Makunga aa Banakristu balikatazyidwe ku masimpe aakuti, nokuba kuti basindinganya buti kulilesya kutempaulwa, pele bacuujisi kucita zinyonyoono. Kuli bamwi, Saatani wakababambila lweeno lwakuti tabeelede kulikatazya kuyeeya mbobeelede kutobela mulawo wabulemu nkaambo “mulawo wakagagailwa kale aciciingano aboobo lino tweendela muluzyalo lwa bulemu.” Ku Banakristu bamwi, balicedwe mukooze kakutobela tulawolawo. Mbweenya mbuli bamaJuuda bansiku, balalyaanzila tulawolawo twakabambwaa bantu kutegwa babule ciindi cakucita zinyonyoono, kabayeeyela kuti ikuti bapona maumi kabalijata akuliimya kapati, nkokuti inga batambulika kuli Yahuwah.
Masimpe eeni ngakuti, basyomi bacicita zinyonyoono nkaambo tucitingaana cibi nkaambo tucili mu Cizuminano Cakale mbuli mbucaatambulwa a Bana ba Isilayeli: “Zyoonse nzyaakaamba Yahuwah tunoozicita.” (Kulonga 19:8, NKJV)
Aawa cikatazya ncakuti, tatujisi nguzu zyesu tobeni zyakutobela milawo nokuba kuti twadadanyana buti. Paulu wakacaamba bwinibwini eeci naakati; “Tulizyi kuti mulawo ngwa mu moza; pele Ime nsyeli wa moza, ndakasambalwa ku buzike bwacinyonyoono. Ime nsyemvwisyide zintu nzyecita. Nkaambo nceyanda kucita nsyeciciti, Pele eeco cindicima ncecintu ncecita.” (BaLoma 7:14-15, NIV)
Kutabikkila makani mbuli mbotuyandisya kuba cimbonimboni cikonzya Yahuwah, pele tucaalilwa kuzwidilila. “Aboobo ono nkokuti nzi ooku? Ooyu mulawo ndaubona kuubeleka: Nokuba kuti I me nkeyanda kucita cibotu, busofwaazi nkobuli muli me. Nkaambo mukati kabuntu bwangu Ime ndikkomanina mulawo ookwa Yahuwah; pele Ime mbwene mulawo uumbi kuubeleka muli ndime, kuutalika kulwana nkondo a mulawo uuli mumizeezo yangu akundibamba sintolongo wa mulawo wacinyonyoono ooyo uubeleka mukati muli ndime. Maawe, ndemuntu uusampukide ncobeni Ime! Nguni uutaandivwune kuzwa kumubili uulaalufu ooyu?&” (BaLoma 7:21-24, NIV)
Makani mabotu aamulumbe ngakuti Yahuwah ulilizyi kale penzi eeli alimwi wakatupa nzila yakulyeeleba. “Ime ndamulumba Yahuwah — kwiinda muli Yahushua Messiah Mwami wesu!” (BaLoma 7:25, NKJV) Ipenzi ndyakuti, inzya, toonse tucili muciimo ciwide mucinyonyoono ncitwaakona kuzwa kuli Adamu. Eeci ciimo ciwide ncibeela cimbi ca “mulawo” ooyo uubeleka mumubili wesu wanyama uutupa kuzumanana kucita zinyonyoono nokuba kuti tatuyandi. Ono kuzyokolola mulawo ooyu wakukona ciimo ca mubili, Yahuwah uvwozya basyomi cisela Muya Uusalala. Kuli boonse bayandisya kulemekezya Yahuwah, ooku kusyomeka kwa Moza Wakwe kulakkwanya kusandula baabo bacimwa mulawo wabulemu kuti babe bayandi bamulawo wa bulemu.
Eeci cipego ca Muya Uusalala tacikkwanyi kuzyula ciimo ciwide akubikka mucibaka caco ciimo ca bulemu, aboobo basyomi bacizumanana kukakatila camasimpe kulwana cinyonyoono alimwi banoozumanana kusikila bakapegwe ciimo cisumpukide. Kuwa mucinyonyoono tacaambilizyi kuti tiibakazukila kusandulwa bwinibwini pe. Caambilizya biyo kuti bacilaa ciimo ciwide mucinyonyoono. Nokuba boobo, kabalaa cipego ca Moza, basyomi lino baluuyanda mulawo wabulemu ooyo ngubakali kucimwa, akucimwa cinyonyoono eeco ncibaazyibide kuyanda. Yahuwah ulaa cisyomyo ciindene kuli boonse aabo bazumizya cipego eeci kuti cibasandule kutegwa bayandisye mulawo wabulemu: kulengululwa mucizuminano cipya alimwi ciimpene.
Amulange, alazya mazuba, mbwaamba Yahuwah, eelyo Ime neyoobamba cizuminano cipya a ŋanda ya Isilayeli a ŋanda ya Judah—kutali kweendelanya aa cizuminano Ime nceekabambide abamawisi mubuzuba buya Ime neekabasolweda ajanza kuzwa munyika ya Egipita, Cizuminano cangu eeco ncibakatyola, nokuba kuti Ime ndakali mwaalumi wabo, mbwaamba Yahuwah. (Jelemiya 31:31-32, NKJV)
Yahuwah aawa utusyomya kutucitila cintu ncotutakonzyi kulicitila lwesu tobeni.
Nkabela Ime njoomusansalaila meenda aasalala, mpoonya inywe muyoosalala; Ime njoomusalazya kuzwa kubusofwaazi bwenu boonse akuzwa kumituni yenu yoonse. Ime njoomupa moyo mupya akumubikka muya mupya mukati muli ndinywe; Ime njoogwisya moyo wabbwe kuzwa mumubili wenu akumupa moyo wanyama. Ime njoobikka Muya Wangu mukati kenu akumweenzya mu milazyo Yangu, nkabela inywe muyoobamba mbeta Zyangu akuzyisunga. Nkabela muyookkalilila munyika eeyo njeekapede bamauso; inywe muyooba Bantu Bangu, ambe ndiyooba Leza wenu. (Ezekiya 36:25-28, NKJV)
Eeci nce Cizuminano Cipya! Walo uyootusalazya akubikka Muya mupya mukati muli ndiswe. Walo uyootugwisya myoyo miyumu mbuli bbwe (ziimo zyesu ziwide zitupa kuzumanana zinyonyoono nokuba kuti tulasolekesya katucili mu Cizuminano Cakale), alimwi Walo uyoobikka Muya Wakwe mukati muli ndiswe. Mpoonya Walo uyootupa kuti tweendele mumilazyo Yakwe akwiibamba. Aawa Yahuwah utusyomya kulengulula bantu Bakwe, akubapa ziimo zisumpukide, zibambilidwe mucikonzya Cakwe cini. Eeci ncecintu ciyandika ncobeni kupona kakwiina cinyonyoono. Mucizuminano Cakale, kulipedwe lusinizyo ncobeni kwa kulengululwa ooku, pele kuyoozuzikwa mubukkwene eelyo Yahushua aakuzyokela kuzyoosimpa bulelo bwa Yahuwah anyika.
Nkaambo cintu cakamukondelezya Yahuwah nciceeci cakuti bulemu Bwakwe buzulide bukale mulinguwe, kwiinda muli nguwe. Alimwi wakabeleka kujanza lyakwe kukuliyanzanisizya zintu zyoonse, niziba zyaansi niziba zyakujulu, akucitya luumuno abulowa bwaciingano cakwe.
Lino nywebo kuciindi cakainda mwakali yimpene, nkabela mumyoyo yanu mwakali basinkondonyina Leza nkaambo kamilimo yenu mibyaabii, pele sunu wamuyanzanya, kwiinda kukufwa mumubili wakwe uufwika, kuti amwiimikizye kubusyu bwakwe kamusalede acakubula kampenda acakutaba amulandu kunembo Lyakwe. (Bakolose 1:19-22, NKJV)
Ikuti yebo kotyompokedwe nkaambo ucilijana mukooze kakucita zinyonyoono, kkazyika camba. Masimpe eeni aakuti yebo uliyandide kale kuleka zibi zyako mbobumboni butondezya kuti Moza ulabeleka mumoyo wako nkaambo moyo wabuntu tuuyandi zintu zya Yahuwah.
Nkaambo basinyama bayeeyela biyo makani aanyama, anukuti basimuuya balayeeya makani aamuuya. Ikuti mizeezo yanyama kaluli ndufu, anukuti mizeezo yamuuya mbuumi, alimwi nduumuno. Nkaambo kakuti mizeezo yanyama ngusinkondonyina Yahuwah, ikuti tiilibombyi ku mulawo wa Yahuwah nikuba kukonzya kulibombya. Aboobo basinyama tabakonzyi kukondelezya Leza pe. Pele nywebo tamuli basinyama, muli mu Moza, nkukuti Muuya wa Leza nuumukalilide mukati.(BaLoma 7-9, NKJV)
Kozumanana kulyaaba kuli Yahuwah. Siminina kuzisyomyo Zyakwe alusyomo mpoonya bumwi buzuba eelyo Yahushua aakuzyokela, yebo uyoozuzyigwa cakuzuzyilwa limwi Muya wa Yahuwah kolenguludwe bupya—oobo mbobede kale—muli Nguwe. Oobu mbobunooli buumi mu Cizuminano Cipya: kulondoka muli Yahuwah, kozuzyidwe muya Wakwe.
