Hena yebo ulilibambide ku mazuba aazya kumbele na? Mwati yebo kulaa ncozyi cini ncoyelede kulibambila?Kakwiina kudonaika, swebo tupona mumazuba aamamanino mumusela wanyika iino. Myaka misyoonto yainda, kufumbwa muntu wakatii sole kukambauka kuti mamanino aanyika aswena, ooyo muntu wakali kunongwa, kufubaazyigwa akutandilwa kulaale. Pele sunu, nokuba boobo, nkaambo kazintu ziyaakucitika munyika mazubaano, bantu boonse kufumbwa nkobakkala bayaakusinsimuka akubbatula meso kulangisya mbozilemede zintu zicitika ciindi ncotupona cino.
Kwiibaluka kuti mamanino asika, ncintu ciletelezya kwiimpana akataa bantu basyoma. Lino luzyibo lwakuti mamanino aanyika ali munsimunsi mbolumwaikide akataa bantu, mulimo nzi wini wa Muna-Kristu?
Masimpe eeni ngakuti, zintu ziyandika kapati nzyoyelede kulibambila nzintu zya moza. Eeci ncintu ncayelede kulibambila muntu omwe-omwe. Kunyina muntu pe uutikafutulwe kayaamide mucilongwe ca muntunyina umwi a Taata wa Kujulu. Pele ino mbuti kayi kulibambila tubbeesu twako akutuvwungaila? Bamwi bana-Kristu baliyoowede kuti kukwabilila lubono lwako nkulitondezya bukandu akubula lusyomo muli Yahuwah kuti nguukonzya kukupa ncobulide.
Masimpe eeni ngakuti, kulibambilila twako mumazuba aazya kumbele, aayo nga malailile aa Bbaibbele ncobeni. Takuli kubula lusyomo mu Mwami Yahuwah pe. Kunze lyaboobo, tumpango tunjaanji mu Mangwalo tuyiisya buyo cintu cipati ncokuyandika kupona kojisi lusyomo kwiinda mukulibambila zintu ziyookugwasya!
Solomoni wakaamba kuti:
“Muntu uucenjede naabona mapenzi, ulayuba, pele mufuba-fuba uliingene kuya nkukwenya ooko, nkabela ulasubulwa (Tusimpi 22:3, NKJV)
BaHebulayo 11 bapede Nowah kuti ngomukonzyanyo wa lusyomo.
“Kwiinda mulusyomo, Noah wakaswiilila kucenjezya kwa Yahuwah kwaamba zintu zyakacili kuboola nzyaatakali kukonzya kubona. Wakayaka bwato kuti walo amukwasyi wakwe bafutulwe. Mukucita boobo Noah wakazula baansi alimwi wakakona bululami Yahuwah mbwapa baabo bamusyoma.” (BaHebulayo 11:7, NKJV)
Yahuwah naakavwuna Noah amukwasyi wakwe kuzwa ku zambangulwe lya meenda. Walo wakalijisi ncobeni nguzu zyakucita boobo! Nokuba boobo, Noah wakeelede kuteelela kulaigwa. Yahuwah wakamucenjezya, pele cakali mumaanza ookwa Noah kuti ateelele akutobela ncaakacenjezyegwa.
Josefa, awalo mbweenya buyo, wakalibambila kuti atakafwi nzala mu myaka iili ciloba ya cimpayuma. Mumyaka nikwakali butebuzi bwakulya kalilekele, walo wakapa malailile kuti kuyakwe matala aakuyobweda maila aakulya mu cimpayuma ciyootobela waawo. Yahuwah wakali kukonzya kutumina manna kuti abalandusye batafwi nzala ya cimpayuma. Alimwi Walo wakalaa nguzu ncobeni zyakucita cintu eeco!
Pele tabusyi pe oobo mbwacita milimo Yakwe pe.
Yahuwah ulapa kucenjezya. Cili kuli ndiswe kuti tuteelele malailile Aakwe. Kwiinda mukutobela malailile ngapede akulibambila kweendelana amalailile aayo, iswe inga twapona maumi eesu kaayendelana alusyomo lwesu mu Jwi lyokwa Yahuwah. Mangwalo alipede kucenjezya kwamazuba aacizya kumbele. Eezi zishinshimi ziyubununa kuti kuli ciindi ciciboola eelyo boonse bakaka kutambula caando ca munyama nobayokwiimwa zintu akulesyegwa kuula a kuuzya.
Pele masimpe ncobeni kuti Yahuwah ulaa nguzu zyakuvwuna bantu Bakwe muciindi camanyongwe. Nokuba boobo, twaano twa Mangwalo tuyubununa kuti basyomi tabeelede kukkala kabaliibide pe, mpoonya kabalindizya Mwami Yahuwah kuti abacitile zyoonse.
Yahuwah ulabeleka antoomwe abantu Bakwe kwiinda mukuleleka milimo njobacita nobalibambila, pele muntu omwe-omwe weelede kucita kufumbwa ncayelede kulibambila. Kutaanguna, yebo weelede kukumbila bulemu bwa kujulu kuti bukusolwede. Kopaila abuzuba kugaminina cintu ncoyanda. Mipailo iigaminina ncobulide, ilaingulwa akugaminina kukupa cintu eeco ncobulide. Mpoonya kuzwa waawo, kotalika kubungilila makani mbonga walibambila kuya kumbele. Eelyo nocita boobo, yebo uyootondezyegwa ntaamu iitobela njoyelede kutobela. Alimwi akuzwa waawo ntaamu iitobela. Alimwi ayitobela yeeyo.
Lyoonse kufumbwa ntaamu njobweza, yebo weelede kupaila mupailo uugaminina cintu ncobulide, kumwi kobungilila makani woonse aayandika, akweendela mulusyomo. Yahuwah uyoobeleka antoomwe anduwe kukusolweda munzila iitakwe ntenda kuli nduwe. Utalangili kuti uyoosolwedwa munzila njeenya mbuli bamwi njibakasolweda pe.
Kuli kulimvwa kukasaalilwa kweendela antoomwe abantunyoko, alimwi kanjaanji bantu balayandisya kuteelezya muntunyina umwi kuti abaambile naa eeco ncobacita cililuleme kwiinda mukulisanganya akataa bantu bacita (nokuba basyoma) mbuli nguwe muntu ooyo.
Nokuba boobo, ooku inga kwaba kucegwa mukooze. Tubunga twabantu banji tulalangisyigwa abantu banjaanji. Bantu bokwa Yahuwah bakalaigwa kuti beelede kuba basimweendaalikke alimwi bantu banji inga bafutuka kuzwa ku ntenda eelyo nobatanteene. Bantu bakkede aawa, abamwi kabakkede kutala lyookuya kabaliibide inga tiibaliletela tunjaanji.
Muntu woonse uyandika kubaa bweendelezi bwa Yahuwah bumugaminide lwakwe nkaambo muntu omwe-omwe ulaa buumi bwaandeene azintu ziimpene nzyayanda. Cisi comwe-comwe ciliimpene, mbweenya mbuli ziindi zyamwaka amilawo yacisi. Mukwasyi omwe-omwe, amuntu omwe-omwe ulaa zintu zimugaminide nzyayanda lwakwe, eezyo ziyandika kweendelezyegwa mubulemu bwa kujulu.
Kanjaanji bantu balayanda kumvwana abantunyina balibambila zintu zya mazuba aacizya kumbele. Alimwi aawa bayeeyela kuti kunyina ntenda kubungana abantunyina banjaanji boobo. Balo bayandisya muntu uubawumbulizya alimwi uujisi mizeezo mbuli mbabo.
Kunyina cintu cilubide mukucita boobo pe, pele lyoonse yebo weelede kwiibaluka kuti lufutuko lwako luli muli Yahuwah. Ibbuku lya Tusimpi lyaamba kuti: “Bbiza lilibambilidwe ku buzuba bwankondo, pele Mwami Yahuwah nguupa kuzunda (Tusimpi 21:31)
Kukamantana abantunyoko bamwi, ncintu ceelede kucitwa buyo kuti waswiilizya jwi limvwika ncobeni lizwa kuli Yahuwah kuti ooko nkokuyanda Kwakwe. Kabunga kabantu, kalaa nguzu buyo zyakwiimikila nji kweendelanya anguzu zya bantu batakwe nguzu basangene mukabunga aako. Yebo weelede kukamantana abantunyoko bamwi lilikke buyo eelyo Yahuwah nakusolweda akukulaya kuti aabo bantu inga bakugwasya, balasyomeka alimwi tabakwe ntenda.
Yahuwah alikke nguuzyi mazuba aacizya kumbele; alikke nguuzyi ooyo uuyoozumanana kusyomeka kuli Nguwe mumazuba aazya kumbele. Kufumbwa muntu ulakonzya kwaamba kuti, “Ime ndicembeede kale; Ime nsyecikwe nguzu; Ime ndimucete, ncinzi ncenga ndalibambila.” Yebo koyibaluka kuti, tociti cintu eeco kwiinda munguzu zyako omwini pe. Yahuwah nguubelekela antoomwe anduwe, pele yebo weelede kucita cibeela cako kwiinda mukupona kolitondezya lusyomo ndojisi.
Jemusi waamba kuti: “Ino cigwasya nzi kuti muntu kati ulijisi lusyomo, pele kakunyina ancacita andulo? Sena lusyomo lwakwe lulakonzya kumufutula na? Atwaambe, kuti mukwesu naa mucizyi ngotusyoma limwi wabula zyakusama azilyo, kwamana umwi wanu wati, “Koya muluumuno, ujane ngubo zyakulivwumba azilyo,” kali taamupa zintu zyeelede mubili, ino cigwasya nzi eeco? Mbubonya oobo alwalo lusyomo lutajisi milimo, lulifwide. Ambweni inga umwi ulati, “Yebo ulijisi lusyomo, mebo ndijisi milimo mibotu.” Ime inga ndati, “Nditondezye lusyomo lwako lutajisi milimo mibotu, ambebo amilimo yangu ndilakutondezya lusyomo ndwejisi.” (Jemusi 2:14-18, NKJV)
Kucinyina ciindi cilamfu cakubambulula zintu zilubide. Kuti yebo ulyaabe cakumaninina kuli Taata, kuti yebo ukakatile kutobela bweendelezi Bwakwe muzintu zyoonse, Walo uyookusolweda yebo amukwasyi wako munzila iitakwe ntenda yakweendela.
Utalelemi! Kotalika ono so! Kunyina ciindi cinjaanji ciceede pe! Ikuti ulindizye kusikila milumbe ikaambilizye ntenda ya manyongwe, yebo ulimukide mukwesu.
