Lufu lwamuyandwa luletelela kukotela mumoyo, kulyeempa kumwi kolangila ciindi cabili kuti kamucizumanana kuba antoomwe, alimwi kanjaanji . . . akuyandisya kubuzyilila mibuzyo.
Muciindi cabuumba eeci, muntu nali muntenda mpati mubuumi bwakwe boonse, mizeezo yakwe ilayandisya kuzyiba bwiinguzi kumibuzyo njajisi.
“Hena ono kwamanina limwi mweendoma mpagolela aawa?”
“Hena waunkila limwi?”
“Ninzi cicitika kuli nguwe cino ciindi?”
“Ino uteene kuli?”
“Tee kayi masimpe kuti mwanaangu uli kujulu cino ciindi...
Embo?”
“Nindalizyi buyo cili naa masimpe ncobeni!”
“Ime ndaminwa kuyeeyela kuti mwana ulasubulwa!”
“Ngu Leza wamusyobo nzi ooyu wuumpa bantu?”
“Mwati mwanaangu nkwali kutala lyookuya kalangilizya ndime?
Hena ulandeebela ncobeni ciindi coonse?”
“Lyoonse nokuba necita . . . . Nsyewukkomanini muzeezo wakulangilizyigwa boobo ciindi coonse!”
Taata wakujulu uulaa luyando, wakalizyi kuti bana Bakwe baanyika banoolaa mibuzyo mbuli yeeyi. Aboobo mu Mangwalo wakapa bwiinguzi ku moyo woonse ulilila mucamba. Bantu banji bayiisyigwa kuti liya muntu naafwa, muzimo wakwe uutafwi ulazumanana kupona. Nokuba boobo, iBbaibbele lilandabika buyo makani woonse mumilazyo yobile iiyubununa kuti ooku nkubeja kwa Saatani.
1 Timoteo 6:16 waamba kuti, Yahuwah alikke “nguutafwi, kakkede mu mumuni uutakonzyi kuswenwa munsimunsi a muntu.” IBbaibbele liyiisya kuti:
“Ooyo muntu uucita cinyonyoono, nguuyoofwa.” (Ezekiya 18:4, KJV)
Mangwalo alayungizya munzila iisalala kuya kumbele kuti:
“Kunyina muntu uutaciti cinyonyoono.” (I Bami 8:46, KJV)
“Nkaambo boonse bakabisya, akulezya kusika kubulemu bwa . . . [Yahuwah].” (BaLoma 3:23, KJV)
Lufu ncibeela camuntu woonse uupona, nkaambo muntu woonse wakabisya. Mulengi wesu uulaa moyo waluyando, kunyina pe naakakanzide kuti bana Bakwe kabapenga mucinyonyoono, wakatusalazyila mukudonaika koonse eeco cicitika lwasika lufu. 
“Muuya” tacili sikalalu, cizwa nokuba ceelo ceendeenda ooku akooku kacitakwe aakukkala.
Kumatalikilo, Yahuwah “wakabumba muntu kuzwa mubulungo bwaansi, akumuyoyela muya wabuumi mumpemo zyakwe, mpoonya muntu wakaba muntu muzumi.” (Matalikilo 2:7) “Muya” wamuntu tuukonzyi kuba ceelo ceendeenda nkaambo kuyandika mubili amuya wabuumi kuti muntu abe muntu muzumi
“Lyoonse muya wabuumi nuuciliko muli ndime, alimwi muya wabuumi ookwa [Yahuwah] nuucili mu mpemo zyangu.” (Joobo 27:3, KJV)
Kucinyina pe kulimvwa bulanga lwasika lufu.
“Utabikki lusyomo lwako mubana babami, nanka mumwana wa muntu uutakwe lugwasyo. Muya wakwe nuuyaamuka, ulabweeda kubuluongo; mubuzuba mbweenya oobo [mubuzuba bwa lufu lwakwe] mizeezo yakwe ilalobelela.” (Intembauzyo 146:3, 4, KJV)
Boonse bauntuluzyila malailile aasalazyidwe mu Mangwalo aaya aakuti kucinyina kulimvwa bulanga lwasika lufu, balinjizya mu ntenda yakuuninwa aamadaimona. Kunjilwa mizimo kunyina acimbi pele mbangele basofweede balipeekezya kuba muciimo ca muntu uufwide naakacili kulanga. Eeci ciyanza cilisinizyide kukasyigwa mu Bbaibbele.
Ciimo ca Taata uutamani cilizubuludwe cigaminina mu Mangwalo. 1 Johane 4:8 waamba kuti Yahuwah ngo luyando lukkwene lumaninide. Luyando lukkwene talusinganyi naba muntu omwe kuti akaumpwe kukabe kutamani mumulilo nkaambo buyo kazibi nzyaakacita mubuumi bomwe.
“Bulumbu bwa cinyonyoono ndufu.” (BaLoma 6:23a)
Lufu, kutali buumi butamani bwa kupenzyegwa, ncecisubulo ca cinyonyoono.
“Bazumi balizyi kuti bayoofwa: pele bafwide kunyina pe ncobazyi, nokuba bulumbu tabacijisi; nkaambo mizeezo yabo yakalubwa kaindi.” (Mukambausi 9:5, KJV)
Nokuba aciindi calufu, kubambilila kabotu-kabotu kwa Taata wa kujulu kulalibonya. Mangwalo atondezya kuti lufu kunyina acimbi pele nkoona. Eelyo naakasika kumunzi wa Jailosi, ooyo wakalaa mwana musimbi wakazwaa kufwa, Walo wakabakulwaizya kuti, “musimbi tafwide pe, pele uloona.” Aabo bakanjizyidwe mulimo wakoomoka tiibakamumvwisisya ncaakali kwaamba , aboobo “bakamunonga Walo.” (Bala Mateyo 9:24, NKJV)
 |
|
Mbuli basicikolo ba Bbaibbele basyomeka, lyoonse tweelede kuyaamina kucikkelo ca bumboni notuswata Mangwalo Mukweezyekanya tunsiyansiya a mangwalo, eeco cakapa kuti bantu bamwi batamvwisyi mbocibede bwini ciimo cabafwide |
Nobaba basikwiiya bakatilimuka kumvwa kuti lufu, ku Mulengi, “nkoona” biyo. Lazalosi naakafwide, Yahushua wakaambila basikwiiya Bakwe kuti, “Mulongweesu Lazalosi
uloona, pele ndaunka Ime ndikamubusye.” Basikwiiya tiibakavwisisya kuti Lazalosi wakafwa.
Balo bakati, “Ikuti kali uloona, inga waba kabotu.” Nokuba boobo, Yahushua wakali kwaamba lufu lwakwe, pele balo bakayeeyela kuti Walo wakali kwaamba kuti uloona kulyookezya. Mpawo Yahushua wakati kuli basikwiiya cakusalazya, “Lazalosi ulifwide.” (Bala Johane 11:11-14)
Eelyo ba Adamu a Eva nibakacita cinyonyoono, Mulengi wabo waluyando wakabalungulwida cakuusa mbubwakali kuyooba buumi bwabo butobela kuzwa waawo:
“Kuzwa ku mitukuta yakumeso kwako webo uyoolya cinkwa kusikila ukajokele mubulungo , nkaambo webo wakazwa mu mubulongo; uli bulongo, aboobo kubulongo uyoojokela.” (Matalikilo 3:19, NKJV)
Eelyo muntu nafwa, muya wabuumi ulapiluka kuMulengi alimwi mubili ulapilukila kubulongo mbuwaabambizyigwa. Munsaa mamanino aabuumi bwakwe,
Mwami Solomoni musongo wakakombelezya bantu boonse kuti:
"Koibaluka Mulengi wako mumazuba aabukubusi bwako,
Naataninga sika mazuba aakatazya [aabucembele],
Pele myaka izyaa kuswena munsimunsi eelyo webo noyooti, 'Ime nsyeyikkomanini pe.'
Koibaluka Mulengi wako bunweba bwa nsiliva nobutaninga sungununwa . . . .
Eelyo bulongo nobuyoopiluka munyika mbweenya mbubwakabede,
Alimwi muya nuuyoopilukila ku . . . [Mulengi] ooyo wakuupede."
(Mukambausi 12:1, 6-7, NKJV)
Mizeezo ilazima, mpoonya muntu uloona alimwi muya ulabweedela ku Mulengi.
“Mulufu kunyina kwiibaluka ndiwe: mucuumbwe nguni uunga wakulumbaizya?” (Intembauzyo 6:5, KJV)
“Bafu tabakonzyi kutembaula . . . [Yahuwah], nanka baabo baunka ansi kabaumwine.” (Intembauzyo 115:17, KJV)
 |
Kuli baabo boonse bamuyanda Mufutuli wabo, lufu nkoona biyo – nkulyookezya kuzwa ku milimo yabo eelyo nobacilindizya Uupa-Buuumi kuti azyokele akuzyoobabusya ku buumi. Eelyo Yahushua aakuboola ciindi cabili, Walo uyoobabusyila ku buumi boonse aabo bakafwa kabasyoma muli Nguwe
Mpoonya aabo bayoobusyigwa antoomwe abasalali bacinoopona bayootolwa Kujulu antoomwe a Nguwe.
Mbweenya mbuli mwaapositolo Paulu mbwaakakulwaizya Batesalonika:
"Ime nsyeyandi kuti mukkale kamutakubwene, banabokwesu, ku makani aajatikizya baabo boona, kuti mutafwi buumba mbuli baabo batakwe bulangizi. Nkaambo kuti swebo katusyoma kuti Yahushua wakafwa akubuka alimwi, mbubwenya abalo boona muli Yahushua Taata uyoobabusya Anguwe. Nkaambo eeci tulamwaambila kwiinda mujwi lyokwa Yahuwah, kuti swebo notucipona kusikila kukuboola kwa Yahushua tatukabasaangunini aabo boona (bafwide). Nkaambo Yahushua Lwakwe uyooseluka kuzwa Kujulu ajwi pati, mujwi lya mungele mupati, alimwi amweembo ookwa Yahuwah: mpoonya aabo bafwide muli Yahushua bayootaanguna kwiimpuka: Mpoonya aswebo notucipona tuyookwempulwa antoomwe ambabo mumakumbi tukaswaangane a Mufutuli muluwo; tuyookkala antoomwe mbweenya oobo a Yahushua. Aboobo amukulwaizyanye amajwi aaya." (Bala 1 Batesalonika 4:13-18)
Buumi butamani ncipego cokwa Yahushua ncapa kuli boonse aabo bamuyanda akumusyoma aciindi ca Kuboola Kwakwe Kwabili.
“Bulumbu bwa cinyonyoono ndufu, pele cipego cokwa Yahuwah mbuumi butamani kwiinda muli Yahushua Mufutuli wesu.” (Bala BaLoma 6:23.)
Kwaamba baabo bacinoopona aciindi ca Kuboola Kwabili, Paulu wakati:
“Amulange, Ime ndamutondezya maseseke; Tatukooni [tatukafwi] toonse pele tuyoocincigwa toonse, mukaindi kasyoonto, mukulaba kwaliso, waakulila mweembo wamamanino; nkaambo mweembo uyoolila, mpoonya aabo bafwide bayoobusyigwa kabatacifwi, aswebo tuyoosandulwa akubaa ciwa citafwi. Nkaambo eeci ciwa cifwa ceelede kusama kutafwa, ooyu mubili uufwa weelede kupindulwa kuba mbili uutafwi.” (I Bakolinto 15:51-53, KJV)
Boonse aabo bayanda akusyoma Mulengi kunyina nobeelede kuyoowa lufu.
Yahuwah wakasyomya kuti:
“Ime njoobanununa kuzwa kunguzu zya cuumbwe; Ime njoobanununwa kuzwa ku lufu: O lufu, Ime njooba penzi lyako;
O cuumbwe, Ime njooba lunyonyooko lwako.” (Hosiya 13:14, KJV)
Mubuzuba oobo, lwiimbo luyoomvwika amulaka uutafwi uuli woonse
luyooba lwakuti:
“O lufu, nduli luboole lwako?
O cuumbwe, nkuli kukoma kwako?”
(I Bakolinto 15:55, KJV)
Kuleka buyo kuba cintu cakumvwida bukandu akuyoowa, lufu nkulyookezya ooko Taata waluyando nkwapa mwanaakwe uuli woonse uukatede, uulindila kubuka kuzwa kubafu a aciindi ca Kuboola Kwabili eelyo “notutakaandaani kabili.”
Ninzi cicitika lwasika lufu?
Azimwi zyeendelana acibalo: