|
Mangwalo ayubununa kuti eelyo muntu muzumi naafwa, kucinyina muzimo uucilimvwa bulanga pe. Kunyina kumvwa cicisa nokuba cikondelezya pe. Pele muzimo wamuntu “uloona” kusikula akabusyilwe kubuumi a Yooyo Uupa Buumi.
|
Umwi mukaintu wakalemba mulumbe wakuumbulizya bamucaala mumilumbe yamause ku Amelika. Banyinazyala bakazwaa kufwa, alimwi mwaalumi wakwe bwakamukosya buumba. Wakayiisyidwe kuti eelyo bantu babotu nobafwa, baunka Kujulu kuyookwabilila akweembela bayandwa babo bacipona anyika.
Eeci cimvwikaanga ncintu cuumbulizya moyo uuminidwe buumba , pele mwaalumi wakwe taakali kuukkomanina muzeezo wakuti banyinazyala nkobacili munsi munsi lyabo, kabawumwine akulangilizya zyoonse zicitika muŋanda … kufumbwa cicitigwa amunzi. Lino mbwaakali kusyoma kuti banyina bakaciliko, waatalika kukaka koonana amukaintu wakwe, ategwa tee kayi banyina baliimvwi munsimunsi kabalangilizya cicitika, mpoonya cikwati cabo cakanjila aataambiki.
Ooku kulubizya kuteelela kulajanikajanika akataa buleya. Kutaanguna aaya makani amvwikaanga asyomya muntu kuumbulizyigwa. Pele eeco ncisyomyo cifwaambana kusanduka kubaanga ndi twe lya mulilo, litontola sikoo mbuli nsizi.
Pele masimpe eeni aacicitika aciindi cakufwa, ayinduluka buyo kuyubununa bulamfu bwa luyando lwa Yahuwah.
Eelyo Lazalosi waku Bethani naakaciswa, bacizyi bakwe bakatumina mulomo kuli Yahushua, kabaamba buyo kuti:
“Omwami, langa ooyo ngookali kuyanda waciswa.”
Eelyo Yahushua naakamvwa boobo, Walo wakati, “Oobu tabuli bulwazi bwa kufwa, pele mbulwazi bwakutondezya bulemu bwa Yahuwah, kutegwa mwanaa Yahuwah alemekezyegwe kwiinda muli ndulo.” (Bala Johane 11:3-4.)
Busanduluzi bwini mbwakuti: Lazalosi takoofwa pe. Nokuba boobo … wakafwa! Yahushua wakalindila kwainda mazuba obile kuzwa waawo, nkokuya ayumuke kuya ku Bethani. Basikwiiya bakazingwa mizeezo. Nkaambo nzi lino ncibakali kuunkila ku Judiya muciindi eeco ooko baJuuda nkobakali kumuyubilila kuti bamujaye? Naakabona nkobapenga kuyeeya mumizeezo akuzingwa, Yahushua wakabapandulwida kuti:
Mulongwe wesu Lazalosi uloona, pele Ime ndaunka kuti nkamusinsimune.”
Mpoonya basikwiiya bakati, “O Mwami, kuti kali uloona, ulaba kabotu.” Nokuba boobo Yahushua wakali kwaambilizya lufu lwakwe, pele balo bakali kuyeeyela kuti wakali kwaamba buyo kuti woona ŋonzi zyakulyookezya.
Mpawo Yahushua wakabaambila munzila iigaminina kuti, “Lazalosi ulifwide.” (Langa mu Johane 11:11-14.)
Lufu luli mbuli koona! Kunyina kumvwa cicisa nokuba cityompokezya, kunyina kuusa, nokuba buumba. Ncobeni kunyina muntu uufwide uusobelela akulangilizya bayandwa bakwe bacipona pe. Kunyina ncazyi muntu uufwide nokuba mbwalimvwide pe.
Kufumbwa muntu wakalicisa kapati nanka yooyo wakalimvwa kukotela mumoyo inga wakwaambila mbwiimvwika mizeezo yamuntu uuminidwe buumba ambwalimvwide mumoyo, ncintu ciinda kucisa kwiinda cintu cikucisa amubili mbocimvwika. Kubulilya lyo mizeezo yakulimvwa bulanga mu lufu, eeco ncipego ciinda kubota cokwa Yahuwah akataa zipego zyakwe zya luyando!
BanaKristu banji basyoma kuti eelyo muntu naafwa, wuunka Kujulu nokuba ku mulilo uutamani. Bamozilemu basyoma kuti aabo bajaigwa nobali mumulimo wabupaizi bwabo, bagaminina kuya ku Muunda wa Edeni, pele zyuulunzuma zyabantu bafwa lufu lwa kulifwida nokuba bafwida muntenda, luliimpene. Bamozilemu bayiisya kuti bangele basandula cuumbwe camuntu kuti cibe busena bweebeka kuli baabo balaa lusyomo luyumu batakwe cibi. Pele kuli baabo batakwe lusyomo luyumu, nokuba baabo bakacita zinyonyoono, cuumbwe mbusena bwa kusubulwa akupenzyegwa.
Saatani nguwakaanza mizeezo iifulyungene boobu yoonse. Walo ukkomanina kupenzya mizeezo ya bamucaala kuti bayandwa babo bafwide lino balapenzyegwa akusubulwa. Kunyina leza uulaa luyando uunga walekela muntu kuti apenzyegwe boobo nokuba kuti wakali sinkondonyina, nkaambo “Yahuwah Lwakwe nduyando.” (Langa 1 Johane 4:8.) Walo ulekela bantu boonse kuti bafwe, babotu abasofweede, kutegwa boone akulyookezya mucuumbwe kusikila bakabusyigwe kuzwa ku lufu.
Nkaambo bazumi balizyi kuti bayoofwa, pele bafwide kunyina ncobazyi pe, tabajisi bulumbu; mizeezo yabo yakalubwa kaindi. Alimwi kunyina cintu cicibakkomanisya nokuba cibacima, kunyomenenwa kwabo lino kwakaloba; alimwi kucinyina cibeela ncobacijisi mu zintu zicicitika ansi lya zuba. (Mukambausi 9:5-6, KJV)
Malengelo ookwa Adamu ayubununa mbwabambidwe muntu muzumi. “Alimwi Yahuwah Elohimu wakabumba muntu abulongo bwaansi, mpoonya wakayoyela muya wa buumi mumpemo zyakwe; mpoonya muntu wakaba muzumi.” (Langa mu Matalikilo 2:7.) Muciindi ca muyoba kulembedwe bbala liimpene aasyoonto, pele eelyo bbala alyalo, lilibelesyedwe munzila njeenya. Yahuwah wakaambila Noah kuti anjizye mu bwato “banyama bobile bobile, aabo balaa muya wabuumi.” (Langa mu Matalikilo 7:15.) Ibbala libelesyedwe waawa eelyo lyakasandululwa kuti “muya”, ndyeenya ndebbala amumasena aambi mu Mangwalo lilembedwe kuti muya. Ndebbala eeli lipandulula mubili uuswaangene antoomwe amuya ookwa Yahuwah uupa buumi akupa kuti muntu alimvwe bulanga, abe muntu uupona.
Mumajwi aamulaka uutelemuka, Solomoni wakakulwaizya bantu kuti babelekele Yahuwah nobuciliko buumi: “Koibaluka Mulengi wako eelyo bunweba bwa nsiliva nobutaninga sungununwa, Nokuba mutiba wagolide nuutaninga pwaika, nokuba citekelo nocitaninga pwaika ku kasensa, Nokuba vwili nolitaninga kompoka ku mugonti. Mpoonya bulongo buyoopiluka mubulongo mubwakazyila, awalo muya uyoozyokela kuli Elohimu wakuupede.” (Langa Mukambausi 12:6-7.)
Kakwiina (muya) wa buumi ngwaakayoyela Yahuwah, kucinyina kulimvwa bulanga pe.
Aabo bakafwa kabasyoma mu lweengelelo amubulowa bwa Yahushua, bayoobusyigwa aakuboola akuyaka bulelo bwa Yahuwah butakwe magolelo munyika. Cipego ca buumi butamani tacipegwi pele buyo kusikila aciindi eeco. Awalo Joobo nokuba kuti wakali kulombozya kufwa pele taakali kulangila kuya Kujulu mpeenya aawo pe. Mubwini, walo waamba cigaminina kuti mubili wakwe uyoobola mucuumbwe.
Nkaambo ndilizyi kuti Muvwuni wangu muumi, akuti kumamanino uyooyima anyika. Lino lukanda lwangu lwaakumana kunyonyoonwa, amubili ooyu njoomubona Yahuwah. Njoomubona ameso aangu eeni, mebo lwangu kutali uumbi, nokuba kuti moyo wangu wanetuka. (Bala Joobo 19:25-27.)
Joobo wakali kusyoma kuti bumwi buzuba Yahuwah uyoomubusya kuzwa kulufu kuti akapone alimwi anyika. Ncobeni, boonse bakafwa kabasyoma mu lweengelelo lwa bulowa bwa Yahushua, bayoobusyigwa kuti bakapone akulela anguwe kwa cuulu ca myaka munyika mpya. Kumamanino aacuulu ca myaka, aabo bakazumenene kuzanga a Saatani, bayoobusyigwa kuzwa kulufu kwa kaindi kasyoonto kuti bakabetekwe ciindi camamanino. Johane wakalemba kuti:
Lino ndakabona cuuno cituba cipati cabwami, ayooyo uukkede ali ncico. Nyika ajulu zyakamutija . . . Mpoonya ndakabona bafu, bapati abaniini, kabaimvwi kumbele lyacuuno eeco, eelyo mabbuku akavwununwa. Alimwi kwakali alimbi bbuku lyakavwununwa, eeli lyakali bbuku lyabuumi. Bafu bakabetekwa mbubonya mbuli mbukwakalembedwe mumabbuku, kweendelana amilimo yabo. Lwizi lwakagwisya bafu bali muli ndulo. Lufu acikkalilo cabafu zyakagwisya bafu bakali muli nzizyo, nkabela boonse bakabetekwa kweendelana amilimo yabo njibakacita. Mpoonya aawo lufu acikkalilo cabafu zyakafusilwa mubbibi lyamulilo. Bbibi lyamulilo eeli ndolufu lwabili. Nkabela kufumbwa ooyo watakajanwa zina mubbuku lyabuumi wakafusilwa mubbibi lyamulilo. (Ciyubunuzyo 20:11-15, NKJV)
Buumi butamani mbo bulumbu buyoopegwa bakomi. Mu Baloma 6:23 kulembedwe kuti “bulumbu bwa cinyonyoono ndufu.” Lufu, kutali buumi butagoli bwa kusubulwa, ncecipego caboonse bakaka lweengelelo aluse lwa Yahuwah. Yahuwah ucita buyo cintu cilikke mbwali Taata waluyando ncanga wacita mu luzyalo Lwakwe: Ulekela baabo banga tiibakkomanina kukkala mubulelo bwa Luyando kuti balobe akuzimaanina limwi.
Mangwalo ayubununa kuti eelyo muntu muzumi naafwa, kucinyina kulimvwa bulanga pe. Kunyina kumvwa cicisa nokuba kukkomana pe. Muya wamuntu uunga wapenga kukkala mu Bulelo bwa Luyando uyooleka kupona akuzimaazyilwa limwi.
Koleka kuteelela kubeja kwa Saatani ooko kukucumba akukucisya moyo wako. Kufumbwa mucintu ncacita Yahuwah, kuyubununwa luyando Lwakwe luteeli ku mubisyi. Kotambula lufutuko. Komuzumizya kuti akukumbatile mumaanza Aakwe aaluyando lutamani, alimwi yebo ulakonzya kuyookkala kukabe kutamani antoomwe a Yahuwah, a Mufutuli abamwi bayoonununwa kuzwa mumisela yoonse.
