|
Eeci cibalo tacili ca WLC. Eelyo notubelesya zilembedwe aabalembi balaanze lya nkamu, tusimba buyo zyeezyo zyeendelana 100% a Bbaibbele a lusyomo lwesu cino ciindi munkamu ya WLC. Aboobo eezyo zibalo inga zyalanganyigwa kuti nzya nkamu ya WLC. Twakalelekwa kapati amulimo wabalanda ba Yahuwah banjaanji. Pele tatukulwaizyi ndinywe nobeenzuma kutalika kubala zyaalembwa abantu aabo. Eezyo nzibaalemba, twakazigwisya mumalembe eesu nkaambo kanjaanji zililubide akubaa tumpenda. Cintu cuusisya ncakuti tucilangaula mbungano yamilimo iitakwe kampenda. Ikuti konyandidwe nkaambo ka [zibalo/milumbe] iitali ya WLC, kobikkila maanu ku Tusimpi 4:18. Kuteelela kwesu nkwakuti kasimpe Kakwe kalazyokoloka, eelyo mumuni nuuyaa kumwesya munzila yesu. Tulakayandisya kasimpe kwiinda buumi, nkanko tulavwuntauzya kufumbwa nkokakonzya kujanwa. |
Lambe lya Nyanzabili — Ooyo Mwanaa Yahuwah: Walo nguuyitwa kuti Mwami Messiah Yahushua naa Kristu.
Lambe Lisubila — Ooyo ngu Yahuwah: Taata, Singuzuzyoonse alimwi Mupati atalaa Boonse Yahuwah.
Lambe lya Mungunga waji — Ooyo ngu Saatani: ngonguwe wiitwa kuti Dyabooli.
Lambe Lisubila
Ooyu ngu Yahuwah. Muleli mupati wa mulengalenga. Walo nguwaalenga majulu anyika eelyo naaka kanana ngawo kuti abe cikkalilo ca bazyali besu bataanzi. Walo alikke (Izaya. 44:24) wakalenga majulu anyika alimwi aakale wakalenga ndiswe mucinkonzya Cakwe. (Aaka kampango keelede kuumbulizya kufumbwa ncotuyeeyela kuti nguni Mulengi wa zilengwa leza.) Walo ngu Taata wesu uulela mukati ka majulu. Alimwi Ulisetekene mbweenya bwaamba Mangwalo: “Ooyo zina lyakwe liyoozyibwa akuyoogwa akataa masi woonse.” Izina lya Leza Omwe Wakasimpe ooyo wakayubunwidwa Mozesi kuti ngu Yahuwah, alimwi mu Cizuminano Cipya Walo wiitwa kanjaanji kuti ngu “Taata.” Eeco cili boobo nkaambo mumazuba aa Cizuminano Cipya wakasika Mwanaa Yahuwah uuli nsini, Yahushua, walo wakabambwa mumaleele muli Maliya (Luuka 1:35 nkakampango kasalazya makani).
Yahuwah Omwe uuli masimpe lino waambila mukowa wabantu eeco ncaakali kubakombelezya mumisela yoonse yakainda kuti:
Zinyonyoono zyenu zyalundana kusikila kumajulu; zyasika munsaa mulyango wangu. Ndacimvwa kululauka ono zyandiminya...Akaka! Ime ndamukomba inywe, nobana bangu, mutalubi caacitika muziindi zya Noah a bwato bwakwe. Abalo bakali kuyeeyela kuti inga kabanoocita zibi kusikila kukabe kutamani. Ono casika ambaakani Ime mpelekela kumusyoma kabili inywe. Cilandiyumina me kumumvwisya eelyo nomulilekelela. Nkaambo nzi?
Nkaambo inywe mulacita zinyonyoono cakuliyandila, kunyina ncomukakatila kucita camasimpe eeco ciyeeme mu lwiiyo lwa Mwanaangu nokuba lufu, kuti muleke zibi. Munyina lukakatilo lwakulwana Dyabooli. Ndakomba, bana bangu, mutalubi mazubaa Noah. Ime nsyeekakkomene kulekela zambangulwe lya meenda anyika akubajaya boonse. Balikke buyo bali lusele mbabaafutulwa.
Alimwi, amulange! Ime ndimwiibalusye mazubaano minzi mipati yobile yiitwa kuti Sodoma a Gomorrah. Mbuli mbokulembedwe, “Yumuka! Bweza mukaako abana bako basimbi bobile bali waano, utafwidilizyi mubusofwaazi bwamu dolopo. Kozwa mubusena oobu, nkaambo Yahuwah ulaafwi kulekela lunyonyooko mu dolopo. Mpoonya Yahuwah wakaleka kuti kuwe mvwula ya sulufa amulilo uuzwa kuli Yahuwah, kuzwa kujulu, atalaa dolopo lya Sodoma a Gomorrah.”1
Amulange! Kufumbwa muntu kugwisyila buyo Loti abana bakwe bobile, wakafwidilila mumunzi ooyo. Amundisyome, bana bangu, Ime nsyeekakkomene kubalekela kunyonyoonwa boonse pe — pele balo baakaka kweempwa akuteelela jwi lyangu (Matalikilo. 19:15-26).
Amulange! Ndasimpa ooku nkucenjezya kwangu kwamamanino kuli ndinywe.
Kamuleka! Nkaambo Ime ndaalilwa cakusala pele buyo kumulekela kujayigwa nkaambo kakutacita kuyanda kwangu. Ime njoomuumpa amulimo a sulufa akumunyonyoona nywe anyika yoonse iisofweede, mbweenya mbuli mu Sodoma. Nkaambo kulilembedwe kuti, “Kuli baabo bakandu, batakwe lusyomo, basofweede, bakolwi, bajayi, basimamambe, balozi, basimituni ababeji boonse: bulumbu bwabo bunooli muzyiba liyaka mulilo a sulufa, oolo ndufu lwabili” (Ciyubunuzyo. 21:8).
Pele mutatyompwi, bana bangu. Tacininga mana ciindi — kucili bulangizi. Bulakonzya kujanwa mubuumi amu Mulumbe mubotu ooyo uukambauka Mwanaangu kumugama, Yahushua. Ikuti mwacenguluka akweempwa cinicini akusyoma Mwanaangu ncaamba ancaakamucitila inywe (alimwi Ime njoomuzyiba mwanoocita boobu), Ime njoomutumina cipego cangu cakupa buyo. Eeco muya Uusalala wangu, nzyenguzu nzyomuyandika kubaa nzyizyo kuti mumukome Saatani, ooyo uuli ngu Dyabooli. Inywe muyootambula cipego canguzu eeci kwiinda mu Mwanaangu, Yahushua! Walo nguupa baabo balisalila kumuteelela. Walo ngo nguwe wakasalilwa ndinywe. Walo alikke ngo Mupaizi Mupati wiimvwi kunembo lyangu kwiiminina bana Isilayeli boonse. Walo cino ciindi ngu Messiah muntu susu, ngo mwiiminini akataa ndinywe a Yahuwah. Amumuteelele. Kamucita ncamwaambila. Mulikke buyo kwiinda muli nguwe nomunga mwasika kuli Ndime. Walo ngo Lambe lya Nyanzabili, njenzila yakugama! Amuteelele ncamwaambila alimwi amumuteelele walo.
Lambe lya Nyanzabili
Ime ndime Messiah naa Kristu, ooyo bazyali bangu ngubakaulika zina lya Yahushua. Ndime Mwana eekazyalwa bwaandeene ookwa Yahuwah (= ndakaletwa mubuumi). Kwainda myaka zyuulu zyobile, Ime ndakali kweendeenda anyika eeyi. Mumyaka mitaanzi ya buumi bwangu iili 30 nokuba kusikila waawo (kugwisyila buyo kuti Ime nsyeekacita cinyonyoono) Ime ndakapona buumi bukonzyanya mbuli bwenu. Ime ndakali kuteelela babaama abataata. Ime ndakali kusalazya kuzyuli kwangu. Ime ndakagwasya bataata mulimo wabo alimwi ndakayiya kufwala mapulanga mbweenya mbuli mbabo. Ime ndakaunka ku sinagogwe kuyoobala akusoma Mangwalo Aasetekene — mbubwenya mbuli ndinywe. Mpoonya nicakasika ciindi cakasalidwe, Ime ndakali libambide kucita mulimo mubuleya, Yahuwah Taata wesu uuli kujulu wakandinanika antangalala a Muya Uusalala wakwe! Nokuba boobo, ndakali kale Mwanaa Yahuwah kuzwa mpeekatalikila kuba muntu (Mateyo. 1:1, 20). Cakali ciindi nsini eeco atalaa nyika, pe ma zyakomena nguzu nzyaakandipa Taata. Ime lino ndakalipedwe nguzu akulibbalaika zilwanyo mubukkwene. Ime ndakalaa muya uusalala wa Taata muli ndime. Ime lino ndakali libambide kuya kunkondo. Ime ndakakomena mu luzyalo abusongo kuzwa kubwana bwangu. Yahuwah wakali Taata wangu kwiinda mumaleele alimwi Josefa wakali Taata mumulawo. Moza wakandisolweda kuya munkanda ooko Ime nkweekaswaangana ntongola meso aamuntu ngobaamba kuti Saatani naa Dyabooli. Naakainda mazuba 40 nketalyi cakulya akunywa meenda, Saatani wakasola ziindi zyotatwe kundicengelezya kucita cinyonyoono kuti ndibelesye nguzu nzyaakandipa Yahuwah. Nokuba boobo taakazwidilila. Walo taakakonzya kuzunda muya uusalala wa Yahuwah muli ndime akuyanda kuteelela kwangu. Mu myaka yotatwe yakatobela waawo baapositolo bangu ambeyo twakayiisya nzila zya Taata wangu a Taata wenu, Yahuwah wangu a Yahuwah wenu Jehovah! Twakaambilizya Mulumbe uufutula wa Bulelo bwa Yahuwah.
Mpoonya aawo, Saatani wakoongelezya bantu basofweede aabo batakalaa muya uusalala wa Taata kuti bandijaye, akundigagaila acisamu. Pele lufu lwangu tiilwakali lwa buyo; lwakali mucibaka cenu — kutegwa inywe mukabaa ciindi cakutambula buumi buteeli, oobo bwiiminina buumi bwa kutafwa mu Bulelo bwa Yahuwah bucizya anyika kumbelaa mazuba.
Eeco cinooli mumusela ulaafwi kusika. Ime ndakatila bulowa bwangu cakuliyandila, amuya wangu wini, kutegwa zinyonyoono zyenu zikonzye kulekelelwa. Ime Ndendime mwanaa mbelele wa Pasika wamasimpe ngwaakamupa Yahuwah. Ime ndakapedwa kucincanya kutalulama mucibaka ca Adamu a Eva, nkaambo Ime ndakali londokede.
Pele amulange! Ime nsyeekasowelwa mu Bbibi lya mulilo (mucuumbwe mobaya babotu ababi nobafwa) nokuba mubili wangu tiiwakabola. Kulilembedwe kuti, “Kristu [naa Messiah] wakafwa ciindi comwe kufwida zinyonyoono, muntu uululeme mucibaka ca batalulelme, kutegwa akamusolwede inywe kuli Yahuwah” (1 Petulo 3:18).
Alimwi, “Leza wa Abulahamu a Leza wa Isaka awa Jakobe, Leza wabamatata, wakapa bulemu ku mulanda Wakwe, Yahushua...pele inywe mwakajaya yooyo uutalisya buumi. Pele Yahuwah wakamubusya kuzwa kubafu, ndiswe bakamboni kumasimpe aaya” (Milimo 3:13-15).
Ime ndamwaambila lino kuti, ikuti mwamulomba Taata, ooyo uuli kujulu, kuti amulekelele zinyonyoono zyenu, kwiinda muzina lyangu amilimo yangu, nkabela mwakakatila akulomya ncomwaamba, Walo uyoomucitila ncobeni. Inywe muyoozyiba Walo namwiibaluka eelyo mwaakutambula Muya Uusalala wakwe. Walo uyoozyiba kuti lino mwateelela malailile mataanzi aa Mwanaakwe aakweempwa zinyonyoono akusyoma Mulumbe wa Bulelo.
Ncobeni ndimwaambila camasimpe inywe, eelyo mwaakutambula cipego cabuyo eeco kuzwa kuli Taata wesu Yahuwah, eeco ncelaa nguzu zyakutilila ali ndinywe, inywe muyoozyiba ncobeni caakucitika! Mbube inywe munokwaamba kuti: “Ma, inguzu nzyajisi Yahuwah! Wakazimaanya zinyonyoono zyangu zyoonse akupukuta misyozi yangu. Mukulaba kwaliso, Yahuwah kwiinda muli Yahushua wakasyodola muya wa Saatani ooyo wakali mumoyo wangu, akubikka mucibaka cawo muya Wakwe. Ime lino ndasimbwa antobo yakwe eeyo. Ime ndatalika kwiiya Masimpe. Kwaciindi cakutaanguna mubuumi bwangu Ime ndakonzya kugwabana a Simwaaba wansiku ooyo, Muzoka wakutaanguna, ooyo ngo Saatani a Dyabooli, alimwi Ime ndiyoozwidilila, pele Ime ndeelede kuligatela nkaambo Saatani ucindibendelela kuti anditole. Mbweenya mbocilembedwe kuti, ‘Pele biyo kuti muntu wazyalululwa mu meenda amu moza, ooyo takonzyi kuyoonjila mu bulelo bwa Yahuwah’ (Johane 3:5). Ime ndakazyalululwa eelyo mbuto ya mulumbe wa Bulelo niyaasyangwa akusiminina mumoyo wangu kwiinda mukuusyoma (Luuka 8:11-12).”
Ndamukombesya amuteelele bakwesu kucenjezya kwangu, mutafubaali akukwelelezyegwa mubupengelenge buyambukide akataa zikombelo zimwi, bwakuti inga kociyaa kuyungizya kulundaika zinyonyoono pele lyoonse unoolekelelwa, nokuba kusikila kanzumina kamamanino kweempwa kotaninga fwa. Mutanikwaambi kuti, “Ime ndaanguzu alimwi ndivwubide, nguni uunga wandicubila? Ime ndakacita zinyonyoono zitaambiki pele ncili no caandicitila?” Alimwi kwaamba kulekelelwa kwako, utalikwayi boobo (ikuti yebo kocizumanana kubisya cakuliyandila). Utaambi kuti, “Luse Lwakwe ndupati, zinyonyoono zyangu nozyili zinjaanji buti uyoondilekelela.” Nkaambo Ime, nde Yahushua, nkwaambila masimpe yebo kuti, cililembedwe kale kuti, “Amube bantu babamba jwi, kutali buyo baswiilizya, kamulicenga amizeezo iilubide” (Jemusi 1:22). Alimwi: “Ayooba buti mamanino aabaabo batateeleli Mulumbe wa Yahuwah...alimwi kuti kacili ciyumu boobu kumuvwuna mwaalumi mululami, nkuli aabo batamuzyi leza ababisyi nkobayoogama” (1 Petulo. 4:7- 19).
Amulange! Ime ndimwaambila masimpe inywe: tamukonzyi kuvwelanya mudima amumuni. Inywe tamukonzyi kukkalilila mumuuya wa Yahuwah amumuya wa Saatani aciindi comwe, nkaambo ndamwaambila kuti eeco tacikonzyeki alimwi mizeezo iipilingene biyo eeyo iisyoma cili boobo. Muya wa Saatani ngwa cinyonyoono akulubizya alimwi cinyonyoono musinze uutamani, alimwi kuti kozumanana muzinyonyoono zyako cakuliyandila, yebo tokonzyi kubona mumuni ooyo uuli mubulemu bwa Yahuwah Taata wesu, Walo alikke ngo MWAMI Yahuwah.
Mbuli mbokulembedwe kuti, “Alimwi ooyu ngo mulumbe ngotwaamvwa kuzwa kuli nguwe [Yahushua] ngotwaambilizya kuli ndinywe, kuti Yahuwah ngo mumuni alimwi kunyina mudima nuuceya uusangene muli Nguwe. Ikuti twaamba kaambo kakuti, ‘Tweendela antoomwe anguwe' pele katucizumanana kweendela mumudima, tulabeja alimwi tatuciti masimpe. Nokuba boobo, ikuti katweendela mu mumuni, mbuli nguwe lwakwe mbwali mumuni, tulaswaangana antoomwe mubunyina, alimwi bulowa bwa Yahushua Mwanaakwe bulatusanzya kuzwa kuzibi zyoonse” (1 Johane 1:5-8).
Lambe lya Mungunga Waji
Ndime Saatani — Ndendime Dyabooli, kubee tamundizyi kale. Ndime eekutolwaazya akukucelesya munzila njoyenda yakuzyibana akuyandana aa Yahuwah! Ime ndi ciseese ciingaila akunyonauna nyika yoonse iiwide mucibi. Yebo wakazyalwa nkeliko kale ooko nkobede. Ime ndime leza wamusela uusofweede uuno. Ndendime mubisyi mutaanzi ali boonse. Ndime wisi wa bubeji. Ndendime mudima ooyo uuli mumoyo wako. Nokuba boobo, ono Ime ndabona kuti casika ciindi cakuti twaandaane nzila. Nkaambo nokuba kuti cilandicima ncobeni kwaamba cintu eeci, yebo inga konooli mufubafuba mupati wiinda boonse kuti kocizumanana kuyanda ndime akutatobela malailile aa Nzila a Kasimpe a Buumi Butamani oobo bujanwa buyo mu Mwanaa Yahuwah alikke, Yahushua, Musale. Ino akali aakuti nzi malailile aakwe? Kweempwa cinicini cakuti wasowa kasamu ajoongola akubaa lusyomo mu Mulumbe wa Bulelo bwa Yahuwah oobo buboola linolino, bulelo buyooseluka kuzwa mukati ka julu, kabuzya anyika eeyi Yahushua nayoozyokela.
Aciindi cino, Ime ndilombozya kuti yebo toko kweempwa mukuti ulombe Yahuwah muya wakwe uusetekene. Nkaambo kuti ucite oobo mpoonya ukawutambule masimpe, pe ma mebo bwandeelela ndafwida mu meenda. Yebo tocinoondikombi me kwiinda mukubeja, kupyopyonganya mangwalo, kucenga, cigololo, bucakolwa, bwaamu, bulyato, kubba, azimwi ziyanza zyanyama yabuntu eezyo Ime nzyeyandisya kusungilizya kumoyo wako. Yebo unookomba Yahuwah akutembaula Mwanaakwe Messiah. Ime cilandicima kuti bantu kabayanda Yahuwah akubaa lusyomo akubamba milawo ya Mwanaakwe, Yahushua. Balamuyeeya Taata ciindi coonse. Bayeeme ku Mwanaakwe Yahushua kubayumyayumya mubuumi.
Ime ndilizyi kuti ciindi cangu cakucita mafunze akataa ka bantu cilipimidwe. Ime ulandikonda eelyo nonyansya Yahuwah, walo uuli ngu Taata, a Yahushua Mwanaakwe, Simalelo a Messiah. Ime mpingilila kuti ukaindwe buumi buteeli. Pele kuti wakumbila Yahuwah Taata muya uusalala wakwe, ikuti yebo watambula bulowa bwa Mwanaakwe Yahushua kuti njenzila yalufutuko lwako, alimwi kuti yebo wamvwisyisya akuteelela Mulumbe wa Bulelo wakwe, eeco ciyoondimanya ncobeni. Ikuti ndaalilwa kukuleba aakale, yebo unooli munzila kuya ku Bulelo bwa Yahuwah, mumunzi wa Jerusalema Mupya, ooyo Yahushua ngwayoobambila atalaa nyika iino mpoyimvwi. Kulilembedwe kuti, “Aboobo ndamwaambila kuti, amukumbile mpoonya mulapegwa, amuyandaule mpoonya muyoocijana, amukonkomone nkabela muyoojulilwa” (Yahushua muli Mateyo 7:7).
Alimwi, “Ikuti mwana walomba cinkwa kuli wisi akati kenu, hena inga wamupa bbwe na?...Ikuti yebo, oosofweede, kozyi bwakupa zipego zibotu kubana bako, mbubuti Taata wako uuli Kujulu mbwanga walezya kupa muya uusalala kuli baabo bamukumbila?” (Yahushua muli Luuka 11:13).
Alimwi, “Aboobo amulibatamike kuli Yahuwah, pele mumutantamuke Dyabooli nkabela uyoomutija. Amuswenene munsimunsi lya Yahuwah alimwi Walo uyooswena munsi lyanu. Amusalazye maanza eenu, inywebo nobabisyi, alimwi amusalazye myoyo yenu, inywe no basimyoyo-yobile. Amoomoke akuungumana akulila. Kuseka kwanu akusanduke kube kulila, alwalo lukondo lwanu alusanduke lube kuungumana. Amukalibombye kumeso a MWAMI, nkabela Walo uyoomusumpula (Jemusi 4:7-10).
Alimwi camamanino, “Amweempwe, inywe nobantu, Bulelo bwa Yahuwah bwaswena. Nkaambo Yahuwah wakiiyanda nyika cakuti Walo wakiipa Mwanaakwe Simuzyalwaalikke, kutegwa kufumbwa uulaa lusyomo muli Nguwe atakanyonyooki pele akabaa buumi butamani. Yahuwah ulamweengelela inywe nkaambo tayandi naba omwe kuti akanyonyoonwe pele uyandisya kuti boonse bakabaa ciindi cakweempwa. Bulumbu bwa cinyonyoono ndufu, pele cipego ca Buumi cijanwa mukusyoma Messiah Yahushua akumutambula mumoyo uulaa bulangizi bwa kuzyokela kwa Yahushua anyika eeyi akunyonyoona kufumbwa cisofweede, akubikka buleli bwa Yahuwah atalaa mulengalenga woonse, kwiinda mu Mwanaakwe. Amunjile mukalyango kasyaanikide, nkaambo mulyango uusolweda kulunyonyooko ulikwazeme alimwi muubauba, alimwi aabo banjila muli nguwo mbanji. Nkaambo kalyango kalisyaankene, alimwi nzila ninjumu, eeyo iisolweda kubuumi, alimwi aabo bakajana mbasyoonto!”
Leza wa Isilayeli, Leza wa Abulahamu, Leza a Taata wa Mwami wesu Yahushua Messiah amulekelele muli Lwakwe. Inywe nobantu! Amumuyoowe alimwi amukombe Nguwe, alimwi amulemekezye Mwanaakwe eelyo nomulemekezya Taata, nkaambo woola lyakuboola kwa Messiah Yahushua lyaswena.
1 Bikkila maanu kukaambyo kakonzyana aako kali mu 1 Bami 8:1 oomo “Solomoni mwaakabunganya balupatipati...ku Mwami Solomoni.” Takuli ba Yahuwah bobile alimwi takuli ba Solomoni bobile pe.
Eeci cibalo citali ca-WLC cakalembwa aaba Adam Stout.
Twakagwisya mucibalo citaanzi mazina aabakomba mituni ngobayita Taata a Mwana, akubikka mucibaka cangawo mazina mataanzi ngubaapedwe. Kuyungizya waawo twakajokolosya mutumpango ntotulembulude akubikka mazina as Taata a Mwana, mbuli mbwaakalembedwe kutaanguna abalembi bamu Bbaibbele bakayoyelwa moza. Nkamu ya-WLC