Nsabata Isetekene yokwa Yahuwah tiiyelede kubelesyegwa kujanya zyanyika pe. Pele kubantu banji, izyanyika ncibumbwa cini ncobatobela. Babikka milazyo yanyika kumbele akuleka kubikka Yahuwah kunembo. Bakomba mali. Kumpela lya mulengalenga oonse, kumpela lya nyika zitawide, akumpela lya bantunyina, batondezya kuti, mumeso aabo, kujana mpindu mbobuleza. Batambula twaano ooto twaatalikilwa koongelezya bantu kuzwa mukasimpe abululami. Mukusala kutobela nyika azintu zyayo zimanina maanu, balalizandula kuzwa kuli Yahuwah.
Saatani wakaletela Kristu zyanyika abubotu bwazyo akumwaambila kuti, "Zyoonse eezi ndakupa , kuti webo undikotamine akundikomba ime." Pele bulemu bwakujulu bwakalibonya mubuntu bwa Kristu, eelyo Kristu wakankamuka kuti, "Kozwaawa Saatani: nkaambo kulilembedwe kuti, Webo weelede kukomba Yahuwah, Elowa wako, alimwi alikke ngoyelede kubelekela."
Ooku nkokwiingula umwi aumwi wabatobeli ba Yahuwah mpayoosikila kuvwiila boobu. Aabo bajisi caando ca Yahuwah utamani munkumo zyabo bayoolanga zyanyika kuti zilaansi kweelanya azibotu zyakutamani. Bayoobamba nzila yokwa Yahuwah, akucita bululami ambeta zyakwe. Kristu waakaka kusunkwa kwa sinkondonyina mukubelesya cilwanyo cilikke eeco sikalumamba wa ciciingano ca Kristu ncayelede kubelesya kuti azwidilile--"Kulilembedwe kuti." Kuli?- Mucizuminano Cakale aCipya. Tweelede kulikwabilila mukubelesya majwi aaya akucenjezya bamwi, akubatambika jwi lyabuumi.
Bantu banji tabana teelela kuti Nsondo teesyi Nsabata ya Mulawo wane. Mubumpelenge bwakwe, Saatani wakavwunikila kaambo aaka, akubikka buzuba buyo kuti mbobusetekene, kutegwa nyika yoonse ibaa cinyonyoono kunembo lya Yahuwah mukutyola mulawo. Bantu banji tabakubwene loko kuti tabaubambi mulawo wane. Cilayandika kuti boonse bayandaule kasimpe kuzwa mubbuku lyabulemu lyeenzi, kutegwa basale cakutobela ali ncaamba Yahuwah kujatikizya ceeci. Zinji bantu nzyobaamba, pele tatweelede kuyaka lusyomo lwesu ali caamba muntu nabani pe. Kuli mabazu obile aali mumubuzyo ooyu. Yahuwah wakujulu ulatupa mulawo Wakwe, awalo Saatani utambika nsabata yakwe iisofweede. Kuli nkamu zyobile, nkamu yabateelela ankamu iitateeleli, basunkwa abasunka.
Casika lino ciindi cakuti mumuni wakasimpe umweke akataa musinze uunyina kulijata. Mulumbe wa mungele watatu watuminwa munyika, akucenjezya bantu kuti batatambuli caando ca munyama nokuba cinkonzya cakwe munkumo zyabo nokuba mumatansyi aabo. Kutambula caando eeci caamba kusikila mpolisalila mbuli munyama awalo mbwaakalisalila, kutabilila mizeezo mbuli yakwe, akukazya jwi lya Yahuwah. Kuli boonse batambula caando ecci Yahuwah waamba kuti. “Ooyu nguyoonywa waini wabukali bwa Yahuwah, uutilwa cakutavwelwa munkomeki yakwe yabukali; alimwi uyoopenzyegwa amulilo asalufa kunembo lya bangele basetekene, akunembo lya Mwanaa mbelele."
Kuti mumuni wakasimpe watondezyegwa kuli nduwe, akukutondezya Nsabata yamulawo wane akukutondezya kuti kwiina pe mujwi lya Yahuwah mpolyaamba kuti Nsondo yeelede kubambwa, pele yebo kocinamatide nsabata yakubeja, akukaka kutobela Nsabata eeyo Yahuwah njaita kuti “Mbuzuba Bwangu Busetekene,” ,webo utambula caano camunyama. Ndilili eeci nocitola busena? – Eelyo notobela mulazyo wakuleka kubeleka mu Nsondo akukomba Yahuwah, kakuli ulizyi kuti kwiina pe Bbaibbele mpolyaamba bumbi kujatikizya Nsondo pele kuti mbuzuba buyo bwakubeleka, mpampawo aawa webo nozumina kutambula caando camunyama, akukaka caando ca Yahuwah. Kuti twatambula caando eeci munkumo naa mumantasyi eesu, imbeta ziboola ali batateeleli zyeelede kuzya alindiswe. Pele caando ca Yahuwah uupona cibikkidwe alibaabo babamba Nsabata yokwa Yahuwah.
“Alimwi Yahuwah wakabona busofwaazi bwamuntu kuti bwaali bupati anyika, mizeezo amanjezyeezya aakwe mumoyo akali sofweede kuya kumbele lyoonse. . . Inyika ayalo yakali sofweede kunembo lya Yahuwah, yakazwide bulwani. . . . Nkabela Yahuwah wakati kuli Nowa, Mamanino aanyama zyoonse asika kuli Ndime; nkaambo nyika yazula bulwani kwiinda muli mbabo; nkabela, kolanga, Ndiyoobanyonyoona antoomwe anyika." Bakali kuyoonyonyoonwa nkaambo kakuti bakasofwaazya nyika eeyo Yahuwah njaakalenga kuti ikondelezye bantu baluleme.
"Mbuli mbucaali mumazuba aa Nowa," wakaamba Kristu, "mbokuyooba mumazubaa Mwanaa Muntu." Hena teesyi mbokubede lino oobu? Kufumbwa uukonzya kulanga muzilembwa buzuba abuzuba ulakonzya kubona mulongo wamilandu iicitigwa – bukolwi, kubba, bubbi, kunyengelela, kujaya. Cimwi ciindi mukwasyi oonse ulajayigwa, makanze aamuntu ooyo uujaya ngakujana mali azintu zitali zyakwe kutegwa alikkomanisye. Inyika iyaakuba ncobeni mbuyaali mumazuba aa Nowa, nkaambo bantu baliikaka milawo yokwa Yahuwah caantangalala..
Nsondo cilenge ca bupoopo. Yakabambililwa akukomezyegwa ambunga ya Basikukazya kabategwa ncecintu ciyandika kuli Yahuwah, pele eeci tacikwe mpociimvwi mujwi lya Yahuwah. Bana Kristu abalo balasunkwa mpobaimvwi mukaambo aaka. Yahuwah utondezya bantu bakwe basanyangula Mangwalo kuti babone kuti naa kuli bumboni bwiiminina Nsondo. Aabo basanyangula mukuyandisya kasimpe balabona kuti kaindi bakayeeme azilengwa zyabantu, akutambula milimo yabupoopo. Aabo, balaa myoyo yeetela, basanyangula jwi lya Yahuwah akuyanda kasimpe, bayootambula cileleko kuzwa kuli Yahuwah. Ziimo zyabo ziyookonzya zyabulemu. Mizeezo yabo inooya kumbele kusumpuka. Mukulanga Wabulemu bayoocinca kuba mucinkonzya cabulemu. Lwiiyo lwabo lwakatalikila anyika luyooya kumbele mucikolo cakujulu.
Uusanyangula kasimpe naya kumbele mukuvwuntauzya kwakwe, ulabona kuti zilengwa, manjezyeezya anzyobaamba bantu, kuti nzyizyaabikka Nsondo kuti nje nsabata. Mubuzyo mbuyaa kuvwuntauzyigwa, bantu balaa luzyibo bayoobona kuti taakwe pe cili mu Mangwalo citabilila Nsondo. Yahuwah taakwe pe naakaleleka buzuba oobo. Aabo batobela buzuba oobo bapa Yahuwah cuumpilizyo ceenzu mubusena bwa ceeco cisetekene. Yahuwah taakwe pe naakati “Kamubamba buzuba butaanzi bwa mvwiki, pele wakati, "Ime ndakabapa Nsabata Zyangu, kuti zibe citondezyo akati kandime ambabo, kutegwa bandizyibe kuti Ndime Yahuwah uusalazya mbabo."
Eeci nciiyo cijulilwa yooyo uusanyangula kasimpe cabululeme. Kunoyaa kuboneka kuli nguwe kuti Yahuwah taakacinca nokuba kumwaya cintu cakazwa mumulomo Wakwe pe. Ulabona cabululeme kusalala kwaabikkwa abuzuba bwa ciloba, ancokweeledwe kububamba. Mbwaya kumbele cabululami kusanyangula ciiyo eeci, unooyaa buteelela kasimpe kali mujwi lya Yahuwah, mbuli mbokabede mumilawo ili kkumi. Kuyandisya kasimpe kwakwe kuyoosunkwa, luyando lwakwe kuli Yahuwah luyoosolwa, mbuli mbwaya kumbele. Kuti walekela kuyandisya kwakwe ku luyando lwa Yahuwah, zyoonse zinooli kabotu. Kuti wasala kuteelela milawo yokwa Yahuwah nuuba muulo uuli buti, luumuno akukkomana kwakwe kuyooyungizya.
Bantu banji balalilekelela ncobabambila Nsondo kuti, “ Bataata abasyaanene bakali bana Kristu bali kabotu, alimwi bakafwa kababamba Nsondo. Bayoofutulwa , nkabela ambeyo inga ndasoleka muntenda mubaainda abalo. Nyika yoonse ibamba Nsondo; nkabela ndili buyo mbuli bamwi bacikombelo cangu.” Hena ooku kulilekelela inga kuyootambulika mu Lubeta?-- Nee peepe, nee pe. Kuti bamawisi nibaatambula milumbe yakucenjezya eeyo Yahuwah njabatumina bantu mazubaano, nibakali bantu bateelela, bantu bayoowa Yahuwah, nibakateelela milawo yokwa Yahuwah. Bamatata tabakwe mulandu amumuni ngobatakatambula, nokuba milumbe yakucenjezya njibataamvwa; hena zilengwa zyabo inga zyalangwa kuti zilaa pindu nkaambo buyo kakuti zyakapegwa kumisela minjaanji kuzyoosikila ali ndiswe na? "Kuti nindatakaboola akubaambila," mbwaakaamba Kristu kujatikizya baJuuda, "nibatalaa cinyonyoono: pele lino tabakwe aakusisila cibi cabo . . . . Kuti nindataacita milimo akati kabo yatakacitwa amuntu uumbi, nibatalaa cinyonyoono: pele lino bakabona zyoonse akucimwa Ndime a Taata."
Tusimpe tuyandisi twakapegwa kweendelana abwaabede zisi. Kasimpe kaliko lino, aako kasunka bantu bamusela uuno, tikaali musunko kubantu bamisela yakaindi loko. Kuti mumuni uumweka lino uujatikizya Nsabata ya mulawo wane, niwaapegwa kumisela yakaindi kale, Yahuwah naakabapa kaambo amumuni ooyo.
Tulaa kaambo amumuni ulikke uumwekela alindiswe. Milawo yokwa Yahuwah alusyomo muli Yahushua zilatusunka lino. Kuti katusyomeka akuteelela, Yahuwah uyootukkomanina iswe, akutuleleka mbuli bantu bakwe basalidwe, bantu baandeene. Lusyomo aluyando lukkwene bwini akuteelela nokuliwo, kazibelekela mukati kamyoyo yabatobeli ba Kristu, banooli ampuwo iikubwene mpati. Mumuni uyoomunika kuzwa muli mbabo, akumwaya musinze uuli mumbali lyabo, kuumwesya akubambulula baabo boonse basika muli nguwo, akubaleta kuluzyibo lwa kasimpe boonse bayanda kusalazyilwa, akutobela nzila yakuteelela.
Zileleko zipati zilisyomezyedwe kuli baabo babamba Nsabata isetekene yokwa Yahuwah. "Kuti webo unyone tende lyako mu Nsabata," Yahuwah mbwaamba, "kuti utalicitili cakulikkomanisya mubuzuba Bwangu busetekene; akwiita Nsabata Yangu kuti mbuzuba bwakukondwa, busetekene bwa Yahuwah, bulemekwa; akumulemekezya, kotaciti nzyoliyandila, nokuba zyakulikkomanisya, nokuba kwaambaula majwi aako omwini; nkabela webo uyookondelezya mumeso aa Yahuwah; alimwi njookucita kuti ukeendele mumasena ali atalaa nyika, akukusanina lukono lwa Jakobo Taata wako; nkaambo mulomo wa Yahuwah nguwaamba ceeci."
By: Ellen White
Review and Herald
June 29, 1895
We have taken out from the original article all pagan names and titles of the Father and Son, and have replaced them with the original given names. Furthermore, we have restored in the Scriptures quoted the original names of the Father and Son, as they were originally written by the inspired writers of the Bible. -WLC Team