“Kuciindi eeco Yahushua wakainda mumyuunda yamaila mu Nsabata. Lino basikwiiya bakwe bakafwa nzala, mpoonya bakatalika kupulula myaangala yamaila akulya. Nobakabona boobo, ba Falisi bakamwaambila kuti: “Bona! Basikwiiya bako bacita citazumizyidwe mu Nsabata.” Wakabaambila kuti: “Sena tiimwakabala ncaakacita Davida ciindi walo abaalumi mbaakali limwi nobakafwa nzala? Sena tanaakanjila muŋanda ya Leza akulya zinkwa zyacituuzyo, eezyo walo abaabo mbaakali limwi nzyobatakazumizyidwe kulya ccita buyo bapaizi balikke? Naa sena tiimwakabala mu Mulawo kuti mu Nsabata, bapaizi mutempele balabeleka pele tabakwe mulandu? Pele ndimwaambila kuti imupati kwiinda tempele mpali aano. Ikuti nimwalizyi ncaamba majwi aaya aakuti,‘Ndiyanda luse kutali cipaizyo,’ nomwatabeteka batakwe mulandu. Nkaambo Mwana wamuntu ngo Mwami wa Nsabata.”
Yahushua wakalaa ziiyo nzyaakali kuyanda kupa basikwiiya bakwe, kutegwa naatakali aambabo, batakasowayiki mubupanduluzi bwabapaizi abaleli bujatikizya nzila iiluleme yakubamba Nsabata. Wakali kugwisya tulengwalengwa amikuli yabapaizi abaleli njibaakulikide atalaa Nsabata. Mukwiinda mumyuunda yamaila mu Nsabata, walo abasikwiiya bakwe, kabafwide nzala, bakatalika kupulula akupaka maila akulya. “Pele nibaabona boobu ba Falisi, bakati kuli nguwe, Kolanga, basikwiiya bako bacita citazimizyidwe kucitwa mubuzuba bwa Nsabata.” Mukuvwiila kutamikizya kwabo, wakabatondekela ncaakacita Davida abamwi bakalaa nguwe, akwaamba kuti: “Sena tiimwakabala ncaakacita Davida ciindi walo abaalumi mbaakali limwi nobakafwa nzala? Sena tanaakanjila muŋanda ya Leza akulya zinkwa zyacituuzyo, eezyo walo abaabo mbaakali limwi nzyobatakazumizyidwe kulya ccita buyo bapaizi balikke? Naa sena tiimwakabala mu Mulawo kuti mu Nsabata, bapaizi mutempele balabeleka pele tabakwe mulandu? Pele ndimwaambila kuti imupati kwiinda tempele mpali aano.
Kuti
kufwa nzala nkali boobu ncencico Davida ncaakalekelelwa nokuba kuti
wakasofwaazya busena busalala, alimwi mucito wakwe tiiwakabaa mulandu, mbweenya
buyo abalo basikwiiya mumucito wakupulula, kupuka akulya maila mubuzuba bwa
Nsabata! Yahushua wakali kuyiisya basikwiiya bakwe abasinkondonyina kuti mulimo
wa Yahuwah wakali mutaanzi ali yoonse; alimwi kuti mumulimo ooyu kwaba kukatala
nokuba nzala, cakaliluleme kumanya nzala naa kukatala ooku nokuba kuti kakuli
mubuzuba bwa Nsabata.
Kwiinda muli Muusa, Kristu wakati: “Mubuzuba bwa Nsabata bana bambelele bobile bamwaka omwe batakwe kabata,zibeela yobile zyabusu bwa cinkwa zyacipaizyo canyama, kusanganya amungwimba, acipaizyo cakunywa, ncecipaizyo cakuumpa, mu Nsabata ili yoonse, kubikkilizya acipaizyo cakuumpa, acakunywa calyoonse” Mulimo wabapaizi wakutuuzya wakali kuyungizya kuvwula mu Nsabata, pele mulimo wabo ooyu wakali mulimo uusalala wa Yahuwah, tiibakali kutyola mulawo wane. Milimo yalubomba alimwi iiyandika kucitika teesyi kutyola mulawo. Yahuwah tatuki micito eeyi. Mucito wa lubomba alimwi uuyandika wakwiinda mumyuunda, wakupulula maila, akwaapuka mumaanza, akulya kutegwa bakkutye nzala yabo, wakaamba kuti wakali mulimo wakali munzila yamulawo ngwaakabikka mwini lwakwe kumulundu wa Sinai. Aboobo wakalyaamba kuti taakakwe mulandu kumbele lyabalembi, baleli, abapaizi, alimwi akunembo lya mulengalenga, akunembo lyabangele bawide abantu bawide.
Liya Muusa naakayandisya kubona bulemu bwa Yahuwah, Yahuwah wakalitondezya ciimo cakwe kumutwanga wakwe. “Eelyo Yahuwah wakainda munsi lyakwe, akwaamba kuti, Yahuwah, Yahuwah Singuzuzyoonse, walubomba aluse, uubikkilila, alimwi uuzwide bubotu akasimpe, uufwida luse bali zyuulu, uulekelela busofwaazi, kutyola mulawo, acibi, alimwi uutalekeli kuti kube ulaa mulandu.” Ooyo wakaambila Muusa eeci, Nguwe lino wakali kwaambila ba Falisi, nokuba kuti ciimo cakwe lino casisidwe muciwa cabuntu. Pele bapaizi abaleli tiibacijisi eeco ncibaali kuyandisya kapati,-- luzyibo lwa ciimo ca Yahuwah. Ncenciceeci asunu ncotutamutondezyi mbwabede bwini. Bakalaa zinji zyakwiiyuluka muzilengwa akulungilila tunjaanji twabantu atala; bakali kuyandika kwiiya milazyo yakasimpe ka mulawo wa Yahuwah.
Kristu wakabona kuti ziiyo zyakeelede kupegwa kutegwa tombe lya zilengwalengwa litapaulwe nkaambo eezi zilengwalengwa zyaali kulemenena ataala mulawo wabulemu, walo waapedwe muluyando aYahuwah silubomba. Nsabata tiiyakali kuyandika kuba mbubakiibamba ba Juuda,--mukuli uulema kubweza loko, uukulikwa akubikkilila atala zilengwa zinjaanji. Kwiinda munzila eeyi Saatani wakacita kuti buzuba oobu bube mbwaakali kuyanda mumizeezo yabantu,--ijoko likatazya kubweza mucibaka ca kukondwa, kusetekana, bwa Yahuwah alimwi bulemekwa. Yahuwah wakapa Nsabata kuti ibe cileleko kumuntu; yakali kumwiibalusya mulimo wakulenga zintu wa Yahuwah; yakali kumwiibalusya kulyookezya kwa Yahuwah kusetekene, nkaambo ncenciceeci ncaa “kaleleka buzuba bwa Nsabata, akubusalazya.”
Kristu wakati, “Ndiibamba milawo ya Taata.” Nzyaakacita, mukubamba milawo ya Taata wakwe, zyakaliindene azyaba Falisi, kulanganya mulawo wa Yahuwah mumilimo njibaali kucita. Aaba banalumi nibaamubuzya, “Nkaambo nzi basikwiiya bako ncobateendeli munzila zyabapati, pele balalya cinkwa amaanza aatasambide?” Kristu wakabavwiila, “Izaya wakashinshima bwini kujatikizya ndinywe nobasikuupaupa ameso, mbuli mbokulembedwe kuti, Aaba bantu balandilemeka amilomo yabo, pele myoyo yabo ili kulaale andime.” Ncenciceeci ncibaatamikizya Kristu kuti utyola Nsabata, asunu bantu ncobacimutamikizya kutyola mulawo.
Wakaya kumbele kwaamba kuti: “Nokuba boobo kundikomba kwabo nkwabuyo, nkaambo bayiisya milawo yabantu kuti njemilazyo ya Leza. Babikka ambali mulawo wa Yahuwah, akubweza zilengwa zyabantu mbuli kusanzya mipika ankomeki: alimwi azintu zimwi nzyomucita. Alimwi wakati kuli mbabo, muligeme cakumaninina kukaka mulawo wa Yahuwah, kutegwa mutobele zilengwa zyenu.”
Mpoonya Kristu wakabapa mukonzyano wa nibayaamukide milazyo ya Yahuwah, akucita ziimpene azintu ziyandika: “Nkaambo Muusa wakati, Lemeka bauso abanyoko, alimwi, Kufumbwa uutukila bawisi naa banyina afwe: pele inywe mwaamba kuti, Kuti mwanalumi waamba kuti kuli bawisi naa banyina, Ngu kkobbani, nkokwaamba kuti, cipego, kufumbwa cinga cakupa mpindu muli ndime; ooyo uya kwaanguluka. Alimwi mutakamulekeli kucita cili boobu kuli wisi na banyina, akunyansya jwi lya Yahuwah nkaambo kazilengwa zyenu: azimwi zintu nzyomucita.” Yahuwah wakalibapede kulailila, 'Lemeka bauso abanyoko,, kutegwa mazuba alampe ngakupa munyika Yahuwah wako.” Pele ooyu, mbweenya mbuli mulawo wa Nsabata, bakaunyansya kwiinda muzilengwa zyabo. Kristu wakaimikila mbuli uukwabilila mulawo kuti bataupinduli.
Nokuba
kwaamba boobu Kristu, “ Ndakiibamba milawo ya Taata,” tulamvwa bakambausi baluulwa maanu
banjaanji kabaambila mbunga zyabo kuti Kristu wakiityola Nsabata. Pele Kristu
ulasalazya kwaamba kuti walo lwakwe takwe mulandu mukaambo aaka. Ooyo wakabamba
Nsabata akulyaamba kuti ngu Simalelo wayo,wakalizyi cakumaninina ziyandika mu
Nsabata eeyo. Wakati: “Kuti nimwalizyi ncocaamba eeci, nindabaa luse, akutali kulyaaba,
nimwatakatuka uutakwe mulandu. Nkaambo Mwanaa muntu ngu Simalelo wa buzuba bwa
Nsabata abwalo.”
Alimwi kwiinda mubashinshimi bakwe wakaambilizya jwi ndilyena: “Nkaambo ndiyanda lubomba,
kutali zipaizyo; njandisya luzyibo lwa Yahuwah kwiinda zipaizyo zyakuumpa.”
Liya Kristu naakalyaamba kuti takwe mulandu, ninzi bantu ncobaamba nobainduluka majwi aaba Falisi, mukwaamba kuti walo abasikwiiya bakwe bakatyola Nsabata? Hena tabateeleli majwi aa kristu naamba kuti, “Ikuti mwaibamba milawo yangu, mulazumanana muluyando lwangu, mbubonya mbondaibamba milawo ya Taata akuzumanana muluyando lwakwe.?” “Ooyo uutambula milawo yangu akwiibamba nguundiyanda. Alimwi ooyo uundiyanda uyooyandwa a Taata, eelyo tuyooboola akukkala anguwe. Ooyo uutandiyandi tabambi nceamba: ijwi ndyomumvwa talili lyangu pele ndilya Taata walo wakandituma.” “Mboobu mbotuzi kuti tulabayanda bana ba Yahuwah, eelyo notumuyanda Yahuwah, akubamba milawo yakwe. Nkaambo ndoluyando lwa Yahuwah, kuti tubambe milawo yakwe: ambebo ndiyoomuyanda akulitondezya caantangalala kulinguwe.” “Nkaambo kuyanda Leza caamba kuti katubamba milawo yakwe; alimwi buya milawo yakwe tiiminyi.” “Alimwi mboobu mbutuzyi, kuti tulimuzyi, kuti katubamba milawo yakwe.Ooyo waamba kuti, ndimuzyi, pele katabambi milawo yakwe, mubeji, alimwi kasimpe takako muli nguwe. Pele ooyo uubamba jwi lyakwe, ncobeni luyando lwa Yahuwah lulizwide muli nguwe luyando lwa Yahuwah lulizwidilide: mbombubo mbutuzyiba kuti tuli mulinguwe.”
By: Ellen White
Review and Herald
August 3, 1897