“Nkaambo cinyonyoono tacikaleli atalaa nduwe: nkaambo webo toli kunsaa mulawo, pele uli kunsaa luzyalo.” Paulu wakali kuyoowa kuti aaka kampango takakateelelwi kabotu mukwaamba kuti iswe kuti katubedwe aluzyalo nkokuti tatuceelede kutobela mulawo. Ncencico Paulu cazumanana kwaamba kuti, “Ino mbuti kayi? Hena tuye kumbele kucita cinyonyoono, nkaambo tatucili kunsaa mulawo, pele twaabedwa aluzyalo? Nee peepe, Yahuwah tacizumizyi eeci.” Ba Roma 6:15, Yahuwah tazumizyi kuti tutyole milawo Yakwe notulipeekezya kuba muluzyalo Lwakwe. Aabo bafwidwe luzyalo lwa Yahuwah balabamba mulawo Wakwe.
Luzyalo talutupi lwaanguluko lwakuti tuleke kuteelela Yahuwah pe. Atwaambe kuti webo koyenzya mootokala kuya munselelo lyamugwagwa, eelyo musilikani wakujata akukwiimika akukupa cisubulo, pele webo wasoleka kupandulula kuti uli munzila kuya kuŋanda yako kuzyila kumulimo kokatede alimwi uyanda buyo kuti uye kuŋanda yako ukalyookezye. Musilikani wakulanga cakweetela akukwaambila kuti tatikusubule: lino webo waba muluzyalo lwa musilikani ooyu. Hena ono inga wabweza lubilo kosukya busi mavwili aamootokala naa inga waunka koyaa bweenzya kabotu kabotu mboyelede kweenzya? Kuba muluzyalo nokuba kunsaa luzyalo caamba kuti lino weelede kubweza ntaamu yakucita kabotu kuti utobele cili mumulawo.
“Nkaambo cinyonyoono tacikaleli atalaa nduwe: nkaambo webo toli kunsaa mulawo, pele uli kunsaa luzyalo.” Ba Roma 6:14. Kupona kunsaa mulawo caamba kuti iswe tweelede kufwa nkaambo bulumbu bwacibi ndufu (Ba Roma 6:23) alimwi boonse bakabisya (Ba Roma 3:23). Pele Yahushua wakatulungila muulo walufu iswe alimwi mucipego caluyando Lwake, aluzyalo, tucipona asunu.
Cinyonyoono cili atalaa muntu ooyo uuli kunsaa mulawo. Pele muntu uuli kunsaa luzyalo tasinganyidwe amulawo pe nkaambo tasotoki mulawo ooyo pe. Bantu bokwa Yahuwah tabali kunsaa mulawo nkaambo tabasotoki nokuba kutyola mulawo ooyo; aboobo tabali mukusinganyigwa Anguwe, pele bali kunsaa luzyalo Lwakwe.
Mulumbe wamakani mabotu tiiwakeelede kusandululwa kuti waangulule bantu kuti baye kumbele kupona mukuzangila Yahuwah mukusotoka mulawo Wakwe uusetekene. Nkaambo nzi aabo batamminina kuti balateelela Mangwalo, ncobatabwene kuti zintu ziyandika kuli Yahuwah zili buyo mbubwenya Walo mbwaakazibambide mu Edeni cinyonyoono-- kutobela mulawo Wakwe mubukkwene. Mulubeta, Yahuwah uyoobuzya bonse aabo balibanda kuti mbana Kristu, Nkaambo nzincomutaminina kuti mulasyoma mu Mwana Wangu, akuya kumbele kutyola akusotoka mulawo Wangu? Nguni waamwaambila kucita boobo—kuti mulyatauke milazyo yangu yabululami? “Amulange, cilainda kubota kuteelela kwiinda cipaizyo, alimwi kuswiilila kwiinda mafuta aabagutu.”
Mulumbe mubotu wa Cizuminano Cipya tuuli mulumbe wa Cizuminano Cakale kucitola ansi kuti ceelane amubisyi akumufutula kacili muzyibi zyakwe. Yahuwah uyanda kuti boonse batobela Nguwe batobele, kuteelela mubukkwene milawo Yakwe yoonse. Lino waamba mbuli mbwaakaamba kale kuti bululami bukkwene ncecikonzya kupa umwi kunjila mukati kajulu. Yahushua ndusyomo aciyubilo cesu. Bululami Bwakwe bupegwa biyo kuli baabo bateelela. Atubutambule kwiind mulusyomo, kutegwa Taata atakajani cibi mulindiswe. Pele aabo balyatauka mulawo uusetekene tabakonzyi kutaminina bululami oobo.