Print

Koiya Zipego zya Bululami kwiinda mu Lusyomo!

Bululami kwiinda mu lusyomo ncipego cizumanana kweetela zibotu. Nkwaabilwa bululami Bwa Kristu lyoonse kakwiina magolelo, ooko kweetelezya azipego zinjaanji.

Buumi BupyaKululamikwa kwiinda mulusyomo ngo moyo wini uuli mukati ka mulumbe mubotu. Yahuwah wakabayanda babisyi cakuti, Walo wakaabila kufumbwa muntu uumusyoma bululami bwa Kristu Yahushua, eeci nceciyubununa bupati bwa luyando butakonzyi kumanina kutondezyegwa mumisela iitamani yoonse. Alimwi kwiindilizya waawo, kululamikwa kwiinda mulusyomo kuletela zipego zisandula mubisyi kuti abe mucinkonzya ca bulemu bwa kujulu.

Pele Yahuwah Sibuuya loko, nkaambo kaluyando Lwakwe lupati, ndwaakatuyandisya nekuba leelyo nitwakalifwide mumilandu, wakatubusya toonse antoomwe a Messiah (luzyalo ndomufutuzidwe) Wakatusumpwida antoomwe Anguwe akutukkazyika toonse mumweenya wakujulu muli Messiah Yahushua: kutegwa mumizukulu iicizya akatondezye buvwubi bugambyabwa luzyalo Lwakwe mulweetelelo Lwakwe ndwaletela ndiswe muli Messiah Yahushua.

Nkaambo kwiinda muluzyalo mwakafutulwa kwiinda mukusyoma, nkabela makani taazwi kuli ndinywe nobeni, ncipo buyo cizwa kuli Yahuwah. Eesyi makani aancito zyesu pe, kuti kutabi muntu uulikankaizya.(BaEfeso 2:4-9.)

Inzila ya lufutuko ijatikizya zinjaanji kutali buyo kulekelela babisyi zinyonyoono zyakainda kale. Kunununwa, kakwiina kubambululwa ciimo, takuli kufutulwa mubukkwene pe. Aboobo, Yahuwah upedelezya muntu uusyoma zipego zinjaanji. Eezi zipego zyaluzyalo lwa bulemu, ziyakulula muya wamuntu kuti abe cimbonimboni cikonzyanya ciimo cabulemu bwa kujulu. Mbombubo mbuubede kukomena mulimo ookwa Yahuwah wa kululamika bantu.

Bululami Kusetekana Kupegwa bulemu

Kululamikwa

Aciindi cini eelyo mubisyi weempedwe zinyonyoono natambika janza lyakwe kwiinda mulusyomo kuti ajatilile cisyomyo cakuti bulowa bwa Yahushua busanzya zinyonyoono zyakwe, mpeenya aawo ooyo muntu walulamikwa. Mpeenya aawo, Yahuwah umubalila kulubazu lwa buumi bwa Yahushua butakwe cibi alufu lwakwe lwakazunda cibi. Eeci ncipego. Tacili cintu cikonzya kujanwa kwiinda munguzu zyamaanza aamuntu, mukuliimya kulya nokuba mukweempwa zibi pe.1 Eeci ncipego cakwaabilwa.

Nkaambo kakuti kumilimo ya mulawo taakwe muntu naba omwe uukonzya kululamikwa kumeso Aakwe, Nkaambo kumulawo nkokuzyibilwa cibi.

Pele sunu kulayubununwa bululami bwa Yahuwah butali bwa mulawo, bulatondezyegwa ku mulawo akubanshinshimi.

Oobu bululami bwa Yahuwah mbwa kusyoma Yahushua Messiah, mbubwabo boonse buyo aabobasyoma, taakwe bwaanka.

Nkaambo boonse bakabisya akulezya kusika kubulemu bwa Yahuwah, pele balalulamikwa buyo kuluzyalo Lwakwe abunununi bwa Yahushua Messiah. Walo Nguwe ngwaakabikka Yahuwah kuti abe mulungo, kwiinda mulusyomo mubulowa Bwakwe.

Ncitondezyo cabululami Bwakwe, nkaambo kakuleka zibi eezyo zyakacitwa kalekale kuciindi ca lweengelelo lwa Yahuwah. Alimwi ncecitondezyo cabululami Bwakwe kuciindi casunu, citondezyo cakuti Yahuwah uliluleme, alimwi ulalulamika ooyo muntu uumusyoma Yahushua. (Bala BaLoma 3:20-26.)

Kwiina muntu ncanga wacita mubusongo bwakwe kutegwa avwozyegwe bululami bwa Kristu pe. Lufutuko talukonzyi kuvwolwa nkaambo kanguzu nokuba milimo yamaanza aamuntu pe. Nkwiinda buyo mulusyomo muntu mbwakonzya kululamikwa, kayimvwi kunembo lya Yahuwah kubee kunyina naakacitide cinyonyoono. Kululamikwa tacili cipego cakupegwa aciindi comwe buyo pe. Lyoonse kulayandika ciindi aciindi kwaabilwa bululami bwa Kristu kutegwa mubisyi alivwumbilile busofwaazi bwakwe kabelesya buumi bwa Yahushua busetekene, butakwe kampenda lufu Lwakwe ndwaakazunda cinyonyoono.

Kusetekana

inzilaEelyo muntu nasala cipego ca kusetekana, milyango yaciyobwedo cazileleko Kujulu ilajulwa, mpoonya ulapegwa zileleko zinjaanji. Cimwi akataa zileleko eezyo nca kusetekana, naa kusandulwa kuti abe muciimo cabulemu bwa kujulu.

Ezekiya upandulula mbocicitika eeci:

Njoomusansaizya maanzi aanjoloma kuti musalale. Busofwi bwenu boonse azimpangaliko zyanu zyoonse, njoomusalazya kuzwa kuli nzizyo.

Njoomupa moyo mupya akubikka muya mupya mukati kanu. Njoomugwisya moyo muyumu wabbwe mumibili yenu, akumupa moyo wabuntu.

Njoobikka Muuya Wangu mukati kenu akucita kuti mweende mumilazyo Yangu akubamba mbeta Zyangu. (Ezekiya 36:25-27, KJV)

Mulawo wabulemu ulawo waluyando. Yahuwah upa muntu uusyoma cipego ciyandisi, umupa moyo mupya uulembedwe mulawo wabulemu. Kwiinda mucileleko eeci, zintu nzyosisikizya kuyanda, alimwi kufumbwa cisisidwe mumoyo wako, cilasalazyigwa. Lino utalika kukkomanina kusetekana akucimwa cinyonyoono.

Eeci tacaambilizyi kuti muntu inga taalyaamba kulondoka kataninga tambula bulemu. Toonse tucijisi ziimo zyakawida mucinyonyoono alimwi tuciinduluka kwaalilwa notutempaulwa akubula nguzu zyakulwana masunko mumibili yesu. Pele cintu ciimpene nokuba boobo ncakuti, cintu cini ncayadisya mumoyo muntu nkuswaangana antoomwe akuba bomwe a Taata.

Ncobeni, ooyu ngomupailo ngwakacaalizya kupaila Yahushua munsaa kunjila mu Getisemane:

“Nsyepailili baaba balikke, pele abaabo bayoosyoma mujwi lyabo; kutegwa boonse bakabebomwe anotomwe;mbuli ndiwe Taata mboli muli ndime, ambeyo muli Ndiwe, kutegwa abalo bakabe bomwe muli ndiswe; akuti nyika ikasyome kuti Webo wakandituma.” (Johane 17:20-21, KJV)

Cipego ncapa muntu moyo mupya nkokwiingula kwa Yahuwah ku mupailo wa Mufutuli ooyo.

Kupegwa Bulemu

Kupegwa bulemu ngomulimo mupati munzila ya lufutuko.

Kupegwa bulemu ncipego cimaninizya kusandula musyomi mubombe moyo kuti abe muciimo cabulemu bwa kujulu: “Pele iswe munzi wesu uli kujulu, nkukonya nkutulangila Mufutuli, Mwami wesu Yahushua Messiah. Ooyo uuzoosandula mibili yesu iisampaukide, kuti ikonzyanisyigwe amubili Wakwe mulemu. Eeci cizooba nkaambo kanguzu zyayooyo uukonzya kumubombezezya zintu zyoonse.” (Bala Bafilipo 3:20-21.)

Paulu upandulula cintu cicitika eelyo notutambula cipego eeci:

Nkabela mbuli mbutwakajisi cinkonzya casibulungo tuyooba aacinkonzya ca sijulu mbubwenya. Lino bakwesu, ndimwaambila masimpe kuti bantunsi tabakonzyi kuvwuba Bwami bwa Yahuwah, alimwi bantu bakonzya kufwa tabakonzyi kuvwuba zitafwiki.

Amubone, ndamwaambila makani aaasisidwe. Ngaaya, tatukooyoofwa toonse pe, pele toonse buyo tuyoosanduka. Tuyoosanduka mukaindi kaniini loko, mbuli mukulaba kwaliso, nuyoolila mweembo musyaalizi. Nkaambo mweembo uyoolila, eelyo bafu bayoobuka mbili batafwiki, aswebo nituyoosanduka. Nkaambo eeci ciwa ciboleka ceelede kusamikwa butafwiki. (Bala 1 Bakolinto 15:49-53.)

Moyo mupya wakapegwa basaante nibakalulamikwa. Lino, cipego ca mibili iitafwi bayoopegwa antoomwe aciimo ciindene. Basaante bayooba cimbonimboni cikkwene ca ciimo cabulemu bwakujulu. Balo mbana basankwa abasimbi ba Mwami Yahuwah alimwi bayookkala a Nguwe kukabe kutamani.

Lufutuko alwalo ncipego cini! Mbweenya buyo akululamikwa, kusetekana, a kupegwa bulemu. Kotambula cipego cokwa Yahuwah buno buzuba! Kunyina cintu nconga walicitila kuti uvwozyegwe cipego eeco pe. Kotambula buyo amoyo uulumba kwiinda mulusyomo lwako. Eelyo wacita boobo, Yahuwah Lwakwe uyookujana kolibambide.

“Nkaambo ngu Yahuwah uubeleka mumyoyo yanu, mbuli mbwayanda, akumupa nguzu zyoonse nzimubula niziba zyakukanza niziba zyakucita kuyanda Kwakwe.” (Bala Bafilipo 2:13.)


1 Kweempwa akwalo ncipego. Kuti kotayandi kulyaaba cakumaninina kuli Yahuwah, yebo inga wamulomba kuti azyokolole moyo wako uyande kulyaaba komaninide. Ulakonzya akulomba kuti moyo wako ucengululwe, uyande kulisungula. Kufumbwa ncoyanda kuti ubaa lufutuko buno buzuba, Yahuwah wakakonkezya kui ulakupa ncobeni.