|
Eeci cibalo tacili ca WLC. Eelyo notubelesya zilembedwe aabalembi balaanze lya nkamu, tusimba buyo zyeezyo zyeendelana 100% a Bbaibbele a lusyomo lwesu cino ciindi munkamu ya WLC. Aboobo eezyo zibalo inga zyalanganyigwa kuti nzya nkamu ya WLC. Twakalelekwa kapati amulimo wabalanda ba Yahuwah banjaanji. Pele tatukulwaizyi ndinywe nobeenzuma kutalika kubala zyaalembwa abantu aabo. Eezyo nzibaalemba, twakazigwisya mumalembe eesu nkaambo kanjaanji zililubide akubaa tumpenda. Cintu cuusisya ncakuti tucilangaula mbungano yamilimo iitakwe kampenda. Ikuti konyandidwe nkaambo ka [zibalo/milumbe] iitali ya WLC, kobikkila maanu ku Tusimpi 4:18. Kuteelela kwesu nkwakuti kasimpe Kakwe kalazyokoloka, eelyo mumuni nuuyaa kumwesya munzila yesu. Tulakayandisya kasimpe kwiinda buumi, nkanko tulavwuntauzya kufumbwa nkokakonzya kujanwa. |
Bumwi buzuba, Ime ndakali sakene kulya musalo a mulongwaangu mujuuda eelyo naakakankamuka mujwi ligwitingene kuti “Yahushua wenu takonzyi kuba Messiah nkaambo kunyina luumuno munyika!”
Ime ndakamwiingula kuti Yahushua wakaboola ciindi cakutaanguna kuzyoopa cinunuzyo ca zinyonyoono zyesu akuzuzika Mangwalo aa Mulanda Uupenga—alimwi akuti Walo ulaafwi kuboola lwabili kuzyoobeteka nyika mu bululami akuleta musela wa luumuno a kululama.
Mulongwaangu wakandibbejela kaamba kuti, “Nkuli nkookajana muzeezo uuli boobu wa ‘Kuboola Kwabili’? Hena tacili nkaambo kakuti Yahushua wakaalilwa koonda mulimo ciindi cakutaanguna ncayooboola kusola lwabili na? IBbaibbele taakwe ncolyaamba cakuti Messiah uboola ziindi zyobile.”
Ambweni mulongwaangu wakali kubala bbuku lyaalembwa Mwiyi wamilawo Kaplan lilaa mutwe wakuti, The Real Messiah? eelyo limbedwe kuti, “Mulimo mupati wa Messiah wakali wakuzyola nyika akwiileta kuli Yahuwah akulesya nkondo zyoonse, kupenzyegwa akululamikwa munyika. Cilisalazyidwe kuti, Yahushua wakaalilwa kucita mulimo ooyu. Aboobo kutegwa azelauke kwaalilwa ooku, Banakristu bakaanza lusyomo lwa ‘Kuboola Kwabili.’ Zyoonse zishinshimi eezyo Yahushua nzyaatakazuzika ciindi cakutaanguna zyeelede kumanizyigwa ciindi cabili. Nokuba boobo, IBbaibbele lya BamaJuuda talikwe bumboni bwakugwasilizya lusyomo lwa ‘Kuboola Kwabili.’”
Bwiinguzi bwa ciyanza ca baJuuda mbwakuti naa Yahushua inga kanooli Messiah ooyo wakasyomezyedwe. Ncintu cizyibidwe kuti kunyina luumuno kuzwa ku mazuba naakaliko Yahushua—pele hena eeco caambilizya kuti Yahushua tali Messiah wakashinshimwa mu Bbaibbele lya BuJuuda na? Atulange mubuzyo ooyu.
Ikuti twalanga tunsiyansiya twa bamayi bamilawo, tulakonzya kubona kuti bamayi aabo, abalo, balaa penzi ku makani aaya. Nokuba kuti bashinshimi boonse bakapa cifwanikiso cisalazyidwe ca Messiah uulela akunununa Isilayeli, kumamanino aankondo aluzyibo lwa Yahuwah munyika yoonse (Izaya 2:1-4, Izaya 11:1-9, Ezekiya 40-48, Daniele 2:44, Zekaliya 14), kuli kkunga lya zishinshimi zimbi eezyo zyaambilizya Messiah kapengela kuba cinunuzyo ca zinyonyoono (Intembauzyo 22, Izaya 52:13-53:12, Daniele 9:25-26, Zekaliya 12:10). Ino mbubuti bamayi aaba mbobalanganya mizeezo yobile eeyi iikoya ilakazyanya mbwiipandulwide Messiah?
Cimwi cikonzya kulangilwa kucitika, kujokela musyule Ku musela watatu awane Kataninga sika Kristu, ncakuti, kuli ba Messiah bobile—umwi wiitwa kuti “Messiah mwanaa Josefa,” uupenga akufwa; umwi wiitwa kuti “Messiah mwanaa Davida,” ooyu uupa milawo akulela. Ooyu Messiah wiitwa kuba “Mwanaa Josefa” nkaambo Walo ulapenzyegwa akutundululwa mbuli Josefa ku Egipita (Matalikilo 37-41). Ooyo Messiah uulela wuulikidwe zina lyakuti “Mwanaa Davida” nkaambo Walo ulalela, kazundide mbuli Mwami Davida.
Saa kuli ba Messiah bobile—naa Bashinshimi bapandulula Messiah ngweenya omwe kaboola aziindi ziindene zyobile kalaa makanze aayindene na? Atuvwuntauzye muzeezo wabili.
Malembe aa buumi bwa Yahushua mu Cizuminano Cipya akosozya kuti Walo wakali Messiah ooyo uuzuzika zishinshimi zyoonse. Balembi ba Cizuminano Cipya bayiisya akuti Yahushua uyooboola lwabili alimwi aciindi citazyibidwe mumazuba aacizya. Cizuminano Cipya, aboobo ciyiisya kuboola ziindi zyobile kwa Messiah ngweenya. Oolu taluli lusyomo lwa kupangilila pele ncibeela ca mulumbe mubotu woonse wamu Cizuminano Cipya.
Ooku takuli kusendekezya kuti Yahushua wakaalilwa ciindi citaanzi aboobo uzyokela kuzyoosola lwabili alimwi pe. Kunze lyaboobo, eeci citondeka milimo yaandeene muciindi comwe-comwe ncaboola. Yahushua wakazuzika zishinshimi zina Messiah zya Mulanda Uupenga kwiinda mu kulyaaba Kwakwe kuti ape cinunuzyo ca zinyonyoono zya nyika. Walo wakazuzika zishinshimi zyabu Messiah azyalo: Walo wakazyalwa ku muumbulu (Izaya 7:14) ku Betelehema (Mika 5:2), alimwi Walo wakakambauka mulumbe wa makani mabotu ku bacete, akuleta lwaanguluko kuli baabo bakali mu buzike Ku cinyonyoono aku malwazi (Izaya 61:1-2). Walo wakajaigwa mbuli similandu—nokuba kuti Walo taakajisi cinyonyoono muli Lwakwe—wakapailila baabo bakalaa mulandu wa kumunjizya mu lufu, wakazikkwa mucuumbwe ca mwaalumi muvwubi, alimwi wakabuka kuzwa ku bafu mubuzuba bwatatu (Intembauzyo 22, Izaya 53, Zekaliya 12:10, Intembauzyo 16:8-11).
Eelyo Messiah Yahushua aakuzyokela kalaa nguzu a bulemu, walo uyooyubununwa kali Messiah ooyo wakali kulangilwa kwa ciindi cikubwene, Mwanaa Davida. Uyoolesya kubwekelana akulwanina atalaa Jelusalema, ooko kukonga kunyonyoona nyika (Zekaliya 12-14, Ciyubunuzyo 16-19). Walo uyoonyonyoona nzila eeyo yeeta zintu zya bumpelenge a busofwaazi a nyika alimwi amanyongwe aa kumamanino aaciindi (Jelemiya 51, Ciyubunuzyo 18), mpoonya uyoobamba mfulumende ya bulelo bwa kujulu ku Jelusalema, akuleta luumuno akululamika ku masi aanyika yoonse (Izaya 2:1-4, Ciyubunuzyo 20:4-6).
Akaambo ka masimpe aakuti Yahushua taakaleta luumuno loongola ciindi citaanzi naakaboolede, eeco tacimusinkili kuti Walo ngonguwe ncobeni Ooyo wakasyomezyedwe wa Isilayeli. Kunze lyaboobo, ncibeela mumakanze ookwa Yahuwah kuti Messiah aboole kuzyoofwa ciindi comwe kufwida zinyonyoono zyesu, akuleta lufutuko akulekelelwa kuli boonse aabo basyoma, akuzyokela aakale kali Mubetesi a Mwami. Muzeezo wa kuboola ziindi zyobile kwa Messiah kalaa makanze aayindene mbuli busanduludwe mu Cizuminano Cipya uleelela cinicini a “zifwanikiso” zyobile zya kupenga akulela kwa Messiah kujanwa mu Mangwalo aaci Hebulayo.
Yahushua Lwakwe wakati kuboola Kwakwe kutaanzi tiikwakali “mamanino aa makani woonse.” Walo wakati,
“Mutayeeyi kuti ndakaboolela kuzikuzimaazya Mulawo wa Mozesi akwiisya kwabasinsimi. Taakwe nindakaboolela kuzikazya pele kucita zilembedwe. Ncobeni ndamwaambila kuti julu anyika ziyoomana, pele taakwe nokaba kadosi nokuba keengwe komwe ka Mulawo kayoomana kusikila zyoonse zikazuzikwe.” (Mateyo 5:17-18).
Kuli biyo Messiah omwe luzutu uukonzya kuboola ziindi zyobile—alimwi ooko Kuboola Kwabili kulaafwi cinicini kusika!
Eeci ncibalo citali ca-WLC cakalembwa aaba Tony Pearce.
Twakagwisya mucibalo citaanzi mazina aabakomba mituni ngobayita Taata a Mwana, akubikka mucibaka cangawo mazina mataanzi ngubaapedwe. Kuyungizya waawo twakajokolosya mutumpango ntotulembulude akubikka mazina aa Taata a Mwana, mbuli mbwaakalembedwe kutaanguna abalembi bamu Bbaibbele bakayoyelwa moza. Nkamu ya-WLC