|
Masesekea akusanduka ali mukusiswa aa Messiah muli Yahuwah. Eeyi njenzila njapede Yahuwah mulweengelelo kuli yooyo uusyoma kutegwa akabalwe kuti ubamba mulawo wabulemu munzila iilondokede.
|
Eelyo bunji bwa bana-kristu nobayeeyela mulumbe mubotu, balo bayeeya cipego citaulwi ca kulekelelwa, oomo muntu uusyoma zinyonyoono zyakwe mozimwaigwa abulowa bwa Kristu kaimvwi kunembo lya Yahuwah mbuli muntu uutanacitide cibi. Pele cipego ca Yahuwah cilainda kuba buyo nsuwa iijisi bulowa bwa Messiah bwakusansaila akumwaya zinyonyoono zya mubisyi mu Bbuku lya Buumi.
Ciyubunuzyo cilisalazyide zintu ziyandika mubuumi butamani: “Balelekwa aabo babamba milawo Yakwe, kutegwa bakabaa lwaanguluko ku musamu wa buumi, akunjila mu milyango ya munzi.” ( Ciyubunuzyo 22:14, KJV)
Saatani ulizyi kuti zintu ziyandika kuti muntu ujane buumi butamani nokuba lufu luteeli tazicincide pe, zicili mbweenya mbuli kaindi; kuti watyola mulawo, ulafwa. Aboobo wakatalisya kupyopyongana mumakani aa mulawo wabulemu. Kujanza limwi, wakasolweda Banakristu batonkomene kuti basyome kuti, mubuumi buno, beelede kubula cinyonyoono kutegwa bakafutulwe. Nkaambo kakuti bayandisya ncobeni kulemekezya Yahuwah akucita ziluleme, ncintu cuubauba ku nkamu eeyi kutyompokelwa kumwi kabadadanyana kucita milimo ya bunakristu. Nkaambo kakuti Yahuwah ulisetekene pele balo balisofweede, balaliimya akulipenzya kapati kutegwa abalo basetekane, kakubaanga kuliimya ncecintu cipati mubukkale bwa bunakristu.
Imwi nkamu ya Banakristu, ayalo kiitonkomene mbuli nkamu ntaanzi, baliintide kwiindilizya waawo. Balibwene mbocitakonzyeki kuti muntu uuwide mucinyonyoono abule cibi. Aboobo, nkaambo kakuti eeco ncintu citakonzyeki, bazumanana kwaamba kuti Yahuwah kunyina naciyanda kuti bantu kabateelela malailile aakwe. Munkamu ya bunakristu eeyi, Saatani wakababambila lweeno lwakuboongelezya kuti mulawo wabulemu wakagagailwa aciciingano”, aboobo tuuceelede kubambwa akutobelwa.
Kutegwa batakwe cinyonyoono bafutulwe -------------------------------------------------------------- Mulawo tuuceelede kutobelwa
Zyoonse zyobile nkamu eezi taziluleme. Johane wakatondezyegwa bakomi alimwi walo wakaamba kujatikizya kubamba mulawo wabulemu kuti: “Nkooku kubikkilila kwa basalali: mbaaba babamba milawo yokwa Yahuwah, a lusyomo lwa Yahushua.” (Bala mu Ciyubunuzyo 14:12.)
Bwiinguzi bwa penzi eeli lilangika aanga talikonzyi kubambulwa, ngu Yahushua. Eelyo webo nosala kutambula cipego ca lufutuko, webo ulaabilwa zinji kutali buyo kulekelelwa zinyonyoono zyako zyakaindi. Buumi bwa Yahushua butakwe cinyonyoono akuteelela mulawo wa Yahuwah cakumaninina, bubalilwa mucibaka cako. Paulu wakalemba kuti:
Kuti kamuli mwakakomezyelwa muli Messiah, amukakatile muli zyeezyo zili kujulu, ooko Messiah nkwabede, kakkede kululyo lwa Yahuwah. Amugamike mizeezo yenu azintu eezyo zili kujulu, kutali zyeezyo zili ansi. Nkaambo mwakafwa kuli zyeezyo, aboobo buumi bwenu bulisisidwe muli Yahuwah. Eelyo Messiah uuli ngo buumi bwesu aakulibonya, mpoonya inywe muyoolibonya aNguwe mubulemu. (Langa mu Bakolose 3:1-4.)
Kusiswa antoomwe a Messiah muli Yahuwah. Eeyi njenzila ilikke muntu njanga walangila kulanganyigwa kuti uteelela mulawo. Alimwi, mbweenya mbuli cituuzyo cabulowa cakumwaizya zinyonyoono, acalo eeci ncipego cakupegwa buyo, kufumbwa muntu uucitambula mulusyomo. Kuyuba antoomwe a Messiah muli Yahuwah, ciiminina kumaninina kubaa lusyomo mu cituuzyo cabulowa kuti cakamwaya zinyonyoono, kuti zinyonyoono zyesu zyakalungilwa abululami bwa Yahushua. Pele ooko takuli kulungila buyo zinyonyoono zyakaindi pe. Nkulungila zinyonyoono akulubizya nkotucicita nkaambo kabuntu bwesu mbotuwide mucibi.
Boonse aabo bayubila antoomwe a Messiah muli Yahuwah, eelyo aakuzyokela Yahushua, bayoopegwa ciimo cisumpukide. Mpoonya, alimwi lilikke buyo eelyo, nobayoopona maumi aatakwe cinyonyoono.
Paulu wakaambila Bakolinto kuti:
Lino nceeci ncemwaambila, bakwesu, kuti nyama abulowa tazikonzyi kunjila mubulelo bwa Yahuwah: nanka busofwaazi tabukonzyi kukona bululami.
Amulange, Ime ndamutondezya maseseke; Tatukooni toonse pe, pele tuyoosandulwa, mukaindi kasyoonto, mukulaba kwa liso, waakulila mweembo wamamanino: nkaambo mweembo uyoolila, mpoonya bafwide bayoobusyigwa kabatacifwi, mpoonya tuyoosandulwa toonse.
Nkaambo ooyu mubili uusofweede uyoosanduka akuba mubili uutasofweede, ooyu mubili uufwa uyoosanduka kuba uutafwi. (Langa mu 1 Bakolinto 15:50-53.)
Davida wakali mubisyi. Wakakwete maali, wakali mubeji, wakali mumambi, alimwi wakali mujayi. Pele, nokuba kuti wakalaa zinyonyoono zinji boobo, Mangwalo aamba kuti wakali muntu uuyandisya cili mumoyo ookwa Yahuwah. Walo wakali munu wakali kuyandisya cili mumoyo ookwa Yahuwah nkaambo walo wakali kuyandisya mulawo ookwa Yahuwah.
Mulawo ookwa Yahuwah tuuli mulwi wazintu zizumizyidwe kucita aziteelede kucitwa pe. Ncimbonimboni cilembedwe citondezya ciimo cokwa Yahuwah ca luyando! Davida naakaibaluka cintu eeci wakaimba kuti, “O Ime ndauyandisya mulawo wako! Buzuba boonse nditontomene kuyeeya buyo mulawo wako.” (Intembauzyo 119:97, KJV) Ikuti yebo koyanda kuyooba muntu uuyandisya cili kumoyo ookwa Yahuwah mwini, kokkomanina mulawo Wakwe (ciimo Cakwe), yebo weelede kutola ciindi mu jwi Lyakwe. Mbocili cuubauba oobo, kwamana, pele ncintu ncoyelede kusala kucita eeco. “Mulawo ookwa Yahuwah ulilondokede, ulasandula muya wamuntu; bumboni bwa Yahuwah buli masimpe, bulasongwaazya muntu uutalisumpuli.” (Intembauzyo 19:7, NKJV)
Eelyo nosala kutola ciindi kobala jwi lya Yahuwah, muya Wakwe ulakusandula. Mulengi wako uba yooyo Uukulengulula.
Ime njoomusalazya kusofwaala kwenu koonse kuzwa ku mituni yenu. Ime njoomupa moyo mupya akumubikka moyo mupya mukati muli ndinywe; Ime njoomugwisya moyo muyumu mbuli bbwe kuzwa mumibili yenu akumubikka moyo wanyama. Ime njoobikka Muya Wangu mukati muli ndinywe akumucita kuti mweendele mu milazyo Yangu, akuti mukabambe mbeta Zyangu akuzibamba. (Ezekiya 36:25-27, NKJV)
Eelyo notola ciindi cilamfu mujwi lya Yahuwah akutontomana kuyeeya ciimo Cakwe, mbweenya mboyootalika kubona kuti ukkomanine akuyandisya ciimo eeco. Alimwi, eelyo nosika ambaakani yakuti kucinyina ncoyanda kwiinda zyoonse pele buyo kuti ube antoomwe a Yahuwah, Walo uyookutambula kuti ooko nkokukakatila kwako kumaninide. Izinyonyoono akulubizya ncibeela ca ciimo ciwide mu cinyonyoono ncotutakonzyi kweeleba; pele topegwi mulandu nkaambo kazintu eezyo. Ulatalika kusanduka munzila yeebeka oomo buumi bulondokede bwa Yahushua mobubalilwa mucibaka cako. Ncenciceeci Paulu ncaakali kupandulula eelyo naakalemba kuti:
Pele ooyo uutabeleki, pele ulasyoma sikululamika basizibi, kuliyooyo lusyomo lwakwe lulaambwa mbuli bululami. Mbubonya oobo alakwe Davida mbwaamba coolwe camuntu ngwayelezya bululami Yahuwah cakutaamba milimo. Wati,
Bali acoolwe abo balekelelwa milandu yabo, Azibi zyabo zyavwumbwa.
Ulaa coolwe ooyo muntu ngwateelezezyi zibi Yahuwah. (BaRoma 4:5-8)
Bulowa bwa Yahushua bulatusanzya zinyonyoono zyesu. Pele kwiinda waawo, bululami bwakwe bulatuvwumbilila mukwaalilwa kwesu. Kuteelela mulawo cakumaninina Kwakwe akutobela kuyanda kwa Yahuwah, kulatuvwumbilila bubi bwesu kutegwa Yahuwah katulanganya aanga tulilondokede akutonkomana kubamba milawo Yakwe, nokuba kuti ooko kupegwa bulemu, tunoolubizya ciindi aciindi nkaambo kaciimo cesu ciwide mucibi.
Eeci ncecipego citapanduluki cipa kuti mazina eesu kaacilembedwe mubbuku lya buumi lya Mwanaambelele. Lino kubamba mulawo kwa Yahushua mbokubalilwa mucibaka cesu, tuyoozumizyigwa kunjila mumunzi akulya micelo ya musamu wa buumi, nkaambo “kunyina cisofweede ciyoonjila mumunzi oomo, nanka muntu uucita zitondwa akubeja: pele balikke aabo balembedwe mwibbuku lya buumi lya Mwanaambelele.” (1599 Bbaibbele lyaku Geneva)
|
Kutegwa umvwe makani manji aacipego cakuvwumbwa bululami bwa Yahushua, langaula musalo wakuti “Hid with Christ in Yahuwah” muli Sikapepele waku WLC.
|