“Kuboola Alimwi” Kwa Yahushua muli Johane 14

“Myoyo yanu itapengi. Amusyome muli Yahuwah, alimwi musyome amulindime. Muŋanda ya Taata muli makkalilo manji, nikwatali boobo nindatamwaambila. Ndainka kuti nkamubambile masena. Ndaakumana kumubambila masena, ndiyooboola alimwi kuti ndizoomutole ooko nkwebede, kutegwa ooko nkwebede, anywebo mukabe nkuko.” (Johani 14:1-3).

Cali ciyanza mu Bunakristu kuti eeci cibalo kacilanganyigwa aanga ncisyomyo ca kuzyokela kwa Messiah kalibonya ntongola meso, mumubili uuzwide, alimwi mubuntu bwakwe kazwa Kujulu kuzyookwempula Banakristu akubatola Kujulu antoomwe anguwe. Pele eeci tacisyi ncociiminina cibalo eeci. Ncociiminina, alimwi Yahushua ncaakali kwaamba, cakali cakuti naakaunkide kujulu, Walo wakali kuyootumina Muya Uusalala kuti azyookkale munyika antoomwe a basikwiiya Bakwe baluleme.

Bamwi basyoma kuti eeci caambilizya ciindi ca lufu: “aboobo muli Johane 14:2f tubala kutolwa mu “makkalilo” mu ŋanda ya Taata nayoozyokela Mwanaa Muntu – kakwiina kudonaika eeco caambilizya lufu lwa basyomi.” Langisya akuti eeci tacili ncociiminina cibalo eeci. Yahushua wakaamba kuti Walo uyoobola “kuzyootambula” basikwiiya Bakwe (akuswaangana “mbuli balongwenyina”). Tacaambi kuti Walo uzyooboola akubatola Kujulu pe.

Atuzubulule cibalo eeci tubone naa cili masimpe. Kuli twaambo tongaye swebo ncotunga twayeeyela kuti ooyu muzeezo tuululeme:

1. Ncociiminina kuti ŋanda ya Taata:

Kutaanguna, kuli ncociiminina kuti ŋanda ya Taata. Ili kuli alimwi ninzi ŋanda ya Taata? Bunji bwa Banakristu babala cibalo eeci munzila yakuyeelela biyo kuya Kujulu akulekela mpeenya aawo. Banji bayeeyela kuti, aayo maanda aali mukati kamunzi wa golide, azimwi mbweenya oobo. Balo tabayungizyide kuvwuntauzya makani aaya. Pele aawa tacaambi kuti ŋanda ya Taata ili Kujulu.

Ikuti swebo katusyoma kuti Yahuwah nkwali kuli koonse, nkokuti swebo inga katuyeeya akuti Walo nkwali kufumbwa busena. Kunyina busena mumulengalenga ooko Yahuwah nkwatabede. Davida wakabuzya kuti, “Ino inga ndaya kuli kuti njube Muuya wako? Ncijile kuli kuti nzwe kulinduwe? Kuti naa ndatanta kujulu, akwalo ooko nkoli, akaka doono ndale mucuumbwe ulindibwene.” (Intembauzyo 139:7-8). Muli Izaya 66:1, Yahuwah wakati, “Mboobu mbwaamba Mwami Yahuwah ulati, “Julu ncecuuno cabwami ayalo nyika ncilyatilo camaulu aangu, ino niŋanda iili buti eeyo njomunga mwandiyakila? Buli kuli busena mbwenga ndalyookezyezya?”

Itempele lyakayakidwe aa Solomoni, alimwi Yahuwah wakayandide kuti bantu Bakwe bazyibe kuti zyoonse zintu eezyo zyakaliko; pele walo taakakanzide kukkala cigaminina abantu Bakwe kulaale mu Tempele limbi pe. Itempele lyakali mukonzyanyo, alimwi zimwi ziindi lyakali kutondezya mpaakabede Yahuwah mbuli mbukwaali kulibonya mukati kalyo. Pele Tempele tiilyakali kulanganyigwa aanga “Nce” cikkalilo cokwa Yahuwah pe.

Alimwi lino, mbwaanga Yahushua wakafwa, wakazikkwa, wakabusyigwa kuzwa kubafu, akutanta kuya kujulu, akutumina Muya Uusalala kuli basikwiiya Bakwe, swebo to BanaKristu tuli mucibaka ca Tempele eelyo mbuli masena aakukkalila ookwa Yahuwah. “Mulinguwe anywebo mulayakilizigwa antoomwe kuti mube cikkalilo ca Yahuwah kwiindila mu Muuya wakwe.” (BaEfeso. 2:22). Muya Uusalala wakakkalalila mu basyomi kuzwa aciindi niwaapegwa kuli basikwiiya. “Saa tamuzyi kuti inywe muli tempele lyokwa Yahuwah, alimwi akuti Muya wa Yahuwah ukkalila muli ndinywe?” (1 Bakolinto. 3:16). “Ategwa ni? Saa tozyi webo kuti mubili wako nde tempele lya Muya Uusalala ooyo uuli mukati kanduwe, ooyo ngojisi kuzwa kuli Yahuwah, alimwi yebo toil wako omwini pe?” (1 Bakolinto. 6:19). Alimwi mulembi wa bbuku lya ciHebulayo wakati, “Pele Kristu ulijisi mwana atalaa ŋanda yakwe mwini; EEYO ŋanda NDE NDISWE ….” (BaHebulayo. 3:6) Swebo tuli ŋanda ya Taata buno buzuba, antoomwe a Yahushua Mwanaakwe kakkede mukati muli njiyo. Kuli ŋanda yomwe amaanda manjaanji. (Langa muli 1 Timoti. 3:15; BaEfeso. 2:19-21; 1 Bakolinto. 3:9-11, 16-17.)

2. Yahushua Ukanana makani aa Muya Uusalala muli Johane 14:

Kuzwa mukampango 16 (ka Johane cipati 14), Yahushua waamba cigaminina Muya Uusalala kuwaamba zina. Yahushua wakati, “Ndiyookomba kuli Taata kutegwa akamupe uumbi Mugwasyi uutikakkale andinywe lyoonse.” (Johane14:16). Ibbala lya kukkala aawa lizyila kubbala lya ciGiliki lyakuti (meno), eeco caambilizya “kukkala (mubusena bupedwe, mucilongwe nokuba mu kulangila) – kukkala, kuzumanana, kukkalilila, kuliyumyayumya, kuba abusena, kucaala, kwiimikila, kusyite (kwa)…” Nkuzwa kubbala eeli ooko bbala lya “makkalilo” (mone) nkolizyila. Mu cisyoonto 17, Yahushua waamba kuti, “Ooyo ngo Muuya wiisya zyabwini. Bamunyika ngobatakonzyi kutambula nkaambo tabamuboni nikuba kumuziba pe. Nywebo mulimuzi nkaambo ukkede anywebo, alimwi uyookkala mulindinywe.” Walo wakali kulwana makanaa Muya Uusalala wakalaafwi kuboola kuzyoo kkalilila antoo a basikwiiya kuboola. Pele mulaka uubelesyedwe waamba kuti ngu Yahushua Ooyo kuboola akukkalila aambabo. “Tandikooyoomusiya mubuumba mbuli bamucaala, pele NDIYOOBOOLA ALIMWI KULI NDINYWE.” (cisyoonto.. 18). Ncintu comwe nceenya eeci Walo ncaakali kubaambila mu cisyoonto 3. Mbwaanga Muya Uusalala wakaboola ncobeni, mbube Yahushua ukkala aandiswe. “Nywebo tamuli mbuli bantunsi, musololelwa a Muuya, kuti naa Muuya wa Yahuwah muuli muli ndinywe ncobeni. Kufumbwa muntu uutajisi Muuya wa Yahushua, tali wakwe pe. Naa Yahushua kali mulindinywe…” (BaLoma. 8:9-10).

Alimwi takonzyi kuba biyo Yahushua alikke kuboola kuzyookkala antoomwe abasikwiiya, pele awalo Taata lwakwe antoomwe. “…Taata wangu uyoomuyanda, mpoonya tuyooboola kuli nguwe, akubamba mpotukkalila anguwe” (cisyoonto. 23).

3. Ibbala lya “Maanda” Lilikonzyene alyakuti “Cikkalilo.”

Eelyo Yahushua naakaamba kuti Taata Wakwe a Nguwe bayooboola kuli basikwiiya akukkala antoomwe ambabo, Walo wakabelesya bbala lya maanda mu cisyoonto 2 (mone). Banakristu bakali kuyooba maanda naa masena aakukkalila ookwa Taata a Yahushua kwiinda mu Muya Uusalala. Ibbala lya maanda/mone liiminina “aakukkala, nkokuti, munzi (mucito naa busena); -- ŋanda, munzi.” Eeli bbala lwalyo lyakazyila kubbala lya ciGiliki lyakuti (meno) lya kucita cintu, mbuli mbukwaambidwe kale, eelyo liiminina “kukkala (mu busena bupedwe, mucisi, a mukwasyi, na bulangizi.) – kukkala, kuzumanana, kukkalilila, kubikkilila, kuba, kucaala, kwiimikila, kumuka (umwi). Ibbuku lisandulula mabala lya Webster lyaamba bbala ya Cikuwa lya maanda kuti nkukkala naa kuswaya. Eeci ncintu citamaninide kuzyibika, ciiminina kuti eeco ncencico ncilyakali kwiiminina bbala eelyo. Swebo lyoonse tweelede kulanganya ncaakali kwiiminina kaindi mabala kuleka biyo ncaayiminina mazubaano. Johane 14:2 mbobusena bulikke mu Cizuminano Cakale aawo bbala eeli mpolisanduludwe kuti maanda. Muli Johane 14:23 lisanduludwe kuti mbusena bwa kukkala. Ndibbala ndyeenya. Yahushua wakaamba kuti uyoobamba busena Bakwe bwa kukkalila aandiswe. Swebo tuba maanda aayo Walo ngaakaamba mu cisyoonto 2. Walo waamba kuti Banakristu bayooba makkalilo ookwa Messiah mu ŋanda ya Taata. Eeci taciiminini kuti, kucinyina kuboola kwa Messiah kwiinda ali ceeci. Bunji bwa Cizuminano Cipya cakalembwa Muya Uusalala niwakaboolede kale, pele cakazumanana kulangila kuti Messiah uciboola. Kuli “kuboola” kwa Messiah kutali komwe buyo mu Cizumainano Cipya. Bunji bwa malembe eesu azingulukide munsaa “kulibonya kwabili” kwa Messiah, ooko kwaacitika mu A.D. 70. Kwakaitwa kuti “nkwabili” kweendelanya a kulibonya kwakwe “kutaanzi” mubuntu.

4. Basikwiiya Tiibakeelede Kupenga mu Myoyo Nkaambo Muya Uusalala Wakacili Kuyooboola:

Mu cisyoonto 27, Yahushua wakati, “Myoyo yenu itapengi.” Aaya nga malailile ngeenya ngaakapede Walo kuli mbabo mu cisyoonto 2, katondezya kuti Walo wakacili kwaamba cintu nceenya. Aboobo ncotujisi aawa nceeci: Yahushua aawa muli Johane 14 waamba kuti mu ŋanda ya Taata (eeyo iili ngo Mulengalenga woonse), kuli masena manjaanji aakukkalila. Pele basikwiiya bakali kuyooba ŋanda Yakwe, alimwi Walo wakali kunookkala ambabo mbuli mumaanda. Walo wakali kuzyooboola kuzyoobagwasyalila, mubuntu bwa Muya Uusalala, akucita cintu eeci. Kuyaamuka Kwakwe kuyoobamba busena bwesu kwakali kujatikizya lufu Lwakwe, kuzikkwa, akutanta kuya kujulu. Zyoonse eezi zyakali kuyandika kuli ndiswe kutegwa tube maanda mu ŋanda ya Taata.

Muzeezo wa mazubaano wa cibalo eeci ngwakuti aayo “maanda” aambidwe masena aayebeka, mapati aasakatizyidwe, alimwi aali Kujulu. Eeci tacisyi nceciimina makani aaya. Ibbala lini lwalyo taliiminini ceeco pe. Yahushua wakaamba biyo kuti walo wakali kuyoobabambila busena bwabo. Walo wakacicita eeco, wakabuka kuzwa kubafu, akutanta, akuyootumina Muya Uusalala kuti akkalile mukati kabo. Walo wakaamba kuti uyooboola akuzyoo “batambula”. Eeci nceciindi cilikke mu Cizuminano Cipya eeli bbala kuligama nolibelesyedwe. Liiminina “kutambula munsimunsi, nkokuti., kulikumbatizya kuli lwako omwini (mu cintu ncozyibide naa mu mucito wa cilongwe.” Ncoliiminina ncakuti walo uyootumina Muya Uusalala mucibaka Cakwe kuzyootambula Banakristu kuti banjile mu cilongwe cakumvwana nkaambo Muya Uusalala wakali kunookkalilila muli mbabo. Walo taakaamba kuti uyoobatambwida Kujulu pe. Eeci cilongwe ciyumu nta Walo ncaakali kwaamba cakali kuyoocitikila anyika. Walo aawa taakali kwaamba kuboola kwabili muli Lwakwe, pele buyo mu Muya Uusalala.

Walo wakazumanana mu cisyoonto 16 naakaamba kuti Taata uyoobapa muumbulizi uumbi (Langa amuli Johane 14:26; 15:26, amu 16:7). Ibbala lyakuti “Muumbuluzi” liiminina “wiiminina akati, uulailila: -- uuzekela, wuumbulizya.” Mumajwi amwi, Walo ngonguwe uutugwasya kutulilaukila nzyotubulide kuli Taata, mbuli mbocaambidwe mu BaLoma 8:26: “Mbuli mbotuzi, Muuya ulatugwasya. Tuli bateteete, tatuzi mbotweelede kukomba. Ncenciceeco Muuya ncuutukombela kuli Yahuwah, kututongokela amajwi aataambiki.” (Mubweende bwa zintu, ooku takuli kwaamba kuti Banakristu kabakanana mu “milaka” mbuli bamwi mbobayeeyela. ‟Kwiimininwa” aa Moza “takukonzyi kupozyegwa majwi.”)

Yahushua wakaamba kuti ooyu Muumbulizi “uyookkala andinywe kukabe kutamani” (cisyoonto. 16). Mu cisyoonto 23, Yahushua waamba kuti, “Swebo TUYOOBOOLA kuli nguwe.” Kutali biyo Yahushua alikke, pele a Taata awalo, “akuzyoobamba makkalilo eesu antoomwe anguwe” (cisyoonto. 23). Mbuli mbukwaambidwe kale, ibbala lya kukkala ndeenya ndibbala likonzyene mumulaka wa ciGiliki alya maanda mu cisyoonto 2, alimwi lyaamba kubamba busena bwakukkalila Taata a Mwana antoomwe a Banakristu. Ncintu ciyandika kubona kuti eelyo Yahushua naakaamba maanda (masena aakukkalila) mu cisyoonto 2, Walo wakali kubandika cintu comwe amu cisyoonto 23 eelyo walo naakati Taata Wakwe a Nguwe bayooboola akubamba makkalilo antoomwe a basikwiiya. Eeli bbala lilikonzyene.

Mu caandaano 26, Walo wakaamba kuti Taata uyootumina Muya Uusalala mu zina Lyakwe. Eeyi yakali nzila Messiah mbwaakaboola kuli basikwiiya – mu ciwa ca Muya Uusalala… Mpoonya, mu kampango 27, kuzumanana amubandi ngweenya, walo ulaamba alimwi (mbweenya mbwacitide mu cisyoonto 1), “Myoyo yenu itapengi.” Myoyo yabo tiiyakeelede kupenga nkaambo bakali kuyoopegwa Muumbulizi wakukkala aambabo. Ncenciceeci Walo ncaakaamba cintu nceenya mu cisyoonto 1: “Myoyo yenu itapengi.” Mpoonya Yahushua waamba kuti balo bakamvwa mbwaakambide kuti, “Ime ndaunka, alimwi njooboola kuli ndinywe (cisyoonto. 28). Walo aawa waamba kujatikizya mubandi wakwe wa Muya Uusalala kuboola kuli mbabo. Aawa ncaamba mu cisyoonto 28, kujatikizya Muya Uusalala, cinikwiiminina cintu comwe amu cisyoonto 3 oomo mwaamba kuti, “Ime njooboola alimwi, akuzyoomutambula inywe kuli ndime…)

Aboobo eeci cibalo cilibotela cili muli Johane 14:1-3, eeco bunji bwesu mbuli bakambausi ncotubelesya mu milumbe yamu madilwe kuti tuumbulizye myoyo yabantu kuyaamina ku makani aakuti Messiah uyooboola akuzyoobweza bana Bakwe akubatola ku “maanda aali mujulu”, taciimininini ceeco nokuceya pe. Kunze lya boobo, ciiminina kuti, Messiah wakasyomezya kuboola mu buntu bwa Muya Uusalala kuzyookkala antoomwe a Banakristu kukabe kutamani. Munzi wa Taata nkuuli kufumbwa busena. Eelyo Yahuwah naakati, “Ijulu ncuuno cangu, inyika malyatililo aamaulu aangu…” (Izaya 66:1), wakatwaambila akuti Walo ulakkala kufumbwa kuli koonse. “Kayi nimuba mujulu lyamajulu tokonzyi kweelela, ino mbuti muŋanda eeyi njindakuyakila?…”(1 Bami 8:27). Kufumbwa naa kuli milengalenga kulaale andiswe, tatuzyi pe. Pele kuti kacili boobo, Yahuwah nkwali akwalo ooko. Umwi mulembi wakaamba kuti ikuti kabwe komwe ka museenga ku cito kakayimina mulengalenga wesu, nkokuti woonse museenga uuli munyika iino wiiminina milengalenga yoonse iili kulaale andiswe. Ncintu cikopanya mizeezo yesu nokuba kuyeeyela cintu eeci. Yahuwah nkwali kuli koonse – nkwali koonse. Pele cintu cikkomanisya ncakuti Yahuwah wakasala kubamba busena Bwakwe bwakukkalila mu myoyo amu maumi aa bantu Bakwe. “Pele hena Yahuwah uyookkala ncobeni abantu anyika na?” (II Makani 8:18). Swebo tuli masena aakwe aakukkalila, minzi, a maanda. Mu ciwa ca Muya Uusalala, Walo ulaboola kuzyootutambula kuli nguwe Lwakwe akutumvwanya mu cilongwe a Nguwe. Alimwi mubweende bwa zintu, hena yebo ulizyi cuuno cokwa Yahuwah nkocibede cino ciindi na? Cili akataa bantu Bakwe, cino ciindi mubuumi buno, mumunzi uusetekene, Jelusalema Mupya, mu cikombelo, mu majulu mapya anyika mpya: “…cuuno ca Yahuwah a Mwanaa Mbelele ciyooba muli nguwo (munzi uusetekene, mu bantu bokwa Yahuwah)…” (Ciyubunuzyo. 22:3).

Eeci ncibalo citali-ca-WLC cakalembwa aaba John L. Bray.

Twakagwisya mucibalo citaanzi mazina aabakomba mituni ngobayita Taata a Mwana, akubikka mucibaka cangawo mazina mataanzi ngubaapedwe. Kuyungizya waawo twakajokolosya mutumpango ntotulembulude akubikka mazina aa Taata a Mwana, mbuli mbwaakalembedwe kutaanguna abalembi bamu Bbaibbele bakayoyelwa moza. Nkamu ya-WLC