|
Eeci cibalo tacili ca WLC. Eelyo notubelesya zilembedwe aabalembi balaanze lya nkamu, tusimba buyo zyeezyo zyeendelana 100% a Bbaibbele a lusyomo lwesu cino ciindi munkamu ya WLC. Aboobo eezyo zibalo inga zyalanganyigwa kuti nzya nkamu ya WLC. Twakalelekwa kapati amulimo wabalanda ba Yahuwah banjaanji. Pele tatukulwaizyi ndinywe nobeenzuma kutalika kubala zyaalembwa abantu aabo. Eezyo nzibaalemba, twakazigwisya mumalembe eesu nkaambo kanjaanji zililubide akubaa tumpenda. Cintu cuusisya ncakuti tucilangaula mbungano yamilimo iitakwe kampenda. Ikuti konyandidwe nkaambo ka [zibalo/milumbe] iitali ya WLC, kobikkila maanu ku Tusimpi 4:18. Kuteelela kwesu nkwakuti kasimpe Kakwe kalazyokoloka, eelyo mumuni nuuyaa kumwesya munzila yesu. Tulakayandisya kasimpe kwiinda buumi, nkanko tulavwuntauzya kufumbwa nkokakonzya kujanwa. |
Mutwe wacibalo eeci ndi zina lya nyimbo yakaindi bunji bwenu njomuzyibide kale. Ndwiimbo luyandisyigwa akataa nyimbo zinjaanji mbuli lwakuti “Kuli Nguzu mu Bulowa” alwakuti
“Itinti Lilaa Bulowa.” Ciyanza cimwi ncemvwide mutubungabunga twa mazubaano cilitondezya mu “nkamu ziindilana kwiimba” pele makanze aazyo nga “kukwelelezya” basicikombelo nobakomba kuti kabainduluka kwiimba nyimbo zisalidwe. Nokuba kuti makani aakweempwa akutambula Muya Uusalala wa Yahuwah acijanwa muziinduluko zya nyimbo eezi, pele kuli cintu cuusisya cinonzomene kumbele ncebwene 'me: ciiyo camakani aakubbizyigwa mu meenda tacijanwi nociceya muziimbo eezyo. Nkaambo nzi ncocili boobo?
Kasimpe katavwelanyidwe nkakuti aabo basyomi bakali muziindi zyakainda bakalimvwisyide kapati mu Bbaibbele ncokuyandika kapati, alimwi aawa ambeyo ndazumina, ncocili cintu ceelede kubbizya mu meenda kwiinda bunji bwa baabo balyaamba kusyoma mazubaano! Kubbizya nciiyo cilaa mulimo kapati ku muntu kufumbwa uulangila, mbuli Ndime, kwiimpuka kuyoocingauzya Yahushua aciindi cakuboola kwakwe kazundide. Nkaambo Messiah a Baapositolo bakalaa lubbizyo mbuli malailile, ncintu ciyandika citasalauzyigwi kumuntu woonse uulibambila cintu eeco caakutola busena!
Cuusisya ncakuti, bantu balabala ma Bbaibbele aabo, akuya kuzikombelo, akulikankaizya kutobela Messiah, azimwi zinjaanji, pele tabakubwene kasimpe kakuti baciswa bulwazi bwa kutamvwisyisya lwiiyo lwa busongo bwamu Bbaibbele lujatikizya ncokuyandika kapati kubbizyigwa!
Eelyo Ime nitwakali kulya musalo abalongwema ncotuyandika kunyikwa mumeenda muzina lya Yahushua kuti tulekelelwe zinyonyoono (Luuka 24:46-47; Milimo 2:38), “mwaalumi uulaa munzi” (walo wakali kuswiilizya munsimunsi nkotuyooma) wakandikazya nceekali kwaamba canguzu kataminina kuti “ikuti muntu kamvwisyide ncobeni Mangwalo aa Cizuminano Cipya ncaamba kumakani aa lubbizyo, inga bazyiba kuti lulikke lubbizyo ndotuyandika mazubaano ndwa kubbizyigwa mu Jwi!” Ooyo wakanditambide wakatalika kundiibalusya Ime kuti: “Uulya kabwalala wakalaa ciciingano munsi lya Yahushua taakabbizyidwe; pele walo wakavwunwa!”
“Amweempwe a akubbizyigwa nyoonse omwe-omwe akati kenu mu zina lya Yahushua Messiah kutegwa zimwaigwe [mulekelelwe] zinyonyoono, mbube muyootambula cipego ca Muya Uusalala.” - Milimo 2:38 (kusinizya caambwa).
|
Akataa bunji bwa mangwalo manji aa Cizuminano Cipya aayo aasimpya kutondezya zintu ziyandika mu lufutuko, Ime ndijana “nzila” yakutalika lweendo lutozya ku lufutuko mubbuku lya Milimo 2:38. Mukampango aaka motubala Baapositolo bakaceede bali kkumi amusanu mbubaazuminana a Petulo mukwaambilizya kuti: “Amweempwe a kubbizyigwa inywe nyoonse mu zina lya Yahushua Messiah kutegwa zimwayigwe [mulekelelwe] zinyonyoono, alimwi mutambule cipego ca Muya Uusalala.” Nokuba kuubauba makani aaya, kubbizyigwa kwini kwakatonkelwa kumbali abantu banjaanji — aabo banji “baide kutandila kupandulula” bakalijanina makani lwabo beni aayinda “kubaa moza” mukuteelela kampango aaka. Eeci ncintu cilaa ntenda kapati nkaambo kufumbwa busanduluzi muntu mbwanga wapa bwakweeleba akuvwuntamuna malailile aagaminina, ooko nkunyansya cakuliyandila, takuli “kusalazyilwa” (Maako 7:13).
Ime andijokelele kukaambo ka mubbi, ooyo waambwa kale, walo wakapa twaambo tupati cinicini tobile. Kayingula kabwalala uuteempwi umwi wakalaa nkazi, akubbodoola munzila yakuliyanda kuli Yahushua naakati, “Hena toyoowi Leza' webo, tobwene ulisinganyidwe mbweenya buyo? Alimwi swebo batucita kabotu ncobeni; nkaambo twatambula bulumbu bwa milimo yesu: ooyu muntu kunyina cibi ncaacita!” (Luuka 23:41).
Mukampango katobela, wakatobela kubwenta mumajwi aaya kuli Yahushua “O Mwami, ukandiyeeye Ime waakuboola mu Bulelo bwako.” Mutumpango tobile ootu, tulajana bumboni bwa moyo wakulyeempa wa kabwalala alusyomo lwakwe muli Yahushua mbuli mbwaakasyomezya Messiah. Ootu tumpango tobile, antoomwe, twakali tunji kuti Yahushua asyomezye mubbi ooyo kuti, inzya, ncobeni, busena bwakwe bunooliko mu Bulelo bwa Yahuwah eelyo Yahushua aakuzyokela kuzyoosimpa bulelo oobo mubukkwene anguzu atalaa nyika yoonse. (Luuka 23:43).
Myaka yainda iili kkumi, Ime ndaazwangana a mufundisi wa SDA, ooyo awalo (mbuli mweenzuma) wakazuunyene kuti kubbizyigwa (nokuba kuti kwakalaililwa aa Yahushua a Baapositolo), nje “nzila yeelela kufumbwa musyomi” kuti “cintondezyo kunyika yoonse ca lusyomo ndwajisi alufutuko.” Mukujala makani aakwe kuli ndime, mufundisi wa SDA wakazuminizya akuti kubbizyigwa “nciiyo citamvwisyidwe kuti calangwa aanga cilayandika kutegwa ujane lufutuko.” Ono kulimvwa kutegwa alulamike ncaakali kutaminina wakasanganizya akaano ka (inzya mwakazyiba kale kaano!) “mubbi wakalaa ciciingano.” Ime nsyeekali kukonzya kweenkela nceekazuunyene kwaambilizya kuti kubbizyigwa mulimo uujatene aa lufutuko, aboobo ooyo mwaalumi wakandibuzya kuti ndipe makani aagwasyilila nceekali kwaamba mvwiki iiboola munkamu ya kuswata Bbaibbele. Ime ndakazumina kutambwa boobo.
Eelyo neekatola ciindi cakulibambila nkeswata Mangwalo, Ime ndakajatikana alimwi, ndakalijana nkelaa mubuzyo ooyo ngweekajisi kale kwa myaka minjaanji, pele tiiwakaingudwe kujatikizya kubbizyigwa: “Mbubuti umwi zinyonyoono zyakwe mbozinga zyalekelelwa eelyo nabbizyigwa muzina lya Yahushua? Tede kwiina acimbi pele banyikwa biyo mu meenda cula!” Nokuba kuti waimpanya kubuzyigwa ooyu mubuzyo ujisi bwiinguzi bomwe mbweenya: kulekelela zibi akusalazyigwa zinyonyoono eelyo muntu nabbizyigwa kuboolela mukwiingula nateelela malailile aakubbizyigwa. Petulo wakatupa bwiinguzi. “Bantu bali lusele bakavwunwa kwiinda mumeenda. Aayo meenda ncitondezyo ca kubbizyigwa mumeenda, ooko kukuvwuna webo cino ciindi, kuleka kukugwisya tombe mumubili, pele ncikonkezyo ca muzeezo uusalala uutozya kuli Yahuwah kwiinda mukubuka kuzwa kubafu kwa Messiah, ooyo lino uuli kujanza lyalulyo lya Yahuwah” (1 Petulo 3:20-25).
Ciindi aciindi alimwi Yahuwah wakalailila kuti bulowa bwa zituuzyo bweelede kulambaikwa mumbali akumeja aacipaililo, kumatwi aaku lulyo, zinwe ŋanda zyaku lulyo aminwe mipati ya matende aaku lulyo aabapaizi abamwi mu Mangwalo aa Cizuminano Cakale, mumbalaa zitendele aatalaa milyango ya bantu Bakwe mangolezya aa Pasika, abamwi banjaanji. Lino kufumbwa akataa ziindi eezyo, ikuti malailile Yahuwah aakulambaika bulowa naatakateelelwa, kufumbwa cakali kunga cacitika cakalaa ntenda iiyoosya! Ono eeco mbocili masimpe, nkaambo nzi bulowa bwakatililwa zinyonyoono ncobuta lambwi ali ndiswe? Mumupailo wakusinizya, Ime ndakabuzya Yahuwah kuti anditondezye mbocibede kuti meenda aakubbizya aleta kusalazyigwa kuzwa kucibi ooko nkotuyandisya toonse swebo. Ikuti Yahuwah wasala kumunika mumuni amakani aaya kuli ndime inga tiicabamba biyo kuti kubbizyigwa ube mulimo “wakucitila bupaizi” uutakwe cilikwabilizyo, inga caba — kwiinda kapati — kuyubununa nguzu zitusalazya eezyo zili mubulowa bwa Yahushua. Ime ndakaibaluka bwiinguzi mpeenya buyo neekabbukizya mubuzyo uumbi ngweekalibuzya mumoyo: “Eelyo nibakamuyasa Mwanaangu, ninzi cakakunka kuzwa kubbazu lyakwe?”
Bulowa a meenda! Liya nikwakaumuzya kuti zi nibwakali kukunka bulowa ameenda kuzwa mubbazu lya Yahushua, eeco cakali ciindi comwe buyo Yahuwah ncaakali kulindizya kuzwa kumatalikilo aa makanze Aakwe mapati aateeli! Aboobo, kutamvwisyisya bulowa ameenda a mulimo ngwaawonda kuli ndiswe, ooko nkwaalilwa kuteelela cintu cipati mu nzila ya lufutuko yokwa Yahuwah, akubamba kuti buumi bwa Mwanaakwe, kufundisya, lufu akupenzyegwa kwakwe kwakali kwa buyo!
Eelyo muntu weempedwe batalika kweendelana amulazyo wa kubbizyigwa (Maako 16:16; Milimo 2:38 atumpango tumwi), bulowa bwa Yahushua bumuletela kulekelelwa zinyonyoono nkaambo meenda aa lubbizyo alamusalazya kuzwa kucinyonyoono mpeenya aawo nateelela! Bulowa bulajuzya Cizuminano Cipya (BaHebulayo 9:22; 10:29; Maako 14:24). Kwiinda muli Messiah, mumuni uutamwekesyi (Cizuminano Cakale) cisika mpocigolela, akutobelwa aa Cizuminano Cipya akuzumizyigwa kwiinda mu bulowa bwa yooyo Mumuni Wamasimpe (Johane 1:9). Muli Yahushua tujana ncobeni “nzila yiinda kubota” yakaambwa aa Paulu mu 1 Bakolinto 12:31. (Paulu ulayimpanya lugwalo lwakaindi a moza uuli mulugwalo lupya mu BaLoma 2:29; 7:6.)
Aayo Mangwalo ngeekazyi Ime lino akatalika kumvwika bupya ncaayiminina mumizeezo yangu yakajulika kuti imvwisyisye: “eelyo Ime ndabona bulowa, ndayinda atalaa ndinywe” (Yahuwah, mu Kulonga 12:13); “ikuti Ime nsyekusanzyi webo, nkokuti toli wangu pe” (Johane 13:8), alimwi Ime lino ndimvwisyide cintu cimwi cakalembwa aa Mwaapositolo Paulu kabotu kwiinda mbweekali kunga ndeezyeezya kaindi. Eelyo Ime neekaunka mumeenda aakubbizyigwa, eelyo bulowa bwakwe nobwakatililwa ndime, mpaaciindi eeco kwiinda muli ceeci buumi bwangu mbubwaka “siswa antoomwe a Messiah, muli Yahuwah” (Bakolose 3:3). Ono mwabona, kuzwa aciindi muntu weempedwe nanyikwa mumeenda mu zina lya Yahushua, kuzwa waawo, kufumbwa Yahuwah nalanga ali nguwe, Walo ubona bulowa bwa Mwanaakwe buvwumbilide muntu ooyo, nkaambo kunyikwa cilikonzyene ambwanoolangika muntu wakanyikidwe mu zyiba lya musila uusubila. Eelyo Yahuwah nabona bulowa bwa Yahushua kabuvwumbide muntu, Walo ulayibalusyigwa kuti muulo wacinyonyoono wakabbadelwa. Mbube, Walo ulakonzya (mbuli mbwaamba mu Kulonga 12:13) “kwiinda atalaa” ndiswe, akuzyola lufu; oolo lutobela cakutaleyaleya kulumbula cinyonyoono. Mbombuboobu buumi bwa muntu mbobu “sisidwe antoomwe a Messiah muli Leza.” Ncintu cuumbulizya kuzyiba cintu eeci.
Majwi aalwiimbo lwakaindi lumwi asika mumizeezo yangu. Mutwe wa ciimbo ubuzya mubuzyo wakuti: “Ninzi cinga candisanzya zinyonyoono zyangu?” Citobela waawo nkutembaula: “Pele bulowa bwa Yahushua! O, busanzye bulowa, undisanzye nditube mbuli canda!” Ime nsyekonzyi kabili, kwiimba ziimbo zyakaindi zya “kubbizyigwa” eezyo zyaka soogwa akucembaala mumbungano zinjaanji, munzila njeenya buyo! Nziibalusyo ziyandisi zya bulowa bucindivwumbide, bundisalazya akuzumanana kusisya buumi bwangu antoomwe a Messiah mumeso ookwa Yahuwah. Bwiinguzi bwa Yahuwah ku mubuzyo wa moyo wangu bwakandipa “meso mapya” ku mulimo mupati wa bulowa bwa Yahushua a meenda aakubbizyigwa ncozibeleka mu makanze Aakwe mapati aalufuko. Myaka minjaanji ya kuyiisya bweelenzi ciiyo eeci kwakapa kuti bantu banjaanji batakubwene (Ime eeci ndacaamba munzila yiinda kubaa lubomba), kuti balayandika kubbizyigwa “mu zina lya Yahushua kuti balekelelwe zinyonyoono” (Milimo 2:38; 4:12; 10:48, 19:5; Luuka 24:47)
Eeci cibalo citali ca-WLC cakalembwa aaba Shelly Hostetler.
Twakagwisya mucibalo citaanzi mazina aabakomba mituni ngobayita Taata a Mwana, akubikka mucibaka cangawo mazina mataanzi ngubaapedwe. Kuyungizya waawo twakajokolosya mutumpango ntotulembulude akubikka mazina aa Taata a Mwana, mbuli mbwaakalembedwe kutaanguna abalembi bamu Bbaibbele bakayoyelwa moza. Nkamu ya-WLC
