|
Eeci cibalo tacili cina WLC. Eelyo notubelesya milumbe iizwa kubalembi balaanze lya mbungano, imbunga izuminizya buyo zintu eezyo nzyotumvwa aanga zileendelana acilembedwe mu Bbaibbele. Kanjaanji, balembi ba milumbe eeyi tabeendelani a mbungano ya WLC muzintu zilaa bulemu (mbuli Nsabata ya buzuba bwa ciloba amutwe wa Buleza). Nokuba boobo, Eeci taceelede kutulesya kutambula zileleko kwiinda muli nzibaalemba, eezyo zyeendelana a Mangwalo. Aboobo kuzumina cibeela ca milumbe yabo takuli kuzuminizya azintu zimwi zyoonse nzyobatongomene kusyoma.
|
Jeremy wakakkala cakoongomana acuuno kunembo lyangu kumwi kalumaluma kupandulula cintu cakamucumbide kumoyo. Wakali tunukide alimwi ciindi aciindi wakali kunga ukwisuka moyo kunyemanyema, eeco ncecintu caabatilimusya bazyali bakwe, cakuti limwi bakasika mpobamusungilizya kuti aboole tuzyoobonane aandime. Mbwaakasikila buyo, mu ofesi mwakaide kuumuzya kuti zi, abusyu bwakwe bwalileka kubee wabbukilwa akubula cakwaamba. Meso aakwe wakali kwiile kubbidikizya kulangila ansaansi, aciimo cakwe wakalibonyaanga ullzundidwe kale tacijisi nguzu abulangizi bwa kulwana nkondo yakali kumuungilila.
Lino neekamanizya kumubuzyilila kabotu-kabotu, ndakazyiba kuti ooyu mukubusi wakali kutingaana ciyanza ca kulyoomba cinswe. Lino naakalimvwide kutolwaala, Jeremy wakatalika kubaa mizeezo iidonaika kuti naa nkwali ncobeni Leza singuzuzyoonse uuteelela mipailo yako yoonse. Nkuli nkwakkede Yahuwah? Nkaambo nzi ncaakali kumulekelezya masunko aanyonganya boobu mumaanu? Walo wakalikombya kapati kuti Yahuwah amuvwune kuzwa mu sunko ndyaakali kutingaana eeli, pele naakali kunga camujata cilaka, alimwi nkulubizya, wakazingwa cakucita amizeezo yamumanina cakuti wakatalika akudonaika.
Mbuti mbonga yebo wamuyumyayumya Jeremy? Hena inga waide kuyuminina kugwagwamuka kumuseka kumwi koide kubuzya kubee tacikwe makani? Hena inga wamwaambila kuti kaide buyo kuliyumyayumya nkaambo mbwiikkalwa, akuti kulyoomba ncipego ca Yahuwah kumwaalumi uutakwete kuti alilemunune? Nee kaka peepe! Muntu uupa lulayo lwabupaizi inga wataanguna kwaambila Jeremy masimpe eeni. Nokuba kuti kulyoomba takugaminidwe kwaambwa mu Bbaibbele, pele kuti muntu wasyomeka kuvwuntaulisya akubala Mangwalo inga wayubunwidwa mbocili cintu citaluleme eeco.
Jeremy weelede kwaambilwa kuti nokuba kuti ncibi, pele eeco tacili cibi citakonzyi kulekelelwa! Lino maulu aakwe kaaimvwi nji atalaa kasimpe, muntu inga waya kumbele kumuyumyayumya kuti abaa bulangizi. Uleelede kwiibalusyigwa kuti kulwana cinyonyoono abuzuba ninkondo ya muntu uuli woonse uusyoma mbuli nguwe. Uleelede kukulwaizyigwa kuti Yahuwah taakamutakata pe, pele wakamubambila kale “nzila yakweeleba” sunko eelyo (1 Bakolinto 10:13) eeyo njomuti yandaule akweendela antoomwe.
Lino mizeezo yabukubusi bwakwe kiisimpidwe mukasimpe, nceciindi cibotu cakujuzya ntaamu zya kumugwasya akubambulula buumi bwakwe muziyanza nzyacita. Yebo weelede kulomya kapati kulangisya kuti kunooyandika zinjaanji zyakucinculula mukukosokezya ciyanza ca luunyaunya akulyoomba kuti cizwe mubuumi bwakwe. Kunooyandika “kukosola ca kunyongweda limwi.” (Mateyo 5:29-30) Komucenjezya kuti, ikuti kaide kweeleba ciyanza cibyaabi eeco, nkokuti ulikomedwe kale kataninga akutalika kucinca. Ambweni mibuzyo yongaye yakuti ayingule inga yamugwasya Jeremy kuliyeeyela nzila nzyanga waakubelesya kulikwabilila mumazuba aaciboola: Ndilili naminidwe busa bwa kuyanda kulyoomba? Nzintu nzi zimusungilizya kuti alisyaanikizye kulyoomba? Mbaani bantu nokuba masena aavwuzya kumwiibalusya kapati sunko eelyo? Nzintu nzi zicitika zimusolweda kuti akaakulijane wanjomba kale mu sunko eelyo? Unooyandika “kukosweda limwi” kuswaangana aabantu bamwi, kweeleba masena, kusowaila ciindi katakwe cakucita, alimwi akulilesya kulangilizya milumbe imwi. Mukumbile Jeremy kuti apaile camoyo woonse nalizeeza cakucita mpoonya alilembele mwini mulongo wazintu nzyayanda kucinca mubuumi bwakwe kutegwa alipasunune. Yebo ulakonzya kumuubyaubila mukuli akumupa malailile ngakonzya kucita mpoonya walo weelede kulyaambilila lwakwe mbozimweendela zintu mumicito yakwe.
Ayimwi nzila iilaa mulimo njanga wabelesya Jeremy njakumwaambila cakulomya kuti “Inzya!” Kanjaanji tumvwa majwi manji aakuti “Nee” nalaigwa muntu uugonkedwe mucibi, pele tulaalilwa kumupa cintu cipya cimukkomanisya kuti aleke cibi nalaigwa. IBbaibbele talitwaambili buyo kuti swebo tuleke kubisya pele lilatwaambila akuti tubikke buleza mucibaka caco. (II Timoteo 2:22) Inga caba cintu cabusongo kumupa zibeela zyakubala (mu Bbaibbele amumabbuku amwi), eeco inga cabukulusya moyo wa Jeremy kuti ayandisye kumuzyiba Yahuwah. Komukulwaizya kubambilila akuzumanana kubaa muya wakupaila mubuumi. Mugwasye kuti azyibe ncokuyandika kutontomana kuyeeya tumpango tumwi twa Intembauzyo ooto tutembaula zintu zikkomanisya muli Yahuwah. (Intembauzyo 34, 36, 37, 42, 61, 62) Pele buyo kuti Jeremy watalika mwini “kulabila akulibonena kuti Yahuwah mubotu” (Intembauzyo 34:8), inga kanoojokelela kuyoolya cibi ncazyibide. Komusinsimwida busa bwa bulemu amaleele aakuswena munsimunsi lya Yahuwah. Mukubaa coolwe, ciindi ciboola aakusikilwa sunko, walo uyoolizeeza katanaya kumbele kumwi kati “Nkaambo nzi ncenga ndalekezya kukkuta nkwejene muli Yahuwah kuti ndikkomanisye azilweela zya nyika?” Mbuli bwaalemba ba John Piper kuti, “Tweelede kuyobozya mumizeezo yesu zisyomyo ziinda kubota azintu zikkomanisya zyokwa Yahushua.
Citobela, mupe mulimo Jeremy wakuyunza buumi bwakwe mu bantunyina bamwi. Kunyina cintu cizunda buumi bwa syaacivwulemwangu mbuli kucitila bantunyoko milimo mibotu iikonzya kubagwasyilila. Eeyi milimo yamusyobo ooyu ilesya nduwe omuntu kulijanajana koli olikke kolyaandanya, aakumukwelela munsimunsi lya Yahuwah, aboobo akumugwasya kutija ntolongo ya ziyanza zyakwe. Komugwasyilila kucita bulembedwe mu BaLoma 12:11: “Utatolwaali akubaa butolo mumakanze, kocacama mu Moza, konyonena Yahuwah.
Camamanino, yebo weelede kulibambila kweenda musinzo wakuyaa kutanta akuselemuka. Utaide kulangila Jeremy kuti azuumuke kuswipuka kutobela malailile woonse cakutaleyaleya mbumwaswaanganina buyo ciindi comwe. Koibaluka kuti cito ncozyibide cilumya ntale, ziyanza nzyookayuminina kuzyibila kucita zitola ciindi kuzimaanya, alimwi kufumbwa cinyonyoono nociba ca musyobo uuli buti, inga tiicalilekelezya kuzundwa kakwiina kubbontana nkondo anduwe! Komukkazyika camba, pele komulangisya ciimo cakwe. Hena ulaa ncinko abuzangi, hena ulakaka kufumbwa ncoomulaya naa ulalelema kucita ncaambilwa? Hena takwe nguzu alimwi takkalikide? Hena ulangikaanga bukandu bulamweembela? Lomba Yahuwah kuti akupe maanu aakulangisya ciimo ca moyo wakwe. Ciimo cakwe tacipinduli kasimpe nokuba milazyo ya Jwi lya Yahuwah, pele ncintu citondezya mbwayelede kubelesya Jwi eelyo mubuumi bwakwe. Ibbaibbele talijisi nzila “yeelela kufumbwa muntu” mukubambulula mapenzi ngobanjide bantu baindene. Mbuli bulembedwe mu 1 Batesalonika 5:14 kuti “Lino twamukulwaizya, bakwesu, amubacenjezye aabo banyansya, amuumbulizye baabo bateteete myoyo, amujatilile batakwe nguzu, amubakkazyikile camba bantu boonse.”
Mbuli basilisi ba muuya wamuntu, tweelede kupailila busongo bwa kuzyiba kuti tunanike bantu amungwimba wa Jwi Lyakwe acibeela ceelede, mucisela ceelela, amunzila iiluleme. Tulikulwaizyidwe kuyakulula Jeremy abantu bamwi mu “muuya wa kubambilila kabotu-kabotu, kamulyeendelezya bweelede anywebo kutegwa mutacegwi mukooze.” (BaGalatiya 6:1) Ikuti twalikulika “cceba libosya koonse-koonse”, katubambilila kabotu-kabotu muluyando, inga twalangilwa kuzwidilila kapati mumulimo wakugwasyilila bakubusi kuti bazunde ciyanza cakulisyoba zinswe.
Twakagwisya mucibalo citaanzi woonse mazina aabaleza bafwalidwe amazina aamilimo aakuti Taata a Mwana, akubikka mucibaka ca ngawo mazina eeni ngobaitwa. Kuyungizya waawo, twakajokolosya mu Mangwalo aalembuludwe mazina aa Yahuwah a Yahushua mbuli mbwaakasanduludwe abalembi ba Bbaibbele bakayoyedwe Moza. -Nkamu ya WLC.