Mubusongo buteeli aluyando lutamani, Mwami Yahuwah wakabamba nzila oomo, muntu uusofweede cinyonyoono mwakonzya kubambululwa kuti atambulike kubulemu bwa Julu. Eeyi nzila yakali kujatikizya zinjaanji kwiinda buyo kufutulula luzubo lwa bantu kuzwa kubuzike abweendelezi bwa Saatani. Yakali nzila yakuzyokolweda limwi ciimo camuya wamuntu kuti cibe muciimo citaanzi cabulemu mbwaakalengedwe, eeco Paulu ncaakali kwaamba. Ooyu ngomulimo ncobeni ngwacibeleka acecino ciindi Yahushua Mupaizi wesu Mupati.
Mukuyiisya tumpango twa nzila yalufutuko, Yahuwah wakalailila Mozesi kuti ayake civwuka oomo milimo iinoocitwa abubambe bwaco mobeelede kuyiisyilwa tusimpe twalufutuko bantu. “Amundibambile civwuka Ime, kutegwa ndikkale akati kenu.” (Kulonga 25:8, NKJV) Cintu cipati camilimo yabulemu iisetekene eeyi cakali kucitika mu Buzuba bwa Kunununwa naa bwa Lumvwano.
Oobu mbobuzuba bwiinda kusetekana mumwaka woonse. Bwakali buzuba bwa kukankama akuyoowa . . . antoomwe akulelekwa cinicini mu moza. Bwakali buzuba bwakulibambila kwiinda mukulisinsa akulyeempa zinyonyoono zisisidwe mumoyo wamuntu. Mubuzuba bwa Lumvwano oobu, eezyo zinyonyoono zyakeempedwe zyakamwailwa limwi – kuzwa mumabbuku aalembedwe Kujulu akuzwa muciimo camuntu cini.
Eeci cipego ciinda kubota boobu, cakali kuzumizya bantu kuti batalike buumi bupya butakwe butongo mumwaka uuli woonse. Aabo bakatula ansi mikuli ya zinyonyoono mucivwuka cakupailila, kwiinda mukulilekelela zibi akulyeempa, bakali kukonzya kutambula moyo mupya kwiinda mulusyomo. 
Ooyu mulimo, mulimo waandeene wakusalazya muya wamuntu, wakali kucitwa mu Buzuba bwa Lumvwano alimwi nkuucili kubantu boonse basangana cino ciindi mbuli Isilayeli wansiku mumulimo wakulisinsa zibi akweempwa zinyonyoono.
Mumilimo yaabuzuba mu civwuka cakupailila, zinyonyoono zya muntu weempedwe zyakali kulemununwa muntu ooyo akubikkwa acipaililo kwiinda mubulowa bwa banyama: bana bambelele, ba mpongo aboombe. Bulowa bwakali kutolwa mu Busena Busalalisya, mpoonya mubisyi wakali kulanganyigwa kuti walekelelwa zibi, nokuba kuti mulandu wazibi eezyo wakacililembedwe. Mubuzuba bwa Lumvwano, Mupaizi Mupati wakali kunjila mu Busena Busalalisya bwa civwuka. Walo wakali kunjila ciindi comwe amwaka pele ooyu ngo mulimo uuciliko wakali kutondezya kuti zibi zyamwaigwa.
Lino . . . bapaizi bakali kuvwula kunjila mucibeela citaanzi ca civwuka [mu Busena Busetekene], kababeleka milimo.
Mboobu mbucakabede mutente. Bapaizi balanjila mukati mukumana milimo yabo yabupaizi. Pele Mupaizi Mupati alikke nguwakali kunjila mukati mwini-mwini, lino wakali kunjila lomwe buyo amwaka. Taakali kunjila buyo katatoleleli bulowa. Bulowa oobo wakali kubutuula mukaambo kakwe mwini alimwi akaambo kazibi nzibakacita bantu mukutaziba. Munzila eeyi Muuya Uusalala ulaiisya cakusalazya kuti kunyina nzila iimbi yakunjila mu Busena Busalalisya naa Busena Busalala kabuciliko. (BaHebulayo 9:6-8, NKJV)
Mulimo wacivwuka caanyika wakali wakuyiisya bana ba Isilayeli milimo yankuta iicitwa mucivwuka ca Kujulu kutegwa bafutulwe basimilandu. Milimo yacivwuka caansi yakali kucitwa aabulowa bwa bana bambelele. Pele milimo ya Kujulu yakali kucitwa aabulowa bwa Yahushua Lwakwe “Mwanaa Mbelele ookwa Yahuwah uugwisya zinyonyoono zya nyika.” (Bala muli Johane 1:29.) Civwuka caansi cakali mukonzyanyo waceeco cakali kunoocitwa Kujulu lwanikwiindide lufu lwa Yahushua.
[Civwuka caansi] cakali mukonzyanyo waciindi cino zipego azituuzyo zipegwa nozitakonzyi kusalazya mizeezo ya yooyo uubeleka milimo eeyo – zyakali kujatikizya buyo zyakulya azyakunywa, kusamba, azimwi zyakusalazya mubili kusikila buyo muciindi ca kubambulula lusyomo. (BaHebulayo 9:9, 10, NKJV)
Bulowa bwa banyama, tiibwakali kukonzya kusalazya naba muntu omwe kuzwa kuzinyonyoono zyakwe pe. Tiizyakajisi nguzu zili boobo pe. Zyakali buyo mikonzyanyo iitondeka kucituuzyo cipati cakugwisya cinyonyoono coonse: Yahushua.
Lino Mulawo ncimvule buyo cazileleko ziciboola, kutali zileleko zini-zini lwazyo. Zipaizyo zilapegwa munzila yomwe buyo mwaka amwaka. Pele Mulawo tiiwakakonzya kubasalazya muzipaizyo eezyo. Nkaambo nizyaataleka kutuuzyigwa. Nikwakali kuti bantu bakomba kabasalazyilwa limwi, nibatakacili kulimvwa kuti mbaasizibi, alimwi nibatacili kupa zipaizyo. Pele mbuli mbokubede, zipaizyo ziyeezya bantu zibi zyabo mwaka amwaka. Nkaambo bulowa bwabapoho abwampongo tabukonzyi kugwisya zinyonyoono. (BaHebulayo 10:1-4, NKJV)
Bulikke bulowa bwa Yahushua mbobusalazya kuzwa kucinyonyoono. Boonse aabo bakali kuboola mucivwuka caansi bakali kutondezya lusyomo kuti eelyo Mufutuli aakuboola, mpoonya zyoonse ziyoolekelelwa, akusalazyilwa limwi akubambululwa ciimo.
Pele Messiah wakasika kale, ngo Mupaizi Mupati wazintu zibotu ziliwo lino. Tente oomo mwabelekela ndyabulemu alimwi lililondokede kwiindilila. Tiilyakabambwa amaanza aabantu, nkokwaamba kuti, tente eeli talili lyaansi aano pe. Ciindi naakaakunjila mutente akunjilila limwi mubusena busalalisya, taakwe naakatolelezya bulowa bwampongo naa bwaboombe kutuula zipaizyo, pele walo (Messiah) wakatola lomwe buyo bulowa bwakwe mwini, eelyo wakatubambila lununuko lutamani.
Lino bulowa bwampongo abwabapoho alimwi atwe lyamoombe mupwizi zisansailwa aabantu batasalali mumulawo. Eezi zilagwisya busofwaazi bwabo. Masimpe bulowa bwa Messiah bulakonzya kutucitila ziinda! Mu Muuya uutamani wakalituula lwakwe mbuli cipaizyo cilondokede kuli Yahuwah.
Bulowa bwakwe busalazya myoyo yesu kuzwa kumilimo yabuyo, kutegwa tubelekele Yahuwah Uupona. (BaHebulayo 9:11-15, NKJV)
Lino bulowa bwa banyama bwakali kutambulwa kuti busalazye bantu ku zinyonyoono zyabo kwiinda mukusyoma, mbubuti bulowa bwa Mwanaa Yahuwah mbobunga tiibwainda kutambulika kuti busalazye bantu akulekelela zibi zyabo?
Masimpe, kweendelana a Mulawo, zintu zilasalazigwa abulowa. Aboobo zinyonyoono tazilekelelwi kakutakwe kutila bulowa. (Bala mu (BaHebulayo 9:22) Nkaambobulowa bwa Yahushua bwakatuulwa, kucinyina kusinganyigwa kuli baabo balaa lusyomo muli Nguwe, beempedwe zinyonyoono zyabo akutambula kweengelela Kwakwe akubasalazya.
Aboobo lino kunyina kusinganyigwa kuli baabo bali muli Yahushua Munanike, aabo bateendeli muzisusi zyamibili yabo, pele beendelana a Moza. (Bala mu BaLoma 8:1.)
Naakafwa Mwanaa mbelele ookwa Yahuwah, wakafwida zinyonyoono zya nyika, Walo wakapiluka alimwi mucivwuka ca Kujulu. Oomo Walo wakaakunjila akuyootuuzya cipaililo mucibaka cako abasimilandu boonse balangaula Nguwe. Eeco cintu cakacitilwa basyomi kwiinda mukuboola kwa Mufutuli, lino cicitika ncobeni mubwini kujulu.
Lino mbokunga zikozyanyo zyazyakujulu zyakali kusalazyigwa munzila iili boobu, nkokuti zyakujulu zini ziyandika cipaizyo cimbi ciinda zeezyo. Messiah taakwe naakanjila mubusena busalala bwakukombela bwakayakwa amaanza aabantu, buli ncikozyanyo buyo cabusena bwakujulu. Pele wakanjila mujulu mwini-mwini, kuti lino katwiiminina kuli Yahuwah. Mupaizi Mupati wa Bajuuda ulanjila buyo mubusena busalalisya lomwe amwaka abulowa bwabanyama, butali bwakwe. Pele Messiah taakanjila kuti kalipaizya lyoonse. Nkaambo nikwali kunga ulapenga ziindi zinji-zinji kuzwa kumalengelo aanyika. Pele lino wakalibonya lomwe buyo kwiiminina boonse kumamanino aamusela kuti agwisye zinyonyoono kwiindila kukulipaizya lwakwe mwini. (BaHebulayo 9:23-26, NKJV)
Lufu lwa Yahushua aciciingano lwakali lwakufwa ciindi comwe buyo. Kunyina pe alimwi Walo naceelede kuyoofwa kabili. Walo, Mwanaa mbelele uukkwene, wakatuuzyilwa limwi ciindi comwe kupaizyilwa milandu yabanjaanji. Lino, kulekelelwa zibi kumaninide kulaabidwe kuli boonse baboola kuli Nguwe, kwiinda mulusyomo, akutambula cipego eeco ncaakabaulila amuulo mupati, pele balapegwa kakwiina kuula muluzyalo lupati. “Kuti walilekelela zinyonyoono zyesu, walo ulasyomeka alimwi uliluleme kutulekelela akutusalazya kuzwa kubusofwaazi bwesu boonse.” (1 Johane 1:9, KJV)
Mbuli mbobafwa bantu boonse ciindi comwe, kuzwa waawo kuboola lubeta, aboobo [Messiah] wakalituula lomwe kuti ayumune akugwisya zinyonyoono zyabantu. Alimwi uyoolibonya ciindi cabili. Tabooleli kugwisya zinyonyoono pe, pele uyooboolela kufutula aabo bamulindilila.(BaHebulayo 9:27-28, NKJV)
Mangwalo atutondezya Yahushua kaimvwi kunembo lya Yahuwah, acecino ciindi katuuzya cipaizyo cabulowa Bwakwe mucibaka ca zinyonyoono zyako. Walo ulalindila, amoyo uulangila, kuti asalazye akubambulula kufumbwa uuboola kuli Nguwe kwiinda mulusyomo. Civwuka caansi cakali kutondeka kuli ceeco LINO ciliko alimwi cilindizya kuti webo ucitambule kwiinda mukusyoma kwako.
Mupaizi wa Bajuda wakali kwiima akucita milimo yakwe yabupaizi mazuba oonse, alimwi wakali kutuula cipaizyo camusyobo omwe ziindi zinji-zinji. Pele zipaizyo eezi taakwe nizyakali kukonzya kugwisya zinyonyoono pe. Nkaako Messiah wakapa lomwe buyo cipaizyo cakugwisya zinyonyoono. Cipaizyo eeco ncalili alili. Amane wakaakukkala kubbazu lyalulyo lwa Yahuwah.
Lino ooko ulalindila mane kusikila Leza akabikke basinkondonyina kuti babe cilyatilo camaulu aakwe. Acipaizyo comwe buyo wabacita kuti babe balondokede akutamani aabo mbaasalazya. Muuya Uusalala awalo ulatupa bumboni oobu. Kusaanguna ulati, “Eeci ncecizuminano ncetikapangane ambabo caakumana ciindi eeco, mbwaamba Mwami Yahuwah. “Njoobikka mulawo wangu mumyoyo yabo, nkabela njoowulemba amizeeezo yabo.” Eelyo wakati, “Nsikaziyeeyi limbi zinyonyoono zyabo amilimo mibi njobacita.” Nkaambo Yahuwah walekelela zyoonse eezi, takuciyandiki cipaizyo cakugwisya zinyonyoono pe. (BaHebulayo 10:11-18, NKJV)
Eelyo Yahushua aakuboola mumakumbi aa Kujulu, lubeta lunokwiindide kale. Zyoonse zinoobetekedwe kale akuzekelwa munkuta yakujulu kuti nguni weelede kulekelelwa zibi alimwi nguni weelede kupegwa mulandu. Kamwi kaambo nkaakacaalizya kwaamba Yahushua aako kalembedwe mu Mangwalo, kasalazya makani aaya: “Amulange ndafwamba kuboola; alimwi ndijisi abulumbu bwangu, bwakupa kufumbwa muntu kweendelanya amilimo njaakacita.” (Ciyubunuzyo 22:12, KJV)
Kutegwa Mufutuli akaletelezye cipego Cakwe, caambilizya kuti kunoozyibidwe kale kuli Nguwe ooyo weelede kutambula cipego cili buti: ooyo uupegwa buumi butamani, ayooyo uuyoovwilima muzyiba lya mulilo antoomwe adyabooli abangele bakwe.
Lino, luse lwabulemu nolucibikkilila, ecino nceciindi cakuti ululamike milimo yako akulomya kubambulula bukkale bwako. Kolisinsa mumoyo wako, kolilekelela zinyonyoono zyako akweempwa. Komukombelezya Yahuwah mu mipailo yako: “Kondilingula, O Mwami Yahuwah, uzibe moyo wangu, ndisunke uzibe mizeezo yangu.
Bona naa muli nzila iilebya mulindime, kwamana undeenzye munzila iitamani.” (Intembauzyo 139:23, 24, KJV)
Musela wamamanino uzwide bantu aabo bakaitwa kuzwa mu Bbabbuloni. Bakaitwa kuzwa akataa zikombelo ziwide; bakaitwa kuzwa akataa ziyanza zyabantu, zilubide, zinyonyoono abuzangi mumoza. Alimwi, eelyo nobateelela lwiito lwakuzwa mu Bbabbuloni akuzyokela kukutobela Mulengi wabo, bayoosandulwa ciimo munzila iilibotela: Bayoosalazyigwa, akusalazyilwa muya cakumaninina. Balo bayoopegwa moyo mupya amuya mupya. Bayooyakululwa akujosyegwa kuciimo ca bulemu.
"Nkaambo njoomugwisya mumasi, njoomuyobolola kuzwa muzisi akumuleta munyika yanu alimwi. Njoomusansaila maanzi aasalala, eelyo muyoosalala, njoomusalazya kuzwa kubusofwaazi bwanu boonse akuzwa kumituni yanu.
Njoomupa myoyo amizeezo mipya, njoomugwisya moyo uuli mbuli bbwe, ndiyoomupa moyo mupya. Njoomupa nguzu zya Muuya wangu, ndiyoocita kuti mukatobele malailile Aangu akuti mukabambe milawo Yangu.
Muyookkala munyika eeyo njindakapa kuli basikale banu, muyooba bantu Bangu ambebo njooba Eloah wanu. Njoomuvwuna kuzwa kuziyanza zyanu zyoonse zitasalali.
Njoocita kuti kamuyoooloka maila, ayoovula kapati alimwi nsikamuleteli nzala pe." (Ezekiya 36:24-29, NKJV)
Ncenciceeci Mufutuli ncalindizya kuti akucitile webo. Walo uyanda kuti akupe moyo uusalala, amuya uululeme. Walo uyanda kukubambulula akukujosya kuciimo cabulemu cokwa Yahuwah.
Kotambula lwiito ndwakutamba buno buzuba. Kweempwa zibi zyako. Kosalazyigwa. Mpoonya uyootambulwa omuyandwa ookwa Yahuwah.