Myeembo ya Ciyubunuzyo iili Ciloba ilaafwi kubbonta Nyika kiifwesede kutobelana. Aayo manyongwe ayoocitika mu Myeembo eeyi ayoobapenzya kapati aabo bakkala mumadolopo. Kakwiina kwaamba zinjaanji, muumadolopo mwini Taata waluyando Yahuwah mwanyansyigwa akudyakaizyigwa, aboobo eeci ncecipede kuti madolopo kaaliibide kucita zitondwa akulengelezya milandu.
Bantu ba Yahuwah babamba milawo sunu beelede kulonga kuzwa mumadolopo nocicikonzyeka kucita eeco. Bamazyali inga tiibalelema kulekelezya bana babo kukwelelezyegwa muziyanza zya mumadolopo, alo aalibambide kale kunyonyoonwa.
Eeyo myeembo ilaafwi kulila iyoobilizya bukali bwa Saatani kapingilide basyomeka bokwa Yahuwah. Linolino buyo, penzi lya kuula akuuzya mumakwebo liyoobaminya kapati bantu Bakwe. Aboobo, busongo bwa kuteelela Yahuwah akulonga kuzwa mumadolopo kuya muminzi, ooko muntu nkwanga waakulilimina zyakulya, tacili cintu cakuuntulizya, mbwaanga mazuba ngunamasandu ccita koyanda kwaazyiba aalimwa nyemu.
Jelemiya mucishinshimi wakazwezya kunyonyaula kuyoodilimuna madolopo eelyo Myeembo yaakutalika kucitika munsaa mamanino. Walo cakamumyonzya bula kapati ncaakabona mucishinshimi eeco.
"O moyo wangu maawe, O moyo wangu maawe!" Wakalilauka, "Bwapya bula! Mwacisa mukati kamoyo wangu! Moyo wangu ulagulungana; nsikonzyi kuumuna, nkaambo ndimvwide, O Muya wangu, ndililimvwide jwi lya mweembo, uucenjezya nkondo." (Jeremiya 4:19)
Ulayungizya kuya kumbele kuti:
"Kunyonyauna atalaa kunyonyauna kulaambidwe, nkaambo Nyika yoonse yasaalwa. Bavwakkamuka kundisaalila mavwuka, azisitilizyo zyangu zyadeluulwa mukaindi kasyoonto. Ndilili nentiikabone ndembela, akumvwa jwi lya mweembo?” (Tumpango 20, 21)
Jelemiya wakafundilila buumba bupati mucamba naakabona bantu ba Mwami Yahuwah mbobakacimidwe kabawentuzya akusulaika kucenjezyegwa kwa bulemu ooku.
"Nkaambo bantu Bangu bafubaala, tabandizyi Ime. Mbaaba bazinzili, tabajisi busongo bwakumvwisisya. Mbacenjezu kukucita cibi, pele kucita cibotu tabakubwene pe." (Kampango 22)
Atubale kabotu-kabotu cakutontomena mumuuya wakupaila eeco cishinshimi Jelemiya ncaakabona kweendelanya abuumi mbobunikweenda mumadolopo muciindi ca Myeembo:
Ndakabona nyika, nkabela yakalipilingene ncobeni akubula zintu; aalo majulu, taakajisi mumuni pe. Ndakabona malundu aakali kukankama, alimwi toonse tulundulundu twakali kuzungaana ooku akooku. Ndakabona ncobeni kuti kwakanyina naba muntu omwe muli njiyo, abalo bayuni bakujulu boonse bakali lobokede. Ime ndakabona, nyika yambolezi yakaba inkanda, aminzi yayo yoonse yakoolaulwa kubusyu bwa Yahuwah, nkaambo kabukali Bwakwe bukalalide. Nkaambo mboobu mbwaamba Yahuwah: 'Nyika yoonse iyoosaalwa; nekuba boobo nsikiikosozyeli limwi pe. Nkaambo kaako nyika iyoolilauka, amajulu woonse ayoosiya mbi kubula mumuni, nkaambo Ndime ndaamba boobo. Mbwindakakanza oobo, alimwi nsikeeteli pe, alimwi nsikaleki makani aayo. Mboliyoomvwidwa ijwi lya basimbizi abasimata, bantu bamunzi woonse bayootija. Bayokwaanjila masaka akutanta mumpangala zya mabwe. Minzi yoonse bayooyiinda muvwi, takucikwe muntu uucinookkala muli njiyo. Lino webo oosiidwe ulacita nzi? Cilakugwasya nzi kusama zikobela zisubila pyu, akulisakatizya zya golide, akulilambaika musila kumeso aako? Kulibotya kwako nkwabuyo nkaambo basimamambe bako bakusampaula bayanda kukujaya. Ndakamvwa jwi mbuli lya mukaintu uutumbuka, mbuli kupenga kwa yooyo uuzyala mwanaakwe mutaanzi, mbuli ijwi lya mwana musimbi waku Ziyoni nalililauka; ulafweketa akulandabika maanza Aakwe, kumwi kalilauka kuti, 'Maawe mebo, moyo wangu wawizuka kunembo lya bajayi!'" (Jelemiya 4:23-31)
Jelemiya wakabona madolopo woonse "akaloolawudwe ansi" aciindi eeco Yahuwah naakali kulekezya myeembo ambeta Zyakwe. Walo wakabona kuti "kufumbwa munzi uyootakatwa, alimwi kucinoonyina muntu uukkala muli nguwo." Mumajwi amwi, wakabona madolopo asanduka kuba matongo mukkala zyeelo. Buumi bwa baabo banoosyeede mumadolopo aciindi eeco bweezyekwa "mukaintu uutumbuka, kutongela kwa yooyo uuzyala mwanaakwe mutaanzi."
Mucishinshimi acimwi ca Cizuminano Cakale, Izaya ulayungizya kutupa makani manjaanji aabweende bwazintu atalaa nyika muciindi ca Myeembo:
"Amoongolole, nkaambo buzuba bwa Yahuwah buli afwaafwi. Buyoosika mbuli lunyonyooko luzwa kuli-Syaatwakwe. Nkaambo kaako maanza woonse ayookompama, amyoyo yoonse yabantu iyoowizuka. Bayookankama, Kuciswa akuzunta kuyoobajata mbubonya mbuli inzunto zyamwanakazi uumitide. Bayoogambwa kabalangana umwi aumwi mweenzinyina. Masyu aabo ayooba mbuli mabangabanga aamulilo. Amubone! Buzuba bwa Yahuwah buleza. Mbuzuba buyumu, bujisi lunyemo abukali bunji. Bulasaala nyika cakugambya akunyonyoona basizibi bali mulinjiyo. Nkaambo inyenyeezi zyakujulu abandakutema zilaleka kumunika. Izuba liyoosizyigwa ciindi cakupasula; awalo mwezi uyookasya mumuni wawo. 
Elyo njoobweedezya nyika bulumbu bwazibi zyayo, abasizibi bayoopegwa mulandu ngubeelede. Njoolesya kulisumpula kwabasicinguni akufwiinsya basikupenzya balikankaizya. Njoocita kuti muntu abe muyandisi mbuli ingolida iisalala. Muntu uulya maila uyooyandika mbuli ingolida yaku-Ofiri. Nkaambo kako njoozungaanya ijulu, ayalo nyika iyooteenkana mpiibede, mubukali bwa Yahuwah wamakamu amubuzuba bwalunyemo lwakwe lupati. Lino kuyooba kuti, mbubonya mbuli insya iitandidwe ambuli imbelele iitakwe mweembeli, bayoopiluka umwi aumwi kubantu bakwe mwini, bayoocija umwi aumwi kunyika yakwe nkwaakazyalilwa. Umwi aumwi uujanwa uyooyaswa; umwi aumwi uujatwa uyoojazigwa ipanga. Atwalo twana twabo tuyoopwayaulwa kumeso aabo. Maanda aabo ayoosaalwa, abanakazi babo bayootizigwa.'" (Izaya 13:6-16)
Mucishinshimi eeci, Izaya ucenjezya bantu ba Mwami Yahuwah mumazuba aamamanino aano.
- Myeembo iyooyoosya nkaambo iyoopa kuti "maanza woonse alebauke, moyo wamuntu woonse uwizuke."
- Ooko kuloka bula kuyoojata bantu mu Myeembo kweezyekwa "mukaintu natumbuka."
- Alimwi masyu aabo ayooba mbuli "mabangabanga aamulilo."
- Inyika iyoodibaulwa, alimwi babisyi banji bayoonyonyoonwa.
- Nyenyezi zya kujulu tazikapi mumuni wazyo, awalo mwezi uyookasya mumuni wawo. Eeci caambilizya Mweembo wane.
- Bantu balisumpula bayakootobekwa baakulijana tabakwe wakubagwasya mu Myeembo eeyo.
- Mu Mweembo wasanu, tubala kuti "bantu bayooyandaula lufu kuti bafwe, pele tabakalujani lufu; alimwi bayooyandisya kufwa, pele lufu luyoobazwela." (Ciyubunuzyo 9:6)
- Kuyooba koompana akusaala cakutikaika bulowa mumadolopo eelyo bantu baakulibilika mpoonya muntu omwe-omwe kanooyanda kulijanina twakwe.
- Nobaba bana abamakaintu tabakeengelelwi:"Bana babo bayoopwasyaulwa mumeso aabo kabalangilizya; maanda aabo ayoosaalwa alimwi bamakaintu babo bayootizyigwa."
Bulelo bwa Mwami waciloba, Benedict XVI, bwakamana mukaindi kasyoonto buyo, mbweenya bwakashinshimwa mujwi Lyakwe. (Langa Ciyubunuzyo 17:10.) Aboobo citobela ncakuti Myeembo ilalangilwa kufumbwa ciindi lino. Ncenciceeco kulonga kuzwa mu madolopo LINO ncokuyandika cakujata maanka.
Bamwi inga babuzya kuti mbusongo nzi bwa kuyaamuka madolopo. Balatwanga kuti kulonga kujatikizya kulekezya mulimo wako wakucenjezya akukambaukila baabo bacikkede mumo. Nokuba boobo, tweelede kwiibaluka kuti madolopo ayoocenjezyegwa abantu bokwa Yahuwah aabo banooswaya mumadolopo, kutali bantu Bakwe kabacikkede mumadolopo pe. Bamwi balatyompwaika kuyeeyela mbobatajisi buvwubi bwakuti bakaakuyakile muminzi. Aabo basunkidwe kuyeeya kuti inga tiibakonzya kulonga beelede kwiibaluka kuti eelyo notukonka kuteelela Nguwe, Taata wesu waluyando ulaa nzila zitabaligwi zyakutugwasyilila kufumbwa buyo notubelesya lusyomo lukkwene kusyoma muli Nguwe.
Tweelede kwaatantamuka madolopo cakubindikizya, kakwiina kweenkela nokuba kulelema. Mukonzyanyo wa muka Loti weelede kuba kunembo lyesu lyoonse. Yahushua wakatucenjezyela limwi kuti: "Amwiibaluke mukaintu wa Loti" (Luka 17:32). Muka Loti wakaba mukonzyanyo uutontozya mumagondo uututondezya cicitika eelyo notutakkomanini kuteelela malailile Aakwe katukkomene kuyaamukila limwi madolopo nocicikonzyeka.
Mazuba masyoonto aayinda, mucisi cabuvwubi ku Japan, tiicakali kukonzyeka kuumpa mitunta yabafu aabo bakafwa muzambangulwe lyameenda akuzuzuma nyika nkaambo kabuyumuyumu bwa kubula mungwimba. Mukweeleba cilengwa catunsiyansiya cabo, bafwide bakazikkilwa antoomwe muzyuumbwe zya madindi mapati, kubelesya mabbokesi aazisamu maubauba kakuli bamwi bakazikkwa muzibbeeke zya pulasitiki zyamusyobo wacijulujulu
 |
|
Mukonzyanyo wa muka Loti weelede kuba |
Nokuba boobo, Bbaibbele litwaambila ciindi cilaafwi kusika eelyo bafwide nobayokwaalabana atalaa nyika kabatazikkidwe:
"Amuboole nobantu bangu, amunjile mumaanda aanu aamukati [kulaale amadolopo] mulijalile milyango yawo, muyube kaindi kaniini, mane bukali bukamane. Nkaambo amubone! Yahuwah ulabbuka kuzwa kubusena bwakwe kuti abweedezye bantu bakkede munyika mulandu wazibi zyabo. Ayalo nyika iyooyubununa bulowa bwayo, tiikooyoovwumba limbi bajayidwe bayo." (Izaya 26:20-21)
"Nobantu Bangu, kamuzwa akati kakwe [mumadolopo]! Alimwi kufumbwa muntu alivwune kuzwa kubukali buyoosya bwa Yahuwah." (Jelemiya 51:45)
LINO NCECIINDI CINI CAKULONGA KUZWA MUMADOLOPO! . . . LINO SO!
Azimwi Zyeendelana acibalo eeci:
