Mu 1999, basyaazyibwene ba lumamba bobile, baduundumuntule mu Lumamba lwa Lwaanguluko Lwabantu baku China, bakasimba bbuku lilaa mutwe wakuti Unrestricted Warfare: China's Master Plan to Destroy America. Eeli bbuku lyakapa mubuzyo wakuti icisi citakwe nguzu mu lumamba mbocikonzya kuzunda nkondo ya kulwana cisi cilaa nguzu ziyoosya mulumamba; cakugaminina, kulwana cisi ca Amelika. Aayo makani ngibaakosozya balembi akatilimuna nyika kutalikila ku Amelika, antoomwe abamambi bakwe abasinkondonyina mbweenya buyo, nibaabona mbokunga kucincana nguzu kwacitika munzila yakubinda iitalangilwi kwiinda mukubelesya nzila zitanteene zyakulwana nkondo. Mumajwi amwi, muciindi cakulwana nkondo kubelesya lumamba mumabbuwa aakulwanina, nkondo zya kumbelaa ciindi ziyoolwanwa (akuzunda) kwiinda munzila zimbi, mbuli kuzimya magesi cisi coonse, kuzibinganya sikapepele wamu kkompyuta, kulwana makwebo aasunga mali, akubelesya milumbe yaambilizyigwa.
Banakristu abalo baluujisi kulwana nkondo. Makani mabotu ngakuti bakazunda kale. Nokuba boobo, kucili kulwana kuciyaa kucitika alimwi kunooyaa kwiindila kulutila akataa cecino ciindi kusikila akaboole Yahushua. Kuli zibelesyo zinjaanji zibelesyegwa mukulwana ooku. Kupaila, kuswata Mangwalo, kulikankaizya mu zisyomyo, akubelesya lusyomo nzyezyimwi zilwanyo zisyoonto buyo nzyotujisi. Pele kucili cilwanyo cimwi, cilaa nguzu kapati alimwi eeco Saatani ncaakasolede kusisa ndiswe nkaambo eeco cilwanyo ncamu nkondo iitanteene: cilabeleka akubelekesya canguzu ncobeni, pele tacili cilwanyo ncozyibide kubelesya.
Cilwanyo eeco … nkutembaula.
Kutembaula ncibelesyo cilaa nguzu kapati mukulwana busofwaazi. Eeci cilitondezyedwe eelyo cisi cansiku ca Judah nicaali kulelwa Mwami Jehoshaphati. Nkamu ya lumamba mpati kuzwa kumasi aandeene yakasika kuzyoofumpa Judah. Kwakanyina bulangizi nobuceya bwakunga ati bana Isilayeli bakonzya kuzunda kulwana nkondo. Aboobo, Jehoshaphati wakacengulukila kuli Yahuwah kuti agwasyigwe alimwi mpoonya mukubusi waba Levi, wakanjidwe moza, wakabaletela mulumbe wa bulangizi akukkazyika camba. Walo wakati, “Mutayoowi nokuba kutyompokelwa nkaambo ka bbunga lya lumamba eeli pe, nkaambo nkondo tiili yenu, pele njiya Elohimu” (2 Makani 20:15).
Lino kakkazyikide camba kumajwi aalusyomo aaya, Jehoshaphati wakacita cintu cataazyibidwe kucitwa. Wakasala kuti nkamu yabayimbi bamu tempele isololele lumamba kuya munkondo, kabayaa bwiimba ntembauzyo kuli Yahuwah.
Eelyo naakamanizya kuyooma abantu, wakasala baabo bakeelede kwiimbila Yahuwah, alimwi abaabo batembaula bubotu bwa kusetekana, kumwi kabayaa bweenda kunembo lya lumamba alimwi kabati:
“Amumutembaule Yahuwah,
Nkaambo luzyalo lwakwe lulakkalilila kukabe kutamani.”
Lino nibaatalika kwiimba akutembaula, Yahuwah wakatumina mpi yakalwisya bantu ba Ammoni, Mowabu, aba Mulundu wa Seila, aabo bakazide kuzyoozinga Judah; mpoonya aawo bakakomwa. (2 Makani 20:21-22)
Kutembaula ncintu citalangilwi pele ncibelesyo cilaa nguzu kapati mukulwana sinkondo.
Kutembaula kutondezya Yahuwah kuli ndiswe kuti walo ngo Mufutuli wesu. “Nkaambo Ime Ndime Yahuwah Leza wenu, Ooyo Uusetekene wa Isilayeli, Mufutuli wenu” (Izaya 43:3). Eeci cilatwiibalusya aceeco Walo ncaakatucitila mazuba aakainda, kutuyumyayumya kusyoma mu kuyandisya Kwakwe kuti atugwasye alimwi. Mumajwi ookwa Stuart Hamblen, “Taali maseseke [Yahuwah] ncakonzya kucita. Eeco ncaakacitila bamwi, Walo uyookucitila ayebo.”
Kutembaula nkulemekezya Yahuwah. Eeci ncintu cipati nkaambo eelyo notupa bulemu kuli Yahuwah, twiibalusyigwa nguzu Zyakwe zipati. Eeci citondezya kuceya kutingaana kwesu kweelanya a nguzu Zyakwe zya bulemu.
Amupe bulemu kuli Yahuwah, inywe nomulaa nguzu,
Amupe kuli Yahuwah bulemu anguzu.
Amupe kuli Yahuwah bulemu bweelede ku Zina Lyakwe;
Amumukombe Yahuwah bubotu bwa bulemu Bwakwe (Intembauzyo 29:1-2).
Kutembaula kunyanyaazya mizeezo yesu. Eelyo notujisi bubi kutembaula Yahuwah, tatujisi ciindi cakulibilika akuyoowa zintu nzyatukonga akutudyaaminizya Saatani. Kutembaula kutonkomeka maanu eesu aalusyomo lwesu kuli Yahuwah. Kwiinda waawo, nokuba boobo, eelyo notutembaula Yahuwah, muya ookwa Yahuwah ulaswena munsimunsi kutusalazyila akunjizya mumizeezo amyoyo yesu ziimo zini zitukulwaizya kuti tusimpe lusyomo lwesu muli Yahuwah. Kwiinda mu kutembaula tulakonzya kuswenena munsimunsi lya Yahuwah akumuzyiba Walo omwe-omwe lwesu muli lwakwe.
Paulu wakaambila ba Tesalonika kuti, “Kosekelela lyoonse, kopaila kakwiina kuleka, muli zyoonse kopa kulumba; nkaambo ooku nkokuyanda kwa Yahuwah muli Yahushua kuli ndinywe” (1 Batesalonika 5:16-18). Eeci ncintu cipati nkaambo eelyo notutembaula Yahuwah, nguzu zya Saatani zitudyaaminina zilapwayaulwa. Eeci cilitondezyedwe canguzu eelyo Paulu a Silasi kabaimba nyimbo zya kutembaula nibakaangidwe akubikkwa muntolongo. Akataa masiku, muzuzumo wanyika mupati wakasokomona micinjili yakabaangide muntolongo! Mukonzyanyo wabo wa kutembaula Yahuwah nokuba leelyo nibakali mu dindi wakaleta lufutuko kuli sintolongo amukwasyi wakwe woonse.
Mulimo wa kutembaula muziindi zya masunko, upyopyonganya sinkondoma. Tacili cintu ncotulangila eeco! “Kwiinda mu kutembaula kwa bana abavwanda webo wakabamba cilisitilizyo kuli basinkondonyoko, akuumuzya sinkondonyoko a sikuliyankoto” (Intembauzyo 8:2).
Yahuwah ulayandisya majwi aako aakutembaula. “Mpoonya aabo bakali kuyoowa Yahuwah bakayooma umwi kuli umwi. Yahuwah wakateelela akubamvwa, alimwi kwakalembwa bbuku lya ciibalusyo kunembo lyakwe lya baabo bakali kumuyoowa Yahuwah akupa bulemu ku zina lyakwe” (Malakayi 3:16).
Hena tacikondelezyi na? Majwi aako aalusyomo aa kumulumba alayandwa kapati kuli Yahuwah cakuti Walo ulaa bbuku lyaandeene oomo mwalemba majwi aayo! Kutembaula kutukwelela kuli Yahuwah. Kutupa kuti tumuzyibisye kuti nguni katuli aciimo cilemu cakuzyibana aanguwe. Kutuyumyayumya lusyomo) akupwaya nguzu zya sinkondoma.
Mbube, talika kutembaula! Hena yebo uteene abusena mpotazyi cakucita? Kotembaula Yahuwah kuti yebo ulakonzya kuunka kuli Nguwe! Hena ulipengede kuciswaciswa zitakwe bulangizi na? Kotembaula Yahuwah kuti Walo mbwali Mulengi wako, Walo ulaaluzyibo lukkwene lwa mubili wako ancuuyanda mubili wako. Hena yebo uli muntenda na? Mutembaule Yahuwah kuti Walo akupe bangele Bakwe bakubambilile akukugatela munzila zyako zyoonse.
Kutembaula ncilwanyo cipati kapati mu nkondo ya moza cakuti taceelede kutazyibwa akataa bantu ba Yahuwah mazubaano. Eelyo webo notembaula Yahuwah nociba kuti kacili ciindi cili buti, yebo waambilizya lusyomo lwako mu luyando Lwakwe anguzu zya kufutula ku mulengalenga uukulangilizya. Oolo lusyomo, nolutondezya mu kutembaula, lulaa nguzu muli ndulo zya kuvwuna kuzwa mutukole twa sinkondonyoko.
“Pe ma, amumwiimbile Yahuwah lwiimbo lupya! Nkaambo wacita maleele aagambya; Ijanza Lyakwe lyalulyo ajanza Lyakwe lisetekene lyamuletela lufutuko” (Intembauzyo 98:1).
