IBbaibbele Lilaa Buumi

Ninzi ncolilyaamba Bbaibbele lwalyo lini?

(1) Mangwalo woonse akapegwa a Mwami Yahuwah alimwi alagwasya mukwiisya zyabwini, mukukasya zitaluleme, mukululamika zitaluleme, amukulailila bantu zyabuumi bulondokede. Malembe alagwasya mubelesi wa Yahuwah kuti ayelele akukonzya kucita kufumbwa ziluleme. (2 Timoteo 3:16-17)

(2) ". . . kunyina cishinshimi cilaa busanduluzi busisidwe pe, nkaambo cishinshimi tiicakazida kwiinda munguzu zyakuyanda kwa muntu pe, pele kwiinda mubaalumi basetekene bokwa Yahuwah bakali kushinshima kabeendelezyegwa a Muya Uusalala." (2 Petulo 1:20-21)

(3) “Nkaambo Majwi aa Yahuwah ngabuumi alimwi nganguzu. Alabosya kwiinda panga likwengedwe koonse-koonse. Alayasa mane kwaandaanya buumi amuuya alimwi kwaandaanya zifuwa amooma. Alimwi alabeteka mizeezo aziyanda moyo.” (BaHebulayo 4:12)

(4) ". . . Mangwalo ngamasimpe lyoonse. (Johane 10:35)

Mbumboni nzi mbolipede Bbaibbele bugwasyilila kulibanda kwamusyobo ooyu?

Lwiiyo lwa zilengwa leza

Njeeyi mikonzyanyo misyoonto iipa bumboni mu lwiiyo lwa zilengwa leza lwakaindi loko kutali lwa mazubaano, luzwa mu Bbaibbele. Kucili bumboni bunjaanji bukonzya kusanganyigwa aawa.

• Zilengwa leza zibambidwe aatubeelabeela tutalibonyi mumeso aabuntu. (BaHebulayo 11:3)
• Muya ulaa cikkelo. (Joobo 28:25)
• Kwiinda myaka iili 4,000 kupiluka musyule, IBbaibbele lyakasalazya kupima bupati bwa ciyobwedo ca meenda aakkalikide. (Matalikilo 6:15)
• Eelyo notulwana malwazi, zikobela zyesu amibili yesu yeelede kusanzyigwa mumeenda aakunka. (Bapaizi 15:13).
• Mafumba (mazi) aabantu kuti taatantamunwa kuzwa akataa bantu, alakonzya kuletelezya malwazi. (Ciibalusyo 23:12-23)
• Lwizi lulaa tusensa twa meenda. (Joobo 38:16)
• Bulowa mbobujisi buumi abukkale bubotu. (Bapaizi 17:11; 14)
• Mibili yesu yakabambwa kuzwa kubulongo bwaansi (Matalikilo 2:7; 3:19). Basyaazyibwene ba zilengwa leza bakabbukizya kuti mubili wamuntu ujisi misyobo yalubulo iili 28 ayimwi iikonzyana ayeeyo, yoonse iijanwa mumamvwu aanyika.
• (Kuzandula) baciswa kuzwa akataa bataciswi malwazi inga capa kuti aayo malwazi aleke kuyambukila bamwi akataa bantu. (Bapaizi 13:45-46; Myeelwe 5:1-4)
• Eeco mazubaano ncotwaamba kuti "jet stream" naa myuwo yuungisya atalaa mulengalenga kuzwa kumbo kutozya kujwe kiiyaa kuselela kunyika akumusanza, yakalizyibidwe kale amuciindi ca Solomoni mumyaka iili 3,000 yakainda musyule. (Mukambausi 1:6)
• Kuli magundu malamfu aabbide kunsaa lwizi. (Jona 2:5-6)
• Inyika ilipapalele, aaka nkasimpe baJesuiti nkobaukwete kusisikizya kwa myaanda ya myaka. Kasimpe kakuti nyika tiibambidwe muciimo ca bbola kayoonyandya bantu banjaanji nkaambo bazyibide kuyiisyigwa lwiiyo lwaba Jesuiti lwakubeja mubuumi bwabo boonse, pele bumboni bwamasimpe aazilengwa leza butondezya buyo ceeco Mangwalo ncaakali kwaamba lyoonse kuti, nyika ilipapalele.

Masimpe Aatacincauki

Mabbuku aali 66 aa Bbaibbele akalembelwa:

• Atalaa Nsumbu zyanyika zyotatwe: Africa, Asia, a Kumusanza lya Bukuwa
• Mumilaka yotatwe: CiHebulayo, CiAlamu, aci Giliki
• Akalembwa abantu bali 40 baindene bazwa mumikowa yaandeene alwiiyo lwaandeene: bami, beembezi ba mbelele, baimbi banyimbo, balimi, bazeli banswi, bapaizi, basilisi, abamwi banjaanji.
• Akalembwa akataa myaka iisika 1,500.

Cintu cinyandya ncakuti, woonse mabbuku aali 66 aa Bbaibbele aleendelana alimwi alaa mulumbe uukamantene antoomwe! Bumboni bwa Bbaibbele bulizuunyene cakutacincauka, oobo mbobumboni bwakuti lyakazyila ku bulemu bwa kujulu.

Cishinshimi

“Amuziyeeye zintu zyakaindi eezyo zyakale-kale, ndime Yahuwah taakwe uumbi pe, ndime Yahuwah taakwe uuli mbuli ndime. Ndime ndikonzya kulungulula mbuli zintu mboziyooba kumamanino kuzwa kumatalikilo aazyo, kuzwa kuciindi cakaindi-kaindi. Ndati makanze aangu ayoocitika, ndiyoocita zyoonse eezyo zindibotela.” (Izaya 46:9-10)

Yahuwah, kutegwa atondezye Bbaibbele mboligaminide kuba jwi Lyakwe liyoyedwe Moza, wakatupa myaanda myaanda yatumpango (twamasimpe) twaambilizya zintu zicizya kumbele. Kusikila munsaa 30% lya Bbaibbele lilembedwe zishinshimi. Ooku nkokwaamba kuti kampango komwe akataa totatwe mu Bbaibbele kaambilizya cishinshimi! Kusikila bobuno buzuba, 85% zintu zyakaambilizyigwa mu Bbaibbele zyakacitika ncobeni mbweenya mbuzyakaambwa kucitika bwini! Nkaambo nzi swebo ncotunga twalanganya zishinshimi ziciboola munzila yaandeene?

Nzyeezyi zishinshimi zisyoonto zyakazuzikwa, kusikila kubbala lyomwe-lyomwe, kusikila abuzuba bwini bwaashinshimwa:

• Kudilimuna bulelo bwa Bbabbuloni akukomena bulelo bwa Medo-Persia (Daniele 2)
• Cyrus wakashinshimwa kuyoofumpa munzi wa Bbabbuloni (Izaya 45:1-3)... Cyrus taakaninga zyalwa aciindi eeco pe!
• Munzi wa Bbabbuloni tuukakkalwi kabili abantu pe (Izaya 13, Jelemiya 51)
• Kudilimuna bulelo bwa Medo-Persia akukomena bulelo bwa Greece (Daniele 2, 7, 8)
• Nkondo nzyaakalwana Alexander Mupati (Daniele 7, 8)
• Kwaabanya bulelo bwa Greece akataa basikalumamba bone naakafwa Alexander (Daniele 8)
• Kukomena akuzimaana kwa munzi wa Loma nibwaainda bulelo bwa Greece (Daniele 2)
• Kwaabanya cooko ca Kumbo lya Bukuwa akataa bami bali 10 (Daniele 2, 7)
• Cooko ca Bukuwa cipandaudwe tacikaswaangani kabili antoomwe pe (Daniele 2)
• Kukomena, kuwa akuyakulula bupoopo bwaku Loma…amyaka yini bapoopo njobayoolela! (Daniele 7, Ciyubunuzyo 13)
• Cisi ca Egypt tacikeendelezyi kabili atalaa masi amwi. (Ezekiya 29, 30)
• Kudilimuna Tempele lyaku Jelusalema (Mateyo 24, Maako 13, Luka 19)
• Bapoopo bakapenzya akujaya BanaKristu basyoma Bbaibbele …akwaambilizya misyobo yakutundulula akujaya bantu yakali kunoobelesyegwa! (Daniele 7, 8, 11; Ciyubunuzyo. 13, 17)
• Kubambwa, kukomena aciimo ca cisi ca Amelika (Ciyubunuzyo 13:11-16)
• Kushinshima mwaka wini eelyo Muna Kristu mutaanzi naakajayigwa, akutola mulumbe mubotu kubantu bamasi – (“Cishinshimi ca Mvwiki zili 70" (Daniele 9)

Ibbuku lya Daniele lilikke, lyakashinshima mulongo mulamfu wazintu zyaacitika mumyaka 2,500 mumisela yesu!

Yahushua wakazuzika zishinshimi zyaambilizya Messiah zili 350 mubukkwene kumaninizya tumpango toonse, kusanganya a ziindi zigantidwe, masena aambidwe azintu zyaacitika ciindi naakazyalwa; mulimo Wakwe, kusulaikwa Kwakwe, alufu Lwakwe ndwaakakoma cinyonyoono.

Lino, atulange Yahushua waku Nazaleta...

Yahushua wakazuzika kwiinda zishinshimi zili 350zyaambilizya Messiah mutumpango toonse, kusanganya a ziindi zigantidwe, masena aambidwe azintu zyaacitika ciindi naakazyalwa; mulimo Wakwe, kusulaikwa, alufu ndwaakazunda cinyonyoono. Zishinshimi zili 61 akataa zyeezyo, zilanganyigwa kuti “nzishinshimi zipati” abasicikolo ba Bbaibbele, ooku nkokwaamba kuti zintu zigantidwe kwaambwa eezyo zyaacitika zigwasyilizya batola milumbe abalembi bwa misela kuti bavwuntauzye masimpe aa zishinshimi kweendelanya azintu eezyo nizyaacitika. Kufumbwa cishinshimi, kakwiina kugwisyila nociba comwe caambilizya Messiah, wakacizuzika ncobeni Yahushua.

Nzyeezyi zishinshimi zisyoonto buyo, nzyaakamaninizya kuzuzika Yahushua kusikila bbala lyomwe-lyomwe:

Myaanda yamyaka kakutaninga talikwa cisubulo ca kukankaminwa mubulelo bwa Loma, Mangwalo alembedwe kuti Yahushua wakali kuyooyaswa mumaanza Aakwe amumatende. (Kobala Intembauzyo 22:16-17 & Zakaliya 12:10.

• Unooli wa lunyungu lwa Abrahamu (Matalikilo 12:3)
• Unooli wa lunyungu lwa Isaka (Matalikilo 17:19; 21:12)
• Unooli wa lunyungu lwa Jakobe (Matalikilo 28:14; Myeelwe 24:17, 19)
• Unooli wa lunyungu lwa Judah (Matalikilo 49:10)
• Uyoozyalilwa ku Betelehema (Micah 5:1-2)
• *Uyoozyalwa mu Ciindi Cigantidwe (Daniele 9:25) – Eeci cishinshimi cakali kutondeka kumyaka njaakapona Yahushua akubbizyigwa akukankaminwa!
• Kujaya bana basankwa naakazyalwa Yahushua mukukakatila kujayilizya Nguwe naakacili muvwanda (Jelemiya 31:15)
• Uyootijila ku Egypt (Hosiya 11:1)
• Uyoosolwedwa amuntu uumwaambilizya (Malachi 3:1)
• Uyoosolwedwa a Elijah (Malachi 4:5-6)
• Wakaambilizyigwa kuti Mwanaa Yahuwah (Intembauzyo 2:7; Tusimpi 30:4)
• Unolaa mulimo wa busilisi (Izaya 35:5-6; 42:18)
• Unoocita mulimo Wakwe ku Galilaya (Izaya 8:22-9:1; 9:1-2)
• Unoyiisya kabelesya twaano (Intembauzyo 78:2-4)
• Mushinshimi (Ciibalusyo 18:15)
• Unikwiitwa zina lyokwa Yahuwah lini Awalo (Izaya 9:5-7; Jelemiya 23:5-6)
• Uyokuumbulizya batyompedwe mumyoyo (Izaya 61:1-2)
• Uyoosulaikwa abasazinyina (Izaya 53:3; 63:3; Intembauzyo 69:8-9)
• Unooyandwa abantu balupatipati (Intembauzyo 72:10-11)
• Mupaizi uutobela mumukondo wa Melechizedeki (Intembauzyo 110:4)
• Uyoonjila munzi wa Jelusalema katantide mbongolo (Zekaliya 9:9)
• Unooyandwa abana basyoonto (Intembauzyo 8:2)
• Tabakamusyomi bantu (Izaya 53:1)
• Uyokwaabwa amulongwe Wakwe (Intembauzyo 41:9; 55:12-15)
• Uyokwaabwa nkaambo buyo ka makkobili aansiliva aali 30 (Zechariah 11:12)
• Uyootamikizyigwa abakamboni bakubeja (Intembauzyo 35:11)
• Unokuumwine buyo nobamubejelezya (Izaya 53:7)
• Uyooswidwa mate akudinkaulwa (Izaya 50:6)
• Bayoomucimwa kakwiina kaambo (Izaya 49:7, Intembauzyo 35:19; 69:4-5)
• Uyookankaminwa antoomwe abasimilandu (Izaya 53:12)
• *Uyooyaswa mumatansyi Aakwe amatende (Intembauzyo 22:16-17; Zekaliya 12:10)
• Uyoofubaazyigwa akunongwa (Intembauzyo 22:7-8)
• Uyoobwentelwa (Intembauzyo 69:9)
• Uyoopailila basinkondonyina (Intembauzyo 109:4)
• Basikalumamba bayokuuma njuka kwaabana zikobela Zyakwe (Intembauzyo 22:17-18)
• Kunyina cifuwa Cakwe ciyootyoka (Kulonga 12:46; Intembauzyo 34:20)
• Uyooyaswa kulubazu lwa mubili (Zekaliya 12:10)
• Uyoozikkwa akataa bavwubi (Izaya 53:9)
• Uyoobuka kuzwa kubafu! (Intembauzyo 16:10; 49:15)

*Azimwi zyakubala: Intembauzyo 22 a Izaya 53. Ma! Cilakondelezya! Kobikkila maanu kuti eelyo nobala tumpango ootu, Intembauzyo 22 yakalembwa munsaa mwaka 1000 BC katanazyalwa Kristu; bbuku lya Izaya lyakalembwa munsaa mwaka 700 BC katanazyalwa Kristu.

Kweendelanya bwaamba basyaazyibwene ba nsaamuzi…

Kuli muntu omwe buyo akataa bali 8 uunga wazuzika zishinshimi eezi .......................1 muli bali 1017
1 muli bali 10:17 = 1 muli bali 100,000,000,000,000,000

Kuli muntu omwe buyo akataa bali 16 uunga wazuzika zishinshimi eezi .....................1 muli bali 1045
1 muli bali 10:45 = 1 muli bali 1,000,000,000,000,000,000,000,000,000,000,000,000,000,000,000

Kuli muntu omwe buyo akataa bali 48 uunga wazuzika zishinshimi eezi.....................1 muli bali 10157

1 muli bali 10:157 = 1 muli bali 10,000,000,000,000,000,000,000,000,000,000,000,000,000,000,000,000,000,000,000,000,000,000,000,000,000,
000,000,000,000,000,000,000,000,000,000,000,000,000,000,000,000,000,000,000,000,000,000,000,000,000,000,000

“Alimwi lino Ime ndamwaambila
kacitaninga citika kutegwa caakucitika,
inywe mukakonzye kusyoma.”
(Johane 14:29)

Mbuli bumboni kunze lya Bbaibbele bukwabilila zintu nzyolyaamba Bbaibbele?

Kweendelana akataa zintu zyaacitika

Zintu zilembedwe mu Bbaibbele, kwa myaka yiinda 2,000, zyakasumbuzya maumi aa zyuulunzuma zya bantu; banalumi a bamakaintu, bakubusi abacembeede, bavwubi abacete, baangulukide abazike, bazyila mumasena aandeene, amikowa yoonse atalaa nyika. Ziyanza zibyaabi zyakazundwa. Myoyo yakatyompedwe yakaponyegwa. Kuyoowa, kuzingwa mizeezo, kutilimuka, buumba, bukali, kutunuka, malwazi, ayimwi misyobo minjaanji yamusinze uunyonganya muya wamuntu, zyakakomwa kwiinda mu mumuni uuyungizya kumwekesya kuzwa mu Kasimpe ka Bbaibbele.

Kuyobozyegwa kwa zintu zya misela

Mangwalo aansiku aa Bbaibbele akayobolwa kabotu-kabotu akusandululwa munzila iiluleme kwa zyuulu zya myaka nokuba kuti banjaanji bakasoleka kuvwikkila makani aali muli ngawo akwaamayawida limwi. Mazubaano, kuli malembe aa Bbaibbele lya nsiku lya Cizuminano Cakale aasika munsaa 25,000 aaciliko. Kunyina bbuku limbi lya nsiku liciliko mazubaano likonzya kukwabililwa amalembe aali muzibeelabeela nokuba aasika 1,000!

Kubbukizya “Malembe aaku Lwizi lwa Munyo” mu 1947, ncintu citondezya bulondo bwakuyobozya Cizuminano Cakale, antoomwe akusandululwa kululeme.

Bumboni mu Buumi buno

Zyuulunzuma zyabantu batabaliki bakasala kwaaba maumi aabo muciindi ca “Kuvwuntauzya kwakusisikizya” mumunzi wa Roma. Bakawumpwa mumulilo, bakaumwa, bakadinkaulwa mabwe, bakasinwa, bakakwamaunwa abanyama bamusyokwe, alimwi bakapenzyegwa kakwiina kweengelelwa munzila zyalunya zitayeeyelwi nokuba kulangilwa akataa bantu. Eeco ciindi caambwa kuti cakali ciindi ca “Misela ya Musinze” nkaambo muciindi eeco Bbaibbele lyakasisidwe caali nokuba kusinkililwa a Cikombelo-cisi ca munzi wa Roma. Kwakali kwaambwa kuti “nkuzangila lusyomo” kuti wajanwa kobala Bbaibbele nokuba kuti kojisi Bbaibbele. Kwakali kubaa Luyando lwa Kasimpe aako kajanwa mu Bbaibbele aabo baalumi abanakazi batakonzyi kubalwa cibaalisungula kwaaba maumi aabo.

Balo bakali kazyi KASIMPE...bakalizyi kuti Bbaibbele talili bbuku lisinganya muntu nokuba bbuku lya manjezyeezya; ndi Bbuku lya Bulangizi bubotu, Cisyomyo, Kumunikila mizeezo, a Lwaanguluko, a majwi aajisi Buumi aa Mulengi Waluyando, ciyubunuzyo ca Luyando a Luzyalo luteeli luyeeme buyo muli Nguwe alikke musemo wa Kasimpe - Yahushua, Mwanaa Eloah Uupona!

 

---

 IBbaibbele – Tusimpe Twakuswata:

• Kuli kusikila munsaa 25,000 malembe aa Cizuminano Cipya aaciliko mazubaano. (Kunyina bbuku limbi lya nsiku likonzya kutabililwa nokuba malembe aasika 1,000!)
• IBbaibbele lyoonse lyakasandululwa mumilaka yiinda 400, alimwi zibeela zyalyo zyakasandululwa mumilaka yiinda 2,500.
• IBbaibbele ndebbuku lijanwa munyika kwiinda woonse. (Mu 2001, ba Gideons International bakeezyeezya kuti kuli ma Bbaibbele aasika 107 aasimbwa mukanzumina komwe-komwe kuya munyika yoonse!)
• Kuli mabbuku manji aambilizya Bbaibbele aakalembwa aayinda mabbuku aaciiyo cili coonse.
• Kuli balembi banjaanji bakainduluka kwaamba cilembedwe mu Bbaibbele kwiinda cilembedwe mubbuku limbi.
• IBbaibbele ndebbuku lyakalwanwa kapati mumisela yabantu yoonse.
• Kusikila 30% makani aalembedwe mu Bbaibbele, nga cishinshimi.
• Balembi bamisela beezyeezya kuti bantu basika 100 zyuulunzuma bakajaigwa muciindi ca kubuzyilila kwabujayi kwaba poopo baku Roma nkaambo bakali kuyanda buyo kubala Bbaibbele akutobela ziiyo zyabulemu zilembedwe muli ndilyo.

“Ijwi Lyako ndilambe kumatende aangu,
Amumuni munzila yangu.”
(Intembauzyo 119:105)