Mulawo ookwa Yahuwah ncimbonimboni ca ciimo Cakwe cilondokede, mizeezo yamoyo Wakwe ambwalimvwide mucamba Cakwe. Mulawo ookwa Yahuwah nkuuli lyoonse kukabe kutamani alimwi tuucinci. Unikwiimvwi lyoonse kukabe kutamani.
Saatani ulizyi kuti Mulawo wabulemu ngomulawo wamfulumende ya Kujulu aanyika. Ulizyi akuti kunyina pe uutyola Mulawo ooyo uyoonjila Kujulu. Aboobo, Saatani weena bantu kuti kabayeeya kuti tabaceelede kubamba Mulawo ooyo. Saatani uyiisya kuti Mulawo “tuuceelede kubambwa.” Walo utaminina kuti Mulawo “waakankaminwa aciciingano.” Ooku nkubeja kwini alimwi nkukazya cilembedwe mu Mangwalo!
Ime Ndime Yahuwah, nsyesanduki pe. (Langa Malakayi 3:6.)
Mangwalo aamba boobu kujatikizya Mulawo wabulemu:
“Mulawo ulisetekene, alimwi mulazyo ulisetekene, alimwi uliluleme, alimwi mubotu.” (BaLoma 7:12, KJV)
Mulawo tuukonzyi kupindaulwa, nokuba “kumwaigwa” nkaambo ulisetekene. Uliluleme! Mubotu – mbweenya mbuli Yahuwah Lwakwe.
Mulawo
ookwa Yahuwah ulilondokede, usandula muuya: bumboni
bwa Yahuwah buli masimpe, akusongwaazya muntu mutuba.
Milazyo yokwa Yahuwah ililuleme, ikkomanisya moyo: mulawo ookwa . . .Yahuwah ulasalala, umunikila meso.
Kuyoowa Yahuwah ncintu cisalala, kuloongola lyoonse akutamani: mbeta zyokwa Yahuwah zyili masimpe alimwi zyili luleme zyoonse.
Milawo ileelede kuyandisyigwa kwiinda golide, inzya, kwiinda golide iifulidwe kapati: akulweela kwiinda buci abunzuka.
Kuyungizya, muli njiyo mulanda wako inga wacenjezyegwa: alimwi mukubamba njiyo kuli bulumbu bupati (Langa Intembauzyo 19:7-11.)
Mulawo ulisetekene alimwi ulilondokede. Kupindula Mulawo ooyo nokuba kuusukumina ambali inga kwaba kuubaula Mulawo ooyo akuubamba kuti ube mulawo uutasetekene alimwi kuti uulaa kampenda. Kuti Mulawo niwali kukonzya kupindaulwa nokuba kusowelwa ambali, nicali kwaambilizya kuti kuli cintu cilubide amulawo ooyo nanka kuti kuli citaluleme amulawo ooyo. Nkaambo kaboobo, eeci inga caambilizya kuti kuli cintu cilubide nokuba citaluleme muli Yooyo Uupa Mulawo ooyo.
Bana Kristu batonkomene banjaanji bakomba mu Nsondo, kabasyoma kuti Mulawo wabulemu “waakankaminwa kuciciingano” eliya Yahuhsua ”! naakakankaminwa aciciingano. Mubwini, masimpe ngakuti, ciciingano mbobumboni bupati butondezya kuti Mulawo wabulemu nkuuli lyoonse kukabe kutamani alimwi tuukonzyi “kumwaigwa nokuba kupindulwa pe.”
Mangwalo atwaambila kuti:
Boonse bakacita cinyonyoono alimwi bakalezya abulemu bwa Yahuwah. (Langa BaLoma 3:23.)
Yahuwah kunyina pe nasiya muntu uli woonse kuti adonaike ncociiminina cinyonyoono:
“Cinyonyoono nkutyola mulawo.” (1 Johani 3:4)
Cisubulo cipedwe mukutyola Mulawo ooyo, cilisalazyidwe kwaambwa mu Bbaibbele:
Ibulumbu bwa cinyonyoono ndufu, pele cipego cokwa Yahuwah mbuumi butamani kwiinda muli Yahushua Omwe ,Uunanikidwe, Simalelo wesu. (Langa BaLoma 6:23.)
Kwakali kufutula nyika kwiilesya kusubulwa cisubulo cayo, eeco Yahuwah ncaakaabila Mwanaakwe kuti afwide aciciingano.
Nkaambo obuya Yahuwah mbwaakiyaanda nyika, wakiipa Mwanaakwe simuzyalwaalikke, kutegwa kufumbwa ooyo uusyoma muli Nguwe atafwidilili, pele abaa buumi butamani. (Langa Johani 3:16.)
Mboobu bumboni bwakuti Mulawo wabulemu tuukonzyi kupindaulwa nokuba asyoonto, nanka kusowelwa ambali naa “kukankaminwa kuciciingano.” Kuti nicali kukonzyeka kucinca mulawo ooyo, Yahushua naatakatufwida pe! Taata naakapindula buyo Mulawo ooyo kutegwa cisubulo cakutyola mulawo nicaataaba lufu. Kutaminina kuti mulawo “wakamwaigwa aciciingano” nkuuntuluzyila muulo waapedwa lufutuko lwesu. Nkaambo kakuti ooyo Mulawo ulisetekene, uliluleme alimwi mulawo wabululami, TIIWAKALI KUKONZYA kupindulwa pe, ncencico eeco Yahuwah ncaakalisungula kuti aabe Mwanaakwe kutegwa akonzye kunununa babisyi kuzwa kucisubulo calufu eeco ncobakeelede kutambula nkaambo kakutyola Mulawo ooyo. Yahushua wakafwida ndiswe mucibaka cesu. Walo, Mwanaa Yooyo Uupa Mulawo, wakafwida bantu batyola-Mulawo, kutegwa swebo tukonzye kufutulwa!
 |
|
Kuti nicali kukonzyeka kupindula Mulawo, Yahushua naatakafwa pe! Pele nkaambo kakuti TIICAKALI KUKONZYEKA kupindaula Mulawo ooyo, ncencico eeco Yahuwah ncaakalisungula kuti aabe Mwanaaakwe kutegwa akonzye kunununa babisyi kuzwa kucisubulo calufu eeco ncobakeelede kutambula nkaambo kakutyola Mulawo ooyo. |
Kuti nicali kukonzyeka kupindula Mulawo, Yahushua naatakafwa pe! Pele nkaambo kakuti TIICAKALI KUKONZYEKA kupindaula Mulawo ooyo, ncencico eeco Yahuwah ncaakalisungula kuti aabe Mwanaakwe kutegwa akonzye kunununa babisyi kuzwa kucisubulo calufu eeco ncobakeelede kutambula nkaambo kakutyola Mulawo.
IBbaibbele lizwide malailile aajatikizya bululami. “Bululami” caamba buyo kuti “nkucita ciluleme.” Mumajwi amwi ooku nkokwaamba kuti, aabo baambwa mu Bbaibbele kuti “baliluleme” mbabaabo babamba Mulawo ookwa Yahuwah! Zisyomyo zyamu Mangwalo, nzyabaabo batobela akubamba Mulawo wabulemu: baluleme.
“Kuli ndinywe . . . . [Yahuwah] uyooleleka baluleme; alimwi uyookufwida luzyalo webo akukukwabilila mbuli kuti ulaa ntobo.” (Intembauzyo 5:12)
“ Ncobeni nkobuli bulumbu kuli baabo baluleme.” (Intembauzyo 58:11)
Meso ookwa Yahuwah ali abaluleme, alimwi matwi Aakwe alijulidwe kukulila Kwabo. Busyu bwa Yahuwah bulidukwide kuli baabo bacita zisofweede [batyola Mulawo Wakwe], cakuti uyoozimaanya kwiibalukwa kwabo kuzwa atalaa nyika eeyi. Baluleme baloongolola, nkabela Yahuwah ulabamvwa, akubanununa kuzwa mumapenzi aabo woonse. (Langa Intembauzyo 34: 15-17.)
Yahushua ulisalazyide kuti kunyina pe bazangi batyola-Mulawo aabo batiikazumizyigwe kunjila Kujulu. Balikke aabo baluleme, aabo babamba Mulawo “mukucita zyiluleme”, mbabayookona buumi butamani.
“Mwanaa muntu uyootumina bangele Bakwe, nkabela bayoobungana kuzwa mubulelo Bwakwe zyoonse zyintu zyisofwaazya akunyemya, abaabo bacita cisofweede [aabo batyola Mulawo], akubawaalila mubbibi lyamulilo: oomo mokuyooba kukwiila akuluma ntwino.
“Mpoonya aabo baluleme [aabo babamba Mulawo wabulemu] bayoobekema mbuli zuba mumunzi wa taata wabo.” (Mateyo 13:41-43)
Zyoonse mfulumende zyaanyika zyilaa milawo yazyo. Mfulumende yabulelo bwakujulu ayalao ilaa milawo yayo mbweenya buyo. Kubikka ambali Mulawo wabulemu, akutaminina kuti “wakakankaminwa kuciciingano” alimwi akwaamba kuti, munzila imwi “tuuciliko,” nkwaamba kuti cilizumizyidwe kuzanga akutyola Mulawo. Mangwalo ayelekanya kutyola Mulawo abusofwaazi alimwi alisalazyide kuti kunyina pe “uusofweede” uyoonjila kujulu. IBbaibbele kalivwumbula cisinkilizyo eeco cinsinkila meso aabantu kuti batakonzyi kubona cili kumbelaa mazuba, lyalo lyaamba kuti “munzi wa Kujulu tuubulide, zuba, nokuba mwezi, kuti umwesyele muli nguwo: nkaambo bulemu bwa . . . [Yahuwah] mbobumwekela ali nguwo, alimwi Mwanaambelele ngo mumuni wamunzi ooyo. . . . Alimwi kunyina pe nokuba cili buti ciyooonjila muli nguwo eeco cikonzya kusofwaazya, nanka cili coonse cicita zitondwa, nokuba kubeja; pele buyo aabo balembedwe mubbuku lya Mwanaambelele [nkaambo mbababamba mulawo Wakwe, aboobo mbabayoonjila mukati oomo].” (Ciyubunuzyo 21:23, 27). Akuteelelesyegwe, aawa kuti: kuti swebo tatubambi Mulawo kutegwa tukakkale Kujulu. Pele, tubamba Mulawo nkaambo tuli bantu bakkala Kujulu aabo bakazyalululwa kwiinda muli Kristu Yahushua.
 |
|
Kubikka ambali Mulawo wabulemu, akutaminina kuti “wakakankaminwa kuciciingano” alimwi akuti, munzila imwi “tuuciliko,” nkwaamba kuti cilizumizyidwe kuzanga akutyola Mulawo. |
Makanze aanzila ya Lufutuko iidulisya boobo, akali aakuyanzanya bantu batyola-Mulawo akubabweedezya akubasandula kuti babe bantu babamba-Mulawo.
“Nkaambo cakamukondelezya Taata kuti muli Nguwe [Yahushua] zyoonse zyikkalilile, alimwi akuti, kamanizyide kubamba luumuno kwiinda mubulowa bwa ciciingano Cakwe, kwiinda muli Nguwe akonzye kumvwanya zyintu zyoonse kuli Nguwe Lwakwe.” (Bakolose 1:20)
Ijulu talikakkalwi bantu batyola Mulawo batakonzyi kufwa pe. Mbuli muulo wakunununwa mbuwaabbadelwa kale aCituuzyo cabulemu, bantu batyola-Mulawo balipedwe cipego camizeezo iisalazyidwe. Aboobo batalika kuba bantu Babamba-Mulawo.
“Nceeci cizuminano Ime nceyoobamba ambabo mumazubaayo, mbwaamba . . . [Yahuwah], Ime njoobikka milawo Yangu mumyoyo yabo, alimwi njooyilemba amumizeezo yabo; alimwi zinyonyoono zyabo azisofweede zyabo Ime nsyekazyiibaluki kabili.” (BaHebulayo 10:16, 17)
Aaya ngamakanze aamamanino ookwa Taata a Mwana: kuti Mulawo Wabo wabulemu, acimbonimboni caziimo Zyabo zyisetekene, cikabe ciimo cabana babo bali muciwa cabuntu. Ooku kusanduka kwaakumaninina kucitika, ndendilyo mupailo nuuyoozuzikwa ooyo Yahushua ngwaakapaila, naakapaila akujatikizya basikwiiya Bakwe basyomeka kusikila kumamanino aciindi:
“Pele Ime nsyepailili baaba balikke pe, pele abalo aabo basyoma muli Ndime kwiinda mujwi lyabo, kutegwa boonse bakabe antoomwe; mbweenya mbuli ndiwe, Taata, mboli muli Ndime, ambeyo muli Ndiwe, kutegwa abalo bakabe bomwe antoomwe muli Ndiswe: . . . Alimwi bulemu oobo Webo mbookandipa Mebo, Ime ndabapa abalo; kutegwa bakabe bomwe, mbweenya mbuli Ndiswe mbotuli bomwe. Ime muli mbabo, aNdiwe muli Ndime, kutegwa bakakonzye kulondoka mbuli bomwe.” (Johani 17:20-23)
Mu Mangwalo, “bulemu” ndibbala limwi liiminina “ciimo.” Ciimo, mizeezo yini njayeeya ambwalimvwa ooyo ulaa ciimo eeco. Eelyo Mozesi naakakombelela Yahuwah kuti, “Nditondezye bulemu Bwako,” bwiinguzi bwaluzyalo bwakali bwakuti:
Ime ndainzya bubotu Bwangu kumbele lyako, alimwi Ime njakoompolola zina lya Yahuwah kunembo lyako. (Langa Kulonga 33:18, 19.)
Mpoonya Yahuwah wakaida kunembo lyakwe, akwaamba kuti, Yahuwah, Yahuwah Eli, waluzyalo aluse, uubikkila camba, alimwi uuzwide bubotu akasimpe, uulaa luzyalo kuzyuulu zyuulu zyabantu, uulekelela zisofweede akutyola mulawo acinyonyoono. (Langa Kulonga 34:6, 7.)
Eelyo “bulemu” bwa Mufutuli (naa ciimo cakwe, mizeezo ambwalimvwide Walo) nozyipegwa kubantu bakatyola-Mulawo beempedwe, balasanduka akuba Babamba-Mulawo. Baba bantu BOMWE a Yahushua, mbweenya Walo mbwali OMWE a Taata. Yahuwah muli Yahushua; Yahushua mbululami; bululami buli muli Mbabo. Aaya ngamamanino aabaabo boonse bayanda kuteelela Mulawo uusetekene, akukaka kweenwa kwa Saatani kuti mulawo “waakankaminwa aciciingano.” Aabo bantu batyola-Mulawo, kunyina pe nobayookona bulelo butamani; pele baluleme, babamba-Mulawo akucita ziluleme bayoopona lyoonse kukabe kutamani, kabasekelela kunembo lya Taata a Mwana, aabo muli mbabo mobali BOMWE, nkaambo muli omwe-omwe wabo kuli Mulawo uusetekene, uulasalala alimwi uululeme.
“Mbuli mbokaindilila kambizyi, mbweenya abalo basofweede tabakabi kabili: pele ooyo uululeme, musemo uutamani. Baluleme tabakaatulwi pe: pele basofweede tabakakoni nyika.” (Tusimpi 10:25, 30)
“Bantu bako abalo baliluleme boonse: bayookona nyika kukabe kutamani.” (Izaya 60:21)
