|
Eeci cibalo tacili ca WLC. Eelyo notubelesya zilembedwe aabalembi balaanze lya nkamu, tusimba buyo zyeezyo zyeendelana 100% a Bbaibbele a lusyomo lwesu cino ciindi munkamu ya WLC. Aboobo eezyo zibalo inga zyalanganyigwa kuti nzya nkamu ya WLC. Twakalelekwa kapati amulimo wabalanda ba Yahuwah banjaanji. Pele tatukulwaizyi ndinywe nobeenzuma kutalika kubala zyaalembwa abantu aabo. Eezyo nzibaalemba, twakazigwisya mumalembe eesu nkaambo kanjaanji zililubide akubaa tumpenda. Cintu cuusisya ncakuti tucilangaula mbungano yamilimo iitakwe kampenda. Ikuti konyandidwe nkaambo ka [zibalo/milumbe] iitali ya WLC, kobikkila maanu ku Tusimpi 4:18. Kuteelela kwesu nkwakuti kasimpe Kakwe kalazyokoloka, eelyo mumuni nuuyaa kumwesya munzila yesu. Tulakayandisya kasimpe kwiinda buumi, nkanko tulavwuntauzya kufumbwa nkokakonzya kujanwa. |
Nziindi zinjaanji buti Yahuwah natuletela bantu mbotutamvwani limwi munzila zyesu? Hena ulizyi kuti nkaambo nzi ncacitila boobo? Ooyo muntu ngomutamvwani limwi ulakonzya kuba simalelo wako ku ncito, mubelesinyoko, mulongwaako wakaindi, mwanookwenu, munyoko nokuba mucizyi wako muli Kristu, nokuba muntu uuli woonse ngomutalyatani limwi. Aaba bantu ulabaleta mu buumi bwako nkaambo Yahuwah ukubambulula kuti ube muciimo ca Kristu, akukuyiisya kuyanda nobaba basinkondonyoko kutegwa walo abelesye nduwe kuba cibikkilo cakuletezya luzyalo lwakwe. Yahushua wakatwaambila muli (Mateyo 5:44-47 NKJV) kuti “Pele Ime ndamwaambila kuti, amubayande basinkondonyoko, amubalekelele aabo bamusinganya, amubacitile cibotu aabo bamucimwa, alimwi amubapailile aabo bamubelesya calunya akumutundulula, {45} “kutegwa inywe mukonzye kuba bana ba Uso uuli kujulu; nkaambo Walo ulazumizya zuba Lyakwe kupasukila basofweede abaluleme, alimwi ulatumina mvwula ku balulami abataluleme. {46} “Nkaambo kuti kamuyanda buyo baabo bamuyanda, mbulumbu nzi mbomujisi? Saa teesyi abalo basimitelo mbobacita oobo na? {47} “Alimwi kuti kamujuzyana buyo banabokwenu, ncinzi ncomucita ciimpene kwiinda boonse? Saa teesyi abalo basimitelo mbobacita oobo na?
Ikuti katutayandi bantu batutukila, batucimwa, batucengelela, a batutundulula nkokuti kwiina mpotwiindene amuntu woonse uutali munaKristu; ikuti katucimwa nokuba kutayanda muntu uuli woonse hena inga twalitamikizya ncobeni kuba bana ba Yahuwah na? Yahuwah nguuleta bantu aaba mu maumi eesu kutegwa tukomene mumoza akulongezyegwa, alimwi ikuti twamuteelela Yahuwah inga cababeda kabotu abalo basinkondoma. Yahuwah utwaambila bwa kuyanda basinkondoma abwa kubaleleka, swebo tweelede kubacitila cibotu, alimwi cimwi ciyandika kapati tweelede kubapailila. Kucita zintu eezi kuyoopindula kucimwa kwesu kuti kube luyando nkabela Yahuwah ulakonzya kutumina luzyalo Lwakwe kwiinda muli ndiswe kuli mbabo; kubaguma anguzu zipati kwiinda zyoonse mu mulengalenga, LUYANDO. Luyando lyoonse lulakoma kucimwa mbweenya mbuli mumuni mbuukoma mudima. Bwiinguzi butaanzi mu ciimo ca buntu bwesu nkubatantamuka biyo, katuyeeyela kuti buumi bwesu bulainda kubota, pe ma ncenciceeci awalo ncaakali kuyeeyela Jona.
Ikaano kalaa mpuwo ka “Jona a Muswi mupati” aako kaambidwe mubbuku lya Jona mu Bbaibbele kaambilizya bweende bwa Mushinshimi Jona eelyo Yahuwah naakamulailila kuya ku Niniva kuyookambauka jwi lyakazwa kuli Yahuwah kuti beempwe, biyobiyo bayoonyonyoonwa. Niniva wakali munzi mupati wa Bulelo buna Assyria, bantu baku Assyria bakali bantu batakwe moyo, balaalunya, alimwi bantu basofweede; bakali basinkondonyina bataambiki ku bana Isilayeli. Jona taakali kuyanda kuti beempwe, Jona taakali kuyanda kuti Yahuwah abafwide lubomba aluzyalo ku bantu bali boobo, aboobo wakatija kwaampanya kutozya bbazu liimpene akuyootanta bwato kuti azelauke mulimo ngwaakali kuyanda Yahuwah.
Mpawo Yahuwah wakatumya guwo pati mu lwizi, lyakali guwo pati libbubbula cakuti lyakacita kuti bantu bayeeye kuti lilapwayaula bwato. Jona wakati kuli basibwato, “Walo wakabaingula kuti, “Amundiwaale mulwizi nolutibatame. Ndizi kuti mulandu wangu nguwacita kuti guwo pati eeli limubbubbwide.” Bamvwe boobo baalumi aabo bakasoleka kuti bakwasule bwato buye kunkomwe. Pele tiibakakonzya pe, nkaambo guwo lyakabbubbulisya kwiinda lutaanzi. Mpawo bakakomba ku MWAMI Yahuwah bakati, “O MWAMI Yahuwah, utalekeli kuti tufwe akaambo kabuumi bwamuntu ooyu ngotuyanda kusowa. Utatupi mulandu wakujaya muntu ooyu uutakwe mulandu, nkaambo yebo O Mwami Yahuwah wacita eeco cikubotela.” Mpawo bakabweza Jona akumusowela anze lyabwato, aawo lwizi lwakali kukapaika lwakabatama. Akaambo kaceeci baalumi aabo bakayoowa kapati, mpawo bakapa cipaizyo ku MWAMI Yahuwah akukonkezya muzina lyakwe.
“Pele Ime ndamwaambila inywe kuti, amuyande basinkondonyoko, amubalekelele aabo bamusinganya, amubacitile cibotu aabo bamucimwa, amubapailile aabo bamubelesya calunya akumupenzya, kutegwa inywe mukonzye kuba bana ba Uso uuli kujulu." (Mateyo 5:44-47)
|
Lino Mwami Yahuwah wakaleta nswi mpati kuti imene Jona, nkabela Jona wakakkala mwida lyanswi kwamazuba otatwe. Lino Jona kacili mwida lyanswi wakakomba ku Mwami Yahuwah wakwe: Wakati, “Mumapenzi aangu ndakakomba ku Mwami Yahuwah, walo wakandiingula. Kandili mwacivwumwe ndakaita kuti ndigwasigwe, walo wakaswiilila kulila kwangu. “Kuli baabo bazumanana kumituni yabuyo bakasweekelwa luse lwakweetelelwa kwabo. Pele mebo njoopaizya kulinduwe anyimbo yakulumba. Eelyo nzindakakonkezya njoozicita ncobeni. Lufutuko luzwa ku Mwami Yahuwah.” Mpawo Mwami Yahuwah wakalailila nswi eeyo, nkabela yakaluka Jona anyika njumu.
Mpawo majwi aa Mwami Yahuwah akasikila Jona ciindi cabili, akuti, “Koya kumunzi mupati wa Niniva ukuukambaukile makani ngindakulailila.” Jona wakaswiilila majwi aa Mwami Yahuwah, wakainka ku Niniva. Lino Niniva wakali munzi mupati, wakali kweendwa mazuba otatwe kuuzinguluka. Jona wakali kweendeenda mumunzi. Wakali kweenda lweendo lwabuzuba bomwe buyo, kaambilizya kuti, “Kwasyaala mazuba aali makumi one munzi wa Niniva ulanyonyoonwa.”
Bantu bamu Niniva bakasyoma majwi aa Yahuwah. Bakaambilizya kuti kube kuliimya kulya, nkabela boonse, kuzwa kubalemenede kuyoosika kubantu buyo basame masaka. Lino makani aaya naakamusikila mwami wa Niniva, wakaseluka acuuno cakwe cabwami, wasamununa majansi aabwami, wakasama masaka akuyookkala ansi mutwe. Mpawo wakaambilizya mu Niniva kuti, “Kwiindila mukulailila kwamwami abalemenede bakwe, ‘Mutalekeli muntu naba munyama, matanga naa butanga bwambelele kuti bulabile cintu cili coonse, mutalekeli kuti banywe naa balye. Pele amubone kuti bantu abanyama basamikwa masaka. Amubaambile basiye nzila zyabo zibi alupyopyongano. Ino nguni uuzi? Ambweni Yahuwah inga watulekelela akutubeda aankumbu cakuti ulaleka kunyema kapati kuti tutalobi.’ “Lino Yahuwah naakabona ncibakacita, ambubakasiya nzila zyabo zibi wakababeda aankumbu cakuti taakabanyonyoona mbuli mbwaakakanzide.
Pele Jona wakabijilwa kapati, wakakalala. Wakakomba ku Mwami Yahuwah wakati, “O Mwami Yahuwah sena eeci tacili ncindakaamba nkecili kwesu? Ncenciceeco ncindakatijilide ku Taasyisyi. Ndakalizi kuti yebo uli Yahuwah siluse sikweetelela, ulamuka kunyema, uli siluyando, uli Yahuwah uutaleteli bantu mapenzi. Nkaako lino O Mwami Yahuwah, ndijaya buyo, nkaambo ncibotu kulindime kufwa kwiinda kupona.” Jona wakazwa mumunzi waakukkala kujwe kuntumba lyamunzi. Ooko wakaliyakila cilawo, wakkala mucimvwule caco, kalindila kuti abone naa ncinzi citicitike kumunzi. Mpawo Mwami Yahuwah wakameneka musaansa kutegwa Jona ayuse aleke kubijilwa, Jona wakabotelwa kapati akaambo kamusaansa ooyu.
Bantu baku Niniva bakateelela kucenjezya kwa Yahuwah
Yahuwah uyanda ndiswe kuti tube zibikkilo zya luzyalo Lwakwe kutegwa Walo akonzye kuswena munsaa nyika iisweekede akumvwa kucisa.
|
Pele kubucedo buzuba bwakatobela Yahuwah wakabamba syaanyungwa wakaluma musaansa ooyo cakuti wakapusama. Lino zuba nilyakazwa, Yahuwah wakaleta luuwo lupya lwakujwe, eelyo zuba lyakamuumpa amutwe Jona cakuti wakawizauka. Wakali kuyanda kufwa, aawo wakati, “Ncibotu kuti ndifwe kwiinda kuti nkepona.” Pele Yahuwah wakati kuli Jona, “Sena uleelede kunyema boobu akaambo kamusaansa?” Walo wakati, “Iiyi, ndanyema, ndinyemede kapati cakuti ncibotu kufwa.” Pele Mwami Yahuwah wakati, “Tee wabona mboyandisya musaansa ooyu nokuba kuti tookali kuubambila-bambila nokuba kuukomezya. Wakamena mubusiku bomwe akufwa mubusiku bomwe. Pele munzi wa Nineva ulijisi bantu bainda kuzyuulu zili mwaanda amakumi obilo batakonzyi kuziba cibi acibotu alimwi balijisi ŋombe zinji. Sena nsyeelede kuuyengelela munzi mupati uuli mbuli bayooyu?”
Kwiinda mu kupilingana ooku, Yahuwah taakali kukutauka buyo mulimo mu bantu baku Niniva pele Walo wakali kuyiisya Jonah ciiyo ca luyando aluzyalo lwa masimpe. Yahuwah uyanda ndiswe kuti tube zibikkilo zya luzyalo Lwakwe kutegwa Walo akonzye kuswena munsaa nyika iisweekede akumvwa kucisa. Aabo bantu mbotutayandani limwi kunooli mbabantu bagwitide kapati kucisa mucamba. Ndiswe bani eelyo notutalika kusalauzya kuti tabeelede kuyandwa kuli Yahuwah kuti abagume mumyoyo yabo? Ndiswe bani notubaima zibotu a zileleko alimwi a mipailo yesu yakupailila mbabo, mbube akulesya luzyibo lwa Yahuwah kusika kuli mbabo? Buumi bwa Bunakristu bulangikaanga nziiyo zinjaanji zya kubija kwesu mbotukonzya kuba, mpoonya kusanganya luzyalo alweengelelo lwa Yahuwah kuli ndiswe.
Swebo tatweelede kuluba kuti tatulwani nkondo yakulwana aa bantu pe; tuli munkondo yakulwana aa Saatani. Aabo bantu mbotulanganya kuba basinkondoma mbazike bakatolwa aa Saatani. (BaEfeso 6:12) Nkaambo nkondo yesu tiili yakulwana aabantu pe, pele njakulwana abasibwami, abasinguzu, abeendelezi bamudima waansi ano, alimwi amyuuya mibi minji-minji yamujulu. Inguzu zya Yahuwah, ninguzu zya luyando, nenguzu zikonzya kusandula sinkondonyoko kuti abe mulongwaako wiinda boonse. Kutondezya luyando kuli sinkondonyoko ncintu cimukondelezya Yahuwah alimwi citondezya kuba mupati mumoza. (Tusimpi 16:6-7) Luyando akusyomeka nzezimanya cinyonyoono, kwiindila mukulemeka Mwami Yahuwah muntu ulasiya bubi. {7} Ciindi muntu neenda munzila zibotezya ku MWAMI Yahuwah, nibaba basinkondonyina boonse balakkala muluumuno anguwe.
Swebo tatweelede kuluba kuti tuli balupatipati aabo bakatuminwa kuzyooyiminina bulelo bwa Yahuwah, a Mwami wesu, Yahushua Messiah. Nkwiinda buyo mukubaa luzyalo aluyando mbotukonzya kutondezya Leza wa luyando, Leza wa luzyalo. Tutondezya luyando kuli basinkondoma kwiinda mukubacitila zibotu. Kwiinda mukubaleleka, tulacita eeco cili mukwaamba zintu zibotu kuli mbabo, akwaamba zintu zibotu kunze lyabo, kukanana zileleko kuleka kubasinganya. (Tusimpi 18:21) Mulaka ulijisi nguzu zya buumi azya lufu, Nkabela ooyo uuyanda uyoolya micelo yawo. Inzila mpati mbotweelede kutondezya luyando nkwiinda mu mipailo, oomo nkondo zya moza mozilwaninwa akukoma. Kucita zintu zyoonse eezi inga cayobolola luzyalo lwa Yahuwah kuti lukunke kwiinda mu myoyo yesu mbuli mulonga wa meenda aa buumi. Eeco ciyoocinca buumi bwa basinkondoma, alimwi nokuba kuti tiibalimvwa kucinca mu moza, ciyoosandula maumi eesu, aayo alo ngamakanze ookwa Yahuwah nokuba boobo.
“Nkaambo nkondo yesu tiili yakulwana aabantu pe, pele njakulwana abasibwami, abasinguzu, abeendelezi basofweede ba mudima waansi mumusela uuno, alimwi amyuuya minji-minji ya mumasena aakujulu." (BaEfeso 6:12)
|
Utasoli kuleyaleya kuyanda kwa Yahuwah mu buumi bwako; uyakuunjila muyoba. Ikuti kacili cibeela ca buumi bwako kusanduka kuba mucikonzya ca Yahushua, uyoosanduka, nokuba kuti ziyume zitete buti. (BaLoma 8:28-29) Kayi tulizi kuti Yahuwah zintu zyoonse uzyeenzya kabotu kulibaabo bamuyanda, nkokuti kulibaabo mbaakaita mumakanze aakwe. {29} Nkaambo aabo mbaakazibila limwi wakabasala kuti bakabe mbuli Mwanaakwe mukuti akabe mutaanzi kuli babunyina banji.
Zimwi ziindi katuli Banakristu, twaanka kubaa ciimo mumizeezo ca kwiindilana a basazima abacizyi besu. Aboobo tulalilesya kucita zintu zibotu, kwaabila zileleko, alimwi nokuba kupailila basazima nokuba bacizyi, katuyeeyela kuti balilelekedwe kale mpoceela, kumwi katuti ino ikuti Yahuwah abaleleke kwiinda ndime? Ino mebo undilekela nzi? Eeci citondezya kutakomena mu muuya nkaambo, mubulelo bwa Yahuwah, ooyo muntu uupa bamwi lyoonse ulilelekedwe kwiinda yooyo uutambula. Ambweni cileleko cako cilisinkilidwe nkaambo Yahuwah uyanda nduwe kuti uleleke bamwi nkokuya Walo akuleleke ayebo. Alimwi, aabo bantu bayeeyela kuti tuli atalaa bantu boonse alimwi “twakasika kale mpotweelela” mbabantu bayandika ncobeni mumipailo yesu, mbabantu bayimvwi nkuuli kumbele mundando ooko nkwiilulide kapati nkondo, aboobo tatuzyi zintu zyoonse mobayaa kwiinda, pele tulilailidwe kupaililana. Eeci citupa kuti tukamantane, akuzyiba kuti tuli cibeela ca kuzwidilila nokuba kwaalilwa kwabo kwiinda muli nzyotubandauka eelyo notupaila.
“Balelekwa aabo baleta luumuno: nkaambo bayokwiitwa kuti mbana ba Yahuwah." (Mateyo 5:9
|
Amwiibaluke Yahushua ncaakatwaambila muli (Mateyo 5:44-47) “ Mbombubo, pele mebo ndamwaambila kuti, ‘Yanda sinkondonyoko, amubaleleke aabo bamusinganya, mubacitile cibotu aabo bamucimwa, mubapailile aabo bamubelesya calunya akumutundulula, {45} mukuti mube bana ba Uso uuli kujulu’; Nkaambo walo nguucita kuti zuba Lyakwe lipaswide aabo babi ababotu, akuusizya mwvula baluleme abaabo bataluleme; {46} “Nkaambo kuti naa mwayanda baabo bamuyanda, ino mujisi bulumbu nzi? Sena abalo basimitelo tabaciti boobo na? {47} “Alimwi kuti kamujuzya buyo banabokwenu, ncinzi ncomucita kwiinda bamwi? Saa abalo bamasi tabaciti boobo na?
(Mateyo 5:9) Balelekwa aabo basikuyunzanya nkaambo bayokwiitwa kuti mbana ba Yahuwah.
Eeci ncibalo citali ca-WLC cakalembwa aaba Gary Robert Ballard.
Twakagwisya mucibalo citaanzi mazina aabakomba mituni ngobayita Taata a Mwana, akubikka mucibaka cangawo mazina mataanzi ngubaapedwe. Kuyungizya waawo twakajokolosya mutumpango ntotulembulude akubikka mazina aa Taata a Mwana, mbuli mbwaakalembedwe kutaanguna abalembi bamu Bbaibbele bakayoyelwa moza. Nkamu ya-WLC
