Mubuzyo: Nkaambo nzi aabo bakkala mucooko ca Kumusanza ncobabona mwezi uuvwunteme kweelanya abaabo bapona mucooko ca Kunyika? Hena eeci tacitondezyi kuti nyika ili muciimo cabbola naa cinkuli?
Kwiingula: Kwiimpana mbuulibonya mwezi kuli baabo bakkala kunyika abaabo bakkala kumusanza, ciimvwi anzila yakulanga mwezi, kutali ciimo ca Nyika kuba mbuli bbola pe. Nkaambo kakuti nzila eeyo mwezi muuyinda kanjikanji itobelezya mweengwe waandula nyika akati uuzwa kujwe kusikila kumbo (akataa mweengwe wa Cancer awa Capricorn), aabo bakkede amweengwe ooyo balanga mwezi munzila yiindene aya baabo bakkede kumusanza. Ncintu cuubauba kwaamba kuti aabo bali kumusanza babwene mwezi “uuvwunteme” kweelanya mbuulibonya kuli baabo bali kunyika. Mubwini, mwezi uliimpene mbuulibonya akataa zyooko zyanyika nkuulangilwa.
Ngaaya makani aajatikizya kwiimpana mbuulibonya mwezi:
1.Kogama kubwaanda bomwe koli mukati kaŋanda.
2.Lungumana kolangide lambe lili muciluli caŋanda. (kweezyeezya kuti eeli lambe ngomwezi.)
3.Lino, kogama kubwaanda bulangene aawaawo mpooimvwi kutaanguna. kocili mukati kaŋanda. (Eelyo nocita boobu, kweezyeezya kuti ukosola mweengwe waandula nyika akati kuzwa kujwe kusikila kumbo, webo kozwa kucooko canyika comwe kuya kucooko cimbi.
4.Eelyo wacenguluka kuti ulange lambe lili muciluli [liiminina mwezi], lino lilalibonya kalicengeme kuleka mbulyali kulibonya nooyimvwi kubwaanda butaanzi mukati kaŋanda. Kubbazu nkoolangide ciindi citaanzi lino ndebbazu mpobede.
Ncintu cuubauba kapati kwaamba kuti aabo bali kumusanza babona mwezi “uuvwunteme” kweelanya ambobaubwene aabo bali kunyika. Mubwini, kufumbwa kubbazu lyanyika nkoolangila mwezi inga walibonya kwiimpana. Mucifwanikiso cilaatala aawa, aabo bali kunyika inga kababwene bbala lya “A” kuti lilaatala kapati alimwi bbala lya “B” lilaansi kapati. Aabo bali kumusanza inga babona bbala lya “B” kuti lilaatala kapati alimwi bbala lya “A” kuti lilaansi kapati. (Amubikkile maanu kuti mwezi ulangilwa mujungusi. Pele ibbazu ndyolangide lili kulubazu nkolangila mwezi, ndelilibonya aanga “mpaatalaa” mwezi.)