Cizuminano Cipya: Cisyomyo ca Mazuba Aaciboola Eelyo Thomas Alva Edison nibaamubuzya mbwaakalimvwide mukwaalilwa kuzwidilila ziindi zinjaanji boobo eelyo naakali kupanga lambe lya magesi, Edison wakaingula kuti, “Ime nsyeekaalilwa pe, Ime ndakabbukizya biyo nzila zili 10,000 zitakonzyi koonda mulimo.
 |
|
Thomas A. Edison |
Ime lyoonse ndabukkomanina bwiinguzi mbwaakapa. Ooko nkusalauzya buyo kubweza ceeco boonse ncobalanga aanga cakwaalila pele akucipindula kuti cilulame. Ngweenya mulazyo ooyu inga tuubelesya mulweendo lwa Bunakristu. Ncintu cityompokezya kubona bubotu bwa mulawo wabulemu, katuyandisya kuti tumuteelele Yahuwah nkaambo tulamuyanda, pele buyo katusombokela mucinyonyoono limwi alimwi.
Ono nokuba kuti kulimvwa mbotubede eelyo notulibwene kubaa mulandu, wakuzumanana mucinyonyoono nokuba kuti tulizyi kuti takweelede kucitwa cibi, Banakristu banjaanji basyoma kuti “ mulawo wakagagailwa kuciciingano.” Saatani takombeleli Banakristu batonkomene naa nkuulubazu kuli nkobeendela mu kazila kasyaanikide akulandabala, kufumbwa biyo kuti baleya kuzwa mukazila aako. Munakristu uukakatila kubelekesya kubamba mulawo wabulemu, pele uudilika musyule nalibilika milandu njasisikizya kuzwa kuli Yahuwah eelyo nanjomba mucinyonyoono ncantingaana, ooyo uubeleka makanze ookwa Saatani mbweenya mbuli Munakristu uuyeeya kuti teelede kubamba mulawo nkaambo waakankaminwa kuciciingano. Cinyonyoono—amaanganyina aancico, kutunuka kubaa mulandu—eezyo nzyezitwaandaanya kuzwa kuli Yahuwah, aboobo dyabooli ulabeleka kwiindilizya kutunusya muntu mbweenya mbuli mbwacita ku muntu uuyeeya kuti kutobela mulawo tacicili cintu ciyandika.
Kupona kakwiina cinyonyoono ncintu ciba masimpe biyo eelyo Yahuwah nabamba, cizuminano ciindene a basyomi eelyo aakuzyokela Yahushua.
Amulange, alazya mazuba, mbwaamba Yahuwah, eelyo Ime neyoobamba cizuminano cipya abaŋanda ya Isilayeli, a baŋanda ya Judah:
Kutali kweendelanya aa cizuminano eeco Ime nceekabambide abamawisi mubuzuba mbweekabatola ajanza lyangu kuzwa munyika ya Egipita; cizuminano ncibakatyola, nokuba kuti ndakali mbuli mulumi wabo, mbwaamba Yahuwah:
Pele eeci nceciyooba cizuminano nceyoobamba Ime abaŋanda ya Isilayeli; Aakwiinda mazubaayo, mbwaamba Yahuwah, Ime ndiyoobikka mulawo wangu mukati muli mbabo, akuulemba mumyoyo yabo; alimwi ndiyooba Leza wabo, abalo bayooba bantu bangu. (Jelemiya 31:31-33, KJV)
Eeci ncisyomyo citaninga zuzikwa! Tatukonzyi kulondoka kubamba mulawo kufumbwa biyo kuti katucili babisyi, balaa ziimo ziwide mucinyonyoono. “Cizuminano Cipya” eeco Yahuwah ncayoobamba eelyo Yahushua aakuzyokela ciyoobambulula penzi eelyo. Yahuwah uyoopa basyomi cipego ca myoyo mipya aawo aanoolembedwe mulawo Wakwe.
Mbweenya mbuli Edison mbwaakabwene kuzwidilila muli nzyaakali “kwaalilwa” kuzwidilila, Kasimpe kalibotela nkobayinzya muvwi basyomi eelyo nobatingaana cinyonyoono nka kusanduka ooko kwakacitika kale muziimo zyabo ziwide kabacili mu Cizuminano Cakale. Ooko kuyandisya kwini kutuyovwa kukakatila kweendelanya nzyotuyanda antoomwe akuyanda kwabulemu kuli mukaambo ka Muya Uusalala Yahuwah ngwavwozya basyomi, kutumina camasimpe ooko kuyootola busena eelyo Walo nayoolemba mulawo Wakwe amyoyo yesu. Cibi ciyooleka kusakamusya moyo alimwi mulawo ooyo ngutwaazyibide kucimwa, lino tuyooyanda akulombozya kuuteelela. Oolo ndoluzyalo mbolunoobeleka mumoyo!
Iswe tweelede “kukakatila kunjila mukalyango kasyaankene.” (Luuka 13:24, KJV) pele tatweelede kweenkela kuboola kuli Yahuwah eelyo notulinontola akuwa nkaambo tulaa ciimo ciwide. Cisyomyo cakupona buumi butakwe cinyonyoono cicili kumbelaa mazuba. Kuli zibeela zya cisyomyo eeci zitondezya eelyo lini nociyoozuzikwa. Kampango keni katobela waawo ka Jelemiya 31 kuyubununa cibeela cipati ca cishinshimi eeco cisalazyidwe kuti tacininga zuzikwa: “Kucinoonyina muntu woonse uuyiisya simukobonyina, alimwi muntu amweeninyina, kaamba kuti, Wamuzyiba Yahuwah,’ nkaambo boonse bayoondizyiba Ime, kuzwa kubaniini kusikila kubapati babo, mbwaamba Yahuwah. Nkaambo Ime ndiyoobalekelela busofwaazi bwabo, alimwi nsyekayibaluki kabili zinyonyoono zyabo.” (Jelemiya 31:34, NKJV)
Cilisalede, kuti bantu baciyiisyanya makani aa Yahuwah, aboobo eeci cisyomyo tacininga zuzikwa. Mpoonya uya kumbele mukampango 38 kuti: “Amulange, alazya mazuba, mbwaamba Yahuwah, eelyo munzi uyooyakilwa Yahuwah kuzwa ku Ngazi yaku Hananeli kusikila ku Mulyango waku Cooko.” Nokuba kuti ooku nkuzuzika mucibeela cimwi eelyo Cyrus naakazumizya bana Isilayeli kujokela kuzwa ku buzike ku Bbabbuloni, pele mabala mbwaabelesyedwe citondezya kuti kuzuzika mubukkwene kunooli mu Jelusalema Mupya ooyo uuyooletwa ansi anyika iibambidwe bupya.
Ma, kuli zisyomyo ncobeni zijatene acishinshimi eeci! Jelemiya cipati 32 a 33 zyoonse nzibeela zya cibalo nceenya cisyomya bulumbu bwa mazuba aaciboola kuli baabo basyomede.
Amulange, Ime ndiyoobayobolola kuzwa mumasi woonse oomo mweekabatandila eelyo Ime neekabatapatila mubukali Bwangu, mukukalala Kwangu; Ime ndiyoobabweedezya alimwi kubusena oobu, alimwi Ime ndiyoobapa kuti bakkale cakuliiba. Mbube bayooba bantu Bangu, alimwi Ime ndiyooba Leza wabo; mpoonya Ime ndiyoobapa moyo omwe aciyanza comwe, kutegwa bakandilemeke Ime lyoonse alyoonse, kutegwa cikababede kabotu abana babo bayootobela musyule lya mbabo. Alimwi Ime ndiyoobamba cizuminano citeeli ambabo, kuti nsyekabasulaiki kuleka kubacitila cibotu; pele Ime ndiyoobikka kuyoowa Ndime mumyoyo yabo kutegwa batakayaamuki kuzwa kuli Ndime. Inzya, Ime ndiyoobalekelela kubacitila cibotu, alimwi Ime ndiyoobakkazyikizya ncobeni munyika eeyi, amoyo Wangu a muya Wangu woonse. Nkaambo mbuboobu mbwaamba Yahuwah. Mbubonya mbundakaletela bantu aaba mapenzi aaya woonse mapati, njoobaletela mbubonya coolwe coonse ncindaabasyomezya. (Jelemiya 32:37-41, NKJV)
Bbabbuloni wamu moza, inzya lyoonse, mbabaabo bakasangana Saatani mubuzangi bwakwe bwakulwana Yahuwah. Inzya ncobeni “twakatapaulwa” akataa misyobo yalusyomo iizwide zitaluleme. Pele cisyomyo ca Yahuwah ncakuti Walo uyooyobolola Bakwe akubamba cizuminano cipya andiswe. Walo uyooba Leza wesu alimwi swebo tuyooba bantu Bakwe. Eelyo nyika yaakubambwa bupya, eelyo mulawo wa Yahuwah waakulembwa amyoyo yabasyomi, ndendilyo makanze mataanzi mukulenga mukowa wabantu nayoozuzikwa. Bumboni bwakuti Walo uyoobamba cizuminano cipya eeci andiswe cijanwa mu kasimpe kakuti ijwi Lyakwe talilezyi kuzuzika. “Mbweenya Ime mbweekaletelezya manyongwe woonse aaya kubantu aaba, mbweenya Ime mbweyoobaletela coolwe coonse eeco nceekasyomezya kuli mbabo.” (Jelemiya 32:42, NKJV)
Kozuunyana kukakatila nokuba kuti waalilwa buti. Pele kkazyika camba mukasimpe kakuti ijwi lya Yahuwah kunyina pe nolyaalilwa alimwi bumwi buzuba linolino, Yahuwah Lwakwe “uyoosansamuna misyozi yoonse kuzwa kumeso aabo; takucikabi kufwa kabili, nokuba koomoka, nokuba kulila. Takucikabi ca kuciswa, zintu zyakale zyakamanina.” (Ciyubunuzyo 21:4, NKJV).
