|
Eeci cibalo tacili ca WLC. Eelyo notubelesya zilembedwe aabalembi balaanze lya nkamu, tusimba buyo zyeezyo zyeendelana 100% a Bbaibbele a lusyomo lwesu cino ciindi munkamu ya WLC. Aboobo eezyo zibalo inga zyalanganyigwa kuti nzya nkamu ya WLC. Twakalelekwa kapati amulimo wabalanda ba Yahuwah banjaanji. Pele tatukulwaizyi ndinywe nobeenzuma kutalika kubala zyaalembwa abantu aabo. Eezyo nzibaalemba, twakazigwisya mumalembe eesu nkaambo kanjaanji zililubide akubaa tumpenda. Cintu cuusisya ncakuti tucilangaula mbungano yamilimo iitakwe kampenda. Ikuti konyandidwe nkaambo ka [zibalo/milumbe] iitali ya WLC, kobikkila maanu ku Tusimpi 4:18. Kuteelela kwesu nkwakuti kasimpe Kakwe kalazyokoloka, eelyo mumuni nuuyaa kumwesya munzila yesu. Tulakayandisya kasimpe kwiinda buumi, nkanko tulavwuntauzya kufumbwa nkokakonzya kujanwa. |
“Kubusena bumwi myaka minjaanji nsiku lini kusikila waano:
Inzila zyobile zyakaandaana kutozya mucisaka, mpoonya Ime –
Ndakatozya yeeyo Iiteendeendwi,
Aboobo eeco cakacinca zintu zinjaanji.”
(Kuzwa mu kaano kakuti “The Road Not Taken” kakalembwa aaba Robert Frost)
Zintu zinjaanji zitaibalukiki zyakatola busena mubweende bwa All-Stars Reunion [kweezyeezya buyo]. Nokuba boobo, kunyina cakakkalilila mumizeezo kuleka zyeezyo zyakaamba musyomi umwi, kunyina cakainda kujata maanu mbuli muzeezo uukondelezya wa musyomi utazyibidwe zina ooyo Yahuwah alikke ngwazyi nkwaakazyila. Coonse ncotuzyi ncakuti wakabbuka kakwiina uumulangila alimwi kakwiina wakamutamba alimwi taakajisi cuuno camulimo akataa bapaizi nokuba lwiiyo lwa buleza. Kunyina wakaninga mubwene, alimwi taakali akataa baabo bakalembedwe kutola cibeela mu muswaano nokuba akataa beenzu bakatambidwe. Walo wakazumanana kuti Yahuwah nguwaamutamba ku muswaano, aboobo kwiina uunga wamukasya kunjila.
Muswaano wakabambidwe ku zekelana akataa nkamu zyobile ziindene mu lwiiyo lwa buleza [Basyoma Baleza botatwe kabakazyanya a Basyoma Leza Omwe] pele caacitika aawo cakaliindene kapati. Kwiindana cinicini! Mbweenya bwaakanzidwe muswaano niwaali kuyaa bucitika, kwakamvwika jwi kaliletezya kusyule lya mbungano. “Mene! Mene! Tekel! Upharsin!” Eeci cakavwundumuna bantu boonse akubanyemya kapati. Mbubuti muntu umwi mbwaakali kunga waamba cintu cisampuzya boobu? (Mene. Mene. Tekel. Upharsin caamba kuti, “Webo wapimwa mu cikkelo akujanwa kuti ulibulide! Aboobo bulelo bwako wanyangwa kuzwa mumaanza aako!”) Muzyukulu wa Nebukadinezala wa zina lya Belishazzar taakali kweelela kulya zina lya cuuno, alimwi munwe ookwa Yahuwah ooyo wakalemba mabala aayo camaleele abwaanda, wakalemba majwi aayo kumuzyibya kuti oobo buzuba bwamweelela aciindi cakwe mpocigolela aawo (Daniyele 5:25-28). Aabo balupatipati bakanjide pobwe bakalaazyi kabotu-kabotu makani ncicaali kwaamba eeco caalembwa, alimwi bakalibilika kumwi kabaliyeeya kuti mbambabo bakali kwaambwa mumajwi aayo! Baakalala nkaambo kamuntu ooyu wakanyonganya pobwe akuyandisya kuti bamwaange, pele “Bamalonda baci Loma” aabo bakali kugatela hotela abalo bakaluukwete kulikkomanisya cakuti tiibakabikkila maanu kuti bamwaange.
Kwakaba kukankama akataa mbungano muganda oomo eelyo ooyu muntu naakanjila katozya kwaakkede balupatipati, ngooyo waakwiimikila aawo aambilizyilwa mulumbe kakwiina akuzumizyigwa! Tiicakali kulangilwa kucitika cintu cili boobu cakuti kwakabula amuntu uumulesya akataa bantu bakali mu ganda boonse. Kwakaumuna kuti zi naakatalika kukanana, nokuba kuti taakatola ciindi, majwi aakwe akakkalilila kwa ciindi cikubwene naakamanide kale akuyaamuka. Nceeci ncaakajisi cakwaamba:
Amunditeelele! Bwasunu inywe mujisi ciindi cakuti musale nzila njomutii yende. Ime ndaboola kuno munzila yansiku yaabambilwa miya yabantu eeyo iilangila kubona busyu bwa Yahuwah. Yahuwah Lwakwe ngu wakanditamba kuno, nceeci Walo ncaandaambila kuti ndimwaambile. Bamwi benu aano mutaminina kuti mulaateelela maseseke malemu ookwa Yahuwah, Pele mwakaliyakila biyo milwi ya tunsiyansiya iisinkila majwi aalulayo kubelesya majwi aatakwe luzyibo. Inywe mwakagwisya cakukopolozya luzyibo! Tamuyandi kunjila mu Bulelo inywe lwenu, nkabela musinkila baabo bayandaula mulyango wakunjilila.
Nceeci cijuzyo ncimwaasinkilila. Nceeci cijuzyo caapedwe ku Mwaapositolo Petulo nkaambo walo wakalibwene aasyoonto kuti Yahushua ngo Kristu, ngo Messiah, Mwanaa Yahuwah uupona! Nceeci cijuzyo! Eeci ncecijuzyo cilikke luzutu! Nga masimpe aapasununa bulelo bwa Yahuwah aluzyibo lwakuti Yahushua Kristu ngo Messiah alimwi ngo Mwana simuzyalwaalikke ookwa Yahuwah. Walo tali Mwanaa Yahuwah kwiindilizya waawo, alimwi walo taceyede kwiinda waawo. Webo tokwe lwaanguluko lwakuyungizya nokuba kugwisyila cili coonse ku makanaaya. Ikuti yebo wayungizyila, Yahuwah uyookuyungizyila mapenzi aakulwana, alimwi kuti wagwisyila cili coonse, Yahuwah uyookugwisyila zina lyako kuzwa mu Bbuku lya Buumi (Ciyubunuzyo. 22). Yebo toyelede kuzelauka kuya kululyo nokuba kulumwesyi (Joshua. 1:7). Yebo toyelede kucesya nokuba kuyungizya atalaa majwi aaya. Utalipeekezyi kuti Yahuwah tazyi Walo mbwayelede kulyeendelezya kwiinda mbwasalide kale Mwini!
Yahushua wakati, “Oobu mbo buumi butamani: ikuti balo bazyibe Ndiwe, O Yahuwah wamasimpe olikke, a Yahushua Kristu ooyo Webo ngookatuma” (Johane 17:3). Ncintu cikkwene kapati kuzyiba Yahushua Kristu Messiah a Wisi Leza wa Isilayeli! Kuli Leza omwe biyo a mwiiminizi akataa Leza a muntu, mwaalumi Yahushua Kristu. Mbwakaamba oobo, “Kunyina uumuzyi Mwana pele biyo Taata. Alimwi kwiina uumuzyi Taata pele Mwana akuliyooyo ngwasala kuliyubununa” (Mateto. 11:27). Yahushua kunyina ncaakaamba cijatikizya ziimo zyotatwe zya Yahuwah, kutali mujwi noliba lyomwe! Nokuba lili pe.
Yebo wakalipangila mabala akwaatantaanya akupunga mabala mapya mbuli mbwaakweelela! Wakalipangila milazyo yako pele ulakaka milazyo iitacengeme yokwa Yahushua lwakwe. Ndoolu lusyomo lwa Yahushua a mulazyo wa cikombelo cakwe! “Koteelela O Isilayeli: Yahuwah Leza wesu, Yahuwah ngumwi!” (Maako 12:29). Ooyu ngo mulawo mutaanzi mupati kwiinda yoonse! Nceciiyo ncaakayiisya Yahushua eeci! Taata ngu Yahuwah, alimwi Yahushua ngo Mwanaakwe Simuzyalwaalikke. Yahuwah tali bantu botatwe baswaangene mumuntu omwe pe — Walo Muntu Omwe buyo! Yahushua tali Muntu wabili Mumutwe wabaleza botatwe pe; Walo alikke ngo Mwana Simuzyalwaalikke ookwa Leza Wamasimpe. Yebo uzumanana kuti Yahuwah mbantu botatwe, pele Yahushua usinizyide kuti Yahuwah ngumwi. Nkabela, nguni ngotutii syome?
Basyomi banjaanji bakatambula nzyookaambilizya, pele Yahushua tazumini pe. Yebo wakalipangila tempele lipati lya lwiiyo lwa bupaizi atunsiyansiya, pele Yahuwah uyoodilimuna zyoonse ansi! Eezyo nzyookalipangila mu bupaizi tazikwe nguzu ziindana cikkelo abulemu Bwakwe! Casika ciindi cakuti usiile limwi majwi aako omwini akuyaamina kuli Aakwe! Yebo tokonzyi kulijanina uukuzumina akataa bantu, pele inga wazuminwa kuli Yahuwah. Tacili cintu cuubauba, pele uyoojana balongwe munzila, alimwi mumajwi aawumwi uuyabila twaano mazubaano, bumwi buzuba, uyoobbukizya kuti eeci “cakajata mulimo zinjaanji.”
Kunyina cisi cakalinjizya muntenda kulanduka munkanda kusikila Yahuwah naakayita basale Bakwe kuti bacite cintu eeco! Kunyina bantu bakeendede kwiinda mulwizi kusikila Yahuwah naakayita Isilayeli ku cito cili kulaale. Kunyina sikwiiya wakalyatide tende atalaa mayuwe kusikila Yahushua naakayita Petulo kuti baswaangene ATALAA meenda aalwizi! Ninzila iisyaaankene eeyo njakwiitila Kristu kuti weende muli njiyo. Yebo tookabambilwa kweendela munzila zikwazeme zya bupaizi bwa tunsiyansiya. Kuli nzila iimbi yaambilizya Leza Omwe a Mwanaakwe Omwe Alikke, Messiah! Bantu banjaanji bakaunka kale kotaninga sika. Tabazyibidwe maningi akataa bantu pele balizyibidwe kuli Yahuwah. Buno buzuba Walo ulakwiita kuti usimpe matende aako munzila iiteendeendwi kwiinda yeeyo njookazyibila kale.
Nkabela...akataa kwiilingana kwakatobela waawo, walo wakasuuluka kakwiina kupanga coongo wainda mumulyango wakali kumbali mpoonya taakalibonya kabili. Mbombuboobo mbocibede kuli baabo bazyalwaa Moza. Bali mbuli muwo wuunga kuugama kufumbwa nkuuyanda. Tulaumvwa kuuvwuuma pele tatuzyi nkuuzyila nokuba nkuuya. Bamwi banooteelela akubikkila maanu. Bamwi balauzya ncobamvwa. Pele webo wamvwa lino.
Eeci cibalo citali ca-WLC cakalembwa aaba Bob Shutes.
Twakagwisya mucibalo citaanzi mazina aabakomba mituni ngobayita Taata a Mwana, akubikka mucibaka cangawo mazina mataanzi ngubaapedwe. Kuyungizya waawo twakajokolosya mutumpango ntotulembulude akubikka mazina aa Taata a Mwana, mbuli mbwaakalembedwe kutaanguna abalembi bamu Bbaibbele bakayoyelwa moza. Nkamu ya-WLC