Bupaizi bwamu Bbaibbele tacili cikobela nconga wasama akusamununa kufumbwa noyanda pe. Mbupaizi butunjila mukati kesu, akutuleta mpotunga twabaa kubikkilila, akuba basikwiiya ba Kristu baliimya, akucita mbuli mbwaakali kucita, akweenda munzila njaakeenda. “Ibukombi busalala alimwi butasofweede mumeso aa Yahuwah Taata wesu mboobu: ikulanganya bamucaala abamukabafwu mumapenzi aabo, alimwi akulibamba katutakwe kulisofwaazya azyanyika.” “Hena teesyi kuliimya ooku nkweekasala? Kwaangulula bali mubusofwaazi, akulemununa balemedwe mikuli kuti baanguluke, akutyola joko lili lyoonse? Hena teesyi kwaabila bafwide nzala cinkwa, akubaleta muŋanda yako bacete batandidwe anze? Liya noyandaula balaa mantanda, kuti ubasamike; alimwi kuti utabeelebi nokuba kuyuba kuzwa kuli baabo banyama yamubili wako ? Nkabela mumuni wako uyoopasuka mbuli cifumofumo, alimwi buumi bwako buyoosyuuka cakufwamba: bululami bwako buyoosolweda kumbele lyako; bulemu bwa Yahuwah buyookusindikila. . . . Kuti watambika moyo wako kuli bafwide nzala, akubaumbulizya bali mumapenzi; mpawo mumuni wako nuyoozwa mpuusisidwe,alimwi mudima wako uyooba mbuli masikati: alimwi Yahuwah uyookweendelezya lyoonse, akukkutya moyo wako, akuneneesya mafuwa aako : eelyo uyooba mbuli mbewu yakaidwa ameenda, mbuli kasensa kameenda, katayuminini pe.”
“Cakucaalizya,, amube bamuzeezo omwe, kamujisi lubomba kuli umwi aumwi, akuyandana mbuli basazinyina, amubaa luse, akubaa mulemeko.” Kuti kakwiina muntu ngookabona uuyanda kuti umuumbulizye, amajwaako aalubomba, eelyo inga tokwe cibi kunembo lya Yahuwah nkaambo kakutabelesya zipego ziyandisi eezi; pele mutobeli wa Kristu uli oonse uyoojana ciindi cibotu cakutondezya luyando akufwida luse mbuli munaKristu; mukucita boobo uyootondezya kuti ulijisi ncobeni bupaizi bwa Yahushua Kristu.
Oobu bupaizi butwiisya kuti tubelesye kweengelela akubikkilila liya notunjila mumasena motutundululwa akupenzyegwa calunya. “Ooyo uuyanda buumi, akubona mazuba mabotu, alesye mulaka wakwe kuzwa kucisofweede, alimwi mulomo wakwe utaambauli cibyaabi.”“Kutali kujokezya cibi kucibi, naa kujokezya kunonga kukunongwa: pele munzila iimpene nkupa cileleko; kamuzyi kuti ncencico eeci ncimwaayitilwa, kuti tukakone cileleko.”“Acileye cibi akucita cibotu; ayandaule luumuno, akulutobela. Nkaambo meso aa Yahuwah ali abaluleme, alimwi matwi Aakwe alijudwe kumipailo yabo: pele busyu bwa Yahuwah bulifutide kuli baabo bacita cibyaabi . . . . Kuti mwapenzyegwa nkaambo kabululami, amusekelele: alimwi mutayoowi kukonga kwabo nokuba kupenga mumyoyo yenu. “Liya Kristu nakanongwa, taakajokezya kunonga. Wakatundululwa, akupenzyegwa, pele taakajula mulomo wakwe.” Bupaizi Bwakwe buleta muuya ulitolaansi wuumwine.
“Alimwi akulibamba kakutakwe kulisofwaazya azyanyika.” Bupaizi bwa Kristu buyanda kuti tweelede kuba baandeene kuzwa kunyika, yalo yakalyatauka mulawo wa Yahuwah kunsaa maulu. Kristu wakati: “Kuti kamundiyanda, amubambe milawo yangu. . . .Ooyo uujisi milawo yangu, akwiibamba, nguundiyanda: alimwi ooyo uundiyanda alakwe Taata wangu uyoomuyanda, alimwi Njoomuyanda, akulibonya kuli nguwe. . . .Ooyo uutandiyandi tabambi ncemwaambila: alimwi ijwi ndyomumvwa talili lyangu, pele ndya Taata wakandituma.”“Mbuli mbwaakandiyanda Taata, mbombuboobu mbweekamuyanda anywebo:amuye kumbele muluyando lwangu. Kuti mwabamba milawo yangu, muyookkala muluyando lwangu, mbweenya mbuli Ndime mbweekabamba milawo ya Taata, akukkala muluyando Lwakwe." Hena mulatondezya kuti mulamuyanda Yahushua ataala zyoonse kwiinda mukutobela milawo yakwe? Kuti pe, nkabela mulaa kampenda kakubaa “cimusofwaazya canyika .” Ulikke moyo uuyanda kutobela nguutambulika kuli Yahuwah; kwiinda mukuyaama munguzu Zyakwe lyoonse, tulajana nguzu zyakutobela milawo Yakwe.
Kulayandika
kubaa kubikkilila lyoonse, kubaa luumuno, kuliimya, akulijata mubupaizi bwa
Bbaibbele. Pele kuti jwi lya Yahuwah lyaba ndelyeendelezya maumi esu, zyoonse
nzyotucita, ijwi lili lyoonse, naa mucito uli oonse, uyooyubununa kuti tuli
batwanga ba Yahushua Kristu, cakuti amizeezo yesu yoonse iyakweendelezyegwa
aanguwe. Kuti jwi lya Yahuwah lyatambulwa mumoyo, liyakwaatula kulisumpula
akulidunda koonse. Maumi esu ayooba nguzu zyakucita cibotu, nkaambo Moza
Uusalala uyoozuzya mizeezo yesu azintu zya Yahuwah. Bupaizi bwa Yahushua
tuyoobucita; myoyo yesu iyoomanina kweendelana akuyanda kwa Yahuwah.
Bamwi balyaamba kuti mbabajisi bupaizi bwamasimpe balasiya ambali bbuku lyakweendelezya ndyaakapa Yahuwah kuti libatondekele nzila yakujulu. Balabala bbaibbele, pele kubala jwi lya Yahuwah mbuli bubalwa cilembedwe amuntu, cipa biyo luzyibo lutakwe mpolusiminide. Nobaambaula kasimpe taakwe bakonzya kusalazyilwa baswiilila. Nobaamba kuti babelekela Yahuwah, pele kuti Kristu naali akati kabo, nikwali kunga kwamvwugwa jwi Lyakwe kalyaamba kuti, “Mwalubizya, nkaambo twamwaazyi Mangwalo, nokuba nguzu zya Yahuwah.” Aaba tabakonzyi kuzyiba bupaizi bwamasimpe ncobwiiminina.
“Majwi ngemwaambila,” mbwaamba Kristu, “nga Moza Uusalala, alimwi nga buumi.” Jeremiya wakakonkezya kujwi lya Yahuwah, naakati, “Majwi Aako akajanwa, alimwi ndakaalya; ijwi lyako lyakali kusekelela akukkomana kwamoyo wangu muli ndime.” Kuli kuponya kujanika mujwi lya Yahuwah, kwalo basongo abacenjede nkobatakonzyi kujana, pele kulatondezyegwa kubana bavwanda. “Kunjila kwamajwi aako kuleta mumuni, kupa kuteelela kubatuba.” Kuti jwi eeli lyayakililwa mumoyo, liba Ŋanda yaciyobwedo camizeezo, nkotuleta zintu zipya azyakale. Tatucikondwi kuyeeya zyanyika pele twaamba kuti “Ijwi Lyako ndilambe lya maulu aangu, mumuni wanzila yangu.”
“Amusanyangule Mangwalo.” Taakwe bbuku limbi likonzya kumupa kusumpula akukwabilila mizeezo; taakwe bbuku limbi nkomukonzya kujana bupaizi buzyandamene. Kuti mwabikkila ciindi cakulizeeza, kupa mipailo yakulitolaansi, akusanyangula jwi lya Yahuwah cakusimpikizya, Moza Uusalala ulaafwaafwi kumubikka kasimpe mumyoyo yenu. Mbuli nomulya mana aakujulu, muyoojana kuumbulizigwa akukkomana, akukulwaizyigwa kuti mwaambile bamwi benu bubotu bwazintu nzimwakatambula.
Ibbaibbele, alimwi Bbaibbele lilikke, nceceeleko calusyomo lwesu. Ndituvwu lizwa kumusamu wabuumi, kwiinda mukulilya, akulitambula mumizeezo yesu, tuyookomena mukucita luyando lwa Yahuwah. Kwiinda muziimo zyabuna Kristu tuyootondezya kuti tulalisyoma jwi, kuti tunamatide ku Bbaibbele kuti lilikke ndelitutondezya kujulu. Aboobo tuyooba magwalo aapona, aazyibidwe akubalwa abantu boonse, akupa bumboni bupona kunguzu zya bupaizi bwamasimpe.
Kuti tiitwatambula bupaizi bwa Kristu kwiinda mukulya jwi lya Yahuwah, tatukanjili mumunzi wa Yahuwah. Mbotupona acakulya caanyika, akubaa mulaka uuyandisya zyanyika,inga tatweeleli kunjila mukati kajulu; inga tiitwasekelela kusalala kuzingulukide mukati kajulu. Majwi aabangele anyimbo zyatunkobela twabo inga tazikonzyi kutukkomanya. Bubambe bwajulu inga bwaba cintu cituzinga mumizeezo yesu. Tweelede kufwa nzala anyota yabululami bwa Kristu; tweelede kubumbwa akukobekwa kusandulwa kuya muciimo calubomba lwakwe, kutegwa tukakonzye kunjila mumbunga zyabangele bakujulu.
Lwesu tobeni, tatukonzyi kujana nokuba kucita bupaizi bwa Kristu, nkaambo myoyo yesu ilaa lucengo kwiinda azintu zyoonse; pele Yahushua Kristu, musilisi wamyoyo yesu mupati, uutalubizyi, ulakonzya kubala moyo wamuntu kwiinda muntu lwakwe mwini, wakatutondezya mbotunga twasalazyigwa kucibi. “Lubomba lwangu lulikkwene kuli nduwe,” mbwaamba kuli baabo balilauka mukulezya kwabo. “Amuboole kuli ndime, nyoonse nomulemedwe mikuli, ndamupa kulyookezya.” Mukuli uli oonse kuutana bikkwa amakkuko eesu, ulibwenwe ayooyo utwaambila kuti tumutobele. Kuli oonse muzumi uusunkidwe, Kristu waamba kuti, Ndime eekupa nguzu zya milimo yabuumi bwa buna Kristu. Katulangide kuli Yahushua, wakatalisya akumanizya lusyomo lwesu, tulazwezya mumuni wabusyu bwakwe, akuba cimbonimboni cacinkonzya cakwe, akukomena muciimo cabalombwana abanakazi muli Kristu Yahushua. Bupaizi bwesu buyooba bweebeka, nkaambo bunoojisi kununkilila bululami bwa Kristu. Tuyookkomana; nkaambo cakulya akunywa mu Moza kuli ndiswe ciyooba bululami, luumuno akukkomana.
Yahushua waamba kuti, “Kakwiina Ndime taakwe ncokonzya kucita.” Kupona muli Kristu, kuyaama Kristu, akutabililwa a Kristu, akujana busani kuzwa muli Kristu, tulazyala micelo iikonzyana aKristu. Tulapona akweenda muli nguwe; tulibomwe anguwe alimwi bomwe aTaata. Izina lya Kristu lilalemekwa mumwana usyomeka wa Yahuwah. Mbobupaizi bwa Bbaibbele oobu.
By:
Ellen White
Review
and Herald
May 4,
1897
Mucilembedwe citaanzi twakagwisya mazina oonse aabakomba zilengwa leza ngobapa Taata aMwana, akubikka mazina eeni aabo ngobalipede. Mukuyungizya twakajokezya mu Mangwalo ngotwaamba mucibalo eeci mazina aa Taata aMwana, mbuli mbwaakalembedwe kutaanguna abalembi ba Bbaibbele balo bakasolwedwe a Moza Usalala. -Nkamu ya WLC.