Lumwi lwiimbo lwakalaa mpuwo kumatalikilo aamyaka ya 1970 lwakali kutalisya aamabala aayasa kumoyo aakuti: “Ikuti cifwanikiso kaceelene amajwi aali cuulu, nkaambo nzi ncetapenti buyo cifwanikiso cako?1
Cifwanikiso caambwa kuti “nkupenta mabala aali cuulu”, nkaambo cifwanikiso nociba cakulambaika misyobo-misyobo, nokuba cifwanikiso cakusimba aamuncini uufotola, citondezya makani aanga ayandika kupandululwa mumabala akulembwa mumapeeji manjaanji, pele nokuba leelyo, zimwi zibeela zyamakani aayo inga zyalangilwa kusiigwa anze.
Izitondezyo nzifwanikiso zya Mizeezo eezyo zitondezya cintu cinga caambwa mumabala aali cuulu mu Mangwalo. Citondezyo citondezya mulumbe mupati uunga wainda muvwi kuti nikwatali citondezyo. Umwi mukonzyanyo mupati mu Bbaibbele ujanwa muli Johane Mubbizyi naakali kwaamba Mufutuli kuti “Mwanaambelele ookwa Yahuwah uugwisya zinyonyoono zyanyika. ” (Johane 1:29, KJV). Kakwiina mabala aamwi aambwa aawo, eeci caambwa inga cafwamba kuletela mizeezo yamuntu eeco cicitwa mucituuzyo cakununuzya muntu wakawida mucinyonyoono.
Acimwi citondezyo nkocili mu Mangwalo, ciiminina Melechizedeki. Intembauzyo 110:4 yaamba kuti: “Yahuwah wakakonkezya, alimwi takabweedi musyule pe, Webo uli mupaizi kwa lyoonse alyoonse mumulongo wa Melechizedeki. ”
Eeci cintu cilaa mulimo mupati nkaambo kakuti icintu cini ncocaamba cikoya maambila mbali eelyo mulembi wa bbuku lya baHebulayo nainduluka kwaamba bbala lyomwe-lyomwe lya kampango aaka mu BaHebulayo 7:17: “Nkaambo ooyo uukonkezya wati, Webo uli mupaizi lyoonse alyoonse mumulongo wa Melechizedeki. ” (KJV)
IBbaibbele lyoonse lilalipandulula lwalyo lini kwiinda muzitondezyo, aboobo cilikke muntu ncayelede kucita muntu nkucengulukila buyo kubbuku lya Matalikilo 14 akwiiya kuti wakalini Melechizedeki mwini acintu ncaakazyibidwe mpuwo.
Myaka minjaanji kataninga zyalwa Isaka, nguwaapa kuti Abrahamu amwetemwete akuti Sarah amvwugwe kayide kulisekela, eelyo Loti amukwasyi wakwe kabataninga fumpwa akutolwa buzike munkondo yakalwanwa akataa bami baku Kanaani bongaye. Eelyo Abramu naakamvwa maŋunuŋunu aayo, wakabinda kubunganya lumamba lwa balanda bakwe akutandila bafumpi, kuyoosikila kubbazu lya kunyika kulaale, ooko nkwaakakubavwunina boonse bakafumpidwe, antoomwe azintu zyakabbidwe kuzwa mumasi aamumisena.
Mpoonya Abrahamu alumamba lwakwe naakali kupiluka kutozya kumusanza, kwakamuswaanganya muntu umwi uulangika bweenzu kazya kuzyoomuswaanganya. Matalikilo 14:18 aamba kuti, “Mpoonya Melechizedeki mwami waku Salemu wakamuletela cinkwa awaini: alimwi wakali mupaizi wa Leza Mupati ali boonse.”
Melechizedeki wakali mwami alimwi wakali kupaila “Leza mupati ali boonse, ” Yahuwah. Pele aaka kaano takamanini buyo mpeenya aawa pe. Melechizedeki wakaleleka Abramu, mpoonya awalo wakapa kwakkumi kuli Melechizedeki!
Naakamanizya kutambula kwakkumi kuzwa kuli Abrahamu, ooyu muntu mweenzu, wakabweeda akuleka kubonwabonwa mumisela yakatobela nsiku alimwi tanabonwa kuzwa ciindi eeco. Tatuzyi pe nkwaakazyila; tatuzyi naa bakali bani bazyali bakwe; tatuzyi ambwaakakkala acuuno ca bwami nokuba naakaba mupaizi wa Yahuwah. Kufumbwa mulumbe wamanjenzyeezya tuukwe busena aawa pe, kwacaala buyo mulumbe uuyandika ngotupedwe. Walo ulibonya buyo kwakaindi kasyoonto alimwi mbweenya mbuli mbwabbuka kulibonya, ulayabaila, pele mumuntu mweenzu ooyu, kusisidwe makani aalaa ziiyo zibotu kapati zya mulimo wa Mufutuli wakabuka kuzwa kubafu.
Izina lini lya, Melechizedeki, liiminina “mwami wabululami. ” Mangwalo atupa mulumbe uutakwe kampenda wa basimilimo baalilwa kucita zintu akubula nguzu pele kabatonkomene ncobeni kusyomeka muli Yahuwah, pele kunyina cilembedwe cili boobo caambilizya Melechizedeki. Aboobo muli ceeci, walo uleelela kapati kuba mucibaka ca Yahushua. Kunyina awumwi muntu wakali kutondeka kuli Messiah mbuli Melechizedeki.
Mulembi wa BaHebulayo wakapandulula kuti:
Lino amuyeeye bupati bwamuntu ooyu mbobubede, wakapegwa kuli sikale Abrahamu cimanyakkumi ca lubono ndwaakaakusaala. Alimwi aabo babana ba-Levi, abanjila bupaizi ncobeni babalilwa kumulawo, kuti basangilwe cimanyakkumi kubantu, nkokuti abalo mbazyalwa ba Abrahamu; pele ooyo uutali walunyungu lwabo wakatambula cimanyakkumi kuzwa kuli Abrahamu akumulongezya walo ngwaakasyomezya zisyomyo. Lino tatukwe muntu uuzumanana kuti musyoonto walongezyegwa aamupati wakwe. Alimwi sunu bantu baide kufwa buyo mbabasangilwa cimanyakkumi, pele walo ulatambula kwa kkumi kuzwa kuli mbabo, kwalo ooko omwe wakasangilwa ngowakapa bumboni bwakuti nkwali alimwi muzumi. Mbwaanga awalo Levi, uutambula cimanyakkumi, awalo wakasangila kwakkumi kuli Melechizedeki kwiinda muli Abrahamu, kwaamba boobo, nkaambo wakacili mucikungu ca wisi eelyo Melechizedeki naakaswaanganya Abrahamu. (BaHebulayo 7:4-10, NKJV)
Masimpe kuti Melechizedeki wakaleleka Abrahamu, wisi wa Aaroni abamukowa wakwe, akutondezya kuti bupaizi bwa Melechizedeki mbupati kwiinda bwa ba Levi.
Melechizedeki taakali buyo “Mwami wa bululami. ” Mbwaakali Mwami waku Salemu, wakali “Mwami wa luumuno, ” nkaambo kakuti munzi wa Salemu wiiminina luumuno. Alimwi,
eeci ncitondezyo ceebeka ciiminina Yahushua ooyo waambwa kuti “Mwanaa Mwami wa Luumuno.”
Aabo basyoma baleza botatwe kwaciindi cikubwene bakali kweezyeezya kuti Melechizedeki wakali Muya Uusalala nokuba Kristu kataninga zyalwa. Bamwi balaindizya kuya kumbele kuti Melechizedeki wakali Taata muciimo cabuntu. Nokuba boobo, manjezyeezya aamusyobo ooyu azwide buyo zintu zilubide eezyo zyakacaalizya kuzwa kulusyomo lwa bupaizi bwa baleza botatwe.
Melechizedeki wakali muntu susu ncobeni. Kunyina pe nociceya mu Mangwalo caambilizya ciimpene aceeco. Aboobo, walo wakali kkwene cakumaninina kutondeka ku Mufutuli, ooyo mu Mangwalo uuyubununwa kuti, awalo wakali muntu uukkwene ncobeni.
Kutegwa anunune mukowa wabantu akaambo kacibi mwaakawida Adamu, Yahushua wakeelede kuba muntu susu wanyama ncobeni. “Nkaambo kwiinda mucibi camuntu omwe banji bakafwa, aboobo luzyalo lwa Yahuwah a cipego ca Mwaalumi omwe, Yahushua Messiah, cakagwasyilizya banjaanji.” (BaLoma 5:15, NKJV)
Alikke mukonzyanyo (citondezyo) cikkwene buntu ncecakali kukonzya kutondeka cakumaninina kuli yooyo weelede kuba cituuzyo (cinicini) caambwa muzitondezyo eezyo, Yahushua.
Masimpe kuti Melechizedeki wakali mupaizi alimwi wakali mwami kumwi kali muntu wanyama uukkwene, eeci ciyiisya ciiyo ciyandika cipati caambilizya Yahushua awalo, mbweenya buyo mbwali, mwami alimwi kali mupaizi kumwi kali muntu wanyama uukkwene.
Yahushua, mbweenya mbuli Melechizedeki ooyo wakali kumbele lyakwe,
awalo wakasalwa kukkala cuuno cipati amulimo mupati ooyu a Yahuwah Lwakwe. Eeci ncecipati cakuti bupaizi bwa Yahushua kabulaa bulemu bwiinda bupaizi bwa baLevi aabo bakakona buyo bupaizi bwabo nkaambo kakuzyalilwa mumukwasyi wabapaizi.
Alimwi mbweenya [Yahushua] mbwaatakabikkwa bupaizi kakwiina cikonkezyo (nkaambo bakabikkwa bupaizi kakwiina cikonkezyo), pele kwiinda mucikonkezyo cayooyo wakaambilizya nguwe kuti:
“Yahuwah wakonkezya
alimwi nsyekwe kubweeda musyule,
'Webo uli mupaizi lyoonse alyoonse
kweendelanya a mulongo wa Melechizedeki’”,
mbombuboobo Yahushua mbwaakaba cikonkezyo ca cizuminano ciinda kubota. (BaHebulayo 7:20-22, NKJV)
Bupaizi bwa baLevi bwakasimpa aciciingano, pele bupaizi bwa Yahushua bunooliko lyoonse alyoonse. Oobu mbobulangizi bwa munaKristu:
Alimwi kwakali bapaizi banji [baLevi], nkaambo bakalesyegwa bupaizi kwiinda mukufwa. Pele walo [Yahushua], nkaambo kakuti unooli mupaizi lyoonse alyoonse, ulaa bupaizi butacinci. Aboobo ulakonzya kuvwuna cakumaninina aabo baboola kuli Yahuwah kwiinda muli Nguwe, nkaambo lyoonse uponena kwiiminina mbabo mucibaka cabo.
Alimwi aabo bakanjila bupaizi kukubalwa, nkaambo kakuti lufu lwakali kubakasya kuti kabacibeleka mulimo wabo, pele walo ulakkalilila lyoonse, aboobo tajisi muntu uunga wakkala mucibaka cabupaizi bwakwe. Cali cibotu kuti tube aa Mupaizi Mupati uuli bobuya, uusaalala, uutakwe luuni, uutakwe kampenda, uupambukide kuzwa kuli basizibi akusumpulwa kwiinda julu. Teelede kupaila azipaizyo mazuba woonse mbubonya mbuli baabo bapaizi bapati, nkaambo balo bakali kusaanguna kupailila zibi zyabo, alwabili kupailila zibi zyabantu, pele eeci Yahushua wakacicita mulweendo lomwe naakalituuzya lwakwe mwini. Nkaambo mulawo nguusala bantu mubulengausi bwabo kuti babe bapaizi bapati aabo batakwe nguzu, pele jwi lya cikonkezyo, lyakatobela kumbelaa mulawo ndelisala Mwana kuba Mupaizi uulomene lyoonse mukuyaa myaka. (BaHebulayo 7:23-24, NKJV)
Yahushua, mbweenya mbuli Melechizedeki wakasalwa cigaminina a Yahuwah kuti akkale acuuno ca mulimo waandeene. Aboobo kwiinda mubulowa Bwakwe mbwaakatila, boonse batambula lufu Lwakwe, kubuka kwakwe kuzwa kubafu, amulimo wakwe mumaumi aabo, balaima kunembo lya Yahuwah kubee kunyina nibakacitide cinyonyoono.
|
Kutegwa umvwe makani manjaanji aa Melechizedeki eceeco ooyu mwami-mupaizi wansiku ncayubununa cijatikizya mufutuli anzila ya lufutuko, kolanga cibeela ca Sikapepele ku WLC cilaa mutwe wakuti “Melchizedeki, Once & Future King.”
|
1 “If,” David Gates.