Munyika eeyi inkondo akataa Muleli wa Buumi a Dyabooli uulela mumusinze , iya kumbele. Kuzwa liya Saatani naakawa, kwakatalika kulwana akataa bululami a busofwaazi. Kristu kamanide kukankaminwa, akupiluka kujulu, boonse aabo bakamusyoma bakalikulika akunjila mulimo wakwe, akuutola kumbele muzina lyakwe. Eeyi nkondo asunu icilwanwa, alimwi iyaakulibonya kuti yalutila. Saatani uluujisi kubunganya lumamba lwanguzu kunkondo mpati icaalizya; lino mubuzyo wini ulaa kaambo ulaa Nsabata ya mulawo wane.
Saatani ulipedwe zintu zinjaanji zibotu. Taakwe uunga wainda kukonzya kucita cintu, nokuba kwiinda busongo abubotu, bwakali Saatani liya katana kuzangila julu. Pele wakalekela muuya wabuunyu kuti umunjile, nkabela wakawa akaambo kakulisumpula. Bangele bakawa anguwe bakalibikka lwabo beni kubbazu lyamuzangi ooyu muciindi cakuti basale kubbazu lya Kristu. Muli Juda tubala kuti: “Alimwi ibangelo batakazumanana mubusena bwabo bwakusaanguna pele ibakasiya busena bwabo bwakukkala mbubeelede ulibayobwede kabaangidwe nketani lyoonse mumudima uusiya mbi kusikila nobayoobetekwa mubuzuba bupati”
Saatani ulaa muzeezo mupati, pele uusungwide kubusofwaazi Kuzwa naakawa, zyoonse nzyacita uzangila Yahuwah. Wakasoleka kumwaya mbunga zisetekene zibikkidwe ambali nzyaakabikka Yahuwah. Wakasolweda bama Juuda basololi kuti basise kasimpe keni ncoyiiminina Nsabata. Mukuyiisya kwabo bakayiisya cimaninide kulubila. Bakalundika zilengwa zyabo atalaa njiyo, akwiivwumbilila kuti italibonyi.
Saatani ngusilweeno wiinda boonse bazibidwe mmunyika, ulizyi bwakulesya akupindula kasimpe. Wakasinikizya bantu kuti bakakatile kupindula Nsabata yamulawo wane. Kwiinda mukwaambilwa aanguwe buzuba butaanzi bwamvwiki bwakazuminwa abuna Kristu kuti nje Nsabata. Wakabelesya muzeezo wakwe kuti awongelezye bantu kuti bacite zintu mbuli mbwayeeya. Pele kuti twacenguluka kuzwa kumulawo wane, walo ngwaakapa Yahuwah, akubweza ntaamo yaatola Saatani, yakacitwa akwaambwa abantu beendelezyegwa aanguwe, tatukonzyi kufutulwa. Tatukonzyi kutambula lweeno azilengwa zyakwe kuti nkakasimpe.
Mulombwana wacibi wakasumpula Nsondo; pele kufumbwa caacitigwa mukupindula mulawo wane, caacitwa kakwiina kuzumizigwa aYahuwah, eeci ncintu cini cigaminina kuzangila ncaamba. Ncotuyanda cini nkasimpe—kasimpe, katavweledwe akantu – kakonzya kusalazya muuya. Banji bacisoleka kupa manjezyeezya aakupindula Nsabata kuzwa kubuzuba bwa ciloba kuya kubuzuba butaanzi bwa mvwiki; pele Yahuwah wakapa kulailila kugame abulemu akusetekana kwa Nsabata yaabikkwa mu Edeni alimwi njaakoompolola kumulundu wa Sinai, alimwi wakapa kucenjezya amulandu uujatikizya bakaka akusampaula buzuba bwa ciloba bwa mvwiki.
Mpawo aawa uuli woose uujisi muzeezo uukkwene kabotu mpayelede kulangisya nkuuzyila mumuni aluzyibo ndwatambula. Tatweelede kuzingwa mumizeezo abantu balitembaula kuti baliyiide akukonzya kucita zinji, pele babelesya nguzu zyabo kuti banyonganye mizeezo yabamwi. Balaa mizeezo iiwongelezya, pele ilalubwa cakufwamba. Liya mizeezo iilangwa kuti mibotu, iikopa akuzelula mumaanu kumwi kiikondelezya, niipegwa, aabo balaa miiya yakufutula nokuba kusweekelwa, abalibuzye beni kuti, Hena kuli Mangwalo aagwasya kutondezya masimpe muli ceeci caambwa abantu aaba?
Aciindi cijatikizya
kutamani, muzumi uli oonse weelede kubuzya beembezi bamulumbe kuti bape bumboni
mu Mangwalo bugwasyilizya ncobaamba.
Zilengwa zyabama Tata, azintu nzyobaamba baluulwa kuti baliyiide, mbabotu
alimwi mbalondo, -- zyoonse tazikwe mpindu kuti kaziteendelanin ajwi lya
Yahuwah. Tweelede kucenguluka kuzwa kuli baabo bategwa “Bamatata” kuya kuli
Taata wesu Wakujulu, Mulengi wazintu zyoonse. Nsabata ya Yahuwah yeelede kuba
mpiibikkidwe lwayo—mujwi lipona lya Yahuwah.
Uli oonse ulasunkwa muciindi cakuzekelwa kujatikizya mbwateelela jwi lya Yahuwah. Ninzi cikatazyide abuna Kristu buluulwa sunu?—Nceenya cakakatazyide kuli Adamu a Eva mu Edeni, -- baswiilila kujwi limbi liteesyi lya Yahuwah. Ijwi lya Yahuwah, lyaamba cisalala alimwi cimvwika kuli mbabo mumulawo wane, lilasulaikwa; ijwi lyalweeno, likulwaizya nsabata yakubeja, ndyobateelela. Balacenguluka kuzwa kuli,“Mboobu mbwaamba Yahuwah,” akuya kunsabata iyeeme amanjezyeezya, kakwiina kampango ka Mangwalo kayitabilila. Saatani wazwidilila mukusweesya bunaKristu munzila yabo, mbeenya mbwaakasweesya Adamu a Eva. Bantu baleenda munzila zikasyidwe. O, nkaambo nzi bantu, liya nobasunkwa, ncocili cuubauba kubakoma? Nkaambo nzi ncobeenwa akaambo kajatikizya Nsabata? Nkaambo nzi, kakwiina mpobasimpide lusyomo lwabo, ncobatambwida akusumpula Nsabata yakweenwa?
Ncuubauba kusala maseseke atwaano kwiinda kasimpe. Pele ncintu cilemu kubikka muntenda maumi esu akulekezya buumi butamani kwiinda mukukomba mubuzuba butasetekene. Tatukonzyi kuyaama ali zyaamba bantu akutaba muntenda mbweenya mbuli baJuuda muciindi ca Kristu mbubatakeelede kuyaama amanjezyeezya aabo. Tatukoznyi kuyaka lusyomo lwesu atalaa cilwi calweeno,aakuswiilila twaano nkaambo twakazyila kuzilengwa nzitwaapegwa, nokuba kuti bakalaa masusu amvwi amutwe bakatupa. Kristu wakati ku baJuuda bakali kukulaika tulengwa atwaambo twa bamayi babo atalaa mulawo wa Yahuwah, “Balandikomba cabuyamba, kabayiisya tulengwa amilawo yabantu.” Aaya ngamajwi aambilwa muzumi uli oonse uucita mbweenya mbuli mbabo.
Kumalengelo, Yahuwah wakiisetekanya akwiipa bulemu Nsabata. Wakiipa kubantu bakwe “kuti cibe citondezyo akataa Ndime ambabo,” wakati,“kutegwa bazyibe kuti Ndime Yahuwah uubasetekanya,” Kuti bantu bakwe nibakeenda mumilawo ya Yahuwah, kuti nibakiibamba Nsabata, naakabaleleka kapati. Pele waamba kuti: ‘Iŋanda ya Isirayeli yakazangila ndime munkanda; tibakeenda mumilazyo yangu, bakasulaika mbeta zyangu, zyalo kuti muntu wazibamba, inga wapona mulinzizyo; alimwi Nsabata zyangu bakazisofwaazya kapati: mpawo ndakati, Njootila bukali bwangu ali mbabo munkanda, akubalobya…. Nkaambo bakasulaika mbeta zyangu, akuteenda mumilazyo yangu, pele bakasofwaazya Nsabata zyangu: nkaambo myoyo yabo yakatobela zibumbwa.” Ncenciceeci ,Yahuwah naakaleta bantu bakwe kunyika ya Kkenaani, ncibaataacijisi mpuwo yakuti mbantu bwakwe nokuba nguzu. Nsabata niyaaba njiisinkila makwebo aabo, bakalijana kuti tabakonzyi kwiibamba. Tiibakiileka Nsabata, pele tibakiibamba mbuli bwaamba mulawo wane. “Ndime Yahuwah Eloah wako; kweenda mumilazyo yangu, alimwi bamba mbeta zyangu, akuzicita; lemeka Nsabata zyangu; ziyooba zitondezyo akataa ndime anduwe, kutegwa uzyibe kuti Ndime Yahuwah Eloah wako. Nokuba boobo bana aaba bakandizangila; tibakeenda mumilazyo yangu, nokuba kubamba mbeta zyangu akuzicita, zyalo kuti muntu wazicita, inga wapona muli nzizyo; bakasofwaazya nsabata zyangu: mpoonya ndakati, njoowaala bukali bwangu ali mbabo, akumanizya kukalala kwangu ali mbabo munkanda.”
Nkaambo nzi Yahuwah
ncaatakabalekela kuti bafwe, aaba bantu baalelekedwe amumuni munji boobu?
Bakamucokacoka kuti abanyemene. Pele Yahuwah wakati: “Nokuba
booboo ndakajosya
janza lyangu, akubikkilila nkaambo kazina lyangu, kuti
litasofwaali mumeso aabatandizyi, ooko nkweekabaleta.” Cisi cili coonse anyika cakali kulangilizya
bantu aaba Yahuwah mbaakacitila zinji boobu. Kuti nibakamutobela, naakasumpula,
akubapa kulumbaizyigwa anyika. Nibakalangwa kuti ncisi cibululami, citaleki
milazyo ya Yahuwah wabo.
Yahuwah taakabasubula bana baIsirayeli mbuli mbubakeelede kusubulwa: pele, “Nkaambo lubeta talusiki cakufwamba kubasofweede, aboobo myoyo yabana babantu ilimaninide kugama kucita zisofweede.” Isirayeli taakeempwa, awalo Yahuwah wakati: “Ndakaimika janza lyangu kuli mbabo munkanda, kuti njoobatapaula akataa batandizyi, akubamwaila muzisi; nkaambo tiibakacita mbeta zyangu, bakasulaika milazyo yangu, akusofwaazya nsabata zyangu, alimwi meso aabo akageme azimbwa zyabamawisi.”
Aabo balemeka milawo ya Yahuwah, amumuni uujatikizya mulawo wane mu Mangwalo kawupedwe kuli mbabo, bayoowutobela kakwiina kudonaika mpindu yancobeelede kucitila kutobela ooku. Yahuwah wakabamba muntu mucinkonzya cakwe, akumupa nzila yakutobela buzuba bwa ciloba, mbwaakasetekanya akupa bulemu. Wakabikka kuti muntu weelede kumukomba mubuzuba oobo, akutacita nzyaliyandila. Taakwe uutatobeli mulawo wane, kuti wamana kupegwa akusalazyilwa kujatikizya Nsabata, uunga wabula kampenda mumeso aa Yahuwah.
Caalembwa a: Ellen
White
Review and Herald
July 6, 1897
Mucilembedwe citaanzi twakagwisya mazina oonse aabakomba zilengwa leza ngobapa Taata aMwana, akubikka mazina eeni aabo ngobalipede. Mukuyungizya twakajokezya mu Mangwalo ngotwaamba mucibalo eeci mazina aa Taata aMwana, mbuli mbwaakalembedwe kutaanguna abalembi ba Bbaibbele balo bakasolwedwe a Moza Usalala. -Nkamu ya WLC.