|
Kunjila mumunzi wa Jelusalema Mupya kuyeeme munzila njotubamba mulawo ookwa Yahuwah. Eeci cileta penzi nkaambo bantu bawide mucinyonyoono tabakonzyi kubamba mulawo ooyo weelede kubambwa kutegwa bakanjile mumunzi uusetekene. Nkulumba buyo Mwami Leza Yahuwah ooyo wakatubambila nzila yakwiinda mu penzi eeli.
|
Yahushua ziindi zinjaanji wakali kuyiisya mu twaano twa masendekezya alimwi cimwi ciiyo ncaakali kuyandisya cakali cakujana nzila yakuyoonjila mubulelo bwa Yahuwah. Cimwi ciiyo cilaa tusimpe twaandeene, tuvwula twiindwa kumbali ciindi aciindi.
“Ninzi ono nconga wayeeyela? Umwi mwaalumi wakalaa bana basankwa bobile, mpoonya wakeza kumutaanzi akumwaambila kuti, ‘Mwanaangu, koya, kabeleke sunu mumuunda wangu wamasaansa.’ Walo wakaingula kuti, ‘Ime nsyekonzyi kuunka,’ pele nikwaba aakale wakeempwa akuunka. Mpoonya wakeza kuli wabili akumwaambila mbweenya. Ooyo wakaingula kuti, ‘Ndaunka Taata,’ pele taakwe naakaunka pe. Nguli akataa bobile aabo wakacita kuyanda kwa wisi?”
Balo bakamwiingula kuti, “Mutaanzi.”
Yahushua wakabaambila kuti, “Ndimwaambila masimpe kuti basimitelo abavwuule bayoonjila mubulelo bwa Yahuwah kamutaninga njila inywe. Nkaambo Johane wakaboola kuli ndinywe munzila ya bululami, pele inywe tiimwakamusyoma pe; pele basimitelo abasibwaamu bakamusyoma; aboobo nimwakabona boobo, inywe tiimwakeempwa f] akusyoma muli nguwe. (Bala Mateyo 21:28-32.)
Kuteelela ncecintu ciyandika! Kunyansya ncinyonyoono. Mubwini, Mangwalo alisalazyide kuti: “Kufumbwa uucita cinyonyoono usotoka mulawo: nkaambo cinyonyoono nkusotoka mulawo.” (1 Johane 3:4, KJV)
Myaka minjaanji kataninga yiisya ciiyo ca bana basankwa bobile, Yahushua wakainduluka kwaamba ncokuyandika kapati kuteelela malailile ookwa Yahuwah woonse, kaambila Johane kuti: “Balelekwa aabo babamba milawo Yakwe, kutegwa bakabaa lwaanguluko lwakulya musamu wa buumi, akuti bakanjile mumilyango ya munzi.” (Ciyubunuzyo 22:14, KJV)
Kuteelela mulawo wabulemu ncintu cipa muntu “lwaanguluko lwakusika ku musamu wa buumi,” akumuzumizya kunjila mumunzi uusetekene. Ooko takuli kubamba tulawolawo; mbobwaamba Mangwalo oobo.
Ncobeni, eeci cijatikizya zinjaanji zisinkila buumi butamani: “Mbuli mbokulembedwe, Kunyina uululeme, pe, naba omwe: Kunyina uuteelela, kunyina uutobela Yahuwah. Boonse bakaleya munzila, alimwi tabacikwe mpindu; kunyina uucita ciluleme, pe, naba omwe.” (Langa mu Baloma 3:10-12.) Paulu wakaamba cakutaleyaleya kuti: “Boonse bakabisya, akulezya kusika ku bulemu bwa Yahuwah.” (Bala Baloma 3:23.)
Ikuti kuteelela nikwali kugwasyilila muntu kuyoonjila mumunzi uusetekene, alimwi kuti nikwanyina uukonzya kuteelela, ino nguni uunga wafutulwa?
Bwiinguzi, mbweenya mbuli penzi lyomwe-lyomwe, abwalo mbuubauba. “Pele aalumbwe Yahuwah, ooyo uutupa kuzunda kwiinda muli Simalelo Yahushua Messiah.” (Bala Bakolinto 15:57.)
Bulumbu bwa cinyonyoono, mbuli mbwaamba Paulu mu Baloma 6:23, ndufu ncobeni. Pele, cipego ca Yahuwah mbuumi butamani kwiinda muli Yahushua Messiah, Simalelo wesu. Mumajwi amwi ooku nkwaamba kuti, lufutuko ncipego. Lufutuko luyungizya kuteelela mulawo wabulemu. Babisyi tabakonzyi kubamba mulawo. Aayo nga masimpe. Aboobo, Yahuwah wakabambila muntu nzila; wakatupa Yahushua, walo wakabamba mulawo woonse akuulondola.
Munakristu woonse ulizyi kuti bulowa bwa Yahushua bulalunga mulandu wa zinyonyoono zyakwe Lweengelelo lwa Mufutuli lupegwa muntu uusyoma, aboobo nalekeledwe zinyonyoono zyakwe ulaimikila kunembo lya Yahuwah kalibonya kubee kunyina naakacitide cinyonyoono. Pele bunji bwa banakristu cintu ncobatazyi ncakuti, kuteelela Yahushua akwalo kulabalilwa mucibaka ca muntu uusyoma. Kuteelela, mbweenya mbuli kulekelelwa zibi, ncipego ca lweengelelo alimwi ceelede kutambulwa kwiinda mukusyoma.
Paulu upandulula kuti:
Pele bululami bwa Yahuwah kakwiina mulawo bulitondezyedwe, akubaa bumboni kwiinda mumulawo abashinhsimi;
Abwalo bululami bwa Yahuwah, ndolusyomo lwa Yahushua Messiah kuli boonse basyoma: nkaambo kunyina kusalauzya:
Nkaambo boonse bakacita cinyonyoono, akulezya kusika kubulemu bwa Yahuwah;
Bakalulamikwa cabuyo mulweengelelo Lwakwe kwiinda mukunununwa muli Messiah Yahushua:
Ooyo Yahuwah ngwaakatuma kuzyooba cituuzyo kwiinda mukusyoma mubulowa bwakwe, akwaambilizya bululami bwakwe bwa kuzimaanya zinyonyoono zyakainda, kwiinda mukweengelelwa aa Yahuwah;
Kwaamba ceeci, Ime ndati, aciindi cino bululami bwakwe: kutegwa alulame, akuba uululamika yooyo uusyoma muli Yahushua. (Bala BaLoma 3:21-26.)
Yahuwah ulizyi kuti kunyina muntu uuwide mucibi uukonzya kuteelela lwakwe mwini. Aboobo, Walo wakapa Yahushua “kuti aambilizye bululami bwa [Yahuhah] ” ku mubisyi. Eelyo mubisyi weempedwe nasala kuzumina cipego ca lufutuko kwiinda mukusyoma mulweengelelo lwa bulowa bwa Messiah, kuleka buyo zinyonyoono zyakwe nzyalekelelwa, pele buumi bwa Mufutuli bwa kuteelela kulondokede, abwalo bulabalilwa mucibaka cakwe ooyo uusyoma. Kwiinda mukusyoma kwakwe, ooyo musyomi ulaimikila kaluleme akuteelela kunembo lya Yahuwah.
Ooku kuteelela takuli kuteelela munzila ya kuliimya. Kulikke kuteelela kulondokede kutambulika kuli Yahuwah, kuteelela kuli boobo kujanwa buyo kwiinda mu kusyoma mulweengelelo lwa Yahushua.
Paulu upandulula kuti: “Kwiinda mulweengelelo mwakafutulwa; alimwi kutali lwenu nobeni: pele ncipego ca Yahuwah: Kutali ca milimo ya maanza eenu, nkaambo inga muntu kayoolipeekezya. Nkaambo swebo tuli mulimo wa maanza Aakwe, twakalengwa muli Messiah Yahushua kunoocita milimo mibotu, eeyo Yahuwah njaakatubambila kale kuti katweendela muli njiyo.” (Langa BaEfeso 2:8-10.)
Kwa ciindi cilamfu kapati, Saatani wakeena Banakristu batonkomene kuti kabalipenzya akudadanyana kubamba mulawo ookwa Yahuwah. Banakristu baliminidwe kucita Ceeci akulilesya kuti Eeciya, aboobo kuteelela kwamusyobo ooyu takutambuliki nkaambo, kuleka buyo kuti takulondokede, pele nkuteelela kwa milimo yamaanza aamuntu, kutali kwa lusyomo.
Boonse bayanda kuyoonjila mu Jelusalema Mupya, mubuumi buno, banikweenda kabatobela mumukondo wa Yahushua. Banooteelela mulawo wabulemu. Nokuba boobo, ooku kuteelela takusyi kubaletela lufutuko pe, pele lufutuko lubaboolela mukaambo kakuti bakafutulwa. Ooyu ngo “mucelo” kutali kuti “muyanda” wa lufutuko lwabo, alimwi uboolela buyo mu lusyomo.
Ncintu citakonzyeki kuyumya nsingo kulamatila cinyonyoono mpoonya akufutulwa aciindi comwe. Alimwi tacikonzyeki muciimo cesu ciwide mucinyonyoono, kubamba mulawo wabulemu. Zyoonse zyobile, kulekelelwa antoomwe a kuteelela, nzipego zipegwa bantu boonse aabo bazitambula kwiinda mu kusyoma. Cikobela ca bululami cokwa Messiah cilipedwe kuvwumbilila muntu uusyoma. Kutegwa muntu alanganyigwe kuti ulateelela, muntu uusyoma weelede buyo 1) kweempwa akucenguluka kuzwa ku cinyonyoono; alimwi, 2) akusimpa lusyomo lwakwe mucituuzyo cokwa Yahushua.
Kuteelela mulawo ookwa Yahuwah ncintu ciyandika. Pele kuteelela kwini ooko—takukonzyi kucitika nkaambo kaciimo cesu ciwide mu cinyonyoono — pele cipego cokwa Yahushua cakapedwa mucibaka cakuteelela ooku. Muukuteelela kwakwe Yahushua, kubalilwa mucibaka cako nkaambo kalusyomo ndojisi, nkokuyookupa kuti ukakonzye kunjila mumunzi wa Jelusalema Mupya akusika ku musamu wa Buumi.
|
Kutegwa uzyibe makani manjaanji aakutambula cipego ca kuteelela, koswiilizya musalo uulaa mutwe kuti “Sinless . . . through faith” muli Sikapepele waku WLC
|