Print

Bulangizi Bupati bwa Banakristu: Kubuka Kuzwa Kulufu

Eeci cibalo tacili ca WLC. Eelyo notubelesya zilembedwe aabalembi balaanze lya nkamu, tusimba buyo zyeezyo zyeendelana 100% a Bbaibbele a lusyomo lwesu cino ciindi munkamu ya WLC. Aboobo eezyo zibalo inga zyalanganyigwa kuti nzya nkamu ya WLC. Twakalelekwa kapati amulimo wabalanda ba Yahuwah banjaanji. Pele tatukulwaizyi ndinywe nobeenzuma kutalika kubala zyaalembwa abantu aabo. Eezyo nzibaalemba, twakazigwisya mumalembe eesu nkaambo kanjaanji zililubide akubaa tumpenda. Cintu cuusisya ncakuti tucilangaula mbungano yamilimo iitakwe kampenda. Ikuti konyandidwe nkaambo ka [zibalo/milumbe] iitali ya WLC, kobikkila maanu ku Tusimpi 4:18. Kuteelela kwesu nkwakuti kasimpe Kakwe kalazyokoloka, eelyo mumuni nuuyaa kumwesya munzila yesu. Tulakayandisya kasimpe kwiinda buumi, nkanko tulavwuntauzya kufumbwa nkokakonzya kujanwa.

kubuka kuzwa kubafu

Mubukambausi bwakwe bwakusindinganya, mbuli mbokutondezyedwe mu 1 Bakolinto 15 amumagwalo ngaakalembela ba Tesalonika, Paulu ulisalazyide kwaamba kubuka kuzwa mucuumbwe kuti eeco atalaa zyoonse mbobulangizi buumbulizya kufumbwa musaante wakaliko mumisela yoonse yakainda. Mu Buzuba bwa Kubusya baluleme kuzwa Kubafu ciindi comwe, Mwami Yahushua Messiah uyooseluka kuzwa kujulu. Bafwide muli Messiah bayoobuka “akuyubunuka anguwe mubulemu” (Bakolose 3:4). Aciindi mpeenya aawo boonse Banakristu bacinoopona bayookwempwidwa antoomwe ambabo kuya muluwo (1 Batesalonika 4:13-18). “Mukulaba kwaliso” ooyo mubili ngwajisi muntu omwe-omwe uuli mucizuminano uyoopindulwa akubaa mubili uutaboli. Bayoosama ciwa citafwi, kwiinda mukubusyigwa kabali muntu wamuuya uulaa nguzu, abulemu bwakujulu (1 Bakolinto 15:42-44, 51-54).

Eezyo zintu zinooli zyamaleele ziyoocitika “akuboola kwakwe” (1 Batesalonika 5:23; 1 Bakolinto 15:23), “aakulibonya aciindi ceelede” (1 Timoteo 6:14-15), mu “buzuba bwamamanino” (Johane 6:40) oomo muyooba “kubukila kubuumi” (Johane 5:29). Aboobo “tuliyandisyide kulindila nguwe” (BaFilipo 3:20) “aakuyubununwa, Yahushua Messiah” (1 Petulo 1:5, 7, 13; BaLoma 8:18-19; 1 Bakolinto 1:7), “aakulibonya” walo (1 Timoteo 6:14; Tito 2:13; 1 Johane 3:2-3), kuboola kwakwe (parousia) mubulemu kuzyoobamba Bulelo bwakwe anyika.

Baluleme “bayooba mbuli nguwe eelyo aakulibonya...akuboola kwakwe” alimwi bayoomubona Messiah “mbuli mbwabede” (1 Johane 2:28; 3:2). Johane inga kataambauli munzila iiluleme kwaamba kulangila kumbelaa mazuba kuyoobona Messiah “mbuli mbwabede” eelyo walo aakuzyokela kuciindi eeco, ikuti baluleme bafwide cino ciindi nibanooli muzyi kale kabali kujulu kataninga boola kumbelaa mazuba. Basaante bayooba mbuli Messiah eelyo buyo nobayoobaa mibili yabulemu “mumweembo wamamanino” mu Buzuba bwa Kubuka kuzwa Kubafu (Filimoni 3:20-21; 1 Bakolinto 15:50-55). Mbube boonse batakasanduki kuba “mbuli Messiah”, tabakanjili mu Bulelo (langa kampango 50). Nkabela, kunyina naba omwe wakali kunga wakanjila “kujulu” aciindi cakufwa pele kalindilizya kunjila mu Bulelo oobo buciboola kumbelaa mazuba eelyo Messiah aakulibonya mu Buzuba bwa bulemu. Mpoonya kwaciindi cakutaanguna mumisela yoonse, bayoolangana busyu abusyu abaabo boonse mbaakafutula Yahushua, kutali kacitaninga sika ciindi eeco.

Aboobo milumbe yiinduluka kutopotwa yakusindikizya bafwide kunamaumbwe eeyo iidumide kubaa mpuwo, nja kuupaupa buyo ameso. Tiikulwaizyi kuteelela makanze aabulemu bwakujulu, aayo Bbaibbele ngolitoongelezya kuti tusyome!

munakristu-uukopedwe

Ncintu citakkazyiki camba mu busanduluzi bwatunsiyansiya kujatikizya Buzuba bwa Kubuka kuzwa Kubafu, oomo “mizimo” ya baluleme mwiiseluka antoomwe a Yahushua kuzwa kujulu mpoonya aawo amibili yabo yaanyika kiivwukkumuka kuzwa muzyuumbwe zyabo. Mumilumbe iilaa mpuwo, “mizimo” yeelede kusolweda nguwe kubuka, kutegwa ikaakunjile muzyuumbwe kiitaninga vwukkulwa akubusyigwa kuzwa oomo! Tunsiyansiya tuleelede kutwaambila bwini mbociyoocitwa eeci. Nkabela bayumya makani aaya kufumbwa nzila njobakonzya mbuli, mumajwi aakupozya kumilomo aayo aalaa mpuwo akuteleleka, ayaayo aalembedwe mumabbuku.

Kunze lyaboobo akwiimpana kapati, Paulu wakalemununa Batesalonika bakali kusyoma kujatikizya bafu mbibaasweekelwa kwiinda mukubalembela Buzuba bwa Kubuka kuzwa Kubafu buciboola kumbelaa mazuba eelyo Mwami Yahushua Messiah alikke “nayooseluka kuzwa kujulu akoompolola mpoonya baluleme bafwide bayoobuka akuvwukkuka muzyuumbwe zyabo kuyooswaangana a Mwami muluwo” (1 Batesalonika 4:16-17). Paulu wakali kuyanda kuti swebo “tuumbulizyane amajwi aaya” (kampango 18).

Eelyo Yahushua naambilizya milazyo iili mu Bulelo (Luuka 20:34-36), walo upandulula ciyootola busena aciindi “cakubuka kuzwa kubafu” (Mateyo 22:30) akataa bana (babantu) bayoobusyigwa. Ikuti lufu kalutola babisyi “kujulu” aciindi nobafwa mbuli mbokwaambwa, nkaambo nzi Mwami ncayita mbabo kuti “mbana ba kubuka kuzwa kubafu”? Eeci coonse tacikwe maanu pe ikuti Kubuka kuzwa kubafu alubeta kazyili zintu zyakusyoma cintu caacitika kale kaindi kasyoonto buyo kutobela waawo muntu naakazwide mumubili akuyookkalila “kujulu”.

Muzeezo walufu uulaa mpuwo, alubeta, kupegwa bulumbu akubuka kuzwa kubafu ulangikaanga tuukwe bulangizi kuti weezyekanyigwa atumpango twa Mangwalo tulondokede.

Kulumbula milimo mibotu kuyoocitwa “aciindi cakubuka kwa baluleme” (Luuka 14:14), akuboola kwa Messiah kumbelaa mazuba. Nkulumbulwa nzi akumwi kunga kwapegwa basaante kuti kabali bakali kkomene kale kwa misela amisela “kujulu” kabutaninga sika Buzuba bwa Kubuka kuzwa Kubafu? Paulu awalo wakali kulangila kubusyigwa kuzwa kubafu (Milimo 23:6; 24:15; BaFilipo 3:11). Aaya makani ngakubeja ikuti, aciindi cakufwa, mwaapositolo naakapegwa bulumbu bwakunjila “kujulu” akuyookkala a Messiah kabutaninga sika Buzuba bwa Kubuka kuzwa Kubafu.

Naakaunkide kujulu kuzwa anyika Yahushua (Milimo 1:11), bangele bobile bakalailila baapositolo masimpe aakuti walo uyooboola alimwi mbweenya mbuli mbwaakayaamuka. (Aboobo kutaminina kwa Bakamboni ba Jehovah kuti kuboola kwabili kwakatola kale busena mu 1914 kulilubide lyo.) Mwami uciyoobusya basaante kuzwa muzyuumbwe aakuboola lwabili kumbelaa mazuba, oolo ndolusyomo luumbulizya basaante mumisela yoonse. Pele eeci cilinyonganyidwe akulebwa nkaambo katunsiyansiya tuzumenene kuti baluleme bayookkala antoomwe a Yahushua kujulu akataa ciindi nobafwa a Buzuba bwa Kubuka kuzwa kubafu. Aayo makani aadumide kubaa mpuwo taamvwiki. Bantu banjaanji tabaninga lizeeza acintu eeci.

Kumamanino aamulimo wakwe, Yahushua wakaamba kuti wakaunka kuyoobambila basikwiiya busena (Johane 14:2; cp. Intembauzyo 115:16). Aakale, Walo wakabaambide kuti, “Ooko Ime nkweya, inywe tamukonzyi kuboola” (Johane 13:33). Walo wakaubyaubya majwi aakwe naakabasyomya kuti uciyooboola alimwi a “kubatambula kuli nguwe lwakwe” (Johane 14:3) kutegwa abalo bakakonzye kuba ooko nkwabede. Cilisalede kuti, basikwiiya tiibakali kukonzya kuya nkwabede Yahushua. Pele Walo uyooboola kuli mbabo mu Buzuba bwa Kubuka kuzwa kubafu. Mulimo nzi ngwayoo boolela alimwi anyika ikuti basaante kabajisi kale busena bwakukkala kujulu mpeenya buyo mbobafwida? Ncintu citakonzyeki kuti Yahushua “abatambule kuli lwakwe mwini” mubusena oomo mobabede kale antoomwe anguwe! Mbubuti Yahushua mbwanga wakkomanina kumpelenga kuli boobo, ooko kubamba Cizuminano Cipya kuti cipyopyongane akuzinga mizeezo boobu?

Inga kwabulila lyo mulimo wakuti Messiah mbuli mbwali nguusunga zijuzyo zya lufu a mulilo uutamani. (Ciyubunuzyo 1:18) Yahushua wakayumyayumya Johane abaabo babala bbuku lya Ciyubunuzyo kukasimpe kakuti, ikuti baluleme bafwide tiibakeelede kulikatazya kumakani aakubuka kulufu kuzwa mu Mulilo Uutamani—eeco ciyootola busena aakuboola kwa Messiah, alimwi lilikke buyo eelyo. Kuli nzila yomwe buyo yakuzabuka lufu alimwi ooko nkubuka kuzwa kubafu mubili wa muntu woonse mbwabede. Nciceeco Davida a Yahushua ncibakali kwaamba “koona kwa lufu” mu (Intembauzyo 13:3; Johane 11:11, 14). Eeco nceciindi mbocibede masimpe aakataa lufu akubuka kuzwa kubafu. Koona nciimo cakutalimvwa bulanga. Mbubuti busongo buna Plato mbubwakakondoola akusofwaazya lusyomo lwamu Bbaibbele? Plato a Yahushua tabeelede kuvwelengana pe.

Kukapaula buumi bwakutafwa, kakwiina lufu kukabe kutamani, buumi butanyonyoonwi, eeco ceelede kuba mulimo mutaanzi kuli ndiswe toonse notutakwe nguzu alimwi notukonzya kufwa! Paulu wakalemba makanaa lusyomo lwa Bunakristu mumajwi aalibotela aaya. Kaambo keni koonse kakusyoma Mulumbe mubotu nkakuti Yahuwah uyoopa buumi butamani kuli “baabo bayandaula bulemu abuumi butafugwi kwiinda mukubikkilila kucita zibotu” (BaLoma 2:7, ESV).

Swebo tweelede kukapaula buumi butamani oobo buyubunudwe mu Mulumbe mubotu (2 Timoteo 1:10) alimwi buyoopegwa baabo bajatisyide kusikila kumamanino (Mateyo 24:13; BaLoma 13:11). Swebo tulindizya cipego ca buumi butafugwi kuti bukapegwe eelyo buyo aakuzyokela Yahushua, nokuba kuti bulakonzya kulabilwa cino ciindi kwiinda mukulangila mu muuya ookwa Yahuwah, katucili mu buumi buno.

kuboola-kwabili


Eeci cibalo citali ca-WLC cakalembwa aaba Stan Paher.

Twakagwisya mucibalo citaanzi mazina aabakomba mituni ngobayita Taata a Mwana, akubikka mucibaka cangawo mazina mataanzi ngubaapedwe. Kuyungizya waawo twakajokolosya mutumpango ntotulembulude akubikka mazina as Taata a Mwana, mbuli mbwaakalembedwe kutaanguna abalembi bamu Bbaibbele bakayoyelwa moza. Nkamu ya-WLC