|
Malweza aamutwe wabaleza botatwe akabelesyegwa aa Saatani nkwakakatila kusinkila kamwi akataa tusimpe twa lufutuko kainda kugambya kakuti: Yahushua, simuzyalwaalikke ookwa Leza wamasimpe, wakali 100% muntu susu wanyama! |
Ipenzi liliko mumanjezyeezya ndyakuti , kufumbwa muntu mbwaatalika buyo kusyoma malweza aayo amupa kuti alibambile mizeezo akutalika kusyoma masendekezya amwi, nokuba kwaayeeyela kuti ali masimpe. Eeci ncencico cicitika mu malweza aa baleza botatwe.
Mutwe wabaleza botatwe tuusimpidwe mu Mangwalo pe.1 Nokuba boobo, kufumbwa buyo naamvwugwa makani aaya, atalisya musemo wakuyakila kweezyeezya azimwi, mbuli aakuti: leza musyoonto wakaliko kale kataninga zyalwa muciimo cabuntu: wakali “Leza Mwana.” Mubwini, mutwe wabaleza botatwe beelene, bapona lyoonse antoomwe, ukulwaizya kuti boonse botatwe bakaliko kale kakutaninga zyalwa Messiah.
Lusyomo lwakuti Yahushua wakali kupona kataninga zyalwa antoomwe a Taata ndusyomo lwakaanzwa munzila yakupelenga aSaatani lwakwe mwini. Oolu lusyomo lwaandaanya babisyi kuzwa kuli Kristu mumizeezo yabaabo bamuyanda kapati Kristu.
Cimwi civwuzya kuyiisyigwa baabo basyoma mutwe wabaleza botatwe ncakuti, Yahushua wakali mubulemu bwa kujulu 100%, aciindi mpeenya kali, 100% muntu susu. Eeci cintu citakonzyeki kucitika, aboobo, citalisya kupyopyongana. Pele eelyo bafundisi bamoza nobabuzyigwa Mufutuli mbwaakali kunga kali muntu kwamana kumwi kalaa bulemu bwa kujulu, aayo makani woonse alawuntuluzyigwa akutamauka kuti aayo “maseseke” aakatazya kapati kumvwisisya kumuntu uutayiide uutakwe nguzu.
Ncintu citakwe maanu eeco! Yahuwah uyandisya kuti bantu boonse bamvwisisye ciiyo ca lufutuko. Izaya 1:18 waamba kuti: “‘Kamuboola lino, atumvwane
antoomwe,’ mbwaamba Yahuwah, ‘Nokuba kuti zinyonyoono zyenu zyasubila pyu, ziyootuba bu mbuli, canda, nokuba kuti zyasubila pyu, ziyootuba bu mbuli boya bwa mbelele.’”
Ooku nkutambwa nobantu! Yahuwah uyandisya kuti iswe tumumvwisisye. Ncobeni, ooku kuyandisya Kwakwe kuti mukowa wa bantu umvwisisye akuvwunwa nkokwaapa kuti tubambilwe nzila yalufutuko: Adam wakawida mucibi uyoonununwa a Adamu wabili (Yahushua). Kutali cintu cakabambwa kuzwa kucibeela camuntu pe; pele muntu susu wanyama.
Kwiinda buyo mukuba muntu susu uukkwene Yahushua mbwaakali kukonzya kwiinda mubuumi bwakwe inguzu zya luyando lwa bulemu.
Mubweende bwa nkuta zyaansi, kamboni nguulungulula bumboni. Paulu waambillizya makani aaya mulugwalo lwakwe lutaanzi kuli Timoteo. Amulangisye mukampango aaka, Paulu mbwaambilizya Yahuwah kuti ngo Mufutuli winiwini wamasimpe, kapa bumboni kuti “mwaalumi,” Yahushua, wakazuzika zyoonse zyakali kuyandika mumulawo kuti swebo tubaa lufutuko.
Nkaambo eeci ncibotu alimwi cilatambulika kunembo lya Leza wa Mufutuli wesu; Walo uyandisya kuti bantu boonse bakafutulwe, akuzyiba kasimpe. Nkaambo kuli Leza omwe buyo, kuli mwiiminini omwe akataa Leza abantu, ooyo ngu Messiah Yahushua mwaalumi; ooyo wakalyaaba lwakwe mwini kuti abe cinunuzyo ca boonse, akupedwa bumboni muciindi ceelede (1 Timoteo 2:3-6, KJV)
Simuzyalwaalikke ookwa Yahuwah wakeelede kuba muntu susu uumaninide kutegwa akonzye kunununa mukowa wabantu aawo Adamu mpaakawida. Walo wakeelede kuba muntu uukkwene cakumaninina kutegwa Yahuwah ape bumboni bwakuti cituuzyo cakwe cakazuzika zyoonse. Lilikke buyo mwanaa Yahuwah naakali muntu susu uukwene naakali kukonzya kutondezya kuti luzyalo lwa bulemu lulainda kugwasya naba muntu mutuba buti, wiinda kusondoka akataa bantu banyongene.
Masimpe ngakuti, nokuba kuti Cizuminano Cipya cijisi tumpango tunjaanji tushinshima kuboola kwa Messiah, kunyina pe akataa twaambo ooto nokaba komwe, kuti kabwalwa mumoyo wamoza kataminina kuti Messiah wakali kunoolaa bulemu bwakujulu nokuba munzila nsyoonto buti.2 Kuyungizya waawo, kunyina pe mpokwaambilizyidwe mutumpango twa Cizuminano Cakale ootu tumpango twaambilizya Messiah uupona kataninga zyalwa. Kutaminina kwamusyobo ooyo kuboolela buyo mukupandulula Mangwalo munzila yakupelengusya.
Cimwi cishinshimi citaanzi ca Messiah cakali cisyomyo cakapegwa Abrahamu kuti: “Kwiinda mulunyungu lwako masi woonse aanyika ayoolelekwa; nkaambo webo wateelela jwi Lyangu.” (Matalikilo 22:18, KJV) Paulu ulayumya cishinshimi eeci naambilizya Yahushua kuti: “Lino kuli Abrahamu alunyungu lwakwe baasyomezyegwa. Walo taakati, Akunyungu zyako, mbuli kubantu banjaanji, pele mbuli kuli omwe, Akulunyugu lwako, ooyo ngo Messiah.” (BaGalatiya 3:16, KJV)
Yahushua awalo wakasalazya kuti eeco cisyomyo kuli Abrahamu cakali kwaamba nguwe lwakwe. Walo wakaambila baJuuda kuti: “Uso Abrahamu wakasekelela kubona buzuba bwangu: eelyo naakabubona, walo wakabukkomanina.” (Johane 8:56, KJV)
Yahushua lwakwe taakwe pe naakataminina kuti ulaa bulemu bwa buleza. Mubwini, inzila njaakali kuyandisya kulyaamba lwakwe yakali yakulyaamba kuti “mwanaa muntu,” eelyo lyakali bbala lyaci Hebulayo lyeelene a bbala lya mazubaano lyakuti “muntu susu.”
Aboobo, mbuntu bukkwene butavwelengedwe bwa Yahushua, butuumbulizya notukwakwalika kupenga akutuyubunwida nguzu zya lweengelelo lwa Yahuwah.
Lino mbotwabona kuti tulaa mupaizi silutwe mupati boobu, ooyo wakatusolweda kuya kujulu, Yahushua mwanaa Yahuwah, atujatisye mubutumwa bwesu.
Nkaambo tatujisi mupaizi uunga taalimvwa mbuli mbotubede mukubula nguzu kwesu; pele awalo wakasunkwa mbubonya mbuli ndiswe muzintu zyoonse, pele taakwe naakacita cinyonyooono.
Aboobo atubaa camba kuboola kucuuno caluzyalo, kutegwa tuzyoofwidwe luse akweengelelwa mukugwasyigwa muciindi notubulide. (BaHebulayo 4:14-16, KJV)
Busongo mubulemu bwa Yahuwah bwakalibwene kale kuti alikke muntu, uukkwene alimwi uulyaabide cakumaninina kukuyanda Kwakwe, nguukonzya kunununa mulongo wa Adamu kuzwa kuncinyonyoono. Yahushua ngo mwana simuzyalwaalikke ookwa Yahuwah, pele ngo muntu ooyo uukkwene boobo. Walo tali cilengwa leza citakonzyene amuntu wanyama pe. Pele kunze lyaboobo, ulamvwisisya mbotupilingana nkaambo, awalo lwakwe muntu susu nyaanya.
Kubeja kwa Saatani mukusinkilila ciimo cini ca Messiah kwakasitilila kasimpe kalibotela, pele lino kasimpe kaakuyubululwa, kufumbwa mwana musankwa amusimbi ookwa Adamu ulakonzya kukulwaizyigwa kuti, mbubwenya Yahushua, mwanaa muntu, mbwaakazunda, aswebo, tulakonzya kuzunda.
Buumi Bwakwe bulondokede, mbwaakapona kalyaabide cakumaninina kuluyando lwa Yahuwah, bulaabidwe ku muntu mubombe uujisi lusyomo. Lino twiimvwi kunembo lya Yahuwah kubaanga kunyina pe nitwaacitide cinyonyooono. Ooku kucincanyizyigwa luzyalo aboobo kutalisya kusandulwa muluzyalo. Nkaambo kaziimo zyesu zyakawida mucinyonyoono, swebo tatuzyi cinyonyoono cili coonse ncotucita katutakubwene, pele moyo uusandudwe inga tiiwasala kuzumanana kucita caali cinyonyoono muntu ncazyi kale. Bululami bwa Yahushua bulaabilwa mucibaka cesu, mpoonya swebo tulaima kunembo lya Taata kubee tatuninga bisyide.
“Inga twaamba kuti nzi kuzintu eezi? Ikuti Yahuwah kali kulubazu lwesu, nguni uunga watulwana? Ooyo wakalesya Mwanaakwe, pele wakamutuuzya mucibaka cesu toonse, mbubuti mbwanga taatupa cabuyo zintu zyoonse kwiinda muli nguwe?” (BaLoma 8:31 & 32, KJV)
|
Kutegwa umvwe makani manjaanji aa buntu bwa Messiah, kolangaula muli Sikapepele wa WLC cibeela cilaa mutwe wakuti, |
1 1 Johane 5:7-8 nkampango kabelesyegwa ziindi zinjaanji kuyiisya lusyomo lwakuti baleza botatwe. Nokuba boobo, aaka kampango takajanwi pe mumalembe aakutaanguna aansiku. Mubwini , takalembedwe pe nokuba mumalembe aaci Giliki kusikila mumusela wa 11th.
2 Icishinshimi ca Izaya 9:6 cilangikaanga caambilizya Messiah wakasyomezyegwa kuti ngu “Leza Singuzu,” pele eeci cili boobu nkaambo kakutamvwisisya mbolibelesyegwa kanjaanji bbala lyakuti “Eli” muci Hebulayo.
“Ooyo wiingula kaambo nkataninga mvwisisya, kuli nguwe nkufubaala akuusya bweemya ooko (Tusimpi 18:13)