|
Munyika iizwide mawuse, moyo uuminidwe ulayandisya kuzyiba kuti: Ikuti Leza naali Leza ulaa luyando ncobeni, nkaambo nzi ncalekela zintu zibyaabi kuti zicitike?
|
Umwi mwaalumi wakaligwitide mucamba, mapenzi akamufwaankanya akumufulusya. Bakaapanyina nibaabona nkwatyompwaila, bakamoongelezya kumwi kabati: “Langa muzyulu wangu, kuti mulundu niwali kutelemuka kuutakwe magunyugunyu, kunyina muntu wanoolikunga wakonzya kutanta mulundu ooyo pe!”
Toonse tobantu tulayandisya buumi bwakukkala koliibide kakwiina kuzwa nkasaalo. Tulayandisya buumi bwa kulyeendelela katulikwayide akutabikkila nociba cintu comwe maanu. Pele masimpe eeni ngakuti, kabuca uleta tunji, buumi bwamuntu buzwide mapenzi manji-manji. Bantu banjaanji nobazingwa akutunuka nkaambo kakuti bwayuma buumi, nokuba kumvwa cicisa mumubili, batalika kutamauka kumwi kabalibuzya kuti: “Ndabaanzi nobantu? Maawe mebo, ninzi ncepengela boobu? Inga wamuzwezyela aali Yahuwah nonjide mapenzi aali boobu? Kuti kali singuzuzyoonse ncobeni, mbuti mbwandilekelezya nkeyide kupenga boobu?”
Bantu basyoma nobamvwa kulilauka kuli boobu, abalo tabakkalwi camba pe. Balasola kuumbulizya muntu uusata kumwi kabamwaambila kuti Yahuwah nguuzyi zyoonse alimwi Walo nguuyendelezya zintu zyoonse; balamucenjezya ooyo muntu kuti atalekeli kudonaika kuti kumunjile mumoyo… pele cintu comwe ncobataciti nca kwiingula mibuzyo eeyi kwiigaminina.
Inzya, eeyi mibuzyo miyumu ncobeni nobantu. Pele eeyi mibuzyo iili buyo kabotu. Makani mabotu ngakuti, Yahuwah ulijisi bwiinguzi. Walo tayoowi kwiingula mubuzyo muyumu wa buumi bwa muntu pe. “Kamuboola lino, atumvwane twaambilane antoomwe, mbwaamba Mwami Yahuwah. 'Nikuba kuti zibi zyanu zibe mbuli nkandamalowa ziyootuba buu mbuli buluba, nikuba kuti kazisalala mbuli cisila ziyootuba mbuli lukobo Walo mbwabakulwaizya. (Bala Izaya 1:18.)
Ntoontu twaambo tuli cisambomwe tupandulula kaambo keni Yahuwah ncalekela zintu zibyaabi kucitika.
“Nobakwesu, kamukkomana nomusikilwa makatazyo manji-manji. Mulizyi kuti kusunkwa lusyomo lwanu akuzwidilila mumasukusyo aaya mulaiya kukakatila. Nkabela kukakatila ooku kubeleka canguzu kuti mulondoke kamunyina kampenda naa kubula cintu cibisya cimwi.” (Jemusi 1:2-4, NKJV)
Muntu nali masunko nceciindi cibotu cakukomena! Eelyo naasika mapenzi, tulaaciindi cakusala: hena ntalike kutongooka akuŋuŋuna, naa ndiyumyeyumye, ndibelesye lusyomo akukkazyika camba. Eelyo notusala kusyoma, eeco nceciindi Yahuwah natukomezya kuti tubaa ciimo ceelela kuyookkala Kujulu. Kulumbaizya notuvwunwa mumasunko ncecitupa kuti tukomene akubaa luyando. Luyando lusinsimuna lusyomo, aboobo eeco ncecikulwaizya kubaa lusyomo muli Yahuwah.
Nokuba kuti cimvwika bweenzu eeci, zimwi zintu zilalekelwa kuti zicitike nkaambo buyo kakuti kunyina muntu wakalomba kulesya cintu eeco kuti citacitiki! Ncintu cuubauba kubaa butolo amwalo mubuumi bwa kupaila. Muntu inga kayeeyela kuti, “Hena ncecintu eeco nceelede kulomba, tede ncakupegwa buyo nokuba kuti toolomba. Yahuwah ulandaabila zintu nzyebulide nkaambo ulizyi kale kufumbwa nceyanda.”
Ooku nkulilendekezya nobantu. Kuli ziindi zinjaanji Yahuwah nayanda kwiinda akati kucingilila bana Bakwe pele ulalilesya kucita boobo nkaambo kunyina muntu wamulomba kuti acite boobo.
Caandaano ca Ezekiya 22 cilaa kaambo kaankamika. Eelyo naakali kwaambilizya kudilimuna munzi wa Jelusalema, Yahuwah wakaibaluka zinyonyoono zyabantu ba Judah, mpoonya wakaambila Ezekiya kuti: “Ndakalangaula mwaalumi akati kabo wali kunookonzya kuyakulula bwaanda akuti azooyime kumbele lyangu akati kamwaako kwiiminina nyika kutegwa intayinyonyooni, pele kwakanyina amuntu pe.” (Ezekiya 22:30, NKJV)
Maccu, cilagambya eeci! Hena ooku nkokwaamba kuti ikuti Yahuwah naakamvwa nokuba mupailo wa muntu omwe buyo “akwiima akati” ka bana Isilayeli a Nguwe, Yahuwah naakalelemya kulekela cisubulo cabo kuti cikaboole aakale. Masimpe eeni ngakuti, Walo wakali yandide ncobeni kweenzya zintu munzila eeyo! Walo wakalikuyandaula buyo muntu omwe uulibatamika, kapaila, akukumbila cileleko Cakwe. Pele kunyina muntu ngwaakazwezya wakayandide kucita boobo. Aboobo kampango katobela kalausisya mbokakosozya makani kuti: “Nkaako njoobanyemena akubanyonyoona mubukali bwangu bupati, ndibasubule akaambo kazeezyo zyoonse nzibakacita, mbwaamba Mwami Leza.” (Ezekiya 22:31, NKJV)
Kwiibaluka kupaila talili penzi likatazya bantu banji. Mubwini, muuziindi eelyo bantu nobanjide mumasunko nobayandisya kapati kupaila! Eeci tacaambilizyi kuti yoonse mipailo yabo ilayingulwa pe. Jemusi utubonya mbozyeenda zintu; nkaambo nzi mipailo zimwi ziindi nciitapegwi bwiinguzi: “Mulayandisya zintu pele tamuzijani pe, nkaako mulajaya. Mulanyonokela, pele tamukonzyi kuzijana pe, nkaako mulalwana akupampana. Tamujani zintu, nkaambo tamukumbili kuli Yahuwah. Nikuba kuti mulakumbila, tamupegwi nkaambo mulaimpya mukulomba. Nzyomukumbila muzimwaila mukucita ziyanda zisusi zyanu.” (Jemusi 4:2-3, NKJV)
Ikuti mipailo yako yalibonyaanga tiiyayingulwa, kopiluluka musyule ulibuzyebuzye naa eeco ncolomba ulombela buyo kuti ulikkomanisye. Ambweni sola kupailila muntu uumbi. Kosola kupailila Yahuwah! Alimwi muzintu zyoonse, kopaila kuti kuyanda Kwakwe kucitigwe.
Mumulumbe wakwe atalaa mulundu, Mufutuli wakakulwaizya baabo bakali kuswiilizya kuti kabapaila, akuzumanana kupaila lyoonse. Pele wakayungizya kubapandulwida kaambo keni zimwi ziindi ncotutapedwi bwiinguzi kuzintu nzyotulomba.
“Amukumbile, mulapegwa, amuyandaule mulajana, amukonkomone mulajulilwa. Nkaambo kufumbwa ooyo uukumbila ulatambula, awalo uuyandaula ulajana, ayooyo uukonkomona ulajulilwa. Ani nguni uunga ulapa mwanaakwe bbwe akumbila cinkwa cakulya? Na uunga akumbila nswi ulamupa nzoka? Kuti naa nywebo, nobasizibi kamuzi kupa zintu zibotu kubana banu, ino walo Uso uuli kujulu inga wakakilwa buti kupa zintu kuli baabo bamukumbila!” (Mateyo 7:7-11, NKJV)
Yahuwah ulizyi kale zyoonse zizya kumbelaa mazuba. Mukutazyiba kwesu, swebo tuyeeyela kuti kuli cintu ncotuyandisya pele Walo ulizyi kuti eeco cintu inga catunjizya muntenda mubuumi bwesu. Nkaambo kakuti Walo ulatuyanda alimwi uyandisya kuti tupone katukkomene, kunyina nanga watupa cintu cikonzya kutuletela ntenda. Webo komusyoma Yahuwah kuti uyookuvwuna kuzwa muntenda, kuzwa kuli ceeco cinga cakuletela ntenda kwiinda mbopengede cino ciindi.
Kamwi kaambo keni masunko ncaalekelwa kutusikila nkakuti, swebo tweelede kumaninina kwiiya kuyaamina muli Yahuwah. Eeci ciiyo tacikonzyi kuyiigwa kokkede muluumuno kovwubide pe. Cikonzya buyo kuyiigwa: mu kunjila akwiinda muntenda.
Ciibalusyo 13:4 cipandulula buumi bwa muntu uusyoma: “Mwami Yahuwah wanu alikke ngomweelede kutobela, alimwi ngomweelede kulemeka akukomba. Amubambe milawo yakwe, mumuswiilile jwi Lyakwe. Walo alikke ngomweelede kubelekela akukakatila. Kunyina cintu “cijatanya muya wamuntu” ku Mwami Leza Yahuwah mbuli kubula cintu ncayanda muntu.
Mumyaka yakwiingaila munkanda makumi one, Bana ba Isilayeli bakanjila mumapenzi ziindi zinjaanji, zimwi ziindi bakali muntenda ya lufu mukaambo komwe buyo: kutegwa bayiye kucengulula myoyo yabo kuli Yahuwah kuti abagwasye nobapatide mumapenzi.
Ncintu cuubauba kuli Yahuwah kutupa kufumbwa ncotubulide katutaninga kumbila, mbweenya mbocili cuubauba kuli Nguwe kutupa nzyotubulide notwamanizya kumukumbila, pele kuti Walo naali kwiide kutulundaika zileleko kufumbwa noyanda notayandi, swebo inga tiitwayiya ziiyo ziyandika kuti katusyoma akulinda Nguwe, eezyo nzyeziiyo ziyandika ncobeni kuti swebo tukomene mumoza.
Yahuwah ulaa bulangizi muli nduwe mbwapede mumajwi aakwe: Walo uyanda kuti yebo ukkomane. Kwamana cilikke eeco! Walo uyanda kuti moyo wako ukkomane cakuti watalika kwiimbilila twiimbo kokondedwe. Eeci inga kacinooli cintu cikatazya kubona nokuba kusyoma kapati kuti wazwaa kutandwa ncinto yako, nokuba kuti buumi bwako bwalibonyaanga bwasimpa kufumbwa nkoolanga, pele aayo nga masimpe ncobeni.
“Nkaambo ndizi kale makanze ngindakamubambila. Mbwaamba Mwami Yahuwah. Makanze Aangu woonse ayoozwidilila, alimwi nsikooyookucisa pe. Makanze aapa bulangizi kumazuba aaboola.” (Jelemiya 29:11, NKJV)
Yebo ulijisi makanze akucita zintu mubuumi bwako, pele awalo Uso uuli kujulu ulaa makanze kuli nduwe. Lino mbwalaa luzyibo lwazintu zizya kumbelaa mazuba zyoonse kusanganya antoomwe akuzyiba zintu nzyoyandisya anzyobulide, yebo inga wamusyoma kuti Walo nguuzyi cintu cini ciinda kubota kuli nduwe.
Ncinzi cakufulusya nkotubuluka akubula ?onzi? Hena zyakumana mubili zikwelete? Hena wakuyumina mulimo na? Ambweni kuli cikucisa mumubili wako na? Hena wafwidwa muyandwa? Naa zyoonse zyaambwa atalaawa antoomwe zyakumana mubili? Muzintu zyoonse, yebo inga wasyoma muluyando, munkumbu, akuyanda kwa Taata wako uuli Kujulu. Luyando Lwakwe nduyando luteeli alimwi Walo nguuyendelezya zintu zyoonse kuti bukweendele kabotu buumi bwako.
|
“Syoma Mwami Yahuwah amoyo wako woonse utaccilili maanu aako omwini, Koyeeya Mwami Yahuwah mumilimo yako yoonse eelyo uyookululamikila nzila zyako.” (Tusimpi 3:5-6, KJV)
|
