|
Lufutuko ncipego, pele mulimo wamuntu mwini kuti azumine lufutuko. Kunyina naba omwe uunga watambwida muntunyina umwi lufutuko pe; kunyina uunga walyaaba mucibaka ca muntunyina pe.
|
Kutamvwana inga caba cintu cileta tunjaanji akataa mwaalumi amukaintu wakwe. Inga caleta mazwanga antenda mucikwati. Mu 2011, Cikuwa cakasalwa kuti ube mulaka weelede kubelesyegwa abantu beenzya ndeke abeendelezi ba ndeke munyika yoonse. Nokuba boobo, kweendelanya bwakaamba ba Dokota Dominique Estival, bayi bamilaka kucikolo cipati caku Australia, abalo beenzya akuyiisya kweenzya ndeke, akaambo kakutamvwisyisya malailile aambwa akataa weenzya ndeke ayooyo uumulailila, “cakaleta lufu kubantu bainda 2000 mu ntenda zyakubbeuka ndeke kuzwa akataa myaka ya 1970.”1
Mbuli mbozitaambiki ntenda eezyi, bantu banji, kabatakubwene, abalo balalubizya munzila iikonzyanya ayeeyi —ambweni akwiindilizya awaawo — kulubila mubweende bwa moza. Balekela bama pasita, bapaizi abasololi babupaizi kuti babacitile mulimo walufutuko ngobeelede kulicitila beni.
Mboobu mbobatalika kubaanga kwiina cilubide. Umwi mwana ulayiisyigwa abazyali bakwe kuti Jeesu ulamuyanda; mukubusi nali mucikolo ca bapasita ulalaililwa kutobela cikombelo camukwasyi ookwabo. Kuzwa kubwana, bayiisyigwa ncobeelede kusyoma kwiinda kuti batambule ciindi cibotu cakulibalila kasimpe lwabo. Eeci cilazumanana kusikila kubudaala. Mu Nsondo nokuba Mujibelo, Banakristu bali 2.4 bbiliyoni balanonzomana mukati kazikombelo kabayiisyigwa musyobo wa Bunakristu umwi, kabasyoma mupaizi nokuba pasita kuti abaambile ncobeelede kuzyiba kutegwa bakafutulwe.
Ipenzi liliko aawa ndyakuti, balekela mulimo wabo mumoza mumaanza aa muntunyina umwi. Bamapasita abapaizi banji balamuyanda ncobeni Yahuwah, pele kabatakubwene kuti luyando lwabo lwini lutaanzi ndwakuteelela mbungano yabo iibavwozya mali. Aboobo, bunji bwabo basulaika kasimpe kuti kasimpe kakateendelani azintu nzyobasyoma mu cikombelo.
Johane wakaambilizya kuti: “Alimwi ndakamvwa jwi limwi kalizwa kujulu kalyaamba kuti “Kamuzwa muli nguwe nobantu bangu, mutalisanganyi muzibi zyakwe, kutegwa mutasubulwi antoomwe anguwe: nkaambo zibi zyakwe zyalundana kusikila kujulu, aboobo Mwami Yahuwah waibaluka zinyonyoono zyakwe.” (Ciyubunuzyo 18:4-5, 1599 Geneva Bbaibbele) Aaya malailile aasinizyide nga bantu boonse. Kunyina mbungano yiindidwe kumbali pe.
Kwiinda mumushinshimi Ezekiya, Yahuwah wakacenjezya ntenda iiliko mukulekela lwaanguluko lwako lwakusala cibotu acibi kumuntu umwi.
Ijwi lya Yahuwah lyakaboola kuli ndime alimwi kalyaamba kuti : “Mwanaa muntu, eelyo nyika niicitila Ndime cibi akuzumanana kutasyomeka … Ime njoolesya kupa cakulya akwiitumina nzala, akukosola muntu amunyama uukkala munyikeeyo. Nokuba kuti aaba balombwana botatwe, ba Noah, Daniele, a Joobo, kabali muli njiyo, inga bakonzya buyo kulivwuna lwabo kwiinda mubululami bwabo,” mbwaamba Yahuwah Elohimu.
“Ikuti ndazumizya banyama bamusyokwe kuti banjile akataa nyika, akukwamauna kufumbwa ciliko, … nokuba kuti aaba balombwana botatwe kabali muli njiyo, kufumbwa nendiliko,” mbwaamba Yahuwah Elohimu, “inga tiibakonzya buyo kuvwuna maumi aabana babo basankwa nokuba basimbi; inga bavwunwa buyo balikke pele nyika inga yanyonyoonwa akubula cintu.
“Nokuba kuti Ime ndalekela cceba kuti liinde munyika eeyo … akukosoola muntu amunyama kuzwa muli njiyo, nokuba kuti aaba balombwana kabaliko oomo mbuli mbwembona,” mbwaamba Yahuwah Elohimu, “inga tiibakonzya kuvwuna bana babo basankwa abasimbi , pele balike lwabo inga bavwunwa.
“Naa kuti ndaleta bamwi kuti bazoolwane cisi eeco akuti, 'Nkeyanda kuti nkondo ivwumpe cisi eeci, akujaya bantu baco abanyama babo,' masimpe nikuba kuti baalumi botatwe aaba bakali mulincico, tiibali kunookonzya kucivwuna, nikuba kuvwuna bana babo balombe nobaba basimbi. Balo balikke mbendali kunookonzya kuvwuna. Nyika lwayo niyanyonyoonwa.
“Cimwi ciindi ndatuma cuumo mucisi eeco akutondezya bukali bwangu bwakunyonyoona bantu abanyama antoomwe. Masimpe nikuba kuti ba Nowa, Daniyeli a Jobo kabali mulincico, nibatakonzya kufutula bana babo balombe nobaba basimbi. Nibakalifutula buyo akaambo kabululami bwabo beni. Mbwaamba Mwami Yahuwah.” (Ezekiya 14:12-20, NKJV)
Muntu takonzyi kulyaaba cakumaninina mucibaka ca muntunyina umwi. Lufutuko ncipego, pele eeco ncipego ca muntu omwe omwe ncayelede kutambula lwakwe mwini. Mulumi takonzyi kutambwida mukaintu wakwe lufutuko; muzyali takonzyi kutambula lufutuko mucibaka ca mwanaakwe uukulide kale. Ninzi acimwi, mufundisi nokuba mupaizi takonzyi kutambwida muntu uumbi lufutuko pele buyo lwakwe mwini.
Kuli basyaazyibwene bagaminina muntu omwe-omwe mubupaizi bwaba Hindu. Cuusisya ncakuti, Banakristu banjaanji bacengulukila kubafundisi abapaizi kuti babe mbabeendelezya maumi aabo. Balakaka kuteelela akujulila mizeezo ku mumuni mupya. Balo bayeeyela kuti, kuti kakuli ncobayanda kuzyiba, mupaizi wabo inga wabaambila. Ikuti musololi wabupaizi bwabo wasulaika muzeezo mupya, abalo mpeenya aawo nkuzuminizya kakwiina kulivwuntawida. Eeyo nje ntenda yakusyoma mumuntu umwi kuti akusalile cakusyoma kuti nkakasimpe.
Kubikka mufundisi wako kuti abe nguukweendelezya mu moza tacili cintu cikulesya mulimo wako wakulivwuntawida kasimpe kunembo lya Yahuwah. Yebo tokonzyi kuyaamina mu bafundisi ba Bbaibbele, bapaizi, bamapasita, bamayi babajuuda, ba imamu, nokuba basyaazyibwene kuti bakwaambile ncoyelede kusyoma. Yebo omwini weelede kulivwuntawida akusalalilwa lwako.
Eelyo novwuntauzya kasimpe omwini, moza ookwa Yahuwah uba mwiyi wako. Kaindi kasyoonto munsaa lufu lwakwe, Yahushua wakati: “Ime ndaazintu zinjaanji zyakumwaambila, pele tamukonzyi kuzyimvwisyisya cino ciindi. Nokuba boobo, Moza wa kasimpe, aakuboola, uyoomweenzya mukasimpe koonse.” (Johane 16:12-13, NKJV)
Eelyo moza ookwa Yahuwah naba mufundisi wako, yebo ulakkalilila mukasimpe cakuti tokonzyi kuzungaanyigwa. Yebo ulayumya kubaa nguzu muzintu nzyosyoma, alimwi citobela ncakuti, ulakwabililwa kuzwa kulweeno lwa Saatani lwa mamanino. Mukwiimpanya, kuti kosyoma buyo nkaambo kakuti umwi muntu ncaakakwaambila kusyoma eeco, yebo uli muntenda. Aboobo kufumbwa muntu inga waboola, alimwi kuti ooy kali mucenjezu kapati, inga wakupindula lusyomo.
Kolibalila omwini!Saatani ulasola kukonga bantu akubalesya kulibalila lwabo beni. Walo ubaambila kuti Bbaibbale ndibbuku liyumu kuteelela, aboobo balikke basicikolo balaa lwiiyo lusumpukide mbabakonzya kulimvwisyisya. Ooku nkubejelwa buyo! IBbaibbele lyakalembelwa muntu mutuba!
Paulu wakakulwaizya Timoteo kuti: “Kobala kutegwa ulitondezye kutambulika kuli Yahuwah, ube mubelesi uutausyi nsoni, waabanya jwi lyakasimpe munzila yeelede.” (2 Timoteo 2:15, KJV) Taakaamba kuti muntu weelede kuyandaula mwiyi wiinda busongo munyika, nokuba kukkala koswiilizya pasita. Paulu wakaamba cigaminina muntu kuti: omwe-omwe wesu uleelede kulibalila, “akwaabanya jwi lya masimpe munzila iiluleme” akusyoma muli Yahuwah kuti atusolwede mukasimpe koonse.
Kwiinda muli Izaya, Yahuwah wakatusomba mulwiito lukondelezya kuti: “Amuboole tumvwane antoomwe.” (Izaya 1:18, NKJV) Eeci ncecikonkezyo cokwa Yahuwah kuti kufumbwa lugwasyo nokuba bumboni mboyanda kutegwa umvwisyisye kasimpe, Walo uyookupa.
Utalekeli lufutuko lwako mumaanza aamuntunyoko umwi: kutali pasita wako, kutali mupaizi wako, kutali ngomukwetene limwi.
Lufutuko ncipego yebo ncoyelede kutambula lwako omwini.
1 “Fatal consequences of miscommunication between pilots and air traffic controllers,” cakayobololwa mu mwezi wa Kasangalubwi 12, 2019