|
Eeci cibalo tacili ca WLC. Eelyo notubelesya zilembedwe aabalembi balaanze lya nkamu, tusimba buyo zyeezyo zyeendelana 100% a Bbaibbele a lusyomo lwesu cino ciindi munkamu ya WLC. Aboobo eezyo zibalo inga zyalanganyigwa kuti nzya nkamu ya WLC. Twakalelekwa kapati amulimo wabalanda ba Yahuwah banjaanji. Pele tatukulwaizyi ndinywe nobeenzuma kutalika kubala zyaalembwa abantu aabo. Eezyo nzibaalemba, twakazigwisya mumalembe eesu nkaambo kanjaanji zililubide akubaa tumpenda. Cintu cuusisya ncakuti tucilangaula mbungano yamilimo iitakwe kampenda. Ikuti konyandidwe nkaambo ka [zibalo/milumbe] iitali ya WLC, kobikkila maanu ku Tusimpi 4:18. Kuteelela kwesu nkwakuti kasimpe Kakwe kalazyokoloka, eelyo mumuni nuuyaa kumwesya munzila yesu. Tulakayandisya kasimpe kwiinda buumi, nkanko tulavwuntauzya kufumbwa nkokakonzya kujanwa. |
Cakalembwa aaba Rabbi Tovia Singer
Ime ndaa mweenzuma Munakristu uubbizyidwe uuboola kuzyoondiswaya kumamanino aamvwiki iiboola. Walo ulijatikene kapati mubupaizi bwa BuJuuda buna Messiah (nokuba kuti walo muntu muna Masi) alimwi ndizyi kuti uzyoonditataukila makani mapati manjaanji azyoosika. Ime ndiyanda kuti ndikakonzye kumwiingula cabusongo. Ime ndizyi umwi mubuzyo ngwazyoondifusila alimwi ndikumbila kugwasyigwa mbweyakumwiingula. Walo uzyoobandika ciindi camu Bbaibbele (nsyekonzyi kwiibaluka mpocijanwa cino ciindi) eelyo nibakaletelezya micelo yaakomena ku nyika yacisyomyo. Mubwini cilembedwe kuti bakaletelezya “echadi” lya mansaansa. Ibbala lya “echadi,” nokuba kuti lyaambilizya COMWE, lyaamba CIKATA CA masaansa. Aboobo, eelyo notwaamba “Adonai Echadi,” inga katunooli twaamba baleza botatwe muli omwe.
Kwiina akataa zyeezi cimvwika masimpe kuli ndime, pele Ime ndiyanda kuti nkenooli ntaamu kumbele kulibamba muli zyoonse eezyi. Hena inga mwandigwasya ndakomba CAKUFWAMBA MBULI MBOCIKONZYEKA. (Walo uzyoosika kumamanino aamvwiki iiboola!)
Ime ndikkomene nkaambo wabuzya mubuzyo ooyu uuli boobu; Ime ndasyoma bunji bwa bamaJuuda babala inga bagambwa makani aaya ngopatide. Yebo kweezyeka muJuuda mbwanga wanyandwa eelyo nabbukizya kuti batumwa bukambausi babelesya mulazyo uuyandisyigwa mucisi cokwabo wakuti, “Koteelela O Isilayeli, Mwami wesu ngu Yahuwah, Mwami ngumwi” (Muci Hebulayo ngu: echadi), kutondezya lusyomo muli Baleza Botatwe. Cintu cigambya bantu banji ncakuti, aabo basyoma muli Baleza botatwe, kanjaanji babelesya kampango kainda kusetekene aaka kaambilizya Leza mbwali omwe akuyumbyayumbya lusyomo kwabo muziwa zya Leza zyotatwe. Kusyoma muli Baleza botatwe takujisi sinkondonyina mbuli makani aambilizyidwe mu Ciibalusyo 6:4. Atusindinganye kukopolola kaambo kakasima aako nkobakazyanya batumwa.
Mukugwasyilizya kutaminina kwabo kuti kuli bantu bangaye mumutwe wa buleza, aabo basimilimo bazuunyene kuti ibbala lyaci Hebulayo lya echad, eelyo liiminina “omwe,” kumamanino aa Ciibalusyo 6:4 ategwa talyaambi omwe bwini. Pele, balakazya kuti, aaka kampango kaambilizya biyo “zintu ziswaangene kuba comwe,” nanka zintu zinji muli comwe. Bavwuzya kusanganya tumpango tobile kugwasyilila ncobataminina eeci. Kampango kataanzi nkobapa nkakuti: “Mpoonya basike buyo ku Musena wa Eshcoli, bakagonka mutabi uujisi cikungo (echad) camasaansa “; bakacitembelana acisamu akati kabo bobile. Bakaletelezya amapomagilanati ankuyu” (Myeelwe 13:23).
Kabili kali mu Matalikilo 1:5 kabala kuti: “Mbube kwakaba mangolezya a mafumofumo, Buzuba bomwe (echad).”
Kuzwa mutumpango ootu, bazumanana kuti, cilisalazyidwe muci Hebulayo kuti bbala lya echad inga lyayiminina buyo kuswaanganya antoomwe mweelwe wazintu kuti cibe comwe.
Nokuba kuti ooku kutaminina takuluzi mbweenya mbuli lusyomo ndokusola kugwasyilila, kuli baabo batauzyi mulaka waci Hebulayo, mbube aaka kaambo kakuzwanganina kabakopa maanu.
Ibbala lya echad mumulaka waci Hebulayo libeleka munzila njeenya mbuli bbala lyakuti “comwe” mbolibelesyegwa mumulaka wa nswipula mulomo naa Cikuwa. Mumulaka wa Cikuwa kulakonzya kwaambwa kuti, “Zyuuno zyone atebule antoomwe zibamba busena bwa kususwida bomwe,” nokuba kwaamba kuti, “Kuli kkobili lyomwe mujanza lyangu.” Ono kubelesya mikonzyanyo yobile eeyi, ncuubauba kubona bbala lya Cikuwa lyakuti “comwe” mbolinga lyaambilizya zintu zinji mucintu comwe, mbuli mukaambo ka busena bwa kususwida, nokuba comwe cilikke, mbuli mukaambo ka kkobili lyomwe.
Nokuba kuti bbala lyaci Hebulayo echad libeleka munzila njeenya, Banakristu ba evangeli tabagantauki mikonzyanyo yamu Bbaibbele oomo bbala lya echad moliiminina “comwe cilikke.” Aboobo, mukutamauka biyo tumpango twa mangwalo mbuli ka Matalikilo 1:5 aka Myeelwe 23:13, eeco cikwelelezya maanu aamuntu uutazyi kuti amvwe aanga bbala lya echad munzila imwi lileelene azintu ziswaangene kuba comwe. Kunyina, ncobeni, cili kulaale akasimpe mbuli ceeci. Ngooyu mukonzyanyo, Ciibalusyo 17:6 cibala kuti: “Kuti bamutamikizya bakamboni bobile nokuba botatwe, ooyo weelede kujayigwa; Pele kuti kakuli biyo kamboni omwe (echad) ooyo teelede kujayigwa.”
Mu Mukambausi 4:8 kulembedwe kuti: “Kuli biyo omwe (echad) alikke, uutakwe mweenzinyina; inzya tajisi Mwana nokuba mweeninyina...”
"Koteelela, O Isilayeli:
|
Mutumpango tobile ootu atalaawa, ndeenya bbala lyaci Hebulayo ndelibelesyedwe, alimwi cilisalazyidwe kuti ibbala lyakuti echad lyaambilizya omwe ulaalikke, kuleka “babunganyidwe antoomwe.” Mpeenya aawa kuboola mubuzyo kumizeezo wakuti: Ikuti bbala lyaci Hebulayo echad kaliiminina cibunga ca zintu alimwi a cintu cili comwe cilikke, mbubuti muntu mbwanga waamba kuti ncili cinicini ncoliiminina eelyo bbala nolibelesyedwe mu kampango? Nkobuli bwiinguzi munzila njolibelesyegwa, eeyo lyoonse njakubala kumvwisya kugama makani. Mbweenya bwini munzila njolibelesyegwa bbala lya “omwe” akuteelelwa mumulaka wa Cikuwa, nkokuti, mbolibelesyegwa. “Zyuuno zyone a tebule zibamba busena bwakulida bomwe” ooku nkubunganya antoomwe, alimwi akuti “Koteelela O Israel, Yahuwah ngu Leza wesu, Yahuwah ngumwi” nkwaamba cigaminina leza uulaalikke luzutu.
Ime ndalumba kumubuzyo wako ooyo, alimwi Siluse Omwe akusolwede mumusinzo wako wakusanduka.
Ndime wako masimpe,
Rabbi Singer
Eeci cibalo citali ca-WLC cakalembwa aaba Rabbi Tovia Singer.
Twakagwisya mucibalo citaanzi mazina aabakomba mituni ngobayita Taata a Mwana, akubikka mucibaka cangawo mazina mataanzi ngubaapedwe. Kuyungizya waawo twakajokolosya mutumpango ntotulembulude akubikka mazina aa Taata a Mwana, mbuli mbwaakalembedwe kutaanguna abalembi bamu Bbaibbele bakayoyelwa moza. Nkamu ya-WLC
