Cibalo 174
Muntu musongo, wakalikkomanisya munzintu zyaanyika kusikila buti?
“Kufumbwa ncaakayanda kubona meso aangu Ime nsyeekalilesya kubona; Ime nsyeekalesya moyo wangu kulikkomanya kuli koonse.” Mukambausi 2:10.
“Ndakalyaambauzya mumoyo wangu kuti, Nkooko, Ime ndakukkomanya alukondo; aboobo kokkomana muli zikondelezya.” Mukambausi 2:1
Nkukondwa kusikila aali ooko nkwaakajana munzila yamusyobo ooyo?
“Amulange, zyoonse zyakali zyakusowa ciindi akupenzya muuya, alimwi kunyina mpindu yakali mulinzizyo kunsaa zuba.” Mukambausi 2:11.
“Nokuba luseko lwamoyo lwakali buusu; alimwi mamanino aakuseka ooko akali kuminwa kwa moyo.” Tusimpi 14:13.
Nguni alikke weelela kusekelela mumusyobo ooyo?
“Bufubafuba nkokukkomana kwayooyo uutakwe busongo.” Tusimpi 15:21.
Mbubuti mbwaakakosozya makani ooyo muntu musongo?
“Mpoonya Ime ndakabona kuti busongo bulainda kubota kwiinda bufubafuba mbuli mumuni mbuuyinda kweebeka kwiinda musinze.” Mukambausi 2:13.
Nkaambo nzi buumi bwakutakolwa ncobuyandika kwiinda buumi bwacakolwa?
“Buumba mbubotu kwiinda luseko: nkaambo mubuusu bwaameso moyo ulainda kubosyegwa.” Mukambausi 7:3.
“Ncibotu kuya kuŋanda yamalila kwiinda kuya kuŋanda yakupobola; nkaambo aayo ngamamanino aabantu boonse; alimwi bacipona balizyi cintu eeci mumyoyo yabo.” Mukambausi 7:2.
Ncintu nzi muntu musongo ncabakulwaizya bakubusi kuti bakkile maanu, nokuba mukukkomana?
“Kokkomana, Omulombwana mukubusi, muciindi cabukubusi bwako; moyo wako awukkomanine mazuba aabwana bwako, alimwi akweenda munzila zya moyo wako, amunzila zyameso aako; pele webo kozyiba kuti zyoonse eezyi zyintu Elohimu uyoozyileta kuli nduwe mulubeta.” Mukambausi 11:9.
Nkulailila nzi kujatikizya buumi bwakutakolwa aabo mwaapositolo nkwaakalemba mulugwalo lwakwe kuli Tito?
“Baalumi bapati beelede kuba batakolwi, masinizya, balijata, beenda mulusyomo, mubwaabi, amukubikkilila. Bamakaintu bapati abalo, beelede kweenda muciimo ceelela kusetekana, kutali babejelezya, kutali banywa waini kapati, pele bamayi bazintu zibotu; kutegwa bayiisye bana basimbi kutakolwa...Bana basankwa abalo beelede kulilemeka kubaa mizeezo iitakoledwe.” Tito 2:2-6.
Nkulailila nzi kupedwe mulugwalo lwaku Ba Loma?
“Atweende cakusyomeka bweelede, mbuli bantu beenda masyikati, kutali mumapobwe aateendelezyegwi amubukolwi, kutali mukoonana kutondwa amubukkale busesemya,ikutali mukuzwangana amubbivwe. Ba Loma 13:13.
Mbumboni nzi mbwaakapa mwaapositolo Petulo mukaambo aaka?
“Aboobo amulikulaike mutusolo twamizeezo yenu, mutakolwi alimwi kamulangila luzyalo oolo ndomuyooletelwa aakuyubununwa Yahushua Uunanikidwe.” 1 Petulo 1:13.
Nkaambo nzi ncokuyandikila kulilingula?
“Mutani kukolwi, amusongwaale, nkaambo sinkondonyoko Dyabooli, uleendeenda mbuli syuumbwa wabutambo, uuyandaula ngwatilume.” 1 Petulo 5:8.
Ncintu nzi acimwi ceelede kubikkilwa maanu eeco ceelede kututola kubuumi bwakutakolwa?
“Pele mamanino aazyintu zyoonse alaafwaafwi; aboobo, inywe mutanikukolwi, alimwi kamulangila kumwi kamupaila.” 2 Petulo 4:7.