Julu a Nyika Mpya zyokwa Yahuwah Nzya Kumbelaa Cuulu ca Myaka. Ngaaya Makani Ncocili Boobo

Bweende bwa buumi, ku baluleme ababisyi, mu Cuulu ca Myaka bunoolondolodwe kapati kwiinda cili coonse ncotunga tweezyeezya. Kupona munyika eeyo muleli mupati aatalaa masi woonse mwatali cibeela ca mbungano yabumpelenge ya UN nokuba mulongwenyina aa mfulumende yaku Amelika iidyakaizya akunyonaunwa aabuleli bwa kulisumpula, kunze lyaboobo munooli munyika oomo malelo woonse aatakwe kubwekelana mwaanooli munguzu zya Yahushua zikkwene bwinibwini, eeco ceelede kunyoomenezya kufumbwa muntu uukkala anyika. Basololi banyika banjaanji azimwi nkamu tazikamutambuli Yahushua eelyo baakumubona mumakumbi uleza anyika, kazingulukidwe bangele bakujulu. Bayookakatila kumulesya kuzyokela anyika kabadubula misyonga ya mabbwalubbwalu kutozya kujulu, pele bayokwaalilwa. Mazuba aayinda nibakadubula ‘mabbaluuni aabamuzwa kule’ ambweni eelyo bakali kusolasola biyo mboyoodubula misyonga aciindi eeco. Luuka utuzyibya mamanino aa basofwaazi aaba mbwaayooba. Nokuba kuti Saatani abangele bakwe bakafwe ucinokwaangidwe mumulindi uutagoli mu Cuulu ca Myaka coonse, babisyi bazwa mumasi bacinooyandika kweendelezyegwa aamusako wa Yahushua wa butale kuti bateelele akulilemeka.

Akataa bubotu bwa kulelwa aa Yahushua kuyooba mamanino aankondo zyoonse akusandula nyika ya mpindu-ayakumba-zilwanyo kuti ibe nyika ya bulimi, amasena aampindu. Kunooli akwalo kusinganyigwa kwa nyika kuyoogwisyigwa muzibeela, akupa kuti babisyi kabapona maumi malamfu kwiinda lino. Kunoonyina malwazi aayambukila nyika yoonse, kunoonyina mpindu zya bumpelenge zya mbungano ya WEF , kunoonyina basimapolitikisi bapoide, kunoonyina badyakaizya muntu, kunoonyina kusalauzyana, kunoonyina ku kudyakaizya, kunoonyina nzala, kunoonyina kufwa nyota, kuvwundumukila mfulumende, kunoonyina 1% basyaacivwule-mwangu bali bavwubide 90% buvwubi bwaanyika, kunoonyina kuzungaana nyika, kunoonyina miyoba, kunoonyina kutundululwa mumilimo, kunoonyina kusumpauzya banakazi boonana abanakazi abasankwa boonana abasankwanyina abaabo boonana kufumbwa muntu abamwi boonana koonse-koonse, kunoonyina boonana abana bacece, kunoonyina banyama bamusokwe, alimwi mulongo uciya kumbele wa zintu zibotu ziyooba mubulelo bwa Yahushua. Ncenciceeci kabeela kamubili wesu kali koonse ncokalangila kupona mumusela uuboola, nkokuti, mu Myaka iili Cuulu ya Messiah ookwa Yahuwah.

Nokuba zyoonse zyaambwa atalaawa, musela wa Myaka iili Cuulu unoolaa kaambo. Kucinooli lufu muminzi ya babisyi, eeco caambilizya kucisa, buumba, akuusa akataa baluleme aabo banoosweekelwa bayandwa. Ooko kukakanyana kuzanga kwa babisyi bamwi kunooletela mukuli uucisa ku baluleme. Eelyo basyomi basyomeka mazubaano nobalangila Cuulu ca Myaka ciciboola, baluleme antoomwe a Yahushua, banoolangila buumi butobela Cuulu ca Myaka eelyo Yahuwah noyoolenga julu anyika mpya kwaakwiinda lubeta lwa mamanino lwa Saatani alimwi kwaakwiinda Lubeta lwa Cuuno Cipati Cituba lwa kubeteka babisyi bayoobuka kuzwa kubafu. Busanduluzi busyoonto bwa majulu anyika mpya mu zyaandaano zya mamanino mubbuku lya Ciyubunuzyo nkuzwezya biyo aasyoonto buumi oobo bwakukkala cakulikwaya kukabe kutamani eelyo baluleme nobayoo kkomana kukabe kutamani.

Mu majulu mapya anyika mpya, Mangwalo aamba kuti, kuli zintu zili ciloba zitanooliko—zintu zili ciloba “zitaciko”:

• kucinoonyina lwizi (Ciyubunuzyo 21:1)
• kucinoonyina lufu (Ciyubunuzyo 21:4)
• kucinoonyina koomoka (Ciyubunuzyo 21:4)
• kucinoonyina kulila (Ciyubunuzyo 21:4)
• kucinoonyina kucisa (Ciyubunuzyo 21:4)
• kucinoonyina kusinganyigwa (Ciyubunuzyo 22:3)
• kucinoonyina masiku (Ciyubunuzyo 22:5)

Yahuwah uyoolenga julu anyika mpya nkaambo nyika, kutali julu, nguuyooba Munzi Wakwe mupya. Walo uyookkala a Yahushua a baluleme mu Munzi wa Jelusalema Mupya ooyo uyooseluka kuzwa kujulu. Jelusalema waansi a Tempele lyawo ooyo Yahushua ngwayooyaka aakuzyokela tuucinooyandiki eelyo Yahuwah aakulengulula majulu anyika mpya. Busanduluzi bwa Jelusalema Wakujulu ooyo uuyooselukila anyika ncintu citapandulukiki mu majwi aabuntu. Coonse ncotukonzya kucita nkuzumanana biyo kulotela munzi ooyu ngwaakagantauka kupandulula Mwaapositolo Johane mu Ciyubunuzyo 21 a 22.

Tatweelede kusumpula Jelusalema waansi kweelanya aa wakujulu:

Kuli zintu ziimpene kapati akataa minzi yobile eeyo. Nzyeezyi zintu zimwi zyaandaanya kapati minzi yobile eeyo:

1. Jelusalema wa Cuulu ca Myaka unoolaa tempele liyakidwe kweendelanya kubusanduluzi bwa zyaandaano zyamamanino muli Ezekiya. Jelusalema uutobela Cuulu ca Myaka tuukwe tempele.
2. Meenda aanookunka kuzwa kunsaa Tempele lya Cuulu ca Myaka kutozya Ku cooko caku Arabah [lwizi lwakafwa, busena bwiinda kuselela ansi lyanyika kupima matende aasika 1400 kunsaa lwizi, mubusena bwiinda kubaa munyo] buyooba aa buumi cakuti inswi zinji ziyookonzya kuzelwa kuzwa mu lwizi lwakafwa lwa mazubaano. Mu Jelusalema uutobela Cuulu ca Myaka, tubala kuti kunooli ‘mulonga wa meenda aabuumi, aa ŋaima mbuli bbwe libalangala, aakunka kuzwa kucuuno ca Yahuwah aca Mwanambelele amumbalaa musamu wabuumi, aboobo eeco ciliindene kapati akataa ba Jelusalema bobile.
3. Nkaambo kakuti kucinooli babisyi mu Cuulu ca Myaka, kunooyandika kuumpa zipaililo akwaaba zituuzyo kutegwa baluleme basalazyigwe kuzwa kubusofwaazi bwa kugumana aababisyi. Kakwiina babisyi bacipona caakusika kumagolelo Cuulu ca Myaka, kunoonyina mulimo wa tempele nokuba kuumpa zituuzyo. Ncenciceeci ncokutakabi tempele mu Jelusalema uuboola kaciindide Cuulu ca Myaka.
4. Takukabi masiku mu Jelusalema uuyootobela Cuulu ca Myaka, mbwaanga bulemu bwa Taata Yahuwah buyoomweka cakuzunda mumuni wa zuba a awa mwezi. Pele tabusyi mbocibede mu Jelusalema uuyootobela Cuulu ca Myaka, oomo myeendelo ya zuba amwezi mwiiyoozumanana kweendelezya buzuba abusiku.
5. Muli Izaya 66:22-24, tulajana cintu cilomya ncobeni kutondezya kutali biyo kuti julu anyika mpya ziyooba kaciindide Cuulu ca Myaka pele akuyungizya makani aayandika kapati aakuti:

“Nkaambo mbweenya majulu mapya anyika mpya, eezyo nzyeyoobamba mboziyookkalilila kunembo”—mbwaambilizya oobo Yahuwah—“mbweenya alunyungu lwenu azina lyenu mboziya koongoola. Mukowa wabantu woonse uzyooboola kuzyooko Ndime kuzwa ku Mwezi Mupya omwe kuyoosikila kuli umbi, akuzwa ku Nsabata imwi kuyoosikila kuli iimbi,” mbwaamba Yahuwah. “Eelyo baakuyaamuka, bayoobona mitumba ya bantu bafwide aabo bakali kuzangila Ndime; nkaambo mvwunyu zyabo tazifwi, alimwi mulilo wabo tuukazimi, alimwi bayooba cisesemyo ku bantu boonse.”

Mukaambo kali atalaawa ijulu anyika mpya nzyayoolengulula Yahuwah, zipedwe mumulongo wa ciindi. Walo uzyibya ndiswe kuti baluleme bayoobona mitumba ya bantu bafwide aabo bakali kuzangila Nguwe, nkaambo mvwunyu zyabo tazikafwi pe, mulilo wuumpa mbabo tuukazimi pe. Oobu mbupanduluzi bwa maambila mbali mukwaamba lubeta lwa mamanino lwa basofweede kaciindide ciindi ca Kubuka kuzwa kubafu Kwabili. Mumajwi amwi, ijulu anyika mpya, ziyooba leelyo basofweede nobamanide kubetekwa akuumpwa, kaciindide Cuulu ca Myaka.

6. Camamanino, izintu zilandabikidwe mu Bbuku lya Ciyubunuzyo zyaambidwe mumundando mboziyoo citika. Tacigambyi kuti nyika mpya, julu lipya, a Jelusalema wakujulu eezyo zipanduludwe mu caandaano 21 a 22, kutalikila ku caandaano 20, zitonkomene kuzintu zya Cuulu ca Myaka.

Ziindi zisangalazya zilindila baluleme mu Cuulu ca Myaka, alimwi ziindi zikondelezya zilindila mbabo canikwiindide Cuulu ca Myaka.