|
Banakristu boonse balazuminana kuti lufutuko ncipego cakupegwa muluzyalo. Pele, nokuba kuumbulizyigwa kuli boobu, banakristu banji, bacitingaana kabatakubwene kwiindilana kulijanina lufutuko mumilimo yanguzu zyabo, eeco citeendelani alusyomo lwabo.
|
Hudson Taylor, umwi mukambausi wakatumidwe ku China mumusela wa 19th , aciindi cimwi wakalemba kuti:
Kumubisyi omwe-omwe, uuminidwe mukuli uulaa cikkelo, [Yahushua] umwaambila kuti, “Koboola kuli ndime kuno ulyookezye.” Pele nkobacili bantu bamwi bajisi lusyomo pele bacidadanyana kuminwa mikuli. Abalo balitambidwe mumajwi ngeenya aayo. Amumvwisisye majwi ookwa [Yahushua] aamba kuti, ikuti mulimo wako wakuminya, utayimpyi kulidadanyika kubeleka mulimo pe. Malailile Aakwe taali aakuti, “Koya ukabeleke. Utaleki kusikila umanizye,” mbuli muntu umwi mbwanga wasendekezya pe. Pele mukwiimpanya waawo, malailile Aakwe ngakuti, “Koyima kace, tula mulimo ansi, koboola kulindime kuno ulyookezye.” Kunyina pe noliba lyomwe Kristu naakasukuma muntu uukatede kuti azumanane kubeleka pe; kunyina pe naakatuma muntu uufwide nzala, uubulide nguzu, uucisidwe nokuba muntu wuuside kuti aye kuyoobeleka mulimo pe. Kubantu bali boobo, IBbaibbele lyaamba buyo kuti, “Koboola, koboola, koboola.”
Kulisungula abuzuba, kuzunda zinyonyoono zikukopede, akukkala buumi bululeme zyoonse micelo buyo iboola aalufutuko.
|
Banakristu balisyomezyedwe kwa ciindi aciindi kuti lufutuko ncipego cakupegwa buyo citakwe muulo. Pele nokuba boobo, kucili muzeezo wakusendekezya kuti, muntu uusyoma weelede kucita cibeela camulimo cimwi kutegwa azumanane kufwidwa luzyalo akufutulwa. Lufutuko ncipego cakupegwa buyo citakwe muulo. Eeco muntu uusyoma awalo ncintu ncazumina, pele tee kayi mulimo wakwe ngwakulisungula akuteelela abuzuba, kulya zintu zisalala, kuliimya, kuzunda masunko azinyonyoono zimukopede, azimwi zinjaanji. Ede kuti taacita boobo, kulangilwa kuti inga wanyangwa cipego citawulwi ca lufutuko.
Umwi sikutongooka wansiku, Martin Luther, waakaka muzeezo wakusendekezya boobu. Walo wakabuzya mubuzyo wakuti: “Hena taali makani mabotu aakusyoma kuti lufutuko taluzyili muli ndiswe?”
Kulyaaba abuzuba, kuzunda masunko aazinyonyoono zizinga muntu, akupona buumi bweendelana a Mwami Yahuwah, zyoonse eezyo micelo buyo iilibonya mucipego ca lufutuko. Aboobo eeyo micelo, tiikonzyi, alimwi kunyina pe niinga yaba milimo yabululami iiyandika kutegwa muntu azumanane kubaa cipego cakupegwa buyo ca lufutuko.
Lufutuko lyoonse ndwakutambula buyo; kuleka kuvwozyegwa pe.
Nkaambo aswebo kaindi twakali bafuba-fuba, bataswiilili, basweekede, bayandisya kucita zitondwa. Twakali bazike bazisusi zyaandeene-andeene. Twakali kukkala muzibi mbuli bbivwe. Bantu bakali kutucimwa aswebo twakali kucimana.
Pele ciindi bubotu aluyando lwa Yahushua Mufutuli wesu nizyakayubununwa, wakatufutula. Taakatufutula akaambo kamilimo iiluleme njitwakacita pe, pele akaambo kalweengelelo Lwakwe. Wakatufutula akutusanzya akutupa kuzyalululwa kupya abuumi bupya kwiinda mu Muuya Uusalala. Muli Yahushua Kristu Mufutuli wesu, Yahuwah wakatupa Muuya Uusalala camaanza obilo. Wakacita eezyi kuti tululamikwe muluse Lwakwe akuti tukakone buumi butamani oobo mbotulangila.(Taitas 3:3-7, NKJV)
Paulu ulizuunyene awalo kwaamba kuti: lufutuko taluli milimo imwi ya bululami muntu njaakabeleka amaanza aakwe pe. Pele, lufutuko nkweengelelwa buyo akuyandwa kuzwa kuli Taata. Kuyungizya waawo, tuuli mulimo wabasyomi kulisalazya mumoza pe. Kunze lyaboobo, eeco cijisi mulimo wakuzyalulula a “kusanzya muntu kuti ayakululwe” acalo ncipego cakupegwa buyo: Muya wa Yahuwah Lwakwe, nguutuminwa ku basyomi boonse basyoma kuti beengelelwe kwiinda mubulowa bwa Yahushua.
Lufutuko, lyoonse kuzwa lili, ncipego cakupegwa buyo.
Lino Yahuwah watuyubunwida bululami Bwakwe munzila njalulamika bantu, nzila eeyi tiili yakubamba Mulawo pe. Naba Mozesi abasinsimi balazuminana kuti nzila yokwa Yahuwah njalulamikila bantu boonse, nkusyoma Yahushua Kristu kuli boonse basyoma.
Taakwe lusalululo pe; nkaambo boonse bakabisya, bakalezya kuba aabulemu mbuli bwa Yahuwah. Pele nkaambo kaluse lwakwe Yahuwah ulabalulamika. Eeci ncipego buyo caluzyalo kwiinda muli Yahushua Kristu wakabanununa. Yahuwah wakapa kuti mulufu lwakwe abe nzila yakulekelela zinyonyoono zyabantu bamusyoma. Eeci ncitondezyo cabululami bwa Yahuwah. Kale-kale Mwami Leza Yahuwah wakali kuleka buyo zinyonyoono zyabantu nkaambo kalweengelelo lwakwe. Pele ono wapa Yahushua kutondezya bululami bwakwe, kutegwa bantu bazyibe kuti Walo uliluleme alimwi nguululamika yooyo uusyoma muli Yahushua.
Sena muntu inga kalisumpula amakani aalufutuko? Peepe, takonzyi. Nkaambo kamulawo nzi? Naa milimo nzi? Peepe, pele nkaambo cintu cipati kuli Yahuwah tiili milimo, pele mulawo wa lusyomo. Aboobo tulakosozya kuti muntu ulalulamikwa kwiinda mulusyomo, kutali mukubamba Mulawo (BaLoma 3:21-28)
Kululamikwa ndibbala lipati ncobeni lyaamba buyo kuti lino muntu walanganyigwa kuti uliluleme. Eelyo muntu nalulamikwa, Yahuwah ubikka bululami bwa buumi bwa Yahushua butakwe cinyonyoono alufu lutakwe mulandu mucibaka ca muntu uusyoma. Lino nasamikidwe bululami bwa Kristu, muntu ulaimikila kunembo lya Yahuwah kabee kunyina naakacitide cinyonyoono pe.
Eeci ncipego cipati cabulemu, pele ncipego cizumanana kuleta zileleko ku muntu. Tacili cipego cakupegwa ciindi comwe buyo kwamana, pe. Webo tolulamikwi nootalika buumi bwa Bunakristu, mpoonya kociyandika kuzumanana kululamikwa kwiinda mubuumi bwakuliimya kulya akupona kotaciti cinyonyoono, peepe, nkaambo kuzunda cinyonyoono acalo ncipego cakupegwa buyo.
Pele Yahuwah ulivwubide alweengelelo lunji, alimwi wakatuyanda kapati kwiindilila. Nikuba kuti twakalifwide akaambo kazibi zyesu, wakatupa buumi abusena bwabulemu antoomwe a Kristu kujulu, kutegwa mumisela iicizya Walo akatondezye buvwubi bwa luzyalo Lwakwe bwiindilila zyoonse mukutufwida nkumbu kwiinda muli Kristu Yahushua. Nkaambo inywe mwakafutulwa aluse lwa Yahuwah kwiinda mukusyoma. Tiimwakafutulwa nkaambo kazeezyo nzimwakacita pe. Pele eeco ncipego ca Yahuwah, kutali camilimo yanu, aboobo muntu atalikankaizyi pe. Yahuwah nguwakatulenga. Twakalengwa muli Kristu Yahushua kuti tubeleke milimo mibotu, eeyo Yahuwah njaakatubambila kale-kale kuti twiicite akweendela muli njiyo. (BaEfeso 2:4-10)
Lufutuko kwiinda mu lusyomo ncecitozya muntu kukubaa lufutuko, kutali milimo webo njocita nocengulula meso aako kuzwa kuli Kristu akutalika kusumpula micito yamaanza aako. Inga muntu watalika akulidunda kuti ulikkutide eelyo naliimya kulya maccokoleti ngayandisya kapati, cakwaayanda ncobeni, pele nkaambo walo uyeeya kuti ajisi musamu uugwitinganya mubili, aboobo aliimya kulya nkaambo ooyo musamu ulaa ntenda kuli nguwe. Kunyina nonga walimvwa kusumpuka eelyo nobona Banakristu bamwi bacita cintu nceenya ayebo ncosisikizya kucita, pele nkaambo “munakristu wamasimpe teelede kucita / nokuba kulya / nokuba kunywa / akulangilizya cintu eeco,” ayebo ulaliimya akulilesya zintu eezyo caantangalala.
Muntu uulimvwa kusumpuka mumoza kwiinda bamwi, utondezya buyo mbwalaa penzi lyakuyandisya lufutuko kwiinda mumilimo yamaanza aakwe. Mukwiimpanya boobo, Paulu waamba kuti, ngu Yahuwah “wakatubamba kuti tupone antoomwe aKristu.” Aboobo mulimo wesu ngwa kusyoma nguzu zya cipego eeco ncaakatwaabila: “Ikuti yebo walilekelela zibi zyako amulomo wako, kuti Simalelo wesu ngu Yahushua, akusyoma mumoyo wako kuti Yahuwah wakamubusya kuzwa kubafu, yebo uyoofutulwa.” (BaLoma 10:9)
Aboobo kuti naa muntu umwi kali muli Kristu, walengululwa bupya. Zintu zikulu-kulu zyamana; amulange zyoonse zyaba zipya. Ooyo wacita eezi ngu Yahuwah, walo wakayanzana andiswe kwiinda muli Kristu. Eelyo wakatupa mulimo wakukambauka luyanzano oolu. Lino tukambauka kuti muli Kristu, Yahuwah ulayanzanya bamunyika anguwe, tabalauki zibi zyabo. Aboobo watupa makani aaluyanzano oolu. (2 Bakolinto 5:17-19)
Mulimo wa nzila ya lufutuko ujatikizya zintu zinjaanji kuleka buyo kuyandisya kuvwuna babisyi kuzwa ku lufu luteeli pe. Magolelo eeni ngakubaleta kuti beendelane antoomwe batalike alimwi kumvwana cilongwe ciyumu nta a Mulengi wabo. Ooyu ngo mulimo uukonzya buyo kucitwa a Mulengi wesu Lwakwe alikke. Walo nguutulengulula mu cinkonzya Cakwe, akuyakulula mumoyo wabuntu oobo busalali mbutwakasweekelwa eelyo Adamu naakawida mu cibi.
Lino muntu uusyoma nasalazyidwe, utalika kuba “omwe” a Taata. Lino muciindi cakuti kalipenzya kuliimya zintu zibotu, eelyo ooyo muntu uusyoma natalika kucita kuyanda kwa Yahuwah, mubwini unoocita zintu nzyayandisya ncobeni.
|
Eeci ncipego citakwe muulo! Lino muntu uusyoma nasalazyidwe, utalika kuba “omwe” a Taata. Lino muciindi cakuti kalipenzya kuliimya zintu zibotu, ooyo muntu uusyoma natalika kucita kuyanda kwa Yahuwah, mubwini unoocita zintu nzyayandisya ncobeni. Ncenciceeci kuteelela ncokutakonzyi kukuvwuna muntu kuti ooko kuteelela kakuli kwakucita buyo ziluleme kuzyila mumoyo wako omwini. Kulikke kuteelela kuzyila mumoyo uusalala nkokutobela kutambulika ku Mwami Yahuwah, alimwi ooko kusalala boobo kujanwa buyo mucipego cakupegwa kuzwa kuli Nguwe.
Muuya Uusalala anabwiinga balati, “Boola!” Ayooyo uumvwa makani aaya aambe kuti, “Boola!” Kufumbwa uufwide nyota aboole anywe cabuyo maanzi aapa buumi. (Ciyubunuzyo 22:17)
Augustine waku Hippo, muna kritsu mutaanzi, sicikolo walwiiyo lwa buleza, aciindi cimwi wakaamba kuti: “Ooyo wakatulenga kakwiina uumugwasya takonzyi kutuvwuna kuti tiitwamuzumizya kutuvwuna.” Lufutuko, kutaanguna alimwi lyoonse kusikila kumamanino, ncipego cakupegwa buyo. Pele cili kuli nduwe kuti naa ulayanda kusala cipego eeco naa pe. Kukosozya ncaakaamba Augustine: Ooyo wakatulenga kakwiina lugwasyo luzwa kuli ndiswe, alimwi kakwiina uumuzumizya, ulatulengulula swebo mbweenya buyo kakwiina lugwasyo luzwa kuli ndiswe.
Aciindi cino, lufutuko ndulwako mukwesu, Kunyina cintu nconga wacita kuti uvwozyegwe cipego citakwe muulo cili boobo pe, kunyina milimo nokuba kuteelela nkokonzya kucita kuti uzumanane kupegwa cipego eeco pe. Lufutuko lulakuletela zyoonse nzyobulide kuti uyakululwe ube mucinkonzya ca bulemu bwa kujulu, alimwi eeco kusanganya antoomwe akuteelela kuzyila mu moyo uusalala akulitolaansi.
Yebo tokonzyi pe kuwina lufutuko. Nokuba boobo, yebo ulakonzya kutambula cipego eeco. “ Mbombubo kuli kulyookezya kubantu ba Yahuwah mbubuli mbwaakalyookezya Yahuwah mubuzuba bwaciloba. Nkaambo kufumbwa ooyo uunjila mukulyookezya kwa Yahuwah walyookezya kuzwa kumilimo yakwe, mbuli Yahuwah.” (BaHebulayo 4:9-10)
Kosala buno buzuba! Kotambula cipego ca Yahuwah ca lufutuko, mpoonya ayebo ulakonzya kulyookezya muli Nguwe.
|
“Kufumbwa muntu wazyalululwa muli Yahuwah wakoma nyika. Nkooku kuzunda kukoma nyika yoonse – lusyomo lwesu.”
|
