|
Bululami bwa kwaabilwa tabukonzyene a buluami bwakulijanina lwako omwini. Koya kumbele kubala wiiye kasimpe kakondelezya ka ciiyo ca lufutuko. |
Tujisi makani aayinda kubota ngotuyanda kwaabana anduwe mukwabo!
Kutegwa ujane buumi butamani, yebo weelede kululama mbweenya mbuli Yahushua mbwaluleme. Eeci caambilizya kuti yebo weelede kubamba mulawo ookwa Yahuwah mbweenya mbuli Nguwe mbwaakacita: kululamika milawo yoonse. Kwiina kuleyaleya. Kwiina kulezya. Mubukkwene.
Inzya. Oobu mbobubotu bwamakani aaya. Nkaambo, masimpe eeni ngakuti, yebo tokonzyi kucita cintu eeci.
Aswebo tatukonzyi kucicita cintu eeci mubukkwene pe. Kunyina muntu uunga wacicita anguzu zyakwe.
Pele ono ngaaya makani aakondelezya ncobeni: Mwami Leza Yahuwah ulizyi kale kuti yebo tokonzyi kucita cintu eeci, aboobo Walo takulangili kucita boobo! Zyoonse zyili kale mumaanza Aakwe.
Makani mabotu aa lufutuko ngakuti yebo ulakonzya kufutulwa, nokuba kuti yebo tookkwanya kucita zyoonse ziyandika munzila ya lufutuko. Yebo lwako omwini, tokonzyi kubaa bululami buyandika mumulawo ookwa Yahuwah. Ncenciceeci Yahuwah ncaakasungwida Yahushua. Walo, wakali “Mwanaa mbelele ncobeni ookwa Yahuwah uugwisya zinyonyoono zya nyika.” (Kobala Johane 1:29, KJV.)
“Nkaambo mbobuya Yahuwah mbwaakabayandisisya bantu boonse bamunyika, wakatuma Mwanaakwe Simuzyalwa alikke, kuti kufumbwa uumusyoma atafwidilili, pele abe abuumi butamani. Nkaambo Yahuwah taakwe naakatuma Mwanaakwe kubantu kuti azoobabeteke, pele kuti bantu bakafutulwe anguwe.” (Kobala Johane 3:16-17, NKJV.)
Mulawo wabulemu waambilizya bulumbu bwa cinyonyoono: “Nkaambo bulumbu bwa cinyonyoono ndufu, pele cipego ca Yahuwah mbuumi butamani muli Yahushua Kristu Simalelo wesu.” Nkaambo “boonse bakabisya, akulezya kubulemu bwa Yahuwah.” (Kobala BaRoma 3:23), kulayandika kuba Mufutuli. Aboobo, Yahushua wakazyalwa ansi aano: wakali muntunsi ncobeni, pele Walo kutali mbuli Adamu, wakasala kubamba mulawo wabulemu cabulondo.
Yahushua alikke ngomuntu wanyama wakabamba mulawo wabulemu cakumaninina. Eelyo naakafwa aciciingano, wakafwa kali mukomi. Nkaambo kunyina naakabisyide, Yahuwah wakaliluleme kumubusya kuzwa kubafu.
Eelyo mubisyi nayempwa akutambula lufu lwa Yahushua mucibaka cakwe kwiinda mulusyomo, Yahuwah ubweza [bululami] bwa Yahushua bwakutobela mulawo wabulemu akububikka mucibaka ca mubisyi weempwa akusyoma.
Paulu upandulula mbuucitika mulimo ooyu, naamba kuti: Ndabona kuti ndakakankaminwa antoomwe a Kilisito aciingano. Aboobo lino buumi mbwepona tabuli bwangu pe, pele mbwa Yahushua Kilisito uuli muli ndime. Buumi oobu mbwepona sunu mumubili mbwakusyoma Mwanaa Yahuwah, ooyo wakandiyandisya akwaaba buumi bwakwe nkaambo kangu. (Kobala BaGalatiya 2:20, KJV.)
Eelyo yebo notambula Yahushua kuti ngo Mufutuli wako, walo nguubbadela mulandu wako. Lufu Lwakwe lubbadela cikwelete coonse ca mulandu wa zinyonyoono nzyookacita yebo. Mpoonya, mulimo weebeka wakucincanya luzyalo lwabulemu, bululami Bwakwe kwiinda mumulawo bubikkwa mucibaka cako akwaangulula nduwe. Oobu mbululami bwakwaabilwa buya. Zinyonyoono zyesu zyabikka amutwe wa Yahushua, kutegwa tupegwe bululami bwakwe amucibaka cazinyonyoono zyesu. “Kilisito wakanyina cinyonyoono, pele Yahuwah wakabikka zinyonyoono zyesu alinguwe, kuti swebo tube balulami kuli Yahuwah kwiinda muli nguwe.” (Kobala 2 Bakolinto 5:21, KJV.)
Ooku “kululamikwa kwiinda mulusyomo” ncintu comwe akululamikwa nkaambo kakusyoma. Mubwini, muci Giliki, ibbala lya kululamikwa, abbala lya bululami, ndibbala lyomwe ndeenya buyo.
Kufumbwa buyo nocisyite muli Yahuwah, kosyoma muluzyalo lwa Yahushua, yebo ulivwumbilidwe abululami bwakwe kuzwa kumulandu wa cinyonyoono. Yebo noyimvwi kunembo lya Yahuwah kubee kunyina noninga citide cinyonyoono. Ooku nkwaabilwa bululami kutamani kucitika lyoonse.
Aaya nga makani mabotu aalufutuko! Mbweenya buyo Abrahamu mbwaakasyomya Isaka kuti, “[Elohimu] Lwakwe ulatupa mwanaa mbelele wakupaizya,” (Matalikilo 22:8, NKJV) Walo wakatupa ncobeni, alimwi ooyo mwanaa mbelele ngu Yahushua, Mwanaakwe mwini.
Boonse batambula caabilo ca bululami bwa Yahushua, ncobeni, banooyanda kupona maumi aabo kweendelanya akuyanda kwa bulemu. Mukubula coolwe, aawa bantu banji mpampawo mpobalubizya. Bayeeyela kuti bululami bwa Yahushua mbobaabidwe inga bwabasandula munzila yamasalamuzi kuti basetekane akubula kampenda mubuumi buno.
Nkulubizya ooku. Mwaapositolo, Jemusi, wakacenjezya kuti: “Toonse ulalubizya muzintu zinjaanji.” (Jemusi 3:2, NKJV) Musyomi uululamikidwe ooyo uutambula moza wa Yahuwah uukkalilila mukati kamoyo uleka ncobeni kucita cinyonyoono ncazyi mumoyo wakwe. Pele, mbuli bwaamba Jemusi, kucinooli kulubizya nkaambo kakutazyiba akuluba, nokuba kubula nguzu. Zinyonyoono zicitigwa kotakubwene nokuba kuti kobulide nguzu tazili mbuli cinyonyoono cicitwa kokanzide amaanu aakkwene kucicita. Kunyina muntu wakeempwa ncobeni uunga wazumanana kucita cinyonyoono cizyibidwe.
Eelyo moza wa Yahuwah nuulela mukati ka moyo wamuntu, muntu uusyoma ulanganya cinyonyoono mbweenya mbuli Yahuwah mbwacilanganya. Mukuya kwaciindi, inga watalika kuyungizya kucimwa cinyonyoono, eeco caandaanya muya wamuntu kuzwa kuli Yahuwah. Paulu wakapandulula mbocicitika eeci, kaamba kuti: “Kuzwa ono cinyonyoono tacili aanguzu kulindinywe, nkaambo ceendelezya buumi bwanu tuuli Mulawo pe, pele nduse lwa Yahuwah lutaambiki. (BaRoma 6:14, KJV) (Mulawo waambwa aawa, “mulawo wa cinyonyoono a lufu” waambwa mu BaRoma 8.)
Mumajwi amwi, toonse tuyandika kweengelelwa abululami bwa Yahushua, nkaambo toonse tuli babisyi. Pele, eelyo notusala kusyoma mucipego caluzyalo cokwa Yahuwah abuzuba, kutalika kuba kusanduka kulibotela. Eelyo notukakatila kuzyiba akucita luyando lwa Yahuwah, Walo ulemba mulawo Wakwe mumyoyo yesu. Langa lino mutumpango tutobela ootu mbokucitika ncobeni kusanduka ooku.
“Ime njoomupa myoyo amizeezo mipya, njoomugwisya moyo uuli mbuli bbwe, ndiyoomupa moyo mupya. Ime njoomupa nguzu zya Muuya wangu, ndiyoocita kuti mukatobele malailile Aangu akuti mukabambe ilawo Yangu.” (Ezekiya 36:26-27, NKJV) Kuzwa ku kululamikwa kwiinda mukusalazyigwa, lufutuko lyoonse ncipego cizwa kuli Yahuwah, alimwi ooyo mulimo Wakwe.
Eelyo muntu nayaa kusanduka, utalika kweendelana akuyanda kwa Yahuwah cakuti, nokuba kuti ucita cintu ncaliyandila mumoyo wakwe, pele eeco ncacita mubwini ucita buyo kuyanda kwa Yahuwah.
Mbweenya mbuli kululamikwa mbocili cipego, akwalo kusetekana mbweenya buyo.
Kusetekana mulimo uutola buumi boonse uuletela bululami mumoyo wamuntu. Kulatalika aawo mubisyi naalulamikwa. Ooyu mulimo usandula muntu kuti abe muciimo cabulemu alimwi ulazumanana kucitika kusikila bantu basyoma batambula ciimo ceebeka eelyo Yahushua aakuzyokela bapa bulemu basaante.
Kululamikwa ngomulimo Yahushua ngwaakatujanina kwiinda mukulisungula kwaaba buumi bwakwe. Kusetekana ngomulimo Yahushua ngwabeleka mukati mumyoyo yesu, kutalikila eelyo notwalulamikwa.
Eelyo Mufutuli naakali anyika, wakali kugolela mpotugolela aswebo mubweende bwa ciindi amisinzo. Pele naakabuka kuzwa kubafu, wakapegwa cipego ciindene ca Muya Uusalala ookwa Yahuwah kuti aabanye basikwiiya bamutobela. Ooyu moza wakali kcita mulimo wakusandula moyo alimwi wakatuminwa basikwiiya mubuzuba bwa Pentekkositi.
Yahushua wakapandulwida basikwiiya, kaamba kuti: “Ndiyanda kumwaambila masimpe kuti, ncibotu kulindinywe kuti ngunke. Nkaambo kuti nsiciti boobo Mugwasyi takoosika kulindinywe pe. Pele naa ndainka ndiyoomutuma kulindinywe.” (Johane 16:7, KJV)
Ooyu muya ookwa Yahuwah wiindene uciliko mazubaano kufumbwa ku muntu uusyoma! Ucipedwe cigaminina kcita mulimo wakusandula akusalazya moyo wamuntu amizeezo, akwiilbamba kuti yeendelane amoyo amuzeezo wabulemu.
Mubwini, kusetekana nkweendelana aa Mwami Yahuwah. Eelyo notuyaa kusetekana, mizeezo yesu, zintu nzyotuyandisya, amakanze eesu atalika kweendelana a Taata alimwi tulakkala Anguwe mu luumuno. “Lino nkaambo kakuti Yahuwah watwaamba kuti tuli balulami akaambo kalusyomo, kuli luumuno akati ka Leza andiswe. Mwami wesu Yahushua Kilisito nguwakatujalwida nzila yakuti kwiindila mulusyomo Yahuwah atufwide luzyalo motubede sunu. Aboobo tulatangala kuti tuyokwaabilwa bulemu bwa Yahuwah.” (Kobala BaRoma 5:1-2, KJV.)
Kululamikwa kwaambilizya kuti mubisyi walulamima.
Kusetekanya ngo mulimo uusandula muntu kuti abe muciimo cabulemu bwa kujulu.
Mumajwi amwi, kusetekana mucelo wa kululamikwa. Aawa, mpeenya aawa, mpaali makanze ookwa Yahuwah aalufutuko lwesu. Kufumbwa buyo mubisyi naatambula lufutuko akusyoma luzyalo kwiinda mubululami bwaYahushua, walo ulatambulika kuti ulilondoke mu Mufutuli. Kufumbwa ciindi Taata nacenka muntu uusyoma uulitolaansi, Walo ubwene bululami nokuba kuti mulimo wa kusetekana tuuninga bamba muntu uutonkomene kulondoka!
Ooku nkulibotela kwini, bubotu bwa mulumbe mubou butapanduluki! Kufumbwa buyo musyomi weempedwe nacikkede muli Kristu, ulivwumbilidwe abululami bwa Kristu bukkwene nokuba kuti ucicita zinyonyoono nzyatakubwene, zinyonyoono zyakulezya kucita ciluleme, nokuba zyakwaalilwa nkaambo takwe nguzu.
Mulimo wa kusetekana umanina mukupegwa bulemu eelyo mubili wacinyonyoono nuucincanyigwa akupegwa mubili wa moza, mbweenya mbuli ngwaakapegwa Yahushua, “mutaanzi kuzyalwa kuzwa kubafu” eelyo naakabuka kuzwa kulufu.
Lino banabokwesu Ime ndamwaambila, kuti mubili wanyama abulowa tuukonzyi kukona bulelo bwa Yahuwah; nokuba busofwaazi tabukonzyi kukona bulemu. Amubone! Ndamwaambila makani aasisidwe. Tatukooyoofwa toonse pe, pele toonse tuyoosandulwa, mukaindi kaniini buyo mukulaba kwaliso, waakulila mweembo. Nkaambo mweembo uyoolila, nkabela bafu bayoobuka amibili iitafwi, eelyo aswebo tuyoosanduka. Nkaambo mubili ooyu uubola uleelede kusanduka kuba uutaboli, mubili ooyu uufwa uleelede kusanduka kuba uutafwi. (Kobala 1 Bakolinto 15:50-53, KJV.)
Kotambula cipego ca lufutuko sunu! Kukkomana akuzunda kulindila boonse aabo batambula bululami kwiinda mulusyomo.