|
Ino mapenzi nzi aakuzingide buno buzuba? Hena yebo nokuba muyandwa wako mucitiingaana penzi lya kupona buumi bubotu? Naa ndipenzi lya kucubilana akataa bamukwasyi? Ambweni ujisi penzi ku milimo naa ucisata akaambo kakusala zitaluleme. Hena yebo upenga kulibilika akutakkazyika moyo na? Kufumbwa penzi ndyomulangene limwi, Mangwalo atupa milazyo yeelede kukupa busongo kuti uzwidilile. |
Aciindi Ime neekasika acijatilo ca nzoka nkeli mukubusi cifuswa-makowa-uutakwe-ncazyi, ndakali kuyeeyela kuti kufumbwa biyo kuti ndazwidilila muli CEECI cindisinkilila nokuba CECIYA, pe ma inga kuzwa waawo buumi bwanduubaubila akuteteeta. Ono kunooli ndakali mukoko mumaanu nkaambo kwakainda ciindi loko kusikila neekakula kubaa myaka yaakatikati neekaibaluka kuti buumi bwaansi—antela, buumi bwangu bwini— tabusyi mbweekabede bwini oobo pe. Lino ndakalizeeza kuti kunyina muntu uulaa buumi buli boobo. Masunko a mapenzi, kucubilana akutingaana nzibeela zya buumi bwa muntu. Messiah lwakwe wakazumina kuti, “Munyika eeyi inywe munikulaa mapenzi.” (Johane 16:33, NIV)
Kuli kaambo keni ncocili boobo, “Nkaambo taakwe Walo anayandide kupenzya muntu, nokuba kukatazya, nanka kuminya bana bwabantu.” (Malilo 3:33, NKJV) Kaambo keni nkakuti makatazyo atupa ciindi cibotu cakuti tukomene mu ziimo zyesu. Mulembi Robert Tew wakalabika cabucenjezu kuti, “Eelyo penzi likujisi bwasunu likupa nguzu nzyoyooyanda juunza.”
Bantu banji kuti bamwinwa mukuli wa penzi lyomwe, balalitija penzi eelyo. Balasoleka kulyeeleba mpobacibwenene kabapenauka munzila zinjaanji mbuli: kulangilizya zipekupeku, kubala tubbuku tunoneezya twa masendekezya, kusobana zisobano zyamu kkompyuta, kupwaya bukoko, misamu iikola, azimwi zinjaanji. Cimwi ciindi inga batalika akukazya kuti nkolili ncobeni penzi eelyo kuyoowa biyo kutazyiba nzila ya kulipasununa mupenzi eelyo.
Masimpe ngakuti, kwiina uuzyi manyongwe nayoocitika, nokuba penzi noliyoovwunduka. Eezi nzibeela biyo zya buumi mbotukkala zyeelede kulangilwa kucitika. Cilikke cakusyomya ncakuti muntu woonse ulaa mapenzi, ino kuti kotajisi? Pe ma, kolindila biyo uyoolibonena. Uyoolilauka aakukuswaya ayebo. Mbube cilayandika kapati kuti basyomi balibambile zibelesyo zya moza zyakulikwabilizya kufumbwa aawo mpubapatila.
Kumamanino, taakwe makani naa ndipenzi nokuba manyongwe aali buti kufumbwa biyo kuti kojisi busongo, nguzu, zintu zikupa busungu, nokuba [koyungizya ncoyeeyela aawa] kuti ulilemunune penzi likujisi. Mapenzi woonse aaya alaa mulimo omwe buyo alimwi ooyo ngwa kutuyiisya kuti tweelede kuyaamina kuli Taata wakujulu kuti atukwabule notuminidwe. Ono makani mabotu ngakuti nzi? Yahuwah kunyina pe naakaalilwa cakucita! Walo ngu Leza uuzunda lyoonse. Paulu wakakkomanina luzyibo oolu, kaamba kuti, “Ino inga twaamba nzi kujatikizya zintu eezi? Ikuti [Yahuwah] kali kulubazu lwesu, nguni uunga watucubila? Walo taakalesya naba Mwanaakwe, pele wakamusanga mucibaka cesu toonse, mbuti mbwanga kwiinda muli nguwe taatupa cabuyo zintu zyoonse?” (BaLoma 8:31-32, NKJV)
Kuleka biyo kuti Yahuwah ulazunda, pele nkuyanda Kwakwe akuti bantu Bakwe abalo, kabazunda. “Alimwi ooku nkokukkazyika camba swebo muli Nguwe, kuti ikuti twakumbila kufumbwa cintu kweendelanya akuyanda Kwakwe, Walo ulatumvwa. Alimwi kuti twazyiba kuti Walo ulatuteelela kufumbwa ncitwamukumbila, nkuzyibila limwi kuti eezyo nzyotukumbila kuli Nguwe twatambula kale.” (1 Johane 5:14-15, ESV)
Kaano ka nkondo eeyo Joshua njaakalwana ba Amolaiti katusalazyila nzila kufumbwa muntu njanga wabelesya milazyo yamu Bbaibbele kuti azwidilile akuzunda kuti zyamuyumina zintu. Eelyo bami bosanwe nibaamuzinga amakunga aampi zyabo antoomwe, Joshua wakacita zintu zyosanwe zyakapa bana Isilayeli kuti bakome.
Ntaamu Ntaanzi: Wakaingula mpeenyaawo. Walo taakalekela penzi kuti likkalilile alimwi taakatija mulimo wakwe. Walo wakagwitingana kulibambila zintu.
Ntaamu Yabili: Walo wakalangaula busongo bwa bulemu. Eeci ncintu ciyandika kapati mu kuzunda kuli koonse. IBbaibbele lilijisi busongo kuli ndiswe, pele tweelede kubuyandaula. Yahuwah wakalemekezya lusyomo ndwaakajisi Joshua, akumwaambila kuti, “Utabayoowi, nkaambo Ime ndabaaba kale mujanza lyako; taakwe mwaalumi akati kabo uutiikulwane.” (Joshua 10:8, NKJV)
Ntaamu Yatatu: Joshua wakeenzya zintu kweendelanya a lusyomo lwakwe mu zisyomyo nzyaakapedwe alimwi Yahuwah wakamuleleka mukukakatila kwakwe. “Mbuli mbucaacitika, bakamwayikizyanya kutija Isilayeli alimwi bakali munselelo mumusena kuzyaa kuswena ku Beti Horoni, ooko Yahuwah nkwaakawunsya civwula mabwe cipati kuzwa kujulu kusikila ku Azekah, mpoonya ibantu bakafwa acivwula mabwe bakali banji kwiinda baabo baajayigwa aacceba ku bana ba Isilayeli.” (Joshua 10:11, NKJV)
Eeyi ntaamu iyubununa tusimpe tupati tobile. Kutaanguna, kulayandika kapati kuti twayandaula lugwasyo kuzwa kuli Yahuwah. Tacili biyo cintu ciyandika pele ncintu ciingulwa akuzwidilila cinicini. Cabili, lyoonse swebo tweelede kubaa myoyo iilumba nkaambo ka lugwasyo ndwatupa. Mu Intembauzyo 50:15, Yahuwah usyomya kuti, “Kondiita Ime mubuzuba bwa mapenzi: Ime ndiyookuvwuna webo, alimwi webo uyoondilemekezya Ime.” Kumwiibaluka akumulumba Yahuwah nkaambo ka lugwasyo Lwakwe ncecisinsimuna luyando oolo luyumya lusyomo lwesu. Eeci citupa kuti tukonzye kucita ciyandika kufwamba mbweenya Joshua mbwaakacita, kwiinda kuti katweeleba penzi lini.
Ntaamu Yane: Joshua wakabelesya zibelesyo zya bulemu bwakujulu eezyo nzyaakali kukonzya kujana.
Mpoonya Joshua wakakanana kuli Yahuwah mubuzuba oobo Yahuwah naakalekela ba Amolaiti mumaanza aabana ba Isilayeli, alimwi wakati mubusyu bwa bana Isilayeli:
“Zuba, koima nji atalaa munzi wa Gibeoni;
Alimwi webo O Mwezi, mumumpata wa Aijaloni.” (Joshua 10:12 a 13, KJV.)
Yahuwah wakakonkezya kale zintu maunda zili kujulu kuti atugwasye, aswebo. Hena toyibaluki kwiita zintu eezyo eelyo nobulide lugwasyo na?
Ntaamu Yasanu: Joshua wakasindinganya kucita ciyandika kusikila wagozya kuzunda. Walo wakalizyi mamanino aa makatazyo aakwe mbwaakali kunga atondezya Leza wakwe kubantu batazyi Leza baku Kanaani. Walo taakakkedwe moyo kuti azunde cibeela cisyoonto biyo. Lyakasika jwi kuti bami bosanwe bakayuside mumpangala yabbwe. Joshua wakapa malailile kuti basinke mulyango wa bwina oomo mubaayubide kutegwa batatiji. Aakale nibakamanizya kulwisya nkondo, wakazyokela kumpangala ya bbwe, wakabakankaula bami boonse akubajaya aabo bakasolweda basilumamba kulwana bana Isilayeli. Ooku kukoma boobu akuzwidilila mumasunko kwakapa bulemu kuli Yahuwah alimwi Joshua wakafwamba kuzyibya kuti ooku kuzunda wakali mulimo ookwa Yahuwah. “Mpoonya Joshua wakati kuli mbabo, ‘Mutayoowi, mutatyompwi; amubaa nguzu akukkazyika camba, nkaambo mbombuboobu Yahuwah mbwayoobacita boonse basinkondonyoko bamulwana.’”
Eelyo nywe nomwaabidwe zibelesyo zya kujulu kwini kuti mulwanye nkondo zyenu akukoma mapenzi eenu, mutalekeli biyo waawo kuzunda aasyoonto pele muzumanane kuzundila limwi. Kuzunda aasyoonto biyo takupi bulemu kuli Yahuwah mbuli kuzunda mpocigolela mbokumulemekezya. Ijulu lilindila buyo nduwe kuti ukumbile kugwasyigwa. Aboobo, utalelemi! “Atuswenene kucuuno ca luzyalo katuliibide, kutegwa tukonzye kutambula luse akujana lubomba muciindi notubulide.” (BaHebulayo 4:16, NRSV)
