|
Yebo utanoolindizyi kusikila noyooleka kucita cibi kuti uboole kuli Yahuwah. Koboola cino ciindi mbweenya mbobede nkaambo Walo utambula babisyi!
|
Ime ndaamakani aayinda kubota kuli nduwe! Hena walibambila ulayanda umvwe? Walibambila?
Walomya ncobeni kulibambila?
Ngaaya Makani mabotu … yebo uli mubisyi!
Ono aayo taali makani ngooli kulangila kumvwa tee kayi. Pele masimpe ncobeni! Aayo makani mabotu nkaambo, Yahuwah ulatambula babisyi kwiinda muli Yahushua!
Makani aamulumbe mubotu ngakuti, nokuba kuti bulumbu bwa cinyonyoono ndufu, pele cipego cokwa Yahuwah mbuumi butamani kwiinda muli Yahushua. (Bala Baloma 6:23.) Yahuwah uyanda kuti bantu boonse bakafutulwe kakwiina uusiigwa anze, pele kasimpe keni nkakuti, Yahushua wakafwida buyo babisyi balikke. Kufumbwa muna kristu ulizyi kuti bantu boonse bakacita cinyonyoono akuwa kuzwa kubulemu bwa Yahuwah. Nokuba kuti tuyeeyela kuti wakafwida bantu boonse, pele mubukkwene, Yahushua wakafwida babisyi balikke buyo.
Eeci inga camvwikaanga nkaambo katakwe maanu, pele tacili boobo pe. Aabo bafalisi bakali kupona mumazuba aa Messiah bakali kulidunda kubaa bululami. Pele Yahushua naakatamba Mateyo kuti abe sikwiiya Wakwe, Mateyo wakabamba pobwe lyakusekelela Mufutuli oomo mwaakatamba abamwi batandilwa kulaale akataa bantu abamwi bakali kusulaikwa.
Bafalisi bakanyandwa, akutalika kutongooka kumwi kabati:
“Nkaambo nzi Webo ncolya akunywida antoomwe abasimitelo ababisyi?”
Yahushua wakabaingula akubaambila kuti, “Aabo bali kabotu taakwe nobayanda musilisi, pele mbabaabo bacisidwe. Ime nsyeekaboolela kwiita baluleme pe, pele babisyi, kuti beempwe zibi.” (Bala Luuka 5:30-32.)
Mumajwi amwi, Messiah wakali kwaamba kuti, “Ikuti kunyina nondiyanda yebo, kozyibila limwi ono kuti Ime nsyeekaboolela nduwe. Ndakaboolela babisyi.”
Banakristu bamazubaano balaangulukide kulyaamba bubisyi bwabo. Pele mbangaye basinizya nobaamba boobo? Mbangaye balyaamba boobo nkaambo buyo kakuti eeco ncobalangilwa kulyaamba? Masimpe eeni ngakuti, banakristu balalyeezyeka kubantunyina bamwi, akulilanga kabayeelela bantunyina bamwi kuti mbababisyi kutali mbabo. “Inzya,” mbobazuminizya, “Ime inga nkeli mubisyi, pele nsyeli mubi . . . mbuli muntu uulya wiimvwi ookuya. Ime ndabambilila akubikkila maanu zyakulya nzyelya: nsyelyi cakulya cilaa bweengwa kapati, Ime nsyenywi cakunywa cijisi caffeine musamu uukola, alimwi kunyina neekalabide nyama ya ngulube amulaka wangu. Ime nsyelangilizyi zipekupeku, pele eezyo nzyelangilizya tazikwe bulwani, alimwi nsyelangilizyi zipekupeku zyamantaanda. Ndalilingula akulyeenzya kabotu mubunakristu bwangu!”
Aboobo kwiinda mukulyeezyekanya ku bantunyina bamwi, balibona aanga zinyonyoono zyabo tazisofweede kapati kwiinda zya bamwi.
Yahushua wakafwida babisyi kuti abavwune. Yahuwah uciyanda kuvwuna baabo balisisa zinyonyoono zyabo, pele balo tabayandi kutambula Messiah. Aabo bantu balyaamba kululama tabakonzyi kutambula bululami bwa Messiah, nkaambo beelede kutaanguna kulibona mbobali babisyi kuti babulide Mufutuli. Muntu uulisumpula kunyina pe nayeeyela kuti ulaa cinyonyoono pe, aboobo ninzi ncanga weempwa, mbwalibuzya oobo? Alikke muntu uuzumina kuti takonzyi kulivwuna munguzu zyakwe, nguyooyo uuyaamina mulufutuko lwa Yahushua kwiinda mulusyomo. Ncenciceeci, nokuba kuti Yahushua wakafwida boonse, pele Yahuwah utambula buyo babisyi.
Kunyina muntu uuyanda kuzumina mizeezo yakwe mbwiizwide zitondwa azisofweede nokuba kwaamba ziindi naakeempwa zibi, pele kacizumanana kucita zinyonyoono nzyeenya. Pele kuti yebo koli mubisyi, aaya ngamakani mabotu! Kuti Yahuwah katambula babisyi, Walo uyookutambula ayebo! Yahuwah tatambuli basikuupaupa ameso balyaamba buyo bubisyi nkaambo ncencico eeco ncobalangilwa kwaamba. Pele boonse babisyi, batakwe bulangizi alimwi basweekede, Walo ulabatambula.
Mukukulwaizya babisyi kuti baboole kuli Yahuwah kuzyoofutulwa, Yahushua wakaana kaano kasalazya cintu ciyandika kuti utambulwe.
Wakaana kaano nkeenya aaka akuli baabo bakali kulisyoma kuti baliluleme, kumwi kabatondaikana minwe bantunyina bamwi: “Balombwana bobile bakaunka kutempele kuyoopaila, umwi wakali mu Falisi mpoonya umwi kali simitelo. Mufalisi wakaimikila akupaila cakuumunizya kuti: ‘Yahuwah, Ime ndakulumba Yebo nkaambo nsyeli mbuli bantu bamwi— basikunyengelela, bataluleme, bamambi, nokuba mbuli yooyu simitelo. Ime ndaliimya ziindi zyobile mumvwiki yomwe, Ime ndapa kwakkumi muli zyoonse nzyejisi.’ Mpoonya simitelo, wakaimina kulaale acipaililo, kagogomeka mutwe akulesya busyu kulanga kujulu, wakalyuuma acamba kumwi kaamba kuti, ‘Yahuwah, kondifwida luzyalo ime ndemubisyi!’ Ime ndimwaambila masimpe kuti, ooyu mwaalumi wakazyokela kumunzi wakwe kalulamikidwe kwiinda umwi; nkaambo kufumbwa uulisumpula uyoobatamikwa, alimwi ooyo uulibatamika uyoosumpulwa.” (Bala Luuka 18:9-14.)
Yebo inga konooli uzwide bukandu. Yebo inga koyeeyela kuti wakaindilizya kucita cinyonyoono, nokuba kwiindizya kupiluluka kuzibi cakuti inga kucinyina ciindi cakuti zilekelelwe. Kuti kakuli mbwaabede makani oobu, yebo ndonduwe ncobeni Yahuwah ngwayita cino ciindi! Yebo toyelede kukkalila kulaale a Mwami Yahuwah kusikila wazunda cinyonyoono comwe ziindi zyongaye. Yebo ulakonzya kuboola kuli Nguwe mbweenya mbobede cino ciindi, mpoonya Walo uyookutambula.
Yahuwah utamba ndinywe “Amupilukile nywebo nobantu batasyomeki, ndamuponya kuzwa mukuwa kwanu kwakutasyomeka. Balo bakati, “Iiyi tulaboola kulinduwe, nkaambo nduwe Mwami Eloah wesu.” (Jelemiya 3:22, NKJV) Kufumbwa nolimvwa kubula nguzu akwaalilwa kulipasununa mumasunko, ulakonzya kwiindizya kukkazyika camba mumajwi aakuti Walo wakaaamba kuti uyookutambula ncobeni mbuli mbwaamba. “Ooyo uuboola kuli Ndime, Ime nsyekamutandili anze pe.” (Johane 6:37, NKJV)
Utalelemi kuboola kuli Yahuwah. Ooko kuyanda kuboola kuli Yahuwah, Walo nguwaakubikka mumoyo wako. Yebo ulakonzya kukkazyika camba kuti Yahuwah uyookutambula nkaambo Walo wakatambula kale bantu banjaanji kumbele lyako: bacakolwa, Noah; wisi wabwaamu, Loti; Mozesi mujayi; Rahabu simamambe; David sikulalila amujayi … boonse bakalekelelwa akutambulwa kuli Yahushua.
Yebo inga wakkazyika camba cako muli Yahuwah kuti uyookutambula nkaambo Yahushua taakakufwida buyo kuti akakulekele kuyoofwidilila kumamanino pe.
Tatuyandi kulimvwa kuti tatukwe mpindu. Tatuyandi kulimvwa kuti tulaa cinyonyoono. Pele makani mabotu ngakuti, Yahushua wakafwida ndiswe tobabisyi. Eeco caambilizya kuti, kuti yebo koli mubisyi, nkokuti Walo wakafwida nduwe!
Bafalisi bakatongooka kabati, “Ooyu muntu utambula babisyi.” (Luuka 15:2)
Hena uli mubisyi yebo na? Kuti inzya, nkokuti walo wakafwida nduwe! Utakakatili kulizimaanya zinyonyoono zyako. Koide kuzumina buyo. Ooko kuzumina kuti uli mubisyi uuyandika kubaa Mufutuli, ncecikupa kuti yebo utambulike kuli Yahuwah.
Utakkali kulaale a Mufutuli nkaambo buyo kakuti uli mubisyi. Utakkalili kulaale nkaambo buyo kakuti toli sicikolo wa Bbaibbele. Utakkalili kulaale nkaambo buyo kakuti ufwide nsoni nkaambo eelyo Yahuwah mbwaamanizya buyo kukweengelela, yebo kalunda kasuko nkujokela kuyooyinduluka zinyonyoono alimwi. Koboola buyo mbweenya mbobede cino ciindi kuli Taata.
Nokuba kuti wakacita mulwi wazinyonyoono, pele Mwami Yahuwah uyookutambula akukulekelela. Luyando aluzyalo lwa Yahuwah talukwe magolelo.
Hena yebo uciminidwe kunsaa mukuli wa zinyonyoono? Hena Saatani ucikutamikizya zintu zikupa kulimvwaanga tokwe mpindu? Aatembaulwe Taata nkaambo yebo ndonduwe muntu ngwaakasungwida Mwanaakwe Simuzyalwaalikke.