Ino ninzi nconga wapa bantu bajisi kale zintu zyoonse?
Ooyo mukwasyi wakamutambide wakalaa lubomba kapati akumupa zintu nzyaakabulide zyoonse. Walo wakalizyi kuti mupobwe lyakali kuzyaakuswena, bantu bamukwasyi ooyo bakali kuyoomupa zipego zinjaanji mbweenya mbuli mbubakali kupa bana babo. Pele ino walo ninzi ncaakali kunga wapa bantu batakwe ncobabulide, aabo bakali kukonzya kulyuulila kufumbwa cizya kumoyo?
Mpoonya buzuba bupati bwapobwe bwakaswena munsimunsi. Eelyo nikwakaceede mazuba obile buyo kuti lisike pobwe eelyo, Claudia wakazyiba cakucita. Wakatanta bbaasi liya kunselelo lya dolopo, 
mpoonya wakaunka kucintoolo ceebeka akuyoowula cisani camwana muvwanda ceebeka mbuli ncaakali kukonzya kuula, mpoonya wakacivwungaila mbuli cipego. Naakazwa mucintoolo wakaswenena munsaa muntu wakali kugatela mulyango akumubuzya kuti, “Amundijatile, hena mulizyi Ime nkwenga ndajana mukwasyi uucetaalide?”
Walo wakacenka nguwe, mpoonya wamudukwida syule akucengulukila kumbi. Mpoonya Claudia wakaunka kumusilikani umwi.
“Mukwasyi mucete? Yebo omucizyi inga tookonzya kuunka kubantu bamusyobo ooyo. Ooko nkobakkala kucibeela cadolopo takulyatwi tende pe, kuli ntenda kapati. Koya buyo kwenu ukalyookezye akulikkomanisya.”
Munzi wa New York wakali gwitide kusekelela mapobwe kufumbwa ciindi camwaka alimwi mazuba obile munsaa pobwe lipati eelyo, cakali mbweenya oobo. Claudia wakali lendeledwe eelyo bantu banji nibakali kuula zintu mumakwebo akuzelauka mumbali lyakwe. Wakatalika kweenda kumwi katazyi nkwaakali kugama kuti akamanizye makanze aakwe, kumwi katyompedwe kuti takazwidilili ncaakali kuyanda kucita.
Nikwakainda kaindi kasyoonto buyo, walo wakasika kumigwagwa eeyo yakalaa bucete mbuli njaakazyibide kuzwa naakaboola ku Amelika. Oomo mumigwagwa, maanda akali dilimudwe, bantu tiibakasamide zikobela zibotu pe. Mpoonya wakamvwa mulangu uulila, mpoonya wakakkomana kubona mwaalumi wakasamide zikobela zituba wakali kulizya mulangu munsaa ciyobwedo ca Salvation Army. Walo wakalibazyi ba Salvation Army. Bakaliko akwalo kunyika ya Bukuwa.
Wakaleelaleela kweenda katozya kooko, kumwi kafwide nsoni, kayoowa kuti inga kabayoomubwentela, Claudia wakaswenena munsaa mudaala umwi akuti: “Amundijatile basa, hena kuli nkomuzyi nkwenga ndajana mukwasyi wabacete?”
Ooyo mwaalumi, uulaa ciimo cabudaala, wakazyiba kuti kucili ciciyanda kwaambwa mumubuzyo ooyo. Mpawo wakamukulwaizya ooyo wakali kubuzya kuti aye kumbele kumubuzya; majwi aakwe aakubbabbalisya mulaka wa Cikuwa, akafwidwa luzyalo naakamvwugwa mumatwi aamudaala ooyo.
Silumamba wa Salvation Army wakazyiba ncaakali kubuzyigwa. “Inzya, Ime ndiluuzyi umwi mukwasyi wabacete. Nkwiili mikwasyi minjaanji iili boobo. Ono ndilaafwi kukotoka mulimo wangu. Kuti undilindile kaindi kasyoonto buyo, Ime ndakusindikila kuyoobona mukwasyi umwi.”
Wakaimya mootokala mukaindi kasyoonto, mpoonya akupa malailile kuli weenzya mootokala kuti atole muntu ooyo kutozya kuganda lilamfu. Eelyo lyakali ganda lyabacete ncobeni. Claudia taakazyi pe kuti inga kakucili bucete buli boobo mucisi ca Amelika. Silumamba wa Salvation Army wakaseluka mumootokala akujulila Claudia mulyango. Claudia wakatikaanya mutwe wakwe kumwi kacikkede mumootokala.
“Nee peepe. Ndakomba, nywebo amubatolele ndinywe mukabape cipego eeci. Nsyeyandi kuti nkabape ndime lwangu. Ndakomba mukabapandulwide kuti: eeci cipego cazwa kuli yooyo uujisi kale zintu zyoonse.”
Mpoonya ooyo wakali kweenzya mootokala wakamutola nkwaakali kukkala, pele taakamubbadelesya pe. Walo wakaliswiilide eelyo Claudia naakali kubandika a silumamba mudaala, alimwi alakwe ooyu wakali mwaalumi wakalaa busongo.
Mpoonya buzuba bwakusekelela bwakasika. Kwakali zipego zinjaanji zikkomanisya myoyo amatebule. Claudia, mbweenya mbuli mbwaakali kulangila, wakatambula zipego zilibotela zinjaanji. Mpoonya boonse nibakamanizya kuvwungulula zipego zyabo, walo wakasoleka kubbabbalisya mu Cikuwa, kapandulula ncikwaanyina cipego kuzwa kuli nguwe.
“Ndakomba amundijatile. Mebo njanda kumupa cipego caandeene kapati, nokuba kuti nywebo mulijisi kale zipego zinjaanji. Kunyina nywebo ncomubulide pe ncenga ndamupa mebo. Kunyina Ime ncenga ndaula cikonzya kumutondezya kulumba kuzyila mumoyo wangu nkaambo kazintu zyoonse nzyomundicitila. Nkako, Ime ndakaula kasiinsi kalibotela kamwana muvwanda nkeekajana akupa mukwasyi mucete ncobeni. Ooyo mukwasyi ulibulide zintu zinjaanji kapati. Ime ndaabapa cipego eeco muzina lyenu. Eeco ncipego cizyila kuli ndinywe kuya kuli mbabo.”
Kukkomana kwa mukwasyi wabacete ooyo kwakali kwabo kuleka nguwe, mbwaakapandulula Claudia. Eeco ncecakali cipego cakwe kuli mbabo, balo bakajisi kale zintu zyoonse.
Kwakaumunizya kuti zi muŋanda yoonse. Misyozyi yakaibaiba mumeso aamukwasyi ngwaakaswayide. Eeco cipego caluyando cili boobo ncaakabapa, bakaciibaluka kwaciindi cilamfu kuzwa naakazyokela kwabo, alimwi cakabakulwaizya “kuunka kuyoocita mbweenya mbwaakacita” mumyaka yakatobela.
Moyo uulaa luyando ncobeni, ulayandisya kwaabila. Bulumbu ku luyando lwatambulwa bulalitondezya kuzwa mukuyanda kwaabila alakwe ooyo watambula luyando oolo.
Pele ino ninzi nconga wapa muntu uujisi kale zintu zyoonse?
Yahuwah ulijisi kale zyoonse. Masimpe ncobeni kuti, Walo kuli Nguwe nkokuzyila zintu zyoonse! Ninzi muntu ncanga wapa Mulengi wakwe kakuli Walo ngomwini wazintu zyoonse?
Yahuwah Lwakwe wakatwaambila musyobo wacipego Walo ncayandisya kapati:
Bupaizi busalala butavweledwe cintu kunembo lyokwa Yahuwah Elohimu: nkuswaya bamucaala abamuka mufu mumapenzi aabo, akulilesya zisofweede zyanyika. (Kobala Jakobo 1:27.)
Yahuwah tabulide hempe lipya pe. Walo takwe mulimo abbuku lipya, nokuba nkoloko nanka cili coonse cibelesyegwa aakkompyuta. Izipego nzyakkomanina Mwami Yahuwah nzizyeezyo Walo nzyaakali kunga wapa muntu eelyo naakacili anyika mbuli: kubaa lubomba, kugwasya bamwi muluzyalo; kuumbulizya muntu amajwi aakulwaizya akukkomanisya moyo wakwe; kwaabila muntunyoko cakulya, azyakusama kuli baabo bafwide nzala. “Ncobeni, Ime ndimwaambila masimpe kuti, kufumbwa nomucitila umwi wabasyoonto mbuli baaba banabokwesu, inywe mucitila Ndime eeco.” (Mateyo 25:40, NKJV)
Kufumbwa eeco ncocita cilemununa bapengede nokuba kuuntuluzyila muntu uupengede nakulomba cintu, cilatambulwa ku Mwami Yahuwah mbweenya mbuli kuti nguwacitilwa cintu eeco. Mufutuli Yahuwah wakasyomezya akuti: “Kufumbwa muntu uumupa nkomeki yameenda aakunywa muzina Lyangu, nkaambo inywe muli . . . [Bangu], Ime ndamusyomezya masimpe nywebo kuti, ooyo muntu takabulili kutambula bulumbu bwakwe pe.”
Amuyeeye eeci! Kufumbwa muntu uumupa maanzi aakunywa akaambo kakuti muli bantu ba Munanike wa Leza, muntu ooyo uyootambula cileleko cakwe ncobeni (Maako 9:41, NKJV) Kumanya nyota yamuntunyoko, ncintu citambulika mbuli kuti wacicitila Taata Yahuwah Lwakwe!
Kaambo keni nkaubauba kupandulula: Taata Yahuwah a Mufutuli Yahushua balacimvwa abalo kufumbwa ncobamvwide bana Babo bali munyika. “Tatujisi Mupaizi Mupati uutakonzyi kutufwida lubomba mubuteteete bwesu. Mupaizi wesu wakasunkwa munzila zyoonse, mbubwenya mbotusunkwa aswebo. Pele taakwe naakabisya pe (BaHebulayo 4:15, KJV) Aboobo, kuti umwi wesu kafwide nzala, awalo Yahuwah ufwide nzala. Eeco cakulya ncasombwa muntu cimulesya kumvwa nkwiimucisa nzala, ncecakulya cini cilesya Taata Yahuwah awalo kuciswa nzala njamvwide, eelyo mwanaakwe uupengede nzala nalemununwa.
Kuti muntu uupengede mumoyo, nanka uumvwide cicisa, waambilwa majwi aamupa bulangizi alusyomo, acalo eeco cilesya kucisa nkwamvwide Taata Yahuwah eelyo umwi wabana Bakwe nalaa buumba akutyompokelwa. Ambweni cipego ciinda zyoonse ncanga watambula muntu, ncipego caluzyibo lwa kasimpe. Makunga aabantu, alikkede mubuumba akoofwaala kumwi kabacita zilubide azyakusendekezya. Yebo kobapa cipego ca kasimpe bantu aabo, kutegwa bakkomanine mulufutuko lwa Mwami Yahuwah akuvwunwa mubulelo Bwakwe buteeli; eeco ncecipego ncayandisya munzila yiindene Taata uuli Kujulu.
Ncintu ciyandika kuti aabo bantu bakomba mucikombelo naa ekklesia waamunzi, aabo batakwe mbungano nkobasangila mali aabo, kuti bateelelesye milazyo yakupa kwakkumi akupa zituuzyo. Nkamu ya WLC tiitambuli kwakkumi nokuba zituuzyo kuzwa kubantu pe, alimwi kuti muntu katazulilwi kucikombelo cili coonse, eeco ncintu cikatazya kuzyiba ncayelede kucita amali aakkumi ngayobwede. Pele kuli nzila zinjaanji muntu mbwanga wapa kwakkumi kuli Taata Yahuwah – nokuba muntu uupailila mucikombelo caamunzi.
Ikaambo keni swebo ncotubelesyela bbala lyakuti Ekklesia kutali lyakuti cikombelo eelyo notwaamba basyomeka bokwa Yahuwah mumalembe aa WLC nkakuti, ibbala lya "cikombelo" talipandululi bweelede mbuli bwaamba bbala litaanzi lya ciGiliki lyakuti, "Ekklesia." Mucizuminano Cipya coonse, Ekklesia ndibbala lyaambilizya baabo Bakaitwa Kuzwa Anze. Ibbala lyakuti “cikombelo”, lyaambilizya buyo nkamu, aboobo, ndibbala lilubide kusandululwa alimwi tiilyakeelede kubelesyegwa pe. Bana Kristu mbabantu beni Bakaitwa Kuzwa Anze. Aabo basyomeka masimpe kutobela Yahushua, mbambabo ncobeni Bakaitwa Kuzwa Anze kuzwida mumbungano zyabupaizi azikombelo zyamu Bbabbuloni uuwide. Eelyo lwiito lwakutija Bbabbuloni nolumvwika, kunyina muntu uuceelede kupilukila kuzikombelo zina Bbabbuloni amisyobo yabupaizi yaanyika.
Kuli kwiimpana akataa kupa kwakkumi a zituuzyo. Kwakkumi kweelede kupegwa ku Mwami Yahuwah kuti kubelesyegwe mumulimo Wakwe atalaa nyika, mukugwasyilila batwanga Bakwe, nokuba mukumwaya mulumbe mubotu Wakwe. Zituuzyo, kujanza limwi, nzipego zipegwa kuli Yahuwah, mukuliyandila kutondezya kulumba aluyando ndwajisi muntu kuli Nguwe. Eezi zipego-zyaluyando zyeelede kuba mumisyobo minjaanji kuleka buyo mali.
Yahushua tali buyo Mufutuli wesu pe. Walo ngomukonzyanyo wesu mbotweelede kupona maumi eesu. Walo wakali mwiyi mupati wiinda boonse atalaa nyika, pele kataninga yiisya bantu tusimpe twa lufutuko, Walo wakali kutaanguna kugwasya bantu eezyo zintu nzyobabulide mumibili yabo. Wakabaponya malwazi ngubakali kuciswa, wakaponya boofu kuti batalike kubona, wakaponya bacuulutwi kuti batalike kumvwa, wakaangulula banjidwe mizimo abasangu, alimwi wakakulwaizya baabo batyompedwe mumyoyo. Zimwi ziindi nicakali kuyandika, waabapa cakulya! Mpoonya eelyo myoyo yabo niyakakkomene akulumba, bantu bakalaangulukide kuteelela majwi aabulemu aazwide kasimpe aako Walo nkaakali kuyanda kwaabanya kuli mbabo.
Mukutobela mukonzyanyo Wakwe, bantu basyoma muli Nguwe beelede kubelesya zituuzyo zyabo kulemununa baabo bapengede mumbali lyabo. Mangwalo azwide lwiito lwakubaa luzyalo akufwida nkumbu kubantu bapengede.
Mboobu mbwaamba Yahuwah wamakamu: Amucite bululami bwamasimpe, amubaa luzyalo akufwida nkumbu umwi awumwi kumweeninyina. Mutanoopenzyi bamuka mufu nanka batakwe wisi, banamasi nokuba bacete. (Kobala Zekaliya 7:9, 10.)
Kuti kozyi mudaala umwi uutajisi cakulya cinji, kumupa cakulya eelyo nafwide nzala, ncecituuzyo caluyando eeco Mwami Yahuwah ncakkomanina kutambula. Cakali ciyanza akataa bana Isilayeli batonkomene kupa zyakulya kubantu balombelela mubuzuba bwacisambomwe bwa mvwiki kutegwa kabanookkutide akuleka kulombelela mumawoola aasetekene aamu Nsabata.
Kuti kakuli mutumbu uutakwetwe uupengede akumwinwa mukuli wakukomezya bana bakwe alikke, cipego camajansi amabbusu aamupeyo,acalo ncintu citambulika ku Mwami Yahuwah, nkaambo eelyo bana Bakwe bakkala anyika nobaumbulizyigwa, awalo Lwakwe ulimvwa kabotu.
Moyo ookwa Yahuwah uuzwide luyando, ulabomba lyoonse kuti kakuli muntu upengede. Walo ubikkila kapati maanu kuli baabo bapengede, nkabela muntu uuli woonse uulemununa mukuli wabantu aabo, ubelekela antoomwe a Taata Yahuwah alimwi eezyo zipego nzyaabila bamwi, mubwini waabila Nguwe.
Ooyo uufwida nkumbu kubacete upa cikwelete ku Mwami Yahuwah; alimwi kufumbwa ncapa bamwi uyoopegwa eeco alimwi. (Kobala Tusimpi 19:17.)
Cipego ncintu ciimpene kuzwa ku cikwelete. Icipego cilapegwa kakwiina kulangila kubbadelwa alimwi. Cikwelete, kujanza limwi, cipegwa buyo muciindi cipimidwe alimwi kakuli bulangizi bwakuti ciyoojosyegwa kuli ulaaco buzuba bumwi. Ncintu citakonzyeki kwaabila bantunyoko zintu kwiinda Yahuwah mbwaabanya. Tee kayi Walo nguupa zintu zyoonse zyaabanwa akataa bantu. Eezyo zituuzyo zipegwa kubacete ababulide, Mwami Yahuwah uzilanganya kuti nzikwelete. Walo uyoolomya ncobeni kubona kuti ooyo waabanya zintu atakacaali kabulide ncajisi, pele uyoomujosyela kufumbwa ncaakapede kugwasya muntunyina. Yahuwah ulabalila cakulya akubambililwa ooko basaante Bakwe nkobatambula kuzwa kubantunyina, alimwi ulalomya kubona kuti ooyo uubacitila zintu eezyo, awalo ulatambula bulumbu bumweelede bukkwene. “Ooyo uulaa bwaabi uyoolelekwa; nkaambo waabila cakulya cakwe kubacete.” (Tusimpi 22:9, KJV)
“Mutalubi kutambula beenzu; nkaambo kwiinda munzila eeyo bamwi bakatambula bangele kabatakubwene”2 Aaya mabala acilaa nguzu mbweenya mbuli kaindi lyoonse kuzwa naakalembwa. Taata wesu uuli Kujulu ucibapa ziindi zibotu bana Bakwe eelyo nobeelede kweetela bamwi zileleko; alimwi aabo bazumanana kucita milimo mibotu muziindi eezyo balatambula kukkomana kupati. “Kuliimya kulya kwanu kubusya kupampanga akulwana, mulaumana ntuku zyabubi. Kuliimya kulya kuli mbuli nkomucita sunu takukonzyi kumvwugwa kujulu pe. Sena ooku nkokuliimya kulya ooko nkondakasala kwabuzuba bomwe kuti muntu alibombye? Sena nkwakuligogomeka buyo mutwe mbuli lubu, akulala aamasaka atalaa mutwe na? Sena ooku nkomunga mwati nkuliimya kulya akuti mbuzuba butambulika ku Mwami Yahuwah? Sena kuliimya kulya nkundakasala takuli kwakwaangununa nketani zyalusalululo, kukkulula zitolopo zyajoko lyaluciso, kwaangununa badyaaminidwe, akuleka luciso luli loonse? Sena takuli kwaabila zilyo zyanu kuli bafwide nzala? Sena takuli kuti kamupa maanda kuli basimutuntuli? Mwabona batakwe zisani mubape zyakusama, kutali kuti kamulekelezya bantu bokwanu. Eelyo mumuni wanu uuyoolibonya, muyoofwambaana kuponyezyegwa, bululami bwanu buyoomusolweda, bulemu bwa Mwami Yahuwah buyoomukwabilila musyule. Eelyo mwaakumana kukomba, Mwami Yahuwah uyoomuvwuwa. Mwaakumulilila kuti amugwasye uyooti, “Ndime aano.” Kuti naa muleke zyakudyaaminina, muleke kutondekana minwe azyakukanana kwaluciso, kuti naa kamulipenzya kutegwa mwaabile bafwa nzala, akubacitila zyeelede aabo badyaaminidwe, aawo mumuni uyoolibonya mumudima, busiku buyoolibonya mbuli sikati. Mwami Yahuwah uyoomusolweda lyoonse, uyoomucitila zyoonse nzyomuyanda munyika yacimpayuma akumuyumya. Muyooba mbuli muunda uutililwa kabotu, mbuli kasensa kamaanzi aatayuminini.”3
Munyika yamazubaano, ncintu cuubauba kwiide kugantauka kwaamba cintu ciiminina mabala aakuti “kwakkumi azituuzyo.” Ncintu cuubauba kuyeeyela kuti pele buyo kuti kwapegwa mali aakugwasyilila mbungano imwi, eeco cipegwa inga tiicaba kwakkumi nokuba cituuzyo. Nokuba boobo, eeci tacili cintu ceendelana a Mangwalo.
Isilayeli wansiku wakali mukowa wabalimi: balo kwaciindi cilamfu, bakali balimi, bavwubi babanyama baamunzi abeembezi babanyama. Kwakkumi kwakali kukonzya kupegwa mubanyama, zingomo zyamungwimba, azingomo zya micelo, masaka aamaila nokuba madolomu aazwide busu bwakubambya cinkwa. Izituuzyo zyakali kukonzya kuba kufumbwa cintu muntu ncaakali kuyanda kwaabila Taata Yahuwah.
Mukaintu wakali munkutwe kubelesya nyeleti, wakali kunoonga wasuma kasani, nokuba kuluka cintu cimwi. Eelyo mukwasyi ookwabo niwakali kuya ku Pobwe lya Mavwuka, mwaalumi wakwe wakali kunga watolelezya masaka aamaila kuti akape kwakkumi kusanganya acisela cazilyo zyoonse nzyaakalima mumuunda wakwe, pele ooyo mukaintu awalo naakaleta kufumbwa ncayanda kupa; eeco cakali cipego caluyando kuli Yahuwah nkaambo kakumulongezya zileleko mumwaka woonse.
Nkaambo kakuti bantu boonse tiibakali kukonzya kweenda musinzo kuya ku Jelusalema amwaka, mapobwe akali kuzumizya kuti aabo batakali kukonzya kusika kupobwe baanguluke. Kwakali nzila ayimwi yakupa kwakkumi, kwiinda mukutamba bacete amunzi wako kuti bazyoolye pobwe. Taata Yahuwah nguubambilila bantu bacete, baciswa, abacembeede. Walo nguupede nzila mbotu yakuti basekelele akwaabilwa zileleko zyamapobwe.
Aabo bakali bacete cakuti tiibakali kukonzya kweenda musinzo wakuya ku Jelusalema, bakacili kukonzya kutambula zileleko zyabutebuzi apobwe lyaMoza kwiinda mukutambwa mumaanda aabaabo bakajisi zintu zinjaanji. Mbombuboobu buvwubi bwaba Hebulayo mbubwakasimpidwe mubwaabi akugwasya bacete. Zipego zyamusyobo ooyu, nokuba kuti taali mali, zyakali kulangwa kuti nzituuzyo zitambulika ku Mwami Yahuwah mbuli zipego zyaabilwa kugama Nguwe.
Ooyo waabila bacete takabulili cintu pe: pele ooyo uuvwululata ababona, uyoosinganyizigwa kapati (Tusimpi 28:27, KJV)
Kuleka kuba mbuli cituuzyo, kwakkumi tacili cipego muntu ncapa ku Mwami Yahuwah pe. Kwakkumi nku Kwakwe kale! Mubwini, zyoonse zintu nzyi Zyakwe Sikabumba. Walo nzyizyakwe nkaambo Nguwaazilenga akubamba zintu zyoonse.
“Amupilukile kulindime, ambebo ndapilukila kulindinywe, mbwaamba Mwami Yahuwah Wamakamu. Pele mulabuzya kuti, 'Ino inga twapiluka buti?'
Sena muntu inga wabbida . . . Mwami Yahuwah na? Pele nywebo mulandibbida. Pele mubuzya kuti, 'Ino tukubbida buti?' Mulandibbida muli kwakkumi amuzipaizyo. Kuzwa kuciindi cabasikale banu, mwakasiya malailile aangu, tiimwakaabamba pe. (Malakayi 3:7, 8, KJV)
Yahuwah ulitupede lwaanguluko lwakubelesya mbuli mbotuliyandila zintu zili fuka mukkumi lyomwe-lyomwe ndyatwaabila. Cilikke buyo walo ncatukumbila ncakuti tweelede kumujosyela kwakkumi. Nokuba kuti zituuzyo zilakonzya kupegwa mbuli mbwaliyandila muntu mwini kuli Yahuwah, nokuba kubasaante Bakwe, pele kwakkumi kweelede buyo kubelesyegwa mumulimo Wakwe wakutola mulumbe mubotu munyika.
Eeci ncintu cikonzya kucitwa kwiinda mukugwasyilila baabo babeleka mulimo Wakwe; mbuli kubapa mali, cakulya, nokuba kufumbwa cintu muntu ncajisi eeco cikonzya kubagwasya mumulimo wakutola mulumbe munyika. Kwakkumi akwalo kulakonzya kupegwa munzila zyaandeene. Kufumbwa cintu cuulwa eeco cikonzya kubelesyegwa mukumwaya mulumbe munyika, eeco cileelene akupa kwakkumi. Eeci ncintu mbuli kuula maBbaibbele azimwi zibelesyo zya Moza eezyo zyeelede kwaabanyigwa akataa bantu.
Aabo batajisi muncini uusimba mabbuku, balakonzya kujosya kwakkumi kwiinda mukubbadela baabo basimba mabbuku. Aayo mabbuku ngaapegwa kubantu bataajisi. Nkamu ya WLC ayalo ilaa cintoolo cijisi zibelesyo zyakwaabanya mulumbe eezyo zikonzya kubelesyegwa mumulimo wakuccumaila. Mulimo wa lufutuko inga watonkelwa kumbele kapati kuti bantu boonse bajosya kwakkumi kwiinda mukwaabanya mulumbe mubotu kufumbwa ooko nkobakkala.
Yahuwah wakatusyomya kale kuti uyoobaleleka cabwaabi boonse aabo bajosya kwakkumi Kwakwe kuli Nguwe.
“Amulete kwakkumi koonse muŋanda yaciyobwedo, kutegwa kube zyakulya muŋanda Yangu. Mboobu mbwaamba . . . Mwami Yahuwah ulati, 'Amundisole muli ceeci, mubone naa nsikoojalula zipulo zyakujulu akumuletela zileleko zinji cakuti mulabula aakuyobweda zintu zyanu.'
Njoomukwabilila kuti bauka batakalyi zisyango zyanu, ayalo misaansa yamumyuunda tiikalosyi micelo yayo, Mbwaamba Mwami Yahuwah wamakamu.
Eelyo misyobo yoonse iyoomwiita kuti mulilelekedwe, nkaambo nyika yanu inooli nyika mbotu. Mbwaamba Mwami Yahuwah Singuzuzyoonse.”(Malachi 3:10-12, KJV)
Taata Yahuwah wakasyomezya cileleko cabulemu bwakujulu kuli boonse aabo basyoma muli Nguwe cakuti balapa kwakkumi azituuzyo kakwiina kuunya. Kunyina muntu weelede kulimvwa aanga cituuzyo cakwe ncisyoonto kapati cakuti tacikwe mulimo, nanka kuti cipego cakwe tacikwe mpindu. Taata Yahuwah alikke nguuyungizyila zileleko! (1 Bakolinto 3: 6, 7)
Kunyina makani kuti naa muntu ubeleka mulimo uuli buti, nokuba mweelwe wakkumi azituuzyo nzyapa ku Mwami. Yahuwah alikke nguubwene cili mumoyo wamuntu, alimwi nguubwene muntu ooyo mbwayandide kupa kwakkumi. Walo nguuyungizyila muntu ooyo zintu nzyabulide.
Cipego cisyoonto, cipegwa amoyo uuzwide luyando, alusyomo lwa kulitolaansi, inga catambula bulumbu bupati kwiinda zyuulu zya madola aapegwa muciimo cakulitukumuna akulisumpula.
Yahushua wakali kuyanda kuti bantu boonse bateelelesye kasimpe aaka. Bumwi buzuba, walo naakali mu Tempele abasikwiiya Bakwe, wakasintamuka kumwi kalanga bavwubi nkobawaala zipego zyabo muciyobwedo, alimwi Walo wakabona umwi mukaintu mucete mukamufu nkwabikka tuli tobile buyo twa mukuba.
“Mpoonya Walo naakalanga-langa, wakabona bavwubi nkobabikka mali muciyobwedo. Alimwi wakabona mukamufu umwi wakali mucete kapati kabikka tuli tobilo twamukuba. Mpoonya wakati, “Ndamulwiida kuti ooyu mukamufu mucete wapa kunji kwiinda boonse babikka aaba. Nkaambo bamwi babikka tuniini buyo kuzwa kubuvwubi bwabo bunji. Pele walo mukamufu mucete, wamaninizya kupa oonse mali ngaajisi, ngaali kuponena mpawo . . . ku Mwami Yahuwah” (Luka 21:1-4, NKJV)
Aabo bakavwubide bakali kuwaala mali manji, pele bakacilijisi mali manji munkomo zyabo. Mukaintu mucete mukamufu wakajisi buyo tuli tobile twakupa. Nokuba boobo, wakapa kwiinda bantu boonse kubabikkila antoomwe aabo bakapa, nkaambo walo “wakabikka mali woonse ngaakajisi mubuumi bwakwe.” Mumajwi amwi, ooku nkwaamba kuti, aayo mali ngaakeelede kuuzya cakulya cakulisanina buzuba oobo, ngamali ngaakapa cituuzyo: walo wakapeda limwi woonse.
Nkaambo kaceeco, bulumbu bwakwe bwakali buyooba bupati kwiinda bavwubi aabo bakabikka mali manji, pele bakasyeede bacijisi milwi yamali. Bumwi buzuba Kujulu, Mufutuli uyootondezya mukaintu ooyo mulimo ngwaakacita wakupa cakulyaaba: basimilimo abasilisi bakatuminwa mumasena aanyika aayindene, izibbadela zyakayakwa, izikolo amaanda musungilwa bamucaala akapegwa lugwasyo kwiinda mucituuzyo cakwe. Zyoonse eezyo zyakatalikila mukulyaaba kupa cakutaliyanda. Bulumbu bwakwe bunooli bupati kwiinda zyoonse! Eeco cakatalikila mbuli tuli tobile buyo, lino cakakomena kusikila lyaba zyiba lya zileleko zyalubomba abwaabi.
Ninzi cili mujanza lyako mukwesu? Ncintu nzi cili munguzu zyako nconga wapilusya ku Mwami wako? Kunyina makani pe musyobo wacipego cipegwa muluyando. Mweelwe wamali awalo tuukwe mpindu pe.Cilikke cintu cilaa mpindu nduyando lupa kuti muntu aabanye cipego eeci. Cintu ciyandika nkubaa luyando lwakubelekela antoomwe a Yahuwah mukumwaya mumulumbe wakasimpe Kakwe.
Nokuba kapego kasyoonto buti inga tiikaalilwa kutambula bulumbu bupati. Aabo bapa cakulikwaya kuli Simalelo wesu abalo bayootambula bulumbu bupati.
1 Aaya mazina akacincwa kutegwa bakobelelwe bantu balaa mazina aaya.
2 BaHebulayo 13:2
3 Kobala Izaya 58.