|
Jeff Bezos wakalelekwa citaambiki a Mwami Yahuwah. Ino kayi nkaambo nzi ncasowa mabbiliyoni aamali mumulimo uutonkela kumbele makanze ookwa Saatani? Nkamu ya WLC yamutamba Bezos kuti abale Bbaibbele lyakwe, ayiye kasimpe, akucenguluka aleke mulimo ooyo ino so! Bulumbu bwakusungilizya zitaluleme cakuliyandila bulaa ntenda yeetezya. |
Jeff Bezos, mwaalumi wakatalisya makwebo (Amazon.com) mu intaneti, ngo muntu wiinda kuvwuba munyika yoonse, ulaa mali aasika $140.9 bbiliyoni madola aaku Amelika.
Mumulumbe ngwaakaambilizya ku (Kennedy Space Center) mumwezi wa Kunkumuna Masamu 2017, Bezos wakaamba kuti buvwubi bwakwe buli mbuli kuzwidilila mukuuma njuka.
"Ime ndakawina kubbejela mali. Eeci cibejo ncipati loko, alimwi ciitwa kuti Amazon.com.”1
Zileleko zyoonse zizwa kuli Yahuwah. “Zileleko zya Yahuwah zilapa buvwubi, alimwi tasanganyi buumba muli nzyizyo pe.” (Tusimpi 10:22) Ooko nkusampaula kutaminina kuti zipego zyokwa Yahuwah ziboolela mukubaa coolwe. Ino ono ninzi cini Bezos ncacita abuvwubi buli boobo mbwaakatambula kuzwa kuli Yahuwah?
Bezos usangila mali aasika 1 bbiliyoni madola lyoonse amwaka mu mpindu yandeke njaakatalisya yiitwa kuti (Blue Origin). Mumulumbe wakwe ku (Kennedy Space Center), Bezos wakayubununa kuti: “Ime ndibelesya mali ngeekawina mukubbejela kuti nditonke ndiswe antoomwe toonse kuyoosika kulaale mumulengalenga. Ime ndilimvwide kubaa coolwe kapati nkaambo ndakonzya kucita cintu camusyobo ooyo, mbwaanga ndayandisya kweendeenda mumulengalenga wajulu kuzwa neekacili mwana.”
Masimpe eeni ngakuti, kunyina nzila yakweenda kuti ukanjile “mumulengalenga uuli kulaale” nkaambo nyika ilivwumbilidwe atala amulengalenga uutakwe cipulo.
Mangwalo aamba kuti: “Ooyo uuyaka maanda Aakwe kujulu, Walo nguwaavwunikila mulengalenga atalaa nyika, ... Yahuwah nde zina lyakwe.” (Amosi 9:6, NASB)
Saatani ukulwaizya muzeezo wakusyoma kuti nyika ibambidwe muciimo ca mbumbulu nkaambo ooyo muzeezo ngomusemo umwi mulucengo lwa dyabooli lwa mamanino.
Ciyubunuzyo ciyubununa kuti mumazuba aazya kumbele munsi lyesu, Saatani uyootumina madaimona aakwe kuti akalibonyaanga azyila kulaale kunze lya mulengalenga kuzyoolwana nyika. Zipekupeku zinjaanji zyaku (Hollywood) zitondezya ziseese zyabasangu zyakatalika kale kubambila bantu kuti balangile akusyoma kuti inga cacitika ncobeni eeco.
Kupyopyongana abukandu kuyootobela waawo takulangilwi alimwi eeco ncecintu cini Saatani ncayandisya kuyootobela kutegwa akazwidilile mubumpelenge bwakwe eelyo bantu nobalaa bukandu. Mpoonya poopo uyoolipakamisa akwiingana kumbele kubee wiiminina mikowa yabantu boonse atalaa nyika kuti apangane cizuminano a “ziseese” ziyanda kulwana nyika.
Saatani ulabelaka cabucenjezu kusisikizya nociyoocitika cintu eeci. Ciyubunuzyo 13 ciyubununa kuti nkondo yamamanino ili mu makani aakupaila: “Munyama wabili“ wakalaa nguzu zyakuti ape buumi kucibumbwa camunyama mutaanzi, kutegwa cikonzye kwaambaula akujaya boonse aabo batacikombi.” (Ciyubunuzyo 13:15, KJV)
Eelyo poopo aakuzwidilila kupangana cilongwe “aziseese” akumvwana cizuminano caluumuno, eeco ciyooba cintu cuubauba kusungilizya masi woonse atalaa nyika kuti ntenda akuvwuba nzintu ziyeeme mukukwabililwa kwa Yahuwah, pele buyo kuti batalika kukomba Nguwe antoomwe boonse mubuzuba butaanzi bwa kkalenda lina poopo, mu mvwiki iina Gregory: oobo buzuba bunooli mu Nsondo.
Kubaa lwaanguluko lwa kupaila kweendelanya ambwaliyeeyela muntu mumizeezo yakwe, eeco ciyooba cintu cakaindi. Boonse bayoolangilwa kutobela cintu comwe akusiila kumbali kwiimpana mizeezo kutegwa batanjili muntenda yakujaigwa ziseese, ngo muulo uuyoosungilizyigwa bantu ooyo.
Lwaanguluko lwa kupaila mbuli mboteelela mumizeezo yako, eeco ciyooba cintu cakaindi. Kutobezya mbobapaila bamwi uyooba muulo musyoonto kutegwa muntu akwabililwe.
|
Makanze aa Jeff Bezos aakuvwuntauzya mulengalenga ali kale mumaanza ookwa dyabooli aakugwasyilila makanze aakwe aakucita zisofweede. Aayo makanze asungilizya mizeezo yabantu kuti batalike kulangila kuti kuli zilengwa leza zipona kulaale mumulengalenga. Eeci ncencico cini Saatani ncayanda kuti cicitike! Walo takonzyi kusungilizya nyika yoonse kupaila mu Nsondo kuti bantu kabaciyeeyela kuti nyika ilipapalele mbuli tebule. Balo inga bazyiba lino kuti kunyina ziseese zipona kulaale mumulengalenga. Eeci inga canyonganya lucengo lwakwe ndwaakabambilila cakusisikizya kuzwa kaindi loko.
Masimpe eeni ngakuti inyika ivwunikidwe kunsaa mulengalenga uutakwe kasena, mbweenya mbuli bulembedwe mu Mangwalo; aaka nkakasimpe kayoovwuna bantu kuti batacengwi alweeno lwa Saatani lwamamanino. Kunyina pe “ziseese zisofweede” zizwa kulaale kunzaa mulengalenga. Nokuba kuti Mangwalo cimwi ciindi asendekezya kuti kuli manyika aamwi aakkedwe zilengwa leza, pele eezyo zilengwa leza zilisetekene akupona maumi aatobela mulawo wabulemu bwa kujulu. Eezyo zilengwa leza inga tiizyalinjizya mumanyongwe aacitika atalaa nyika iino pe, mpoonya akuleta bujayi akudilimuna cili coonse pe.
Mbokuli boobo, zilikke zilengwa leza nzyotupona limwi aano anyika mujungusi lya mulengalenga, ngu Saatani abangele bakwe alimwi kufumbwa acinyama nokuba daimona lyakalisandula kubaanga muntu nokuba bantu banjidwe madaimona azyizimba zyabo nzyobalipangila. Bunji bwa bangele basofweede balijalidwe “mumulindi uutagoli” kunsaa nyika. Nokuba kuti Saatani uyoozumizyigwa kwaangulula basangu aabo mumweembo wasanu, alimwi nokuba kuti uyoopelengusya kuti balibonye aanga “nziseese zizwa kunze lya mulengalenga ” ziyanda kulwana bantu baanyika, mubwini ooko kunooli kulwanwa zyeelo, madaimona, basangu, mizimo atuyowela, boonse aabo mbangele basofweede.
Kuti ciimo cini mbwiibambidwe nyika nicalizyibidwe abantu boonse, Saatani naatayookozya kucenga bantu kusyoma kuti ziseese zyaboola kuzwa kunzaa mulengalenga kuzyoolwana nyika.
|
Ncenciceeci Saatani, abaJesuiti basanyangula lwiiyo lwa nyenyezi, abaabo boonse bazyi kasimpe keni ncobalutide kusisa kasimpe aaka kuzwa kubuleya bwaanyika. Kuti ciimo cini canyika nicalizyibidwe abantu boonse, Saatani inga taakonzya kucenga bantu kusyoma kuti ziseese zilwana nyika. Eeci inga camwaya kufumbwa kukakatila kuswaanganya bantu kuti bapaile mubuzuba bomwe, oobo poopo mbwaakasala. Ooku nkunyengelelwa ncobeni nobantu! Eelyo poopo nayoolibonya aanga “ubamba cizuminano akataa bantu aziseese”, mubwini walo unoopangana cilongwe amadaimona kutegwa akamugwasyilile kumbelaa mazuba kutonkela kumbele makanze ookwa Saatani aakubaa buzuba bwakukombwa butaluleme.
Yahuwah ulaazyi kale makanze ookwa dyabooli. Kazitaninga citika zintu zya myeembo iili ciloba, Walo uyooyubununa masimpe aaciimo cini mbwiibambidwe nyika amulengalenga uuvwunikide atalaa njiyo.
Ciyubunuzyo 6 cipandulula mulengalenga ooyo kuti uuyookwamuka, akutilimuna basinkondonyina ba Mwami Yahuwah:
Julu lyakavwumbuka mbuli munseme wavwungailwa, eelyo malundu ansumbu zyoonse zyakaatuka aawo mpozyakabede. Mpoonya aawo bami baansi, beendelezi, bapati balumamba boonse, bavwubi, basinguzu, abantu buyo, bazike naa bazyale, bakayuba mumpangala, alimwi amumyaala yamumalundu. Bakaambila malundu aamyaala kuti, “Amutuwide mutusise kuzwa ku busyu bwa yooyo uukkede acuuno cabwami akutuvwuna kuzwa kubukali bwa Mwanaa mbelele! Nkaambo buzuba bwabukali bwabo bwasika, ino nguni uucikonzya kwiimikila? (Ciyubunuzyo 6:14-17, NKJV)
Eeci cintu ciyoobonwa atalaa nyika yoonse. Eelyo mweenya wakujulu uuvwunikidwe atalaa nyika waakukwamuka akuvwumbuka, bantu boonse bakkede anyika bayookonzya kulibonena mbokulangika mukati ka Julu akubona Yahushua kaimvwi munsaa bulemu butowa kumweka buzingulukide Taata. Stephen, muna-Kristu mutaanzi kujayigwa, wakayumya lusyomo eelyo naakabona cilengaano eeco.
Mulengalenga waakuvwumbuka, basalali bayooyumya lusyomo lwabo abalo mbweenya. Ciyooba cintu cibayumyayumya mulusyomo kuti bakainde mumanyongwe aataambiki aayootobela eelyo myeembo yaakutalika kusibwa.
Aabo bakasulaika Mwami Yahuwah bayoolimvwa bwiindene. Kuleka kuti bayumye lusyomo lwabo, bayookankama akuyoowa kapati. Makanze aabo woonse ayoobagolela mpeenya aawo nkaambo ayoozulwa bubeji. Buvwubi bwa basyaacivwulemwangu buyoobulila limwi mpindu aciindi eeco nkaambo banookwaampalika akutuntulika ooku akooku kuyuba kuzwa kubulemu bwakujulu butowa kumwekesya.
Bavwubide, basinguzu, abaabo boonse bakapangana cilongwe a Saatani bayoobona malelo aabo nkwaadilimuka. Tiibakalisanganya kulubazu lwa Mwami Yahuwah akasimpe, alimwi oobo buvwubi mbubakaliyobweda tabukabavwuni muciindi eeco kuzwa kubukali Bwakwe.
Aciindi ncotulemba cibalo eeci, cisela comwe campindu ya Amazon cilaa muulo wa zibeela zya nsiliva zili 106. Kuti mwaalumi Bezos kacizumanana kukulwaizya lucengo, awalo uyooba akataa bavwubi abasinguzu banookwakwalisya kuyubila mumpangala zyamabwe eelyo mulengalenga wakujulu waakuvwumbuka. Eelyo myeembo yacishinshimi yaakutalika kucitika, cisela campindu ca Amazon antoomwe ampindu iili yoonse iyoobula makwebo. Tacili cintu ciyootugambya swebo kuti, muciindi ca myeembo, cisela ca Amazon tacinookonzyi kubbadela nokuba muulo wampindu yomwe ya nsiliva.
Bezos wakalelekwa citaambiki a Mwami Yahuwah. Ncibyaabi kusendekezya kuti muukubaa coolwe mookajanina cipego ncaakakupa Yahuwah. Kwiindilizya waawo, Bezos uluujisi kusowa cileleko ncaakapedwe a Mwami Yahuwah mukuyungizya makanze ookwa Saatani kuya kumbele, kwiinda mukukulwaizya bantu kuti bayeeyele kuti kuli buumi kulubazu kumwi kulaale anyika. Kunooli Bezos ucita zintu eezi katakubwene, pele masimpe eeni nkwaali kale mumweenya wakujulu. Twamutamba nyoonse antoomwe a Jeff Bezos kuti mubale ma Bbaibbele eenu akwiiya kasimpe. Twamukomba Bezos kuti aleke ncacita ono. Ncintu cilaa ntenda kumuntu uuli woonse kuzumanana kusungilizya makanze ookwa Saatani akuyumya nsingo kulwana Mwami Yahuwah akasimpe. Cidinto cacisambomwe ciyubununa mbwaabede mamanino aabantu boonse bazumanana kunyansya boobo.
Eelyo mulengalenga waakwaanduka mucidinto cacisambomwe, nyika yoonse iyoozyiba kuti nkamu ya NASA yakali kutuyunga akutuyiisya lwiiyo lwazilengwa leza lwakubeja ncobeni. Bayokwiibaluka kuti baJesuiti basyaazyibwene mulwiiyo lwanyenyezi, mbabakali kumbele kucenga bantu kapati mumisela yakainda: kusisikizya ciimo cini canyika.
Casika lino ciindi cakulisalila. Kufumbwa muntu uuzyi kuti ukulwaizya muzeezo wakuti nyika ibambidwe mbuli mbumbulu nokuba bbola kuleka kuti nyika ilipapalele mbuli bbuwa naa musena, ooyo muntu ngu sinkondonyina a Mwami Yahuwah, ngu sinkondonyina wabantu akasimpe.
Toonse twakazyondolwa maanu kuzwa kubwana kuti katunonga akuseka muzeezo wakuti nyika ilipapalele mbuli bbuwa. Pele muntu woonse ulibwene lyoonse ameso aakwe bumboni oobu. Nee musa, tokonzyi kweenda musinzo kuyoosikila kumagolelo aanyika mpoonya waakukulumbukila mumulengalenga uutakwe cintu. Ooko nkusendekezya nkwaakatalisya Saatani kutegwa asungilizye bantu kusampaula cilembedwe mu Mangwalo Mwami mbwaakiilenga nyika.Ategwa nyika ilafuuma mumweenya uuzwide manyika manji aakkedwe ziseese, ooyo umvwikaanga muzeezo wamaanu nkaambo buyo kakuti ndolwiiyo lwa kucikolo ndotwaayiisyigwa maumi eesu woonse. Nokuba boobo, oobu mbusongo buyo bwamuntu waanyika uukonzya kufwa.
Kuti yebo koyanda kuba akataa baluleme aabo bayooyumya lusyomo lwabo eelyo mulengalenga waakuvwumbuka akulijana aciindi nceenya eeco mucaando cacisambomwe, kotambula lino kufumbwa mumuni wakasimpe ngwakuletela Mwami Yahuwah. Kolazyika ansi zyoonse zyamasesya akunonga zitaluleme eezyo zibambila buyo muntu kuti akacengelwe limwi a Saatani kumamanino.
Atalaa zyoonse, sumpula lubono lwa Kujulu atalaa buvwubi bwaanyika. Majwi aa Mufuutli abe nkakaambyo kako omwini:
Mutanooliyobwedi buvwubi bwaansi aano, mapempya ankalaya mpozinyonyoona ababbi mpobadonkola akubba. Pele nywebo amuyobole lubono kujulu, ooko mapempya niiba nkalaya nkozitanyonyooni, ababbi nkobatadonkoli kuti babbe. Nkaambo ooko kuli lubono lwanu nkokunooli mizeezo yanu (Mateyo 6:19-21, KJV)
1 Mbocilembuludwe mu: http://www.newsweek.com/jeff-bezos-says-hes-using-amazon-lottery-winnings-put-humans-space-640622
