Mulawo wabulemu ncimbonimboni ca ciimo cokwa Yahuwah. Uyubununa mbwalimvwa mumoyo, mizzeezo Yakwe mbwiisalala, akusetekana akubaa luyando. Mulawo ookwa Yahuwah, mbweenya mbuli cuuno cakwe, unooliko lyoonse kukabe kutamani, kunyina nuutikabikkwe kumbali nokuba kupindulwa.
Saatani wakasolwe bantu banjaanji kuti basotoke mulawo ookwa Yahuwah kabatakubwene nokuba kuti kabasendekezya kuti lufu lwa Yahushua aciciingano lwakazimaanya mulawo ooyo.
Moyo ookwa Yahuwah mupati uuzwide luyando ucilangila bana Bakwe bakeeenwa. Muluzyalo Lwakwe, Walo wakabatumina kucenjezya bambungano ya ekklesia ya musela wamamanino. Ooku kucenjezya kuli mumulumbe wa Laodicea:
“Alimwi mungele wa ekklesia waku Laodicea, ngaaya makani ngotimulembele aamba yooyo uuli ngo Ameni, kamboni uusyomeka, wakasimpe. Ngomatalikilo aazintu Leza nzyaakalenga. Ulati, ndilizi milimo ya ko mboyibede, totontoli alimwi topyi. Nicabota kuti nooli kutontola naa kupya. Aboobo mukuti ukasaala buyo, ndakuswiidila ansi. Tee kayi waamba kuti, Ndiliv'wubide, ndijisi lubono lunji-lunji, taakwe cintu ncendibula.' Pele tozi kuti ulipengede uleetezya, uli mucete, uli moofu, alimwi uli cintanda. (Ciyubunuzyo 3:14-17)
Ekklesia wamusela wamamanino ulilelekedwe amumuni mupati. Aboobo, bantu ba ekklesia balalidunda kuti kunyina mumuni uuyungizya waawo weelede kupegwa – balo balyaamba kuti balizyi kale zyoonse!
Pele Julu libwene zintu munzila yiindene. Yahuwah ulibwene zintu nzyobalubizya zinjaanji aziyanza zigagambide kukomba mituni, eezyo bantu Bakwe nzyobacilamatide. Musamu wa Julu wakusilisya baabo bali muciimo ca Laodicea , lyoonse ujanwa mu Mufutuli:
Lino ncekulailila ncakuti uule ngolida kulindime yakasalazyigwa amulilo kutegwa ube muvwubi mwini-mwini. Alimwi uule azisani zituba zyakuti usame kuti usise cintanda cako, ujazya bweeme. Uule amusamu wameso kuti ukonzye kubona kabotu. Aabo mbenjanda ndabakalalila akubasubula. Aboobo sungwaala kapati kuti weempe. (Ciyubunuzyo 3:18-19)
Nkaambo kakuti kulisumpula mumoza antoomwe akoofwaala mumoza nceciimo citondezya musela wamamanino wa ekklesia, bantu boonse bayanda kufutulwa beelede kutambula mulumbe wa Kamboni Uusyomeka kwiinda mulusyomo, kuti ooyo mulumbe waambilizya mbabo kubagaminina – nokuba kuti balibwene aanga bali masimpe, baleempedwe alimwi balalibombya.
Ndilyeelyo buyo ooyu mulumbe nuuzuminwa kwiinda mulusyomo, Musilisi Mupati natalika kubasilika. Walo ubapa golide yakasalazyigwa mumulilo, eeyo yiiminina lusyomo aluyando. Walo ulabavwumba mantaanda aabo abululami Bwakwe, akubabikka musamu wabulemu mumeso aabo aakoofwaala nkaambo ka zilubide amanjezyeezya.
Lino kabalangila zintu mumeso aamoza, muntu uusyoma weempedwe akulibombya, kuleka buyo kuti abone ciimo cakwe mbocibede bwini, pele ulabona mbuuli mupati akusetekana mulawo ookwa Yahuwah. “Ndabona kuti zintu zyoonse zibotu zilaamagolelo, milawo yako inyina magolelo pe.
Nduuyandisya kapati mulawo wako, buzuba boonse ngwetelaika.” (Intembauzyo 119:96, 97, KJV)
Mupailo wamuntu uusyoma ngwakuti: “Vwumbula meso aangu, kutegwa ndibone zintu zigambya zili mumulawo wako.”(Intembauzyo 119:18)
Eelyo mizeezo yamuntu niimunikwa akutalika kumvwisyisya mulawo ookwa Yahuwah, ooyo muntu ulasolwedwa kubona kuti mulawo unooliko kubantu boonse kukabe kutamani. Tiiwakagagailwa aciiciingano, nokuba “kumwaigwa” nkaambo ka lufu lwa Yahushua.
Mangwalo ayubununa kuti munsaa Kuboola Kwabili, Yahuwah uyokwiimikizya nkamu yiindene yabantu, eeyo kwiinda mulusyomo alweengelelo lwa Mufutuli, bayoopegwa nguzu zyakubamba mulawo ookwa Yahuwah akuulondola. Eeyo ninkamu yabantu bali 144,000. IBbaibbele lipandulula nkamu yamusela wamamanino eeyi kuti “Mbaabba babamba milawo yokwa Yahuwah akulondola lusyomo lwa Yahushua.” (Bala Ciyubunuzyo 14:12.)
Masimpe kuti eeyi nkamu ilaandeene akataa bantu nkaambo babamba milawo yokwa Yahuwah, eeco caambilizya kuti baliimpene kuzwa kuli baabo batabambi milawo. Mbuli mbobali nkamu yabantu ntaanzi anyika aabo bakalyaaba cakumaninina kuli Yahuwah, balo bazumizya Mufutuli kuti apene buumi Bwakwe kwiinda mumaumi ngobapona, nkako bapandululwa boobu:
“Aaba mbabantu bakalijata batakalisofwaazya abakaintu, balasalala mumyoyo. Balatobela Mwanaa mbelele kufumbwa nkwaya. Aaba bakanununwa akati kabantu kuti babe mbabataanzi kupegwa kuli Yahuwah a Mwanaa mbelele. Aaba taakwe ciindi ncibakabejede. Aboobo tabajisi mulandu pe”kunembo lya cuuno cokwa [Yahuwah].” (Ciyubunuzyo 14:4, 5, NKJV)
Banu bali 144,000 bapona maumi aabo muli Yahushua, a Walo muli mbabo. Mbweenya Mufutuli mbwaakabamba mulawo woonse wabulemu akuulondola, abalo mbobacita, nkaambo Walo nguupona MULI mbabo.
“Muntu woonse ulaa bulangizi muli Messaih ulalisalazya, mbweenya awalo Messiah mbwasalala. Kufumbwa uusotoka mulawo ubaa mulandu wakubula mulawo, nkaambo cinyonyoono nkubula mulawo. Mulizi kuti Messiah wakaboola kuti azoogwisye zinyonyoono, alimwi mulinguwe tamukwe cibi pe. Aboobo ooyo uukkalilila muli Nguwe takkalilili muzinyonyoono. Kufumbwa uukkalilila muzinyonyoono tanamubwene nikuba kumuziba pe. (1 Johane 3:3-6)
Mulawo wabulemu ujatikizya zinjaanji kwiinda buyo Milawo iili 10, eeyo yakaambilizyigwa mubulemu ku Mulundu wa Sinai. Ujatikizya mulawo wa milazyo, ooyo uupandulula zinjaanji zyeelede kubambwa mu Milawo iili 10.
Mulawo wabulemu mulawo uutamani alimwi uuliko lyoonse. Unokwiimvwi lyoonse. “Kufumbwa r [Elohimu] ncacita, cinooliko lyoonse alyoonse. Kunyina cikonzya kuyungizyigwa atalaa ncico, alimwi kunyina cikonzya kugwisyigwa kuli ncico.” (Mukambausi 3:14, NKJV)
Kunyina ceelede kusanganyigwa ku mulawo ookwa Yahuwah alimwi kunyina ceelede kugwisyigwa akwaamba kuti cakamwaigwa pe. Mangwalo alisinizyide kulailila kuti: “Webo toyeledekuyungizya atalaa jwi eelyo Ime ndeekakulailila, alimwi webo toyelede kucesya akugwisyila kujwi eelyo, weelede kubamba milawo yokwa [Yahuwah Elohimu wako] eeyo Ime njeekakulailila.” (Ciibalusyo 4:2, KJV)
Bali 144,000 bajokolosya mulawo wabulemu woonse, kusanganya amilazyo yeelede kutobelwa mukubamba mulawo, eeyo iilailila kubamba mapobwe aakukomba mumwaka, aayo aayitwa kuti “Mapobwe ookwa Yahuwah” mu Bbaibbele. Aaya mapobwe, aalembedwe mu BaLevi 23, ayelede kuba malailile “lyoonse alyoonse mumakkalilo eenu amumisela yenu yoonse.” (Bala BaLevi 23:14, 21, 31,a 41.)
Ooyu mulimo wabantu bali 144,000, wakubambulula akujokolosya mulawo ookwa Yahuwah woonse wakaambilizyigwa mu Mangwalo alimwi ujaikizya makani aakukomba:
Bantu bako bayooyakulula matongo aakale-kale, basikubukulusya bwaanda mbabayoobukulusya ntalisyo zyamazyalani aakale zyakooledwe, basikubukulusya maanda aakawa atuzila twawo.
Mwami Yahuwah ulati, “Kuti naa mwabubamba buzuba bwa Nsabata, akuleka kucita nzyomuyanda mubuzuba oobu, kuti naa mwabucita mbuli buzuba bupati bulemenede ku Mwami Yahuwah, cakuti kamuteendi nyendo akutacita mbuli mbomuyanda akwiide kukanana zyabuyo, muyootangala mu Mwami Yahuwah ndiyoomucita kuti mukalemekwe munyika, eelyo muyoolikkalila munyika eeyo njindakapa sikale wanu Jakobo kuti ibe lukono lwakwe, 'Mebo lwangu nde Mwami Yahuwah ndime ndaamba. (Izaya 58:12-14)
Mulawo wabulemu ulailila kubamba mapobwe ookwa Yahuwah, antoomwe a Nsabata zyamvwiki amvwiki. Mbweenya mbuli Elijah a Johane Mubbapatizi aabo bakali kumbelaa bali 144,000, abalo bapa bulemu kuli Yahuwah kwiinda mukubamba mulawo Wakwe akoompolweda bantunyina bamwi kuti beempwe akujokela kukukomba Yahuwah munzila iiluleme mumazuba Aakwe aasetekene.
Cizuminano Cakale cigozya makani aacishinshimi cabaabo babeleka mulimo wakoompolweda bantu kuti beempwe kaindi kkasyoono munsaa Kuboola Kwabili kwa Yahushua.
Amubone, ndiyootuma mutumwa wangu, ooyo uuyoondibambila nzila. Eelyo cakufwambaana Mwami Yahuwah ngomuyandaula uyooboola kuĊanda eeyi, mutumwa wakaambwa mucizuminano, ooyo ngomusukamina uyooboola, mbwaamba Mwami Yahuwah Singuzuzyoonse. Kamuyeeya mulawo wa Mozesi mubelesi wangu, amalailile aamilawo njindakamupa kucilundu ca Holebu kuti ailailile Baisilayeli boonse.
Amubone, ndiyoomutumina Elija musinsimi buzuba bupati bukankamya bwa Mwami Yahuwah kabutanasika. (Malakayi 3:1, 4:4, 5)
Masimpe aakuti aaya malailile apedwe muntu woonse kuti ayibaluke “mulawo wa Mozesi”, alisalazyidwe mubumboni bwakalubigwa. Pele aayo masimpe taalekeli buyo waawo. Kusinizya kuya kumbele kusanganya amilazyo iipandulula mulawo woonse ayalo.
Kujokolosya kukomba kwabulemu mumazuba aaKulyookezya kusetekene aa Kujulu aasetekene woonse ncimwi akataa zitondezyo zyakuti mamanino aanyika asika.
Bali 144,000 bayoobamba mapobwe ookwa Yahuwah, nkaambo balo mbantu babamba mulawo, kutali basotoka mulawo. Mulawo ookwa Yahuwah baluuyandisya, aboobo bapa bulemu ku Mulengi wabo kwiinda mukutobela caluyando malailile Aakwe.
Ooyo wamba kuti Ime ndilimuzyi ” pele katabambi milawo Yakwe, mubeji, alimwi kunyina kasimpe muli nguwe pe. (1 Johane 2:4)
Musunko wini wakuba siciiya ngwakuti muntu ulateelela naa tateeleli.
Kwiinda muli ceeci tulizyi kuti tulabayanda bana ba [Yahuwah], eelyo notuyanda [Yahuwah] akubamba milawo Yakwe. Nkaambo oolu ndoluyando lwa [Yahuwah], kuti tubambe milawo Yakwe. (1 Johane 5:2, 3)
Bsalali bali 144,000, balitolaansi alimwi beempedwe kuzwa mumusena wamamanino, banoobamba milawo yokwa Yahuwah yoonse. Balo balamuyanda kapati nkaambo abalo bakalekelelwa zinjaanji alimwi luyando lwabo lulitondezyedwe mukulyaaba cakumaninina kumuteelela mubukkwene, kakwiina kubikkila maanu cinga cabacitikila.
Bulumbu buteezyekwi bulindila baabo bayandaula Kamboni Wamasimpe kuti abasilike kuzwa ku ciimo cabu Laodicea akuswaangana antoomwe a Julu mukujokolosya bulemu ku mulawo ookwa Yahuwah: “Kuli yooyo uuzunda, Ime njoomuzumizya kuti akakkale Andime acuuno Cangu, mbweenya mbuli Ndime mbweekakkala a Taata Wangu acuuno Cakwe.” (Ciyubunuzyo 3:21)
Mulumbe waa Kamboni Uusyomeka ucoompolola akucenjezya bantu boonse kuti beempwe. Kosala kusyoma kuti Mufutuli ulizyi ciimo camoyo wako kwiinda nduwe omwini. Kolyaaba kuli Nguwe. Koba cilengwa leza cipya kwiinda mulweengelelo Lwakwe.
Koba yooyo Uubambulula Caalubila, Uujokolosya nzila Zyakukkalilla. Ayebo, ulakonzya kukoma mbweenya mbuli Yahushua akukkala Anguwe acuuno Cakwe.
Zibalo azipekupeku zyeendelana acibalo eeci: