|
Eeci cibalo tacili ca WLC. Eelyo notubelesya zilembedwe aabalembi balaanze lya nkamu, tusimba buyo zyeezyo zyeendelana 100% a Bbaibbele a lusyomo lwesu cino ciindi munkamu ya WLC. Aboobo eezyo zibalo inga zyalanganyigwa kuti nzya nkamu ya WLC. Twakalelekwa kapati amulimo wabalanda ba Yahuwah banjaanji. Pele tatukulwaizyi ndinywe nobeenzuma kutalika kubala zyaalembwa abantu aabo. Eezyo nzibaalemba, twakazigwisya mumalembe eesu nkaambo kanjaanji zililubide akubaa tumpenda. Cintu cuusisya ncakuti tucilangaula mbungano yamilimo iitakwe kampenda. Ikuti konyandidwe nkaambo ka [zibalo/milumbe] iitali ya WLC, kobikkila maanu ku Tusimpi 4:18. Kuteelela kwesu nkwakuti kasimpe Kakwe kalazyokoloka, eelyo mumuni nuuyaa kumwesya munzila yesu. Tulakayandisya kasimpe kwiinda buumi, nkanko tulavwuntauzya kufumbwa nkokakonzya kujanwa. |
Umwi muntu musongo aciindi cimwi wakalemba kuti:
1 Bakolinto 13:1-3- “Nikuba kuti ndaambaula mumisyobo yabantu, niiba yabangelo, pele nketajisi luyando, inga ndaba mbuli mulangu uulila naa mbuli cibulo cuumwa. 2 Alimwi kuti naa ndijisi cipego cabusinsimi, akuziba makani oonse aasisidwe akuba aaluzibo loonse, alimwi kuti naa nkendijisi lusyomo lunji lukonzya kuzyula malundu, pele nketajisi luyando, nsili muntu pe. 3 Kuti naa ndaabanya lubono lwangu loonse, nikuba kupa mubili wangu kuti utentwe, pele nketajisi luyando, taakwe mpindu njendijana.”
Inzya ncobeni, Yahuwah ngo luyando. Bubambe bwa jwi lya Yahuwah lyoonse bwiimvwi atalaa luyando Lwakwe kuli ndiswe, mbotweelede kumuyanda Walo, alimwi ambotweelede kuyandana.
Bamwi bakatutamikizya kuyandisya tulawo-lawo. Masimpe eeni ngakuti, Ime ndizyi kuti ikuti kuyandisya kwesu kakutali kwa luyando, nkokuti kunyina ncotujisi. Nokuba kuti toompolola zina Lyakwe, akubamba buzuba bwa Nsabata, akucita kufumbwa zilangika kubaanga nzintu ziluleme, kunyina ncotujisi kuti katutakwe luyando.
Nokuba kuti katuluulwa kubaa luzyibo lwa mangwalo akusolweda bantu banjaanji ku matende aa Mufutuli…ikuti katunyina luyando, kunyina ncotujisi.
Alimwi nokuba kuti katulibonya aanga twaaba buumi bwesu boonse kuli Yahuwah, nokuba kujailwa akaambo ka zina Lyakwe…ikuti katutajisi luyando, ncobeni kunyina ncotujisi.
Lyoonse jwi lya Yahuwah lyeelede kubalwa eelyo LUYANDO kaluli musemo wancociiminina ncotubala.
1 Timoteo 1:5- Muzeezo wangu mukukupa malalilile aaya ngwakuti kube luyando luzwa mumoyo uusalala, kuyeeya kululeme, alusyomo lwini-lwini. 6 Bantu bamwi bakazwa muli zeezi akulubila nibakaccilila nkazyanyo zyabuyo. 7 Balayandisya kuba bamayi bamilawo, pele tabazizi nzyobaamba niziba eezyo nzyobazumina pe. 8 Lino swebo tulizi kuti Mulawo mubotu kuti naa muntu wuubelesya bweelede.
Mulawo Wakwe utwaambila mbotweelede kuyanda. Ncobeni, mulawo uli setekene alimwi ulaa bulemu, akukkomanisya. Ikuti katumuyanda Walo, tweelede kubamba milawo Yakwe, katwiiya bupaizi akusyomeka.
Kunyina mulawo uulembedwe uutatwaambili mbotweelede kuyanda. Ikuti katumuyanda Yahuwah, tunoomukomba Walo munzila njayanda kuleka nzila zyakabambwa aamuntu. Ikuti katubayanda basimukoboma, tunoobalanganya mbuli mbotuyanda kulanganyigwa. Mbuli mbwaakaamba Yahushua, mulawo woonse ulakonzya kufwiinsyigwa mu milawo yobile:
Mateyo 22:36-40- “O Mwiiyi, ino nguuli mulawo mupati mu Milawo ya Leza?”, 37 Mpawo wakati kulinguwe, “Uleelede kuyanda Mwami Yahuwah wako amoyo wako woonse, amuuya wako woonse, amiyeeyo yako yoonse., 38 Ooyu ngomulawo mupati alimwi ngomutaanzi., 39 Awabili uli mbubonya mbuli nguwo. Yanda mweenzinyoko mbubonya mbuli mboliyanda omwini., 40 Amilawo eeyi yobilo mpaali Mulawo woonse wa Mozesi abashinsimi.”
Mbombubo, mulawo wa Yahuwah woonse mbuuzwide waanzikidwe atalaa milawo yobile eeyi. Muntu inga wasola kuzandula mulawo umwi kuzwa akataa milawo ya kuyanda bantu eeyi akuuntuluzyila kuti coonse mulawo ncowaamba nkuyanda Yahuwah a kuyanda basimukoboma- inga wazandula mulawo umwi kuzwa akataa milawo eeyi kwiinda mukwaamba kuti mulawo tuuciyandiki kuli ndiswe. Pele Yahushua kunyina pe naakazandula luyando kuzwa ku mulawo wa Yahuwah.
Eeyi milawo yobile izyila Ku mulawo (Ciibalusyo. 6:5, Bapaizi 19:18). Mulawo Wakwe, Messiah Wakwe (ooyo ngo Jwi lyakaba muntu [Johane 1:14]), antoomwe a luyando Lwakwe, ncintu comwe.
Alimwi inzya ncobeni, luyando nce cintu cipati ali zyoonse.
Eeci ncibalo citali ca-WLC cakalembwa aaba Tom Martincic.
Twakagwisya mucibalo citaanzi mazina aabakomba mituni ngobayita Taata a Mwana, akubikka mucibaka cangawo mazina mataanzi ngubaapedwe. Kuyungizya waawo twakajokolosya mutumpango ntotulembulude akubikka mazina aa Taata a Mwana, mbuli mbwaakalembedwe kutaanguna abalembi bamu Bbaibbele bakayoyelwa moza. Nkamu ya-WLC