Ndakomba, Mebo ndiyanda kuzyiba kuti naa inga ndababbapatizya bantu basandukila kulubazu lwa Yahushua. Nkaambo Ime ndipasita uunjide kale mumulimo, hena ndiye kumbele kucita boobo?
Lubbizyo ncintu cakucita kuti koyanda kuti ukutondezye caantangalala lusyomo lwako lwa kutobela kubuka kuzwa kubafu kwa Yahushua, pele tacili cintu cini cijanya lufutuko. Mucito uutondezya kuti lufutuko lwini wakalutambulwa kale kwiinda mulusyomo. Uubbapatizya ulipedwe nguzu zyakubbizya cigaminina muzina lya Yahushua Uunanikidwe lwakwe mwini. Kunjizyigwa mulimo wabweembezi nokuba kukkala acuuno cabwaapositoli tacili cintu cipa nguzu zyakubbizya pe.
Nzila ilikke yakujana nguzu zyakubbizya njakutambula lwiito lugaminina kuzwa kuli Yahushua Uunanikidwe. Kuli kunyangana nguzu zyokwa Yahushua kapati akataa bantu balipeekezya kubaa nguzu kwiinda mukunjizyigwa mulimo wabweembezi nokuba bakkede acuuno ca bwaapositoli. Bantu bamusyobo ooyu bazingaila mizeezo yabantu kutegwa balesye bantu kutobela Mwami Yahushua .
“Ndimwaambila ncobeni inywe kuti, Kufumbwa cintu eeco ncimwazumizya anyika akwalo kujulu cilazuminwa: alimwi kufumbwa cintu ncimwaangulula anyika akwalo kujulu cilazuminwa. Alimwi ndamwaambila nywebo kuti, kuti akati kenu nyobile mwazuminana anyika kujatikizya kufumbwa cintu ncimwalomba, Taata uuli kujulu uyoomucitila cintu eeco. Nkaambo aawo aabungene bobile naa botatwe antoomwe muzina lyangu, ambeyo nkweli akati kabo” (Mateyo 18:18-20).
Nzila ilikke njotujisi mazubaano yakutambula mulimo kugaminina kuzwa kuli Yahushua nkubungana antoomwe mbuli Ekklesia wa Mulumbe Mubotu.Eeci ciyandika kucitika kuti kakuli bantu bobile nobaba botatwe babungene muzina lyokwa Yahushua, kabakonkede kuzyiba kuti nkwali akati kabo. Eelyo nobazuminana kuti Yahushua wapa mulimo wakubbizya kuli umwi akati kabo, mpoonya kwiinda munzila yakubikka matansyi ali yooyo wasalwa, akumupailila, beelede kumulongezya muntu ooyo kuti akkale acuuno cabusololi akati kabo. Yahushua lwakwe nkwali aawo kuti ape nguzu zyamulimo ooyo.
Nzila ilikke njotujisi mazubaano yakuba Ekklesia wa Yahushua ndileelyo notubungene Muzina Lyakwe, alimwi awalo Yahushua nkwali mumbungano yamusyobo ooyo ilikke. Nkamu yoonse yeelede kulipa cakumaninina ku milawo yokwa Yahuwah akulusyomo lwa Yahushua. Tacili cintu cilikke ciyandika kubungana antoomwe akutaminina kuti ndinywe ba ekklesia wa Yahushua. Ekklesia, nimbunga yabaitidwe, yiiminina bulelo bwa Yahuwah anyika. Oobo bulelo bulaa mulawo amwami. Kakunyina mulawo amwami, eeyo mbunga inga kiitali cibeela cabulelo bwa Yahuwah pe. Eelyo zyoonse ziyandika kuti zyajanwa, Yahushua Lwakwe mwini nguutalisya nkamu eeyo. Kutalisyigwa aamuntu nokuba kunjizyigwa mumulimo wakweembela nkamu eeyi tacili cintu cikonzya kupa muntu nguzu pe.
Ncintu cilibotela ncakuti Yahuwah wakabelesya nduwe kuleta lusyomo lwa Yahushua kuli bamwi. Pele webo toyelede kulyeezyeka kubaa nguzu zyakubabbizya muciindi cino pe. Webo weelede kubunganya bantu antoomwe mbuli ekklesia waamunzi aawo Yahushua mpabede akutobela Busololi Bwakwe kuti aite mweembezi wakujata mulimo ooyo, nokuba muntu umwi. Walo uyoobandika cigaminina kuli baabo babungene akubatondezya kuyanda Kwakwe munzila iisalala.