|
Bulumbu bwiinda zyoonse buyoopegwa bakomi takuli kuleka kufwa. Pele, nkuyoobaa ciindi cibotu cakukkala munsimunsi lya mpabede Yahuwah mubulelo Bwakwe buzya anyika. Eelyo nobelesya lusyomo lwako kutambula lufutuko, kumwi kolibambila kuyookkala antoomwe a Yahuwah, eeco cini ncecibalilwa kuli nduwe kuti mbululami.
|
Cinyonyoono cilaandaanya muya wamuntu kuzwa ku Mulengi. Paulu wakapandulula kuti Yahuwah “Uulilelekedwe alimwi ngo Singuzuzyoonse alikke, Mwami wa Bami a Simalelo wa basimalelo, alikke nguutafwi, nguukkala mu mumuni uutasikwi munsimunsi, uutanabonwa nokuba uutaakonzyi kubonwa aamuntu; kuli nguwe akube bulemu anguzu ziteeli.” (1 Timoteo 6:15-16, KJV) Eelyo Mozesi, naakagambwa kubota ciwa cabulemu, wakakumbila kuti amubone Yahuwah busyu-abusyu, Yahuwah wakamupandulwida kuti, “Webo tokonzyi kundibona busyu Bwangu; nkaambo kunyina muntu uunga wandibona Ime, mpoonya kacipona.” (Kulonga 33:20, NKJV)
Muntu uuli boobu, uusumpukide citaambiki cakuti takonzyi akupandululwa bululami Bwakwe, uukkala mukati ka mumuni uutasikwi munsimunsi, tali muntu ngwanga mubisyi wakawida mucibi weendelana anguwe. Yahushua taakafwida buyo babisyi balikke pe: buumi bwakwe, kali muntu uukkwene buntu, wakayubununa Taata mbwaakali kunga waba kuti naali muntu wanyama.
Yahushua naakatambula bamatumbu abana babo, wakayubununa Taata kalaa maanza aatambikide kutambula baabo kanjaanji baindwa kumbali akataa buleya.
Yahushua naakaamba kuti, “Ambeyo nsyekupi mulandu; koya utakaciti kabili cibi,” eeco citutondezya Taata kamwetamweta akutondezya mbwabwene ciimo ca muntu, kalibambide alimwi kayandisyide kumulekelela zibi.
Yahushua naakaponya baciswa akuumbulizya batyompedwe mumyoyo, wakatondezya Taata mbwakumbatila mukowa wabantu, akugwasyilila kufumbwa mpakonzya kugwasya.
Muukuyubununa ciimo ca Taata ca luyando luteeli ooku kubambila moyo wabuntu kuti ukatambule bulumbu oobo bulindila basalali:
Alimwi Ime ndakamvwa jwi pati kalizwa kujulu kalyaamba kuti, “Amulange, cikkalilo ca Yahuwah cili akataa bantu, alimwi Walo uyookkala ambabo, abalo bayooba bantu Bakwe. Yahuwah Lwakwe unooli akati kabo alimwi uyooba Leza wabo. Alimwi Yahuwah uyoosansamuna misyozyi yoonse kumeso aabo; takucikabi lufu, nokuba buumba, nokuba kulila. Takucikabi kucisa, nkaambo zintu zyakaindi zyakamana.” (Bala Ciyubunuzyo 21:3-4.)
Kutegwa muntu akakkale munsimunsi lya Singuzuzyoonse; akulanga mubusyu butaambiki kusalala akubaa luyando luteeli … oobu mbobulumbu bwa baluleme. Makani mabotu ngakuti Yahushua wakaamba kuti, ooko kubambila muya wamuntu kusandula mubisyi kuti abe mwanaa Yahuwah, akukonzya kulanga mubusyu bwa Taata busyu-busyu, eeco ncecipego ca lweengelelo lwa bulemu. Eeci cipego cilipedwe ku muntu woonse, kunyina makani naa unjombede mucibi cili buti, pele kuti watambula cipego eeci a lusyomo.
BaLoma 3:10 (KJV) balaamba cakutaleyaleya kuti: “Kunyina uululeme, pe naba omwe peepe.” Bululami nkweendelana aamulawo wabulemu. Yebo tokonzyi kulisandula omwini kuzwa ku muzangi uugagambide cibi kuya kumuntu uululeme. Ambeyo nsyekonzyi pe. Pele Yahuwah ulakonzya kucita eeco. Coonse ncoyelede kucita nkulekela lusyomo lwako kuti lusiminine mu cisyomyo eeco, mpoonya cilazuzikwa mpeenya aawo!
Paulu, wakatola mulumbe mubotu ku masi, akubapandulwida kusanduka kwaaboolela bantu bakasyoma mumunzi wa Loma.
Ategwa ninzi caambwa mu Mangwalo? “Abulahamu wakasyoma Yahuwah, aboobo eeco cakabalilwa kuti mbululami kuli nguwe.” Lino kuli yooyo uubeleka, mali aakuvwola taabalwi kuti ndweengelelo pele ncikwelete.
Pele kuli yooyo uutabeleki pele kasyoma muli Nguwe uululamika batazyi leza, lusyomo lwakwe lubalwa kuti mbululami, mbweenya mbuli Davida awalo mbwapandulula kulelekwa kwa muntu ooyo Yahuwah ngwapa bululami kutali nkaambo kamilimo njaacita: “Balelekwa aabo balekelelwa micito yabo yakusotoka mulawo, alimwi balaa zibi zyabo zyavwumbilwa; walelekwa ooyo muntu Yahuwah ngwatakapi mulandu wacibi.” (Langa BaLoma 4:3-8.)
Mumajwi amwi ooku nkwaamba kuti, eelyo webo notambika janza lyako mulusyomo kuti utambule lufutuko, oolo lusyomo lwako lwini ndolubalilwa kuli nduwe kuti mbululami!
Acikkalilile mucamba eeci kwakaindi kasyoonto: mucito wini wakutambula lufutuko kwiinda mukusyoma ncecibalilwa kuli nduwe kuti mbululami.
Yebo kunyina ncoyelede kucita kutegwa waabilwe bululami oobo. Mubwini, kunyina yebo nconga wacita kutegwa upegwe bululami oobo. Coonse ncoyelede kucita nkuzumina a lusyomo. Mpoonya oolo lusyomo lwini ndobelesya kutambula cipego eeco alwalo ncipego cakwaabilwa buya!
“Ime ndaamba kuti, kwiinda mu lweengelelo ndweekapegwa, kuli omwe-omwe akati kenu, atalipeekezyi kuti ulisumpukide kwiinda mbwayelede kuyeeyela, pele abaa mizeezo iikkalikide, mbweenya mbuli Yahuwah mbwapede muntu omwe-omwe cisela ca lusyomo.” (Langa mu Baloma 12:3.)
Mpeenya buyo mboobelesya lusyomo oolo ndopedwe akutambula cipego cokwa Yahuwah ca bululami bwa Yahushua, Yahuwah ulakulengulula mucinkonzya Cakwe mwini. Alimwi, eeci tacili cintu nconga walicitila omwini pe. Ooyu mulimo Wakwe Yahuwah alikke kumugama.
Mpoonya njoosansaila meenda ali ndinywe, nkabela muyoosalazyigwa; Ime njoomusalazya kuzwa kubusofwaazi bwenu boonse amituni yenu yoonse. Ime njoomupa moyo mupya akubikka muya mupya mukati muli ndinywe; Ime njoogwisya moyo muyumu aanga ndibbwe kuzwa muli ndinywe akumupa moyo wabuntu. Ime njoobikka Muya Wangu mukati muli ndinywe akumweenzya mu milazyo Yangu, nkabela nywebo muyoobamba mbeta Zyangu akuzicita. Mpoonya inywe muyookkala munyika eeyo njindaapa bamauso; muyooba bantu Bangu, Ambeyo ndiyooba Leza wenu. Ime njoomuvwuna kuzwa kubusofwaazi bwenu boonse. (Ezekiya 36:25-29, NKJV)
Yahuwah wakakubambila kale zyoonse nzyoyanda kutegwa ukafutulwe.
Kumamanino, cili mumaanza aamuntu kuti asale, aboobo kunyina muntu uumbi uunga wakusalila pe. Ikuti yebo wasala, inga yebo waakukkala ncobeni munsimunsi lya Yahuwah uupa kukkomana koonse, lyoonse kukabe kutamani. Alimwi, kutali mbuli Mozesi Munkanda, yebo ulaaciindi cibotu cakulangana busyu-abusyu a Taata.
“Nkaambo lino tubwene buyo mbuli mucimbonimboni; pele eelyo tuyoobonana busyu abusyu; lino ndizyi buyo aasyoonto; pele eelyo ndiyoomuzyiba mbuli mbwezyibidwe.” (1 Bakolinto 13:12, KJV)
Cili kuli nduwe: kosala kutambula cipego Yahuwah ncakwaabila. Taata ulindila nduwe akulangila kutapanduluki kuti akwaabile bululami bwa Messiah. Eelyo notambula cipego eeci, Walo kukkomana kwakwe takweeli. Walo uyookkomana kapati cakuti, kukkomana Kwakwe kuyoomvwika mulwiimbo lwakuti:
Yahuwah wakagwisya kubetekwa kwenu,
Walo wakatanda sinkondonyoko.
Mwami wa Isilayeli, Yahuwah, ulaakati kenu;
Kucinyina ntenda iiyoomusikila kabili.
Yahuwah Elohimu wenu ulaakati kenu,
Singuzuzyoonse, uyoomuvwuna;
Uyoookkomanina ndinywe alukondo,
Walo uyoomuyanda aluyando Lwakwe mukaziziizi,Walo uyookkomanina ndinywe akwiimba.” (Bala Zephaniya 3:15 a17.)
Kotambula cipego eeci nkabela uyakwiimikila kunembo lya Yahuwah kolondokede kwiinda muli Yahushua. Yahuwah uyookkomaama akumwiimbilila.
