Ziimo Zyobile: Lusyomo Lwa Masampu

Lwiiyo lwa ziimo zyabulengwe zyobile luletelezya kuyeeyela kwa masampu ooko kuguminizya Yahushua, ooko kuvwundaula mibuzyo minjaanji.

Kweezyeezya Kwa Masampu 1:

Kwiinduluka zyaamba basyoma baleza botatwe

"Ciimo cokwa Yahushua tacili cibeela ca Baleza botatwe,"

"Ciimo ca buntunsi cokwa Yahushua cakatolwa... Wakalaa ziimo zyobile ...ciimo ca moongole .... a ciimo ca bulengwa leza....iciimo ca moongole ngo muntu umwi akataa Baleza botatwe ... iciimo cabuntu tacikwe cibeela akataa baleza botatwe, bazuunyene kuba baleza botatwe balaa bubambe aciimo comwe.... ciimo ca bulemu cokwa Yahushua ncibeela ca baleza botatwe..."

"Baleza botatwe, Taata, Mwana, a Muya Uusalala balaa bubambe aciimo comwe. Bamwi bantu bayeeyela kuti “Mwana” ndizina liiminina ciimo cabuntunsi bwa Yahushua, aboobo muntunsi ncibeela ca Baleza botatwe. Tabusyi bocibede oobo."

Ikuti ciimo ca "muntu" kacitali cibeela ca Baleza botatwe, ino nkukuli ciimo ca “muntu” cokwa Yahushua nkucakaunka kuti citabi cibeela ca Baleza botatwe?

Hena cibeela ca "muntu" cokwa Yahushua cilikkede mukkoce kulaale eelyo ciimo cakwe ca "Leza" nocili cibeela ca baleza botatwe na?

Hena ciimo ca “muntu” cilizyi kuti tacili cibeela ca Baleza botatwe na?

Bantu basyoma muli Baleza botatwe tabakonzyi kupandulula Yahushua mbwanga waba cibeela ca Baleza botatwe alimwi katali akati kabo aciindi mpeenya. Pele, bacizumanana kuyiisya kuti Baleza botatwe a ziimo zyabo zyobile "maseseke mapati" aayo kunyina uunga waapandulula nokuba kwaamvwisyisya.

Nzyobaamba Basyoma Baleza botatwe

"Maseseke Leza mbwakonzya kuba bantu botatwe pele kali Leza omwe."

"Baleza botatwe maseseke alimwi, aboobo, tabakonzyi kumvwisyigwa bwinibwini a muntu."

"Ncintu ciyumu kujana mabala aabuntu aakonzya kupandulula Leza mbwanga waba omwe uukamantene kumwi kali bantu baanzeene botatwe aciindi comwe."

"Aabo bakaka kuti kunyina Baleza botatwe bavwuzya kucita boobo nkaambo tabakonzyi kuteelela cintu eeco. Aabo besu batambwide lusyomo lwa Baleza botatwe tabalumvwisyide cakumaninina abalo pe."

"Hena Baleza botatwe balakonzya kupandululwa na? Kutali aa ndime. Ime kunyina pe nekakatila kupandulula ceeco citakonzyi kupandululwa."

"Leza kubambwa kuba muntu maseseke eeni mbwaanga yebo ulakonzya kusyoma akuti Leza wakaba muntu, pele yebo tokonzyi kumvwisyisya kukamantana kwinikwini akataa ciimo ca bulemu aca buntu."

"Maseseke aa Leza kubambwa kuba muntu taakonzyi kupandululwa."

Mbubuti basyoma muli Baleza botatwe mbobazyi kuti Baleza botatwe/ziimo zyobile zili masimpe mbwaanga tazikonzyi kupandululwa nokuba kumvwisyigwa?

Ikuti lusyomo kalutakonzyi kumvwisyigwa nokuba kupandululwa ca maanu, talweede kuyiisyigwa.

1 Bakolinto 14:9- Mbukubede kulindinywe anywebo. Indimi zyanu zyatanooamba majwi aaswiililika, ino kulazibwa buti kuti makaninzi aambwa? Mulaba anga mwaambila muuwo buyoye.

Lusyomo lwa ziimo zyobile talukonzyi kupandululwa ca maanu nkaambo talukwe bugwasyilizi mu Bbaibbele oolo lukonzya kutondekwa kuti mbumboni bwakuti Yahushua ulaa zibeela zya ziimo zyobile.

Kwiinduluka Zyaambidwe

"Bafundisi ba buleza balazuminana kuti Cizuminano Cipya acalo tacijisi lusyomo luzukide kugaminina Baleza botatwe." (Vol 15 pg 54) Encyclopedia of Religion

"Saa tacili ceenzu – ikuti Baleza botatwe kuuli muzeezo mupati, mbuli zikombelo zya Bakatolika aba [Protestanti] mbozisyoma, aabo bataminina kuti ncibeela ciyandika alimwi cipati mu lusyomo lwabo – mbube nkaambo nzi Bbaibbele ncolitaambi kuguminizya "Baleza botatwe" munzila iisalala, alimwi nkaambo nzi NCOKUNYINA NOKUBA AALI ibbala lyakuti "Baleza botatwe" mu Mangwalo?"

"Kweendelanya ku lusyomo lwa tunsiyansiya twa Bunakristu, "Baleza botatwe" Maseseke" - Muzeezo ooyo swebo mbuli bantunsi banyama abulowa ngotutakonzyi kuteelela. Kuswata bbaibbele kwangu kwakandisolweda kukukosozya kuti akwalo kweelede kuba maseseke kuli Leza awalo nkaambo awalo takwaambi nokuba asyoonto mu Jwi Lyakwe Lisetekene."

"Baleza botatwe tabajanwi mu Bbaibbele – tabalibonyi mu Cizuminano Cakale nokuba Cizuminano Cipya nokuba aasyoonto."

"Kristu taakayiisya Baleza botatwe. Aabo Basyoma Baleza botatwe tabakonzyi kutondeka nguwe kuti nguwaalengelezya lusyomo lwabo. Basicikolo basyoma muli Baleza botatwe baibaluka cintu cakuti yebo weelede kuunka anze lya Bbaibbele kuti ukajane bumboni.

Lusyomo lwa Baleza botatwe/ziimo zyobile taluyiisyigwi mu Cizuminano Cipya. Pele, manjezyeezya aalo alimwi akubbejela. Aabo basyoma muli Baleza botatwe batondeka tumpango mbuli bwa Johane 1:1, Johane 8:24, Johane 8:58, a Johane 20:28 kwaamba kuti Yahushua wakali Leza. Mpoonya, bajatanya busanduluzi bwakubejelezya bwa tumpango ooto ku tumpango tuyiisya kuti Yahushua muntu. Mpoonya badumbaizya kuti Yahushua weelede kuba Leza, aboobo weelede kubaa zibeela (ziimo) zyobile, eeco ciiminia kuti walo ngu “Leza-muntu.”

Yahushua MUNTU

Bafilipo 2:7-8- Wakalilonzya, wakalisalila ciimo cabuzike akuba mbubonya mbuli bantu balya maila. 8Lino naakabonwa kuti waba acikozyano CAMUNTU…

BaHebulayo 10:12- Anu WALO Yahushua naakamana kutuulila zibi cipaizyo comwe ciramani, wakaakukala kululyo lwa-Yahuwah;

Johane 8:40- Pele eno muyanda kundijaya, ndi MUNTU uumwaambila bwini,,.

1 Timoti 2:5- nkaambo kuliide Leza omwe luzutu, alimwi kuli sikuyanzanya omwe uuli akati ka-Leza abantu, NGUMUNTU Kristo Yahushua.

Cizuminano Cipya ciyiisya kuti Yahushua wakali muntu, eeco ciiminina kuti Yahushua woonse mbwazulwa muntunsi. Eeci ncuubauba kumvwisyisya. Eelyo Cizuminano Cipya nociyiisya kuti Yahushua wakatempaulwa, ciiminina kuti woonse Yahushua mbwabede wakasunkwa. Eeci ncuubauba kuteelela. Eelyo Cizuminano Cipya nociyiisya kuti Yahushua wakaamba kuti Wisi alikke ngo Leza wamasimpe alimwi akuti Wisi mupati kwiinda nguwe, eeco ciiminina kuti Yahushua woonse mbwabede wakaamba zintu eezyo.

Kunyina ba Yahushua bobile pe....walo wakaamba akucita zintu kali muntu omwe kutali kuti ciimo cakwe ca "muntu" ncicaacita akwaamba zintu alimwi akuti wakalaa ciimo ca "Leza" eeco catakaamba akucita zintu.

Yahushua MUNTU...omwe luzutu

Kasimpe kakuti Taata alikke ngo Leza, eeco ciiminina kuti Yahushua tajisi "bu Leza" muli nguwe, mbube eeco ciiminina kuti lusyomo lwa ziimo zyobile ndwiiyo lwakubeja.

1 Bakolinto 8:6- nekubaboobo kulindiswe kuli Leza omwe buyo, Taateesu,...

BaEfeso. 4:6- Leza NGUMWI, ngonguwe Wisi wabo boonse, uubainda boonse, nguuli akati kaboonse,..

Malakayi 2:10- Sa toonse tatuli bana ba MUZYALI OMWE na? Sa teensi LEZA OMWE wakatulenga toonse na? Lino nkaambonzi muntu ulacitila mweenzinyina lweeno, akutyola cizuminano cabamatata?....

Kweezyeezya Kwa Masampu 2:

Lusyomo lwa bubambwe bwa ziimo zyobile luyiisya kuti Yahushua wakafwida zibi zyesu aciciingano alimwi taakafwida zibi zyesu ncobeni aciciingano.

Kwiinduluka zyaamba Basyoma Baleza botatwe

"Cakali cibeela ca buntu bwa Yahushua eeco cakafwa aciciingano, kutali ca bulemu."

"Cilikke ciimo ca buntu bwa Yahushua ncicaafwa aciciingano."

"Bulemu bwa Kristu tiibwa KAFWA aciciingano, alimwi buntu Bwakwe BULIKKE mbubwaafwa aciciingano."

"Cili masimpe kuti Leza tafwi. Cili masimpe akuti muntu ulakonzya kufwa. Pele tulabona kuti Yahushua ulaa ziimo zyobile, kutali comwe. CIBEELA CA BUNTU bwa Yahushua cakafwa aciciingano, kutali ca bulemu bwa kujulu."

Ikuti nicakali cibeela buyo ca "buntunsi" bwa Yahushua caafwida aciciingano, ino cibeela ca "Buleza" cokwa Yahushua cakaya kuli eelyo cibeela ca "buntunsi" cokwa Yahushua nicakafwa aciciingano?

Mbubuti cibeela comwe buyo ca muntu mbocinga cafwa?

Aabo basyoma muli Baleza botatwe bataminina kuti bayiisya kuti Yahushua ulaa “ziimo” zyobile kutali kuti mbantu bobile, pele balanganya “ziimo” zyobile eezyo kubee mbantu bobile.

Kwiinda mukuyiisya kuti ciimo ca “muntunsi” ncicaafwida zinyonyoono zyesu aciciingano, pele ciimo ca “Leza” tiicakafwida zinyonyoono zyesu aciciingano, aabo basyoma Baleza botatwe bakaabaula Yahushua mu bantu bobile bacita zintu ziimpene akati kabo umwi kuzwa kuli umwi.

Yahushua tali muntu omwe ikuti kakuli Yahushua wakafwa alimwi a Yahushua watakafwa. Aabo mbantu bobile.

Kwiinduluka caamba basyoma Baleza botatwe

"Pele nceeci ciyumu nta kuli ndime. Yahushua wakajailwa aciciingano ca BuLoma a kufwa. Hena eeco caambilizya kuti Leza wakafwa na? Nuuba mubuzyo lwawo ooyo umvwika kubaa masampu. Hena Leza wakafwa na? Hena Leza wakafwida azitanda zya cisamu zyobile, kagagaidwe mpikili mu matansyi aku matende na? Bwiinguzi a Maanu busomba bwiinguzi buzukide. Yahushua ngu Leza. Yahushua wakafwa aciciingano. Aboobo, Leza wakafwa aciciingano—muzeezo wakukosozya kaambo muubauba. Pele Ime nsyezyi kuti naa inga ndabeteka mangwalo kumuzeezo uuvwutauzya boobu. Kuleka leelyo notujisi bubi muli cimwi mbuli bwa kubambwa buntunsi bwa Leza...Inga twazubulula makani aaya munzila yiindene. Leza taakafwa aciciingano. Kunze lyaboobo, cakali ciwa ca buntu eeco Leza ncaakalisamununa. Muntu wakafwa. Pele Ime ndijana kuti eeci coonse taciteeleleki. Cilangikaanga nkukaka Kulengwa buntunsi. Caandula akati ciimo ca buntunsi ca bulemu bwa kujuli cakuti Yahushua tacicikonzyi kulanganyigwa aanga muntu omwe."

Mbweenya mbuli lusyomo luyiisya kuti Yahushua wakafwa mucibeela buyo ca buntu kutali cabulemu bwa kujulu,

Nestorius wakaulikwa kazina ka buzangi nkaambo ka zintu nzyaakali kuyiisya, pele aabo basyoma Baleza botatwe bayiisya cintu cini nceenya.

Kwiinduluka zyakaambwa

"Eelyo notucesya micito ya Kristu ku ziimo Zyakwe kunze lya buntu Bwake, tulasweekelwa buntu bwakwe bumaninide akucaazya buyo Kristu muna Nestoria."

"Tatweelede kuzandula ciimo ca buntu kuzwa ku ciimo ca buleza, kubee mu buntu bwakwe naakacita cintu eeco ciimo ca bulemu ncocitakubwene; eeci cakali, mucibeela, kulubila kwa bazangi bana Nestoria."

"Eelyo notucesya milimo ya Kristu ku ciimo cakwe comwe kuleka ku buntu bwakwe, swebo tunyonyoona kukamantana kwa buntu bwakwe akucaazya buyo Kristu muna Nestoria."

Lusyomo luna Nestoria

Kwiinduluka zyaambidwe

"Mu lusyomo luna Nestoria, Kristu wakaambidwe kuti wakalaa bulemu bwa kujulu alimwi wakali muntunsi, kazibeleka mbuli muntu omwe, pele kabaswaanganyidwe antoomwe. Aabo basyoma lusyomo luna Nestoria baasulaika muzeezo uuli boobo wakuti "Leza wakapenga" nokuba wakuti "Leza waakankaminwa" nkaambo cakali ciimo ca buntu bwa Kristu cakapenzyegwa, kutali ciimo ca bulemu. Lusyomo luna Nestoria lwakatamikizyigwa kwaandaanya Kristu mu ziimo zyobile zyaandeene bweende."

Nestorius wakayiisya kuti cibeela ca "buntu" bwa Yahushua ncecakafwa aciciingano, pele kutali cibeela ca "bulemu" alimwi eeco cibeela ca Yahushua cakaliko kufumbwa busena kuli koonse, pele cimwi cibeela cakali sinkilidwe kubaa luzyibo. Hena eezyo ziiyo zimvwika bunyenzi kuli nduwe na? Uleelede, nkaambo aabo basyoma Baleza botatwe bayiisya cintu nceenya.

Aabo bakomba Baleza botatwe bayiisya kuti cibeela ca "buntu" bwa Yahushua cakafwa, pele cibeela ca "bulemu" bwa, Yahushua tiicakafwa, mbweenya mbuli Nestorius mbaakayiisya.

Kwiinduluka zyakaamba bakomba Baleza botatwe

"Cakali cibeela ca buntu bwa Yahushua cakfwa aciciingano, kutali ca bulemu wa kujulu."

"Cilikke cibeela ca buntu bwa Yahushua ncicaafwa aciciingano."

"Bulemu bwa kujulu bwa Kristu tiibwaka FWA aciciingano alimwi buntunsi Bwakwe mbubwaka FWA aciciingano."

"Bulikke buntu bwa Yahushua, kutali buntu bwa bulemu bwakujulu bwa Yahushua, mbubwaafwa aciciingano."

"Eelyo Yahushua naakaali kulengeenga aciciingano, Walo wakali, mu ciimo ca buntu Bwakwe, cituuzyo ca camasimpe ca cinyonyoono ca bantu Bakwe, alimwi mbuli boobo, Walo wakeelede kupenzyegwa alikke. Leza takonzyi kutola cibeela mu cinyonyoono,"

Aabo basyoma muli Baleza botatwe bayiisya kuti Yahushua ula ziimo zyobile, ulaa mizeezo yobile, ulaa myuuya yobile, mizeezo yobile, kuteelela kobile, maanu obile, kwiibaluka kobile, kweezyeezya kobile, a myuuya yobile alimwi akuti eezyo ziimo zyobile zilapona antoomwe kaziimpene alimwi kazyaandeene kuzwa kuli cimwi acimwi...

Kwiinduluka zyaamba basyoma Baleza botatwe

"Kristu ulaa mizeezo yobile akuyanda kobile."

"Kuli mizeezo yobile muli Kristu."

"Yahushua Kristu ulaa kuyanda kobile-kumwi nkwa bulemu bwa kujulu alimwi kumwi nkwa buntunsi."

"Walo ulaa mizeezo yobile, kuyanda kobile, myuuya yobile."

"Yahushua Kristu mbwalaa ziimo zyobile, mbube ulaa busongo bobile."

"Ziimo zyobile amizeezo yobile yokwa Yahushua iliswaangene mu muntu omwe."

"Eezi ziimo zyobile zilaanzeene alimwi taziswaangene, pele zili antoomwe mu muntu ngweenya omwe, Kristu. Walo ulaa "ziimo zyobile, pele muntu omwe." Ziimo zyobile, pele muntu omwe."

Aabo basyoma muli Baleza botatwe bayiisya kuti ziimo zyobile zili antoomwe mu muntu omwe.

Kwiinduluka zyaamba basyoma Baleza botatwe

"Kristu ulaa ziimo zyobile zyaanzene pele zili antoomwe mu mubili omwe."

"Yahushua ulaa ziimo zyobile ziswaangene mu muntu omwe."

"Eezi ziimo zyobile zili swaangene mu Muntu omwe."

Aabo bakomba Baleza botatwe bataminina kuti eezi ziimo zyobile zilikamantene mu muntu omwe. Pele balanganya Yahushua kubee mbantu bobile, mbweenya mbuli lusyomo luna Nestoria, kakuli cibeela ca buntu cokwa Yahushua cakafwa aciciingano pele cibeela cokwa Yahushua cabu Leza tiicakafwa aciingano alimwi cibeela cakwe ca buntu bwa Yahushua cakatempaulwa pele cibeela cabu Leza cokwa Yahushua tiicakatempaulwa alimwi cibeela ca buntu bwa Yahushua cakalaa luzyibo lugola pele cibeela cabu Leza bwa Yahushua cakalaa luzyibo lwa zintu zyoonse.

Lusyomo luna Nestoria luyiisya kuti Yahushua mbantu baandeene bobile...muntu wa bulemu bwa kujulu a muntunsi.

Kwiinduluka zyakaambwa

"Lusyomo luna Nestoria nkulubila kwakuti Yahushua mbantu baanzeene bobile."

"Lusyomo lwakakwabililwa aa Nestorius, ooyo wakakkede cuuno ca poopo ku Constantinople mu 428, ndwakuti Kristu ubambidwe aa bantu bobile, umwi ngwa bulemu bwa kujulu kakuli umwi ngwa buntunsi. Lwakasinganyigwa akuzumizya mucibaka candulo lusyomo lwakuti walo wakali muntu omwe, wabulemu bwa kujulu alimwi wa buntunsi."

"Lusyomo luna Nestoria, Bunakristu buzangide bwakali kulanganya Yahushua kuti wakali bantu bobile, baswaangene cakuti tabakonzyi kwaandaanyigwa."

"Lusyomo luna Nestoria, oolo lwakali lwakuti kuli bantu bobile baandeene, muntususu a muntu wa bulemu bwa kujulu, mukati ka Kristu Uuzyaluludwe."

Lusyomo luna Nestoria luyiisya kuti Yahushua mbantu bobile (wabulemu a muntunsi), akuti aabo basyoma Baleza botatwe bayiisya kuti Yahushua ulaa ziimo zyobile (cabulemu aca buntususu.

Busanduluzi bwa lusyomo lwa basyoma muli Baleza botatwe aluna Nestoria buliimpene. Pele, zyoonse zyobile nzila zya lusyomo zigolela abusena bomwe, Yahushua ulazandaulwa mu bantu bobile baamba akucita zintu ziindene kuzwa kuli umwi awumwi.

Aabo bakomba baleza botatwe babelesya bbala lya “ziimo” muciindi ca kubelesya lya “bantu,” pele eezyo “ziimo” zili mbuli “bantu bobile,” aboobo tacikwe makani kuti aabo basyoma baleza botatwe kabayiisya kuti Yahushua ulaa ziimo zyobile kutali bantu bobile.

Kunyina kwiimpana kufumbwa naa Yahushua waambwa kubaa “ziimo” zyobile muciindi cakuba “bantu” bobile mbwaanga boonse bobile balanganya Yahushua mbuli bantu baanzeene bobiile.

Mbuli lusyomo luna Nestoria, lusyomo lwa bakomba baleza botatwe luyiisya kuti cibeela ca “buntu” bwa Yahushua’ ncecakafwa aciciingano. Nokuba boobo, cibeela ca bulemu bwa kujulu tiicakafwa. Eelyo cibeela ca “buntu” bwa Yahushua cakalaa luzyibo lugola, cibeela ca “Buleza” cilaa luzyibo lwa zintu zyoonse.

Lusyomo lwa baleza botatwe alwa Nestoria lutola nzila ziindene, pele zyoonse nzila eezyo ziswaanganina kumamanino omwe aakuti: Yahushua uli mu bantu bobile baandeene bamvwa zintu bwiindene.

Kweezyeezya Kwa Masampu 3:

Lusyomo lwa ziimo zyobile luyiisya kuti Yahushua wakalizyi ciindi ca kuzyokela kwakwe alimwi taakazyi ciindi nayoozykela aciindi mpeenya aawo.

Kwiinduluka zyaamba basyoma muli Baleza botatwe

"Eelyo Yahushua naakati Mwana taakazyi, Walo wakali kwaamba kweendelanya aa buntu bwakwe, kutali kwaamba kweendelanya ku bulemu bwakwe. “Mwana” ciiminina buntu bwa Kristu mu kampango aaka, kutali buleza bwakwe."

"Hena Kristu wakalizyi zyoonse na? - Mbuli Leza, Walo wakalizyi, mbwaanga Leza ulizyi zyoonse. Pele mbuli muntu, Yahushua wakaamba kuti Walo taakazyi ciindi ca Kuboola Kwabili. {Mateyo 24:36]."

"Mu ciimo ca buntu Bwakwe, walo taakazyi zintu zyoonse."

"Mu ciimo ca buntu bwakwe, Yahushua wakalaa luzyibo lugola."

Ikuti ciimo cabu "Leza" cokwa Yahushua nicakalizyi ciindi ca kuzyokela kwakwe, mbubuti Yahushua mbwalesya ciimo ca buntu bwakwe kuzyiba ceeco ciimo ca Leza cakwe ncocizyi?

Hena cibeela ca Leza cokwa Yahushua cilakaka kukanana ku cibeela ca buntu bwa Yahushua?

Hena cibeela cabu Leza cokwa Yahushua cilasisa zya maseseke kuzwa ku cibeela ca buntu bwa Yahushua na?

Hena kuli abusena aasinkwa mumizeezo yokwa Yahushua aawo aandaanya muzeezo wakwe wa buleza kuzwa ku muzeezo wakwe wa buntu na?

Mbubuti muntu omwe mbwanga wazyiba alimwi katazyi cintu cimwi?

Ncintu cabuyanga bwini kuyiisya kuti Yahushua ulizyi zintu zyoonse alimwi ulaa luzyibo lugola. Yahushua inga kanooli bantu bobile kuti eeco nicali masimpe.

Muntu umwi takonzyi kulilesya luzyibo ndwajisi kale...Yahushua tajisi bongo bobile cakuti kakonzya kucincauzya akataa bongo oobo.

Kweezyeezya Kwa Masampu 4:

Lusyomo lwa ziimo zyobile luyiisya kuti Yahushua wakatempaulwa alimwi taakatempaulwa aciindi comwe.

Kwiinduluka zyaamba basyoma Baleza botatwe

"Walo wakatempaulwa mbuli muntu, kali muciimo ca buntu bakwe. Kutali kali mbuli Leza. Leza takonzyi kutempaulwa."

"Mbuli muntu, walo wakatempaulwa"

"Yahushua wakatempaulwa mu ciimo ca buntu bwakwe, kutali muciimo ca bulemu."

"Yahushua wakali kukonzya kutempaulwa mu ciimo ca buntu Cakwe, pele kutali muli ca bulemu. Mu buntu bwa Kristu, kukkede ziimo zyoble: Leza a muntu.......Mbuli muntu, Walo taakali kukonzya kutempaulwa."

Ikuti nicakali cibeela buyo ca buntu bwa Yahushua eeco cakatempaulwa, ino nkukuli cimwi cibeela cokwa Yahushua nkucakaunkide eelyo naakatempaulwa?

Hena cibela cabu Leza cokwa Yahushua cakalaandeene ku cibeela ca buntu bwa Yahushua na? Ime ndakayeeya kuti ziimo zyobile zyeelede kuswaangana alimwi tazikonzyi kwaandaanyigwa. Mbube, mbubuti cimwi ciimo mbucakatempaulwa pele kutali cimwi?

Hena Yahushua wakazimya cibeela ca Leza cakwe eelyo walo naakatempaulwa alimwi wakamwesya cibeela eeco cabu leza eelyo dyabooli naakamanizya kumutempaula na?

Hena dyabooli wakalizyi kuti wakali kutempaula buyo cibeela comwe ca Yahushua?

Hena dyabooli wakaswena munsaa cisela comwe buyo ca Yahushua na?

Hena cibeela cabu Leza cokwa Yahushua acalo cakasunkwa na?

Leza takonzyi kutempaulwa aa busofwaazi, aboobo cilisalazyidwe kuti iicibeela cabu Leza tiicakali kukonzya kutempaulwa, eeco civundausya mubuzyo wakuti,”Nkukuli cibeela cabu Leza cokwa Yahushua nkucakaunkide eelyo dyabooli naakatempaula Yahushua?”

Jakobo 1:13- Naa muntu watepaulwa, ataambi kuti, Ndatepaulwa kuli-Yahuwah, nkaambo Yahuwah tatepauliki kucibi, alimwi walo mwini tatepauli muntu.

Yahushua wakatempaulwa kuti acite cisofweede, eeco citondezya kuti walo taakali Leza.

BaHebulayo 4:15- Nkaambo oyo wesu tali Mupaizi Mupati uutakonzya kutweetelela mukulengauka kwesu, pele ngonguwe oyo uwakasunkwa mbubonya mbuli ndiswe, nekuboobo taakwe naakacita cibi.

Maako 1:13- Nkabela (Yahushua) wakali munkanda mazuba aali makumi one, kusunkwa kwa-Saatani;

Luuka 4:1-2- Lino Yahushua kazywide Muuya Uusalala, wakabweeda kuzwa ku-Jordano, wakasolwedelwa Muuya munkanda mazuba aali makumi one, wali kusunkwa Saatani.

Luuka 4:5-7- Eelyo wakamutola kudundu idamfu, wamutondezya zisi zyoonse zyaansi mukaindi komwe, Saatani wakati kulinguwe, Ndakupa bwami obu boonse abulemu bwazyo, nkaambo ndabupegwa, eno kufumbwa ngwenyanda inga ndamupa mbubo. Kuti wandikomba, boonse bulaba bwako.

Aabo bakomba baleza botatwe baamba kuti Yahushua ulaa ziimo zyobile (Leza-muntu) akuti cilikke cibeela cakwe ca "muntu" ncicaa tempaulwa kucita cibi.

Aboobo, kweendelanya kuli baabo bakomba Baleza botatwe, Yahushua wakalaa cibeela comwe buyo eelyo naakasunkwa aa dybooli mpoonya cibeela cimwi tiicakasunkwa.

Kwiindulula zyaamba bakomba Baleza botatwe

"Mbuli muntu, walo wakatempaulwa."

"Yahushua wakatempaulwa mu ciimo ca buntu Bwakwe, kutali ca bulemu Bwakwe."

"Pele Yahushua Kristu, mu buntu bwakwe, wakatempaulwa. Leza takonzyi kutempaulwa."

Cilubide: Yahushua taakatempaulwa mbuli cibeela comwe ca muntu pele wakatempaulwa woonse mbwazwide.

Yahushua woonse wakatempaulwa. Walo taakali muzibeela zyobile, alimwi tiicakali cibeela comwe akataa zibeela zyakwe eeco cakatempaulwa.

Yahushua naali bantu bobile ikuti naakalaa cibeela comwe cakatempaulwa kakuli cibeela cimwi tiicakatempaula. Muntu omwe takonzyi kutempaulwa mpoonya akutatempaulwa aciindi comwe.

Alimwi, mpali mpociyiisya kuti comwe buyo cibeela cokwa Yahushua cakatempaulwa? Ncobeni kunyina mu mangwalo mpociyiisya boobo.

Tatujisi ba Yahushua bobile pe... Yahushua ooyo wakatempaulwa a Yahushua ooyo watakatempaulwa.

Eelyo Yahushua naakatempaulwa, woonse mbwazulwa wakatempaulwa, Eeco ciiminina kuti tacikonzyeki kuli nguwe kuba Leza, nkaambo Leza takonzyi kutempaulwa (Jakobo 1:13). Ikuti Yahushua naali Leza, nkokuti Leza wakasunkwa kuti acite cinyonyoono.

Ndipenzi lini ndibaalengelezya aabo bakomba Baleza botatwe. Ikuti kabayiisya kuti Yahushua wakatempaulwa mu ciimo ca "buntu" bwakwe cilikke, nkokuti balo bakaandaanya Yahushua kuti abe bantu bobile...Yahushua "muntu" ooyo wakatempaulwa a Yahushua "Leza" ooyo watakatempaulwa. Alimwi ikuti kabayiisya kuti Yahushua wakatempaulwa kali mbuli Leza, nkokuti bayiisya kuti Leza wakasunkwa kucita cinyonyoono, eeco ncintu citajanwi mu mangwalo alimwi cilasampauzya.

Kwiindulula zyaambidwe

"Kwaamba buyo kuti Walo wakatempaulwa mu ciimo ca buntu Bwakwe nkusoleka kwaandula Kristu kuti abe bantu bobile, oomo cintu cimwi mocitola busena muciimo ca Kristu cimwi, pele kutali muli cimwi."

"Tatukonzyi kwaandaula Yahushua mukwaamba kuti mu cibeela Cakwe ca buntu, wakali kukonzya kucita cinyonyoono, pele mucibeela Cakwe ca bulemu, Walo taakali kukonzya kucita cinyonyoono. Cisela comwe ca Yahushua tiicakalli kukonzya kucita cinyonyoono, pele cisela cimwi cakali kukonzya."

Muzeezo wa bakomba Baleza botatwe wakuti Yahushua wakalaa zibeela zyobile alimwi akuti comwe akataa zibeela eezyo cakatempaulwa, tuumvwiki kubaa maanu.

Kuyiisya kululeme nkwakuti Yahushua wakali muntu eelyo naakatempaulwa ncecintu cimvwika kubaa maanu cilikke.

Woonse Yahushua wakali muntu omwe, alimwi ooyo Yahushua muntu omwe wakatempaulwa. Lino eeco ncecimvwika kubaa maanu bwinibwini.

Yahushua...MUNTU omwe buyo.

Bafilipo 2:7-8- Wakalilonzya, wakalisalila ciimo cabuzike akuba mbubonya mbuli bantu balya maila. 8Lino naakabonwa kuti waba acikozyano CAMUNTU,...

BaHebulayo 10:12- Anu WALO Yahushua naakamana kutuulila zibi cipaizyo comwe ciramani, wakaakukala kululyo lwa-Yahuwah;

Johane 8:40- Pele eno muyanda kundijaya, ndi MUNTU uumwaambila bwini,,.

1Timoti 2:5- nkaambo kuliide Leza omwe luzutu, alimwi kuli sikuyanzanya omwe uuli akati ka-Leza abantu, NGUMUNTU Kristo Yahushua;...

Milimo 2:22- Nobaalumi ba-Israyeli, amuswiilile majwi aya, Ngaa-Yahushua wa-Naza-reta, MWAALUMI ngomwakatondekelwa Leza.....

Kweezyeezya Kwa Masampu 5:

Lusyomo lwa ziimo zyobile luyiisya kuti Yahushua wakapaila alimwi taakapaila aciindi mpeenya aawo.

Kwiinduluka zyaamba bakomba Baleza botatwe

"Yahushua wakapaila mu buntu bwakwe, kutali mu buntu bwakwe."

"Ninzi, aboobo, busanduluzi bwa mipailo yokwa Kristu? Inga kacili buyo cibeela ca buntu bwa Yahushua eeco cakapaila ku Moza uutamani wa Leza. Ciimo ca bulemu tiicakabulide lugwasyo; pele buyo ciimo ca buntu."

Cilubide: Yahushua taakapaila alimwi akupaila aciindi comwe...eeco ncintu cisampauzya.

Aabo bakomba Baleza botatwe baamba Yahushua kubee walo mbantu bobile...Yahushua ooyo wakapaila a Yahushua ooyo watakapaila.

Swebo tatujisi [ba] Yahushua bobile, aabo bacita zintu ziindene kuzwa kuli umwi awumwi.

Swebo tujisi buyo Yahushua omwe ooyo wakapaila mbuli muntu omwe alimwi kutali cibeela comwe buyo ca muntu.

Mbubuti muntu omwe mbwanga wapaila alimwi taapaila aciindi comwe nceenya?

Hena cibeela cabu Leza bwa Yahushua cakoona eelyo cibeela ca buntu bwa Yahushua nicakali kupaila na?

Nkuli ooko cibeela cabu Leza bwa Yahushua nkucakaya eelyo cibeela ca buntu bwa Yahushua nicakali kupaila?

Utatambuli manjezyeezya aalweeno aakuti cilikke cibeela ca Yahushua ncicakapaila kuli Leza Yahuwah.

Eelyo Yahushua naakapaila kuli Yahuwah...Yahushua woonse mbwazulwa wakapaila alimwi kutali buyo cibeela cakwe.

Yahushua wakapaila kuli Yahuwah

Maako 1:34-35- Nkabela wakaponya banji baciswa malwazi aamisyobo misyobo, alimwi wakatanda badaimona banji, pele takakali kuzumizya badaimona kwaamba, nkaambo kakuti kabamuzi. Lino buumbuluke buyo, wakafuma loko, wazwa, wainka kunkanda kuyookomba nkukonya..

Luuka 6:10-13- Nkabela wabacebaukila boonse, wamwaambila mwaalumi kuti, Vungununa ijanza lyako. Wacita mbubonya, mpoonya ijanza lyakwe lyavungunuka, lyaba mbuli limwi. Nkabela bafundilila abukali, babuzyanya kuti, Ino tumucite buti Yahushua? Kumazuba ayo Yahushua wakainka kucilundu kuyookomba, masiku oonse wali mukukomba kuli-Yahuwah, Nobwakaca wakaita basikwiiya bakwe, kulimbabo wasala abali kumi abobile, wabaulika zina lyakuti mbaapostolo;

Ikuti Yahushua naali Leza, nkaabela nkaambo nzi ncaakapaila kuli Wisi? Leza tapaili, pele kuli nguwe nkokupaililwa.

Ikaambo keni Yahushua ncaakapailila kuli Wisi nkakuti Taata alikke ngo Leza wamasimpe (Johane 17:3), alimwi Taata mupati kwiinda Yahushua (Johane 14:28), (Johane 10:29), alimwi Taata ngo Leza wa Yahushua (Johane 20:17).

Woonse Yahushua wakapaila kuli Wisi, ooyo alikke ngo Leza.

1 Bakolinto 8:6- kubaboobo kulindiswe kuli Leza OMWE buyo, Taateesu,.

1 Timoti 2:5- Nkaambo kuliide LEZA OMWE luzutu, alimwi kuli sikuyanzanya omwe uuli akati ka-Leza abantu, ngumuntu Kristo Yahushua,.

Malakayi 2:10- Sa toonse tatuli bana ba MUZYALI OMWE na? Sa teensi LEZA omwe wakatulenga toonse na? Lino nkaambonzi muntu ulacitila mweenzinyina lweeno, akutyola cizuminano cabamatata?....

Aabo bakomba Baleza botatwe bayiisya kuti Yahushua ulaa zibeela zyobile (ziimo), pele bayiisya kuti Yahushua wakacita zintu zyoonse kali buyo mu cibeela ca “buntu” bwakwe.

Yahushua wakayiisya kuti Taata wakali mupati kwiinda nguwe, akuti Taata alikke ngo Leza wamasimpe, akuti Taata ngo Leza wakwe. Pele aabo bakomba Baleza botatwe baamba kuti Yahushua wakayiisya zintu eezyo kali buyo muciimo ca “buntu” bwakwe. Eelyo Yahushua naakafwa aciciingano, aabo bakomba Baleza botatwe baamba kuti walo wakafwa buyo mu cibeela ca “buntu” bwakwe. Mbweenya buyo, eelyo Yahushua naakapaila akutempaulwa, aabo basyoma baleza botatwe baamba kuti wakapaila akutempaulwa kali buyo mu ciimo ca “buntu” bwakwe.

Mbubuti muntu omwe mbwanga wacita zintu mu cibeela biyo cakwe cimwi?

Atwaambe kuti Yahushua wakayiisya zintu eelyo naakali buyo mu ciimo ca buntu bwakwe alimwi wakapaila buyo mu cibeela ca buntu bwakwe akutempaulwa kali mu buntu bwakwe akufwida aciciingano kafwida zinyonyoono zyesu alimwi wakabuka kuzwa ku bafu kali mu ciimo ca buntu bwakwe akutanta kuya kujulu kali buyo mu buntu bakwe. Nkaambo nzi Yahushua ncakalaa cibeela cabu “Leza” muli nguwe?

Tacimvwiki kuba cintu ca maanu kuyiisya kuti Yahushua “weelede kuba Leza” mpoonya akuyiisya kuti Yahushua wakaamba akucita zyoonse kali buyo mu cibeela ca “buntu” bwakwe (ciimo).

Aabo basyoma mu Baleza botatwe bayiisya kuti Yahushua weelede kuba Leza kuti abe mufutuli wesu, pele balayiisya akuti Yahushua mufutuli wesu eelyo nali buyo mu ciimo ca buntu bwakwe.

Kwiindulula zyaamba basyoma Baleza botatwe

"Ikuti Yahushua naali Leza, nkokuti bantu tabajisi Mufutuli."

"Ikuti Yahushua Kristu kali Leza Singuzyoonse, ino nguni Mufutuli wesu?"

"Ikuti Yahushua kali Leza, nkokuti yebo tokwe mufutuli."

Aabo basyoma muli baleza botatwe bayiisya kuti Yahushua “weelede kuba Leza” kutegwa alunge mulandu wa zinyonyoono zyesu, pele balayiisya kuti Yahushua wakabbadela mulandu wa zinyonyoono zyesu eelyo naakali buyo muciimo ca “buntu” bwakwe.

Kwiindulula zyaamba bakomba Baleza botatwe

"Cilimasimpe kuti Leza tafwi. Cilimasimpe akuti muntu ulakonzya kufwa. Pele mbuli mbotutiibone Yahushua ulaa ziimo zyobile, kutali comwe. Cibeela ca buntu bwa Yahushua cakafwa aciciingano, kutali ca bulemu."

"Yahushua muntu wakafwa, pele Yahushua wa bulemu bwa kujulu taakafwa."

“Mu mubili Wakwe muzyaalonzyelwa zinyonyoono zyesu."

"Ncobeni, Yahushua, muntu wakalaa ciimo ca buntu wakatuuzyigwa aciciingano."

Ikuti Yahushua naakafwa aciciingano nkaambo ka zinyoynoono zyesu kali mucibeela ca “buntu” bwakwe, nkokuti cili masimpe akuti Yahushua taakabulide cibeela cabu “Leza” bwakwe kuti alunge mulandu wa zinyonyoono zyesu.

Mangwalo alisalazyide kuti wakali MUNTU Kristu Yahushua buyo ooyo wakalunga mulandu wa zinyonyoono zyesu.

BaLoma 5:11-15- Nkabela teensi boobo luzutu, pele alimwi tulatangala muli-Yahuwah nkaambo ka-Mwami wesu Yahushua Kristo, ikuti kumaanza aakwe nkutujene LUYANZANO. Mbuboobo cibi mbucakanjila munyika kumaanza aamuntu omwe buyo, alwalo lufu nkaambo kacibi, nkabela mbubonya obo lufu mbulwakazida bantu boonse, nkaambo kakuti boonse babisya. Ikuti mane kusikila kuciindi ca-Mulao kakuli cibi munyika, pele cibi taceelezegwi ciindi ncikutakwe­ Mulao. Pele lufu lwakali abwami kuzwa kuli-Adamu kusikila kuli-Musa, nikuba kulibaabo batakaina kucita zibi zikozyenye alusotoko lwa-Adamu, nguwenya cikozyano casikuciza. Pele cipo tacili mbubonya mbuli mulandu pe. Nkaambo bantu banji bakafwa nkaambo kamulandu wamuntu omwe buyo, pele luzyalo lwa-Yahuwah lwakainda loko kupaya, acalo cipo camuluzyalo camu MUNTU omwe Yahushua Kristo, kubantu banji,...

1 Timoti 2:5-6-Nkaambo kuliide Yahuwah omwe luzutu, alimwi kuli sikuyanzanya omwe uuli akati ka-Yahuwah abantu, ngumuntu Kristo Yahushua, uwakalisanga mwini kuti anunune bantu boonse, Eci ncecintu cilyaamba cini muciindi caco.

BaHebulayo 10:12- Anu WALO Yahushua naakamana kutuulila zibi cipaizyo comwe ciramani, wakaakukala kululyo lwa-Yahuwah;..

Kuleka buyo kuti Mangwalo ayiisya kuti Yahushua wakabbadelela zinyonyoono zyesu kali muntususu, pele aabo basyoma muli Baleza boatwe balayiisya akuti Yahushua wakalungila zinyonyoono zyasu kali muntu biyo.

Kwiindulula zyaamba basyoma Baleza botatwe

"Walo wakaunka ku ciciingano kali MUNTU kuyoolungila zinyonyoono zyesu."

"Yahushua wakatufutula ncobeni kwiinda mu micito ncaakacirta kali muciimo ca buntu bwakwe."

"Kunyina pe Bbaibbele nolyaamba kuti Leza wakafwa. Wakali MUNTU Kristu Yahushua ooyo wakalyaaba lwakwe kuba cituuzyo ca zyoonse."

Aabo bakomba Baleza botatwe bayiisya kuti cilikke ciimo ca "buntu" bwa Yahushua ncicakafwida zinyonyoono zyesu.

Ikuti nicakali ciimo ca "buntu" biyo cakatunununa kuzwa ku zinyonyoono zyesu, mbube nkaambo nzi Yahushua ncayandika kuba Leza kuti atulungile zinyonyoono zyesu?

Nkaambo nzi Leza ncanga walipenzya boobo kuti abe "Leza-muntu" akuboola ansi kuzyootufwida buyo zinyonyoono zyesu?

Tacimvwiki kubaa maanu nokuceya kuti Yahushua wakali kuyandika kubaa cibeela cabu "Leza" kuti alungile zinyonyoono zyesu kali mu ciiimo ca "buntu".

Kunyina kaambo keni Yahushua ncaakeelede kuti atununune ku zibi zyesu ikuti naakafwa kali mbuli Leza

Mangwalo ayiisya kuti Yahushua wakafwa kali buyo MUNTU.

BaLoma 5:11-15- Nkabela teensi boobo luzutu, pele alimwi tulatangala muli-Leza nkaambo ka-Mwami wesu Yahushua Kristo, ikuti kumaanza aakwe nkutujene LUYANZANO. Mbuboobo cibi mbucakanjila munyika kumaanza aamuntu omwe buyo, alwalo lufu nkaambo kacibi, nkabela mbubonya obo lufu mbulwakazida bantu boonse, nkaambo kakuti boonse babisya. Ikuti manekusikila kuciindi ca-Mulao kakuli cibi munyika, pele cibi taceelezegwi ciindi ncikutakwe­ Mulao. Pele lufu lwakali abwami kuzwa kuli-Adamu kusikila kuli-Musa, nikuba kulibaabo batakaina kucita zibi zikozyenye alusotoko lwa-Adamu, nguwenya cikozyano casikuciza. Pele cipo tacili mbubonya mbuli mulandu pe. Nkaambo bantu banji bakafwa nkaambo kamulandu wamuntu omwe buyo, pele luzyalo lwa-Yahuwah lwakainda loko kupaya, acalo cipo camuluzyalo camu MUNTU omwe Yahushua Kristo, kubantu banji.

Kwiindulula zyaambidwe

"Inguzu zifutula zya cinunuzyo zyakali kuyandika kuti Kristu kamaninide alimwi kazwide kuba muntu, kakwiina ciimo ca Bulemu bwa kujulu, alimwi kakwiina Buleza buli boonse nkaambo Yahuwah alikke nguujisi buleza."

"Paulu utwaambila kuti Kristu wakeelede kuba muntu kutegwa akonzye kunununa. Kunyina noliba lyomwe natwaambila kuti Kristu wakeelede kuba Leza. Noliba lyomwe pe."

"Aabo bakomba Baleza botatwe bakaka kupandululwa Kristu kuba 'muntu biyo' kwa ciimo cakwe – baapositolo bakazuunyene ciimo eeco. Kaambo kalaa makani nkakuti aabo basyoma Baleza botatwe bamazubaano basumpauzya kuti Kristu wakalaa 'Buleza.' Baapositolo bakazuunyana ku buntu bwakwe....lusyomo lwa bakomba Baleza botatwe, mulazyo, alwiiyo lwabo lugaminide kutondezya kuti Kristu wakali Leza – lusyomo lwa baapositolo, mulazyo, a lwiiyo zyoonse zyakoongomene kutondezya kuti Kristu wakali muntu, mwanaa Yahuwah."

Yahushua wakali Kristu, Mwanaa Leza, alimwi wakali muntu buyo eelyo naakafwida zinyonyoono zyesu aciciingano.

Kuba muntu tacilesyi nokuceya mulimo ngwaakoonda Yahushua aciciingano.

Yahushua wakali muntu uutakwe cinyonyoono.

1 Petulo 2:22 -Walo teewakacita zibi, pe,

Alimwi teemwakajanwa lweeno mumulomo wakwe.

1 Johane 3:5- Mulizi kuti walo wakayubununwa kuti amanizye zibi zyesu, nkabela mulinguwe tamukwe zibi.

BaHebulayo 4:15- Nkaambo oyo wesu tali Mupaizi Mupati uutakonzya kutweetelela mukulengauka kwesu, pele ngonguwe oyo uwakasunkwa mbubonya mbuli ndiswe, nekuboobo taakwe naakacita cibi.

Eeci cibalo citali ca-WLC. Cakafwiinsyigwa kuzwa ku: http://bibleteachings.atspace.com/ridiculousdoctrine.html

Twakagwisya mucibalo citaanzi woonse mazina aa mituni ngobaita Taata a Mwana, kubikka mucibaka cangawo mazina mataanzi ngubaapedwe. Kuyungizya waawo, swebo twakajokolosya muMangwalo mazina ookwa Taata a Mwana mbuli mbwaakalembedwe kutaanguna abalembi ba Bbaibbele bakayoyelwa moza. Nkamu ya -WLC