|
Kuli mweelwe uugambya wa Banakristu bakalilekela ku ziyanza zya mizeezo amicito yabu Falisi. Cintu cuusisya ncakuti, aabo kanjaanji mbabasyoma cakuntonkomana pele batakubwene ntenda njobalangene. Koya kumbele kubala uzyibe kooze ka dyabooli kapilingene aaka. |
Kutolwa buzike ku Bbabbuloni kwakasilika bana Isilayeli kulekela lyo kuyaa bwiingaila kutobela baleza bambi. Kumamanino bakaibaluka kuti luzubo lwabo lwakali jatene kakwiina kwaandaana akusyomeka kwabo kuli Yahuwah, Leza wa kujulu. Saatani, nokuba boobo, wakalaa makanze aabucenjezu aakusungilizya bana Isilayeli bantonkomene kubamba biyo ibbala lya milawo pele kumwi kabanyansya moza wa mulawo. Mumajwi amwi: bufalisi.
Walo wakasungilizya bana Isilayeli kulengelezya tulawolawo atunsiyansiya tutabaligwi twakabambwa aabantu. Kwiinda mu “kubbataika” atalaa mulawo wabulemu toonse tulawolawo ootu twakabambwa aabantu, Saatani wakasyomya bana Isilayeli kuti tacikonzyeki kuti balo inga basotoka mulawo. Mbube bakaanka kutonkomana kubamba bbala lya mulawo cakuti bakalubila lyo makanze eeni aamulawo wabulemu. Bunji bwa basyomi bamazubaano balinjombede mukooze aaka nkeenya kakwiina kulibona. Mpoonya Saatani ubatamikizya kuti bafwe bweemya cakuti batantamuna miya yabo kuzwa munsi lya Yahuwah. Kulanga lwabili azibi zya lufu zili ciloba kuyubununa mbwaakazwidilila kubelesya nzila yakulimvwa nsini eeyi.
Bamwi bantu basyoma kuti mukusulaika cibi ca kulitukumuna, beelede kulitola ansi. Balanganya cintu eeci kuti nkulibatamika. Bayoowa kuti kulimvwa kusumpuka inga cabamba muntu umwi kuti atalike kulitukumuna.
Pe ma tacikonzyeki eeco. Bantu balimvwa kusumpuka munzila ya buumi bubotu balainda kukonzya kukwabilila zintu nzyobasyoma kunembo lyabaabo bakazyanya ambabo kwiinda baabo batalimvwi kusumpuka. Balakonzya kucita zinjaanji kwiinda bantu bapenzyedwe kulidonaika ooko kuboolela mukutalimvwa kusumpuka. Banakristu beelede kwiinda boonse kulimvwa kusumpuka atalaa nyika mbwaanga Yahuwah wakali kuyandisya kwaaba Mwanaakwe nokuba kuti nikwakali muntu omwe buyo wakufutula!
Nokuba kuti kunyonokela—kutalimvwa kabotu ooko nkobalimvwa bantu bamwi kuti babona umwi kazwidilila—kakwiina akudonaika kuti ncinyonyoono, kuyandisya kubaa zintu zinji tacili cinyonyoono. Akataa Bunakristu butonkomene, kuyandisya zinjaanji kweelanyigwa aa kunyonokela. Kusendekezyegwa kuti Ikuti kotakkomene mpoteene lusumpuko, nkokuti uucita cinyonyoono ca kunyonokela. Pele teesyi mbocibede bwini oobo pe. Tacili cinyonyoono kuyandila bana bako buumi bubotu. Tacili cinyonyoono kubeleka kuti ubaa buumi oobo. Mubwini, Yahuwah uyanda bantu balaa makanze mabotu aabo bayoomubelekela canguzu Walo.
Bulyato ncinyonyoono cimbi, pele Saatani cimwi ciindi usungilizya bantu kwiindilizya kulilesya bulyato. Ngooyu mukonzyanyo, tabuli bulyato kuyobozya lubono lwa mukwasyi wako. Zimwi ziindi, kuba mwaabi, muntu weelede kupa kakwiina kubbadelesya bamwi pele walo nokuba mukwasyi wakwe nguubbadela. “Kopa ‘kusikila cicise” nkakaambyo bafundisi nkobabelesya mucikombelo kutegwa basungilizye basicikombelo kupa kunji alimwi alimwi, nokuba kuti tabacikonzyi kucita boobo.
Yahuwah talangili bana Bakwe kwiindilizya mpobakonzya kusika. Paulu wakacenjezya kuti, “Pele ikuti kakuli muntu uutapi banabokwabo, alimwi kapati ba mukwasyi wakwe, ooyo muntu wakaka lusyomo alimwi ulainda kusofwaala kwiinda uutasyomi” (1 Timoteo 5:8).
Mukulya mubusena abumwi Saatani usungilizya bantu kwiindilizya kulya. “Ikuti kuliimya kulya asyoonto kacili cilainda kubota kwiindilizya waawo!” ooyo ulibonya kuti ngo muzeezo uutonka basyomi banjaanji kutobela maumi aakuliimya.
Mubweende bwa lyoonse, basyomi balayandisya kulemekezya Yahuwah kwiinda mukusala zyakulya zipa buumi bubotu pele kokacenjelela kampenda kakunungilila tulawolawo twakabambwa aa bantu ooto tupandulula zyeelede kuba mu buumi bubotu. Messiah lwakwe wakatamikizyigwa kuba cakolwa a mulyato! Pe ma, Yahushua taakali cakolwa nokuba ncelelebula, pele ciyanza cakutondaikana minwe akujanina bamwi milandu aabo batobeli kusala zyakulya mbuli nduwe ncecilibonya akataa basyomi.
Kukalala ncintu cakulimvwa mubuntu. Kanjaanji cilakonzya kuba moza wa Yahuwah uukuyumyayumya kuti eeco ncaakucitila umwi ncibi. Bukali/kunyema kusotoka munyina akuba cinyonyoono eelyo nokuyungizya kuleka biyo kuzula mucamba akulitondezya mumicito. Mbubuti mboingula nolimvwide kukalala? Jena ubelesya mbolimvwide kuti cikukulwaizye kucita ciluleme na? Kuyanda kululamikila yooyo wacitilwa citaluleme? Naa ncakulijatya biyo kuti utoneke muntunyoko umwi? Bwiinguzi ku mubuzyo ooyo butondezya kuti kwacitwa cinyonyoono naa pe.
Yahushua wakasalazya cinicini: “Mwakamvwa kwakaambwa abaabo bansiku kuti ‘utaciti bumambi’, Pele Ime ndimwaambila masimpe kuti ooyo uulanga mukaintu cakumusukama ulimucitide kale bumambi mumoyo wakwe. Mbube kuti liso lyako lyalulyo lyakulebya, uligwisye, ulisowe, nkaambo kulakubotela kuti ufwidwe cipanzi comwe kwiinda kusowelwa mu-Gehena mubili wako woonse.” (Mateyo 5:27-29).
Yahushua wakabikka mulimo wakusalazya mizeezo atalaa muntu mwini lwakwe, kutali ali ceeco ncasukamina. Eeci ncintu cikazyanya aciyanza ca mazubaano cakutamikizya umwi muciindi cakuti mwaalumi lwakwe alilesye kusukamina mwanakazi. Kutamikizya mizeezo ya mwaalumi ya nkwela nkaambo biyo Ka zisani nzyasamide mwanakazi (naa, kwaanda awaawo, kana kasimbi kasyoonto), akumusinikizya ncayelede nanka ncayelede kusama, oobo mbu sikuupaupa ameso abufalisi kubumaninizya.
Buumi munyika ya cinyonyoono bulakonzya kuminya cinicini. Eelyo bazyali nobayaa kucembaala akuyandika kubambililwa kapati, zintu zicumba kumoyo zilatolwaazya kapati. Yahuwah ulizyi mpotugolela anotuyandika kulyookezya. “Mbuli Wisi mbwafwida nkumbu ku bana bakwe, awalo Yahuwah ubafwida nkumbu aabo bamuyoowa. Nkaambo ulizyi mbotubambidwe; Walo ulaibaluka kuti tuli bulongo.”
Kulilingula takuli kuba mutolo. Ikuti kolaa nguzu zyakupa bamwi, ulayandika kubikka ambali ciindi ca kulibambilila lwako. Ooko takuli kuba mutolo nokuba kuba muunyu.
Banakristu batonkomene kanjaanji balombozya kuba mbuli Yahuwah. Eelyo notwaalilwa mucintu, ncuubauba kucegwa mumakanze ookwa Saatani aakututonkela mu kuyungizya zinjaanji atalaa zizumizidwe kucitwa mumulawo. Utupa kulimvwa nsini nkaambo kakubula nguzu mubuntu bwesu mpoonya utusungilizya kubeteka akufubaazya bamwi. Kufumbwa notucilaa ciimo ciwide mucibi, tunikwaalilwa kulondoka bwinibwini.
Kokaka lino kubikkila maanu kuli nzyobaalilwa kucita bamwi. Landabika meso aako ali Yahuwah uzyibe kuti walo ulakuyanda webo!
