wamuntu.” (Mukambausi 12:13) Mumajwi amwi ooku nkokwaamba kuti, Kamwiiya akuzumanana kwiiya zyokwa Yahuwah, akubamba milawo Yakwe, nkaambo ooyu ngomulimo wamuntu woonse.
Kuyoowa Mwami Leza Yahuwah ncintu ciletela cileleko cipati: “Ncobeni lufutuko Lwakwe lulaafwaafwi kuli baabo bayoowa Nguwe; kutegwa bulemu Bwakwe bukkalilile munyika yesu.” (Intembauzyo 85:9) Mangwalo alisalazyide zintu ziyandika kuti kube lufutuko: “Walo wakakutondezya, webo O muntu, cintu cibotu; ino kayi ninzi ncayanda kuli nduwe Yahuwah? Pele nkucita buyo ziluleme, akuyandisya luzyalo, akweenda cakulilemeka kunembo lya Eloah wako.” (Micah 6:8)
|
“Amumukutaukile Mwami Yahuwah kumwi kamuyoowa akusekelela cabulemu.” |
Eeco cimvwikaanga ncuubauba kapati. Ncuuba ncobeni. Pele aabo bayoowa Mwami Yahuwah balakonzya kucita zyabululami, kuyanda luzyalo, akweenda cakulitolaansi a Nguwe. Kuyoowa Yahuwah tacili cintu caantangalala “cimwi” ncacita muntu umwi. Kuyoowa Yahuwah ncintu ciinda waawo. Ncintu cizwa mukati kamoyo wamuntu akumweendelezya micito yakwe, majwi aakwe, mizeezo yakwe, azintu nzyasyoma, akuzileta antoomwe kuti zyeendelane akuyanda kwa Yahuwah.
Kupona buumi bwako koyoowa Mwami Yahuwah, cilaa mulimo mubuumi mbokkala buzuba abuzuba. Kuyoowa Yahuwah ncintu cakulikwabilizya, cisosolosya muntu kuzwa kuzisofweede. Kuyoowa Mwami Yahuwah kusalazya muya wamuntu. Eelyo muntu uulitolaansi, uusyoma nazyiba luyando luteeli ndwapegwa; eelyo kuyoowa nguzu zyokwa Yahuwah nokusangene akunyandwa bululami abubotu Bwakwe; eelyo mizeezo yamuntu niizwide akukkomanina kayeeya bubotu Bwakwe, inga wasanduka munzila iikondelezya. Muntu inga wasanduka ciimo cakwe, akulibambila kutambula akwaanzya Mufutuli eelyo nayoozyokela.
Nkaambo kakuti basaante balimuzyi Yahuwah mucilongwe cakukamantana kapati, balo bakanjila mucizuminano Anguwe. Eeco ncecilongwe cibabambila kuti bakanjile Kujulu. “Maseseke ookwa Yahuwah ali aabaabo bayoowa Nguwe; alimwi Walo uyoobatondezya cizuminano Cakwe.” (Intembauzyo 25:14)
Eeci ncecisyomyo cimwi cakaambilizyigwa mu Mangwalo! Yahuwah uyootondezya cizuminano Cakwe kuli baabo bayoowa Nguwe! Eeco ncecibasandula ziimo zyabo kuti babe mucinkonzya Cakwe.
Amulange, alazya mazuba, mbwaamba Yahuwah, eelyo Ime nenjoobamba cizuminano cipya aŋanda ya Izilayeli…mbwaamba Yahuwah. Pele eeci cizuminano nceyoobamba Ime aŋanda ya Izilayeli mumazuba aayo, mbwaamba Yahuwah: Ime njoobikka mulawo Wangu mumizeezo yabo, akulemba mulawo ooyo mumyoyo yabo; alimwi Ime njooba Eloah wabo, alimwi balo bayooba bantu Bangu. Kucinoonyina muntu uuyiisya mweenzinyina, alimwi naba mwaalumi uuyiisya mukwabonyina, kaamba kuti, ‘Komuzyiba lino Yahuwah,’ nkaambo boonse bayoondizyiba Ime, kuzwa kubasyoonto kusikila kubapati babo, mbwaamba Yahuwah. Nkaambo Ime njoobalekelela zibi zyabo, alimwi cinyonyoono cabo Ime nsyekaciibaluki kabili. (Jelemiya 31:31-34)
Mwati nkulibotela cisyomyo cili boobu! Aabo bayoowa Yahuwah mbabaabo bazyi Nguwe. Balo balikamantene abubotu Bwakwe, luzyalo Lwakwe, luyando Lwakwe lusangalazya mazuba aabo alimwi akulekelelwa muluyando Lwakwe ooko kubaletela luumuno nobalyookezya masiku. Balo bayanda Nguwe, nkaambo balimuzyi Walo.
Aabo bapona kabayoowa Yahuwah, banoolaa luyando mbuli mbwalaa luyando. Bayookakatila kulyaaba kuti bagwasyilizye kusika ooko kuli basweekede. Majwi aabo, mbweenya mbuli Lyakwe, ayokwiimpuka cakujata maanka kukombelezya, akucenjezya bantu muluyando. Mubweende bwabo balizyi kuti, “Kuyoowa Yahuwah nkakasensa kabuumi, kakulisosolosya kuzwa mutooze twalufu.” (Tusimpi 14:27) Boonse aabo bayoowa Yahuwah inga beendelana abatumwa bakujulu mukumwaya mulumbe wakasimpe kuli bamwi, alimwi, akweeleba lucengo lwa Saatani akutambula cipego ca buumi butamani.
Ciyubunuzyo cilijisi cishinshimi cicaalizya cakumwaya mulumbe wakasimpe:
“Mpawo ndakabona mungelo umwi kauluka mujulu. Wakalijisi mulumbe wa Makani Mabotu uutamani kuti awaambilizye kuli baabo bakkala ansi, kuzisi zyoonse, akumisyobo yoonse, kumilaka yoonse, akubantu boonse.” (Ciyubunuzyo 14:6)
Ncintu ciyandika kuti aaya majwi aacishinshimi eeci kayeendelana akuba cimbonimboni ca mulawo wane:
Koyeeya buzuba bwa Nsabata, ubusalazye. Kobeleka milimo yako yoonse mumazuba aali cisambomwe, pele buzuba bwa Nsabata mbuzuba bwakulyookezya bwakulemeka Mwami Yahuwah wako. Muli boobo toyelede kubeleka milimo pe, noba nduwe, nibaba bana bako, nibaba babelesi bako baalumi, nibaba babelesi bako bakaintu, niziba ŋombe zyako naba mweenzu uuli mulubuwa lwako. Mumazuba aali cisambomwe Mwami Yahuwah wakalenga julu anyika, aalwizi, azintu zyoonse zili mulinzizyo, pele mubuzuba bwa ciloba wakalyookezya. Ncenciceeco Mwami Yahuwah ncaakabuleleka buzuba bwa Nsabata akubusalazya. (Kulonga 20:8-11)
Mumulawo wane, bantu boonse balaitwa kuti bakombe Mwami Yahuwah nkaambo Walo ngo Mulengi. Mumulumbe wamungele mutaanzi, aaya makani alayinduluka kwaambwa. Boonse bantu balitambidwe kuti bazyokele kukukomba kwa masimpe Mwami Yahuwah mubuzuba bwa Nsabata iitobezya mwezi-azuba yansiku, eeyo iikonzya kujanwa kwiinda mukubelesya kkalenda lyakabikkwa Kumalengelo. Kaambo keni kapedwe mumulumbe wamungele mutaanzi kalikonzyene akaako kali mumulawo wane: nkaambo Walo ngo Mulengi wa Majulu aNyika.
Mulumbe wamungele mutaanzi ugaminide makani aakukomba. Eeci cili boobo nkaambo aabo bayoowa Mwami Yahuwah, balikke mbabakonzya kukomba Nguwe “mumoza amukasimpe.” (Johane 4:24) Balikke mbabakonzya kumulumbaizya akumukomba munzila yabulemu iitambulika. Balo mbabalaa luzyibo lwa Mulengi oolo lwakabasikila kwiinda mukuzyiba Nguwe, alimwi eeco, ncecintu ciyandika kotaninga kona buumi butamani.
|
“Njoocita kuti kabandiyoowa amoyo omwe, kuti balo abana babo zintu zibeendele kabotu. Ndiyoobamba cizuminano citamani ambabo, nsikaleki kubacitila zibotu, nkabela njoocita kuti kabandiyoowa amyoyo yabo yoonse, kuti batakandifutatili limbi. |
Mumulumbe wamungele mutaanzi uumvwika mazubaano, Ijulu liyaa kubambulula Nsabata yamasimpe akuyubununa lucengo oolo lwakatupindaula maanu kuti tutazyibi ciimo cini mbwiilengedwe nyika. Kukomba kutambulika, kukonzya buyo kupegwa Sikabumba kuti muntu kalaa luzyibo lwamasimpe oolo. Aboobo mizeezo yobile ya (ciimo cini mbwiilengedwe nyika iipapalele abuzuba bwini bwamasimpe bwakukomba) eeyi yobile mizeezo iliswaangene kakwiina kwaandaana.
Omuyandwa, eeyi mizeezo yalucengo yobile ibambila nyika yoonse kuti ikacengelwe limwi. Pele kufumbwa eelyo bantu nobasyoma lucengo lwa zikolo zyaanyika kuti nyika ibambidwe muciimo cambumbulu nokuba bbola, eeco ncecibambila nyika yoonse kuti ikacengelwe limwi mulweeno lwa Saatani lwa mamanino. Pele kuti kasimpe katambulwa, akukumbatilwa, nkakayoovwuna akukwabilila muntu kuti atakacengwi. Nkakaambo keni aako Ijulu ncilyakayungizyila luzyibo muciindi camamanino ecino. Ecino ciindi notujatide maanka, bantu bokwa Yahuwah tabakaide kuumuna buyo pe kakwiina ncobacita. Eelyo nobanoobwene ntenda kiiswena munsaa bantunyina bamwi, balo bayoolibbakamuna akupozomoka kabakwabilila kasimpe, alimwi kasimpe koonse mubuzwide bwini, atusimpe toonse tutakwe mpuwo akataa buleya, mbuli kasimpe ka Nsabata iitobezya mwezi-azuba, akakuti nyika tiibambidwe muciimo cambumbulu pele ilipapalele. Balo bayoobbununa kubeja kwa Saatani koonse. Balo bayokwaambilizya tusimpe mbuli mbotulembedwe bwini mu Kulonga 1 alimwi, mukucita mulimo ooyo, bayoojokolosya akubambulula kukomba Mulengi mbokweelede kucitwa mubuzuba bwini Bwakwe bwamasimpe.
Koonse kunongwa akusampaulwa nkobayoopenga aabo boompolola kasimpe, kuyoobapa buyo kuti baliyumyeyumye akubula bukandu nkaambo balo banoozyi kale cintu cini cinooli muntenda yakufwa lufu luteeli: muya wamuntu.
Taata Yahuwah Lwakwe uliyoowede. Walo uliyoowede nkaambo kanduwe. Lwiito Lwakwe lwakavwumbu lwiimvwi mukuzyiba Kwakwe mbuli mbwabwene mamanino mbwayaa kuswena afwaafwi kapati. Aswebo lwesu tweelede kusinsimuka akuyoowa ncobeni. Tweelede kupona akulilingula maumi eesu. Hena kuli cintu nociceya buti ncumuteendelani, nokuba ncotanalekela Mwami Yahuwah cakumaninina ?
Ooko kuyoowa Mwami Yahuwah tacili cintu cikonzya kucitika buyo mukuliyandila. Ncipego cini buya. Mufutuli ukombelezya nduwe kuti weempwe:
“Lino ncekulailila ncakuti uule ngolida kulindime yakasalazigwa amulilo kutegwa ube muvwubi mwini-mwini. Alimwi wuule azisani zituba zyakuti usame kuti usise cintanda cako, ujazya bweeme. Uule amusamu wameso kuti ukonzye kubona kabotu. Aabo mbenjanda ndabakalalila akubasubula. Aboobo sungwaala kapati kuti weempe.”(Ciyubunuzyo 3:18-19)
Boonse aabo bamulemekezya akumuyoowa Mwami Yahuwah, mbabaabo bayiya kuzwa kuli Nguwe, batalikankaizyi kuti balivwubide alimwi kunyina ncobabulide. Pele, balo batambula cipego caluzyalo akumulomba golide yakasalazyigwa mumulilo; eeyo golide ncikobela cabululami cituba, amusamu wameso uubonya ziluleme mumoza.
Walo takonzyi kutwaabila kufumbwa cintu ncotubulide kuti Walo naatali kuyanda kutupa cintu eeco. Komusyoma ncobeni majwi Aakwe! Kokumbila cileleko ncaakasyomezya, kosyoma cileleko eeco, alimwi kotambula cileleko eeco. Balikke aabo batambula cileleko ncaakasyomya mulusyomo, mbabanoomuyoowa Mwami Yahuwah akuzumanana kwiiya kuzwa kuli Nguwe. Balikke aabo mbabayoonjila mucizuminano citamani a Sikabumba wabo, akumuzyiba ncobeni Walo.
|
Mwami Yahuwah naakasinganya akukosola buumi bwa mubisyi, akumunyonyweeda limwi; pele Walo wakasala nzila yiinda kudula. Muluyando Lwakwe lupati, Walo wakabamba bulangizi bwamuntu uutakwe bulangizi, akupa Mwanaakwe Simuzyalwaalikke kuti alikulike zinyonyoono zyanyika. Alimwi nkaambo kakuti wakajulwida julu lyoonse mukwaabila cipego ciinda zyoonse, Walo kunyina lugwasyo ndwanga walesya kupa muntu kuti atambule cipego ca lufutuko, akuba umwi akataa baabo bakona lubono kuzwa kuli [Yahuwah], akukona antoomwe a [Yahushua].” |
Aaka nkaambo kalaa mulimo ncobeni. Yahushua wakacenjezya bantu kuti:
Tabali boonse aabo baamba Ndime kuti, O Mwami, O Mwami, bayoonjila mubwami bwa kujulu; pele nguyooyo uucita kuyanda kwa Taata Wangu uuli kujulu. Banjaanji bayokwaamba mubuzuba oobo kuti, O Mwami, O Mwami, hena tiitwakashinshima muzina Lyako? Alimwi hena tiitwakatanda zyeelo muzina Lyako? Alimwi muzina Lyako hena tiitwakacita maleele mabotu manjaanji? Nkabela Ime njooshinshima kuli mbabo kuti, Ime nsyemuzyi nywebo pe: amuzwe munsi Lyangu, inywe nomucita zisofweede. (Mateyo 7:21-23)
Balikke aabo bapona maumi aabo kabayoowa Mwami Yahuwah mbabazyibidwe kuli Nguwe.
Mbubuti yebo mbonga wazyibana a Sikabumba wako? Ino mbuti mbozyibana abantunyoko bamwi?
Yebo weelede kukkala Anguwe kwaciindi cikubwene. Yebo weelede kwiiya bube bwa ciimo Cakwe mbuli mbociyubunudwe mumulawo Wakwe waluyando. Yebo weelede kwaambaula Anguwe mumipailo yako. Mumipailo yakuumunizya, yebo weelede kuswiilizya kajwi kasyoonto kaambawida moyo wako. Ciyobwedo ca Kujulu cilijulidwe alimwi cilindizya buyo baabo beelede kupegwa zileleko kuti baboole mulusyomo kuzyootambula zileleko. “O amumuyoowe Mwami Yahuwah, inywebo nobasaante Bakwe: nkaambo aabo bamuyoowa kunyina pe ncobabulide.” (Intembauzyo 34:9)
Ŋanda yakazekelo iyaakujalwa. Amusangane antoomwe ankamu yabana ba Mwami Yahuwah ya WLC munyika yoonse. Amutumine mulumbe wacishinshimi uucenjezya bantu kumabazu aanyika woonse. Amwiite bantu boonse kuti bakkale maumi aabo kabayoowa Mwami Yahuwah akulibambila kuboola kwa Mufutuli. “Ooyo watakeenkela kwaaba Mwanaakwe Mwini, pele wakamwaaba mucibaka cesu toonse, mbubuti Walo mbwanga taatupa zintu zyoonse kakwiina muulo?” (Ba Loma 8:32)
1 Webster’s New Universal Unabridged Dictionary.