Ikuti Yahushua Naakaliko Kataninga zyalwa, nkokuti Taakali Muntu Johane 17:5

Eeci cibalo tacili ca WLC. Eelyo notubelesya zilembedwe aabalembi balaanze lya nkamu, tusimba buyo zyeezyo zyeendelana 100% a Bbaibbele a lusyomo lwesu cino ciindi munkamu ya WLC. Aboobo eezyo zibalo inga zyalanganyigwa kuti nzya nkamu ya WLC. Twakalelekwa kapati amulimo wabalanda ba Yahuwah banjaanji. Pele tatukulwaizyi ndinywe nobeenzuma kutalika kubala zyaalembwa abantu aabo. Eezyo nzibaalemba, twakazigwisya mumalembe eesu nkaambo kanjaanji zililubide akubaa tumpenda. Cintu cuusisya ncakuti tucilangaula mbungano yamilimo iitakwe kampenda. Ikuti konyandidwe nkaambo ka [zibalo/milumbe] iitali ya WLC, kobikkila maanu ku Tusimpi 4:18. Kuteelela kwesu nkwakuti kasimpe Kakwe kalazyokoloka, eelyo mumuni nuuyaa kumwesya munzila yesu. Tulakayandisya kasimpe kwiinda buumi, nkanko tulavwuntauzya kufumbwa nkokakonzya kujanwa.

Bantu banjaanji aabo basyoma muli Baleza botatwe basyoma kuti mupailo ookwa Yahushua mu Mumulumbe wa Johane 17:5 utondezya kuti Yahushua wakali kupona kataninga zyalwa:

“alimwi lino, Taata, ndaabile bulemu kunembo lyako oobo mbookandipa kuzwa nyika kiitaninga kulengwa.” (RSV).

Mbuli kampango kali koonse kalaa kaambo mu Bbaibbele, tweelede kulangisya ncaakaamba Yahushua mumupailo ooyu kuli Yahuwah (Taata). Kujokelela munsi tweengwe tobile, mbuli mbokulembedwe muli Johane 17:3, Yahushua wakapaila kuli Yahuwah kuti: “Taata (17:1) …oobu mbobuumi buteeli, kuti bazyibe Ndiwe olikke Leza wamasimpe, a Yahushua Messiah ooyo ngookatuma.” Muli Johane 17:5, myeengwe yobile kumbelaa waawo Yahushua mpaakaamba kuti Taata alikke ngo Leza wamasimpe; inga caba cintu cinyandya kuti Yahushua alisendekezye kuti, awalo lwakwe Yahushua, ngu Leza.

Taata = Yahuwah

Mupailo ookwa Yahushua muli Johane 17 ugamikidwe kuli “Taata.” Mucizuminano Cipya, Wisi Yahushua ngweenya ngo “Yahuwah.” Eelyo Yahushua naamba kuti, "Taata," walo ncaamba cini waamba kuti "Leza." Kuleta manjezyeezya mukampango, bantu basyoma muli Baleza botatwe balanganya mupailo ooyu akubona “Leza mwana” kakombelezya Leza Taata kuti amujosyele bulemu oobo walo, “Leza mwana,” mbwaakajisi kataninga kuba muntu wanyama. Pele aawa tabumvwisyide Buzyali bwa Yahuwah mu Bbaibbele. Mu Bbaibbele, bu Taata bwa Yahuwah nkaambyo kapandulula mbwalanganyigwa Leza kumukowa wa bantu (Kulonga. 4:22, Izaya. 63:16, Hosiya. 11:1, Mateyo. 5:45, 6:9, Johane 20:17). Mu Bbaibbele, bu Wisi bwa Yahuwah tabuli kusandulula mbobeelene a muntunyina omwe omwe mu “mutwe wabaleza botatwe” kuli umwi awumwi.

Alimwi, iBbaibbale talipandululi bulemu bwa Messiah mbwaakajisi aciindi cimwi naakali kujanza lya lulyo lwa Leza Singuzuzyoonse mpoonya wakajosyelwa alimwi. Kunze lyaboobo, kusumpulwa abulemu bwa Messiah zyakaambidwe kale mu Cizuminano Cakale mpoonya akuzuzikwa muli Yahushua. Yahushua wakati: "Mpoonya aawo wakabaambila kuti, Nywebo nobafubafuba, nomuli aamyoyo iikakila kusyoma woonse makani ngobakaamba bashinshimi! Sena Messiah taali kweelede kuciswa obo akunjila mubulemu bwakwe na?" (Luuka 24:25-26).

Kwaamba makanaa zintu zitaninga ba, kubee nkozili kale

Kusandulula kwa baabo bakomba Baleza botatwe Johane 17:5 kulaalilwa kumvwisyisya kuti boonse bobile Yahushua, a Yahushua, bakanana zintu zyakaambwa kuyoocitika (nokuba zintu zyaazyibidwe kale) (abantu) kubee bakali kupona kale. Bikkila maanu kumajwi ookwa Yahushua mweenya mumupailo wa Johane 17 acaandaano 15:

"Ime nsyepailili baaba biyo, Pele abaabo boonse bayoosyoma muli ndime kwiinda mujwi lyabo, … Oobo bulemu mbookandaabila Ime abalo ndabaabila, kutegwa abalo bakabe bomwe mbweenya mbuli ndiswe mbotuli bomwe” (Johane 17:20-22).

1. Aawa Yahushua wakaamba kuti walo wakalipedwe kale bulemu oobo bwakeelede nguwe. Pele bulemu bwakwe taakaninga tambula mubwini mbwaanga Yahushua taakaninga fwa, kubusyigwa kubafu akusumpulwa kujanza lya lulyo lya Singuzuzyoonse Yahuwah (Luuka 24:25-26). Yahushua wakati oobo bulemu wakaabilwa kale nkaambo wakalizyi kuti Yahuwah wakamusyomezya kumupa bulemu. Kwaabilwa bulemu “cilikabotu mbuli cintu cicitidwe kale,” nkabela Yahushua wakalaa camba cakwaambilizya bulemu oobo kubee wakali bujisi kale.
2. Alimwi Yahushua wakali kunga wakanana makanaa bulemu oobo walo mbwaakapa bantu aabo batakaninga kuba basyomi. Kubantu aabo, Yahushua wakabapa kale bulemu bwakwe nokuba kuti tiibakali kupona aciindi eeco Yahushua naakakanana majwi aaya. Mbweenya buyo Yahuwah mbwaakapa Messiah eelyo Messiah kataninga zyalwa, aawa Yahushua ukanana bulemu oobo mbwaakapa kubantu kabataninga kuzyalwa.
3. Eeco caambwa kuti "buleza bwa Kristu", aabo basyomi bazuunyene kuti mbobulemu oobo Yahushua mbwaakajisi alimwi mbwaakalisamununa naakalaa bulemu mbuli Yahuwah. Pele Yahushua waamba bulemu mbweenya oobo Taata mbwaakamupede (kale), awalo Yahushua mbwaakapa (kale) kubantu bamwi batakaninga zyalwa. Hena tacili cintu cizyibidwe kuti oobo bulemu Yahuwah mbwaakapa Yahushua tabuli bulemu bwa Yahuwah na?

Kuyungizya kubala tumpango tongaye buyo, muli Johane 17:24, Yahushua wakainduluka ncaakapaila mukampango ka 17:5: “Taata, Ime ndayandisya kuti abalo, aabo mbookandipa Ime, kuti babaa ndime ooko nkwebede, kuti babone bulemu bwangu oobo mbookandipa kakutaninga ba matalikilo aanyika.”

Bikkila maanu kuti Yahushua wakaamba cintu nceenya pele munzila yiindene aasyoonto. Yahushua “taakalaa” bulemu bwa Taata biyo (17:5) pele WAKAPEDWE BULEMU ncobeni (17:24) kiitaninga lengwa nyika.

Alimwi, mupailo ookwa Yahushua tuuyendelani abusanduluzi bwa buleza bwa Kristu munzila zyobile:

1. Aboobo hena tweelede kuyeeyela kuti muntu mutaanzi mu mutwe wabaleza wakapa bulemu akuyandisya muntu wabili mumutwe wabaleza kaataninga ba malengelo aa aanyika na? Nkaambo nzi kutali nsiku lini kusyule lya ciindi?
2. Taata wakapa mwana bulemu bwakwe kaataninga ba malengelo aanyika. Eeci caambilizya kuti kwakali aciindi cakaliko cimwi, nokuba kuti taakaninga ba malengelo aanyika, eelyo muntu wabili mumutwe wabaleza naakanyina bulemu nkabela nceciindi eelyo naakapegwa. Nkaambo nzi ooyu muntu mutaanzi ncaakeelede kupa bulemu kuli yooyo wabili mumutwe wabaleza kaataninga ba malengelo aanyika?

Aabo bapandulula ba buleza bwa Kristu balengelezya kupyopyongana akudonaika mbuli kooku nkaambo biyo kakuti eeco ncobasyoma takali kasimpe.

Mulazyo muyumu wakusanduluzya Mangwalo ngwa kulanganya mabala kweendelanya a misela nkwaakazyila mabala aayo a ncaayiminina. Mukaambo aaka, tweelede biyo kuteelela ku twaambo twiinda 15 mu mupailo ookwa Yahushua kutegwa tumvwisyisye kabotu eeco Yahushua ncaakali kwaamba mu 17:5. Muli Johane 17:20-24 Yahushua alimwi wakabelesya mulaka wakuti “kwaabila bulemu” akuti “kubaa bulemu” kataninga zyalwa mubuntususu.

Oobo bulemu Yahuwah mbwaakakanzide kupa Messiah Yahushua wakabwaamba mbuli cintu caacitika musyule lya ciindi, mbweenya mbuli mbwaakaamba bulemu mbwaakapegwa kuti uyoopa basyomi ba kumbelaa mazuba. Izntu zyakabambilwa kuyoocitika zilaambwa kubee zyakacitika kale nkaambo biyo kakuti “nzibotu mbuli zintu zyaacitwa kale” mu meso ookwa Yahuwah.

"Kotaninga bambwa mwida Ime ndakalikuzyi kale, alimwi kotaninga zyalwa webo, Ime ndakakusetekanya webo; Ime ndakakusala kuti ube mushinshimi wa masi" (Jelemiya 1:5).

Ayimwi nzila yakwaamba boobu ilajanwa mu Bbaibbele, muntu ulakonzya “kubaa” cintu kataninga tambula nokuba kubaa cintu eeco npkuba kuti taninga zyalwa. Yahushua wakati bacete mu muuya abaabo bapenzyegwa nkaambo ka bululami balijisi kale bulelo kujulu (Mateyo. 5:3, 10) Nokuba kuti aaba bantu tiibakajisi Bulelo bwa kujulu aciindi eeco (bakali bacete akupenzyegwa), bakalijisi kale bulelo oobo.

Paulu wakati aabo basyoma muli Leza wakasimpe Omwe a Messiah Wakwe Yahushua balaa lufutuko alimwi bakalipedwe kale mulimo uusetekene kabataninga kuzyalwa. “(Yahuwah) wakatuvwuna iswe akutwiitila mulimo uusetekene, kutali nkaambo ka milimo yesu pele nkaambo makanze aakwe alweengelelo lwakwe, oolo ndwaakatupa Messiah Yahushua kiitanaba misela minjaanji, alimwi lino iitondezyedwe…” (2 Timoteo 1:9-10). Nkaambo Paulu, “naakamvwisyisya kuti Yahuwah ulakonzya kucita eeco ncaakasyomya” oolo ndusyomo lufutula (BaLoma 4:21).

Mbweenya awalo Jeremiya wakali zyibidwe kale kataninga ba akusalwa kuba mushinshimi kataninga bambwa mwida lya banyina, Yahushua wakali zyibidwe akusalwa kuba Messiah:

"Nketaninga kubamba webo mwida Ime ndakali kuzyi kale yebo, alimwi kotaninga zyalwa webo Ime ndakakusetekanya; Ime ndakakusala kuba mushinshimi ku masi" (Jelemiya 1:5).

Awumwi mukonzyanyo wa Izaya 53

Bunji bwa banakristu inga bazumina kuti Izaya 53 nkampango kaambilizya Messiah; nkokuti, keendela antoomwe abweende bwa cisi ca Isilayeli, Izaya 53 munzila imwi utwaambila kuboola kwa Messiah (Johane 12:37-38, 1 Petulo. 2:24-25). Izaya 53 wakalemba myaanda-myaanda yamyaka kataninga zyalwa Yahushua. Pele Izaya 53 wakalemba makani woonse abee akacitika kaindi. “Wakakomena kunembo lyakwe…wakasulaikwa akukakwa aabantu…walo wakakulikwa mikuli yesu… twakamubona kawumidwe…bakamucisa…Yahuwah wakalazyika ali nguwe mikuli ya busofwaazi bwesu toonse…” akuya kumbele zinjaanji, zyoonse kazilembedwe aanga zyakacitika kale. Hena Yahuwah wakalazyika ali Yahushua, busofwaazi bwesu toonse, kuutaninga sika mwaka wa 700 BC na? Pe tacimvwiki eeco, pele cakaambwa myaka 700 kacitana citika kubee cakacitika kaindi.

Bamwi baamba kuti ooyu mulaka wa musyobo wa “cishinshimi uuzukide” nkaambo majwi aamushinshimi ajatikizya cintu cicizya kumbelaa ciindi, Pele majwi abandikwa aanga akacitika kale, abee wakali kupona kale. Ikuti Yahuwah wakakanzide kale cintu eeco, cili biyo kabotu mbweenya mbuli kuti cakacitigwa kale. Munzila njeenya, Yahushua wakali kukonzya kwaamba kuti Yahuwah “wakali mupede” bulemu kataninga tambula bulemu oobo.

Awumwi mukonzyanyo, Abramu

Eelyo Abramu naatakajisi lunyungu, Yahuwah wakati kuli nguwe: "IME NDAKAPA (caacitwa kale) eeyi nyika ku lunyungu lwako (Matalikilo 15:18). Kabataninga (nokuba nguwe) kupona, ba lunyungu lwa Abramu bakapegwa kale nyika.

Eelyo Abramu naakacembeede alimwi katajisi mwana wa cisyomyo, Yahuwah wakati kuli nguwe, “IME NDAKAKUPA (cakacitigwa kale) webo wisi wa masi manjaanji.” Mwati mbombubo na? Hena Abramu, wakacembeede katajisi mwana, wakali kale wisi wa masi manjaanji? Cakali boobu nkaambo Yahuwah waamba zintu zinjaanji zitaninga kuba abee zyakaliko kale (langa mu BaLoma 4:17).

Mapenzi manjaanji mu busanduluzi bwa bakomba Baleza botatwe

Bantu bakomba Baleza botatwe balengelezya mapenzi mayumu nta mukwaamba kuti Yahushua wiibaluka ciindi naakaliko kataninga zyalwa abulemu mbwaakajisi muli Johane 17:5. Atusalazye aawa: Yahushua kwiina nataminina kubaa buleza muli Johane 17:5, nokuba kuba cibeela ca mutwe wa baleza-botatwe mumuntu omwe pe. Kunyina pe Yahushua naakaamba kuti wakalaa bulemu antoomwe a Yahuwah kuzwa kumisela yansiku yakaindide pe, pele biyo kiitaninga lengwa nyika, eeyo ninzila njenzu yakulipandulula kweelena kubaa bulemu akataa bantu bobile kukabe kutamani mu mutwe wabaleza botatwe.

Mumalembe aa bakomba Baleza botatwe, “Leza Mwana” taakalisamununa ciimo cabulemu Cakwe eelyo naakasamikwa ciimo cabuntu, nkokuti, eelyo walo naakaba “Leza uukkwene a muntu susu uukkwene.” Ciimo cabuntu bwa Yahushua tiicakajisi bulemu bwakujulu “kiitaninga lengwa nyika,” aboobo eeci ceelede kuba nceciimo cabulemu bwa “Leza Mwana,” ooyo uukanana muli Johane 17:5.

Pele mwati “Leza Mwana” ulakonzya kuba Leza uukkwene zyoonse pele katajisi bulemu Bwakwe na?

• Ikuti Mwana kali wakalisamununa bulemu bwakwe, nkokuti ooyo Mwana tali Yahuwah uutakonzyi kutulaa ansi bulemu Bwakwe.
• Ikuti Mwana kali wakalaa bulemu kabali a antoomwe a Yahuwah, nkokuti ooyo Mwana tali Yahuwah.
• Ikuti Mwana kali wakali kukombelezya Yahuwah kuti amujosyele (ambweedezye) bulemu, nkabela ooyo Mwana tali Yahuwah.
• Ikuti Mwana naakalaa bulemu bwakujulu kiitaninga lengwa nyika (17:24), ooyo Mwana tali Yahuwah.

Kusandulula Johane 17:5 kwa bakomba Baleza botatwe kulalizambaila mukooze ka kupelengusya.

Atwaambe kuti aabo bakomba Baleza botatwe bayanda kwaamba kuti Johane 17:5 utondezya kuti Yahushua wakali kupona kataninga zyalwa. Mukaambo aako, balo beelede kuba batobeli ba Arius wa musela wa AD 4^th ooyo wakali kusyoma kuti Logos naa (Ijwi), leza musyoonto nokuba mungele wakali kupona kataninga zyalwa, wakasamikwa ciwa cabuntu. Kufumbwa uuli woonse ooyo wakalaa bulemu “antoomwe” a Yahuwah, inzya ncobeni ooyo wakaabidwe bulemu, nkokuti kutaanguna ooyo taakajisi bulemu “antoomwe” a Yahuwah, pele ulajosyelwa bulemu akuba “antoomwe” a Yahuwah, mbube ooyo tali Yahuwah pe. Mbweenya mbuli yooyo “kuli Yahuwah” mbwatali Yahuwah.

Inzila yiinda kubota ya Kusandulula Johane 17:5

Kwiinda kubungubunga makanaa yooyo wiitwa kuba muntu wa bulemu uuteeli, Johane 17:5 makani aakaambwa mangolezya kataninga kankaminwa mwaalumi Yahushua waku Nazaleta mu cisyomyo cokwa Yahuwah. Eeco caambwa kuti nkusandulula “buleza bwa Kristu” ciladyakaizya, ncobeni cisola kumwayaula mwaalumi Kristu Yahushua alusyomo ndwaakabikkide muli Yahuwah, Leza wakwe.

Eelyo Yahuwah naakapa lunyungu lwa Abulahamu nyika, kabataninga zyalwa, mbweenya Yahuwah mbwaakapa Abramu wisi wa masi manjaanji, kataninga kubaa mwana wacisyomyo, Yahuwah wakapa bulemu kuli Messiah Yahushua alakwe kataninga zyalwa. Yahuwah naamba zintu waamba aanga zyakacitika kale. Mwaalumi Kristu Yahushua wakasyoma cakumaninina mu cisyomyo caakanzidwe nguwe kaindi loko.

Kucenjezya

Ikuti Yahushua naakali kupona kataninga zyalwa mbuli Yahuwah, nkokuti tali muntu. Inga kanooli biyo cilengwa leza camusyobo uumbi, pele kutali muntu susu wanyama. Kumamanino, lusyomo lwa bakomba Baleza botatwe, lusolwedwa kukukaka Yahushua mwaalumi muntu.

Ikuti Yahushua naakali kupona kataninga zyalwa mbuli Yahuwah, nkokuti tali muntu. Inga kanooli cilengwa leza camusyobo uumbi, pele kutali muntu susu wanyama. Kumamanino, lusyomo lwa bakomba Baleza botatwe, lusolweda ku kukaka mwaalumi Yahushua.

Hena Adamu wakali kupona kataninga lengwa

Kunze lyakuba biyo mumakanze aamilimo yokwa Yahuwah na? Hena kuli muntu naba ni wakali kupona kataninga zyalwa pele kuba biyo mumakanze ookwa Yahuwah? (Cilagambya kuti, ba Mormoni basyoma kuti bantu bakali kupona kabataninga zyalwa, hena aaya masimpe aajanwa mu Bbaibbele na?). Ikuti Yahushua naakali kupona ncobeni kataninga zyalwa, nkokuti ooyo tali muntu; ncintu biyo cimwi. Tali mbuli nduwe andime muli ceeco citubamba kuba bantu. Ciwa ca Yahushua eeco cili muzibeela zyobile mu milazyo ya Bukatolika ncica Clark Kent Superman, muntu wakuyeeyela biyo, kaano kakulengelezya, amanjezyeezya. Ikuti Yahushua naakali Yahuwah wakalisamika mubili wanyama, ooyo tali muntu, aboobo tatujisi cituuzyo ca zinyonyoono zyesu (BaLoma 5:15, 17; 1 Timoteo. 2:5; 2 Bakolose. 5:21).

Mangwalo taasweni munsaa kwaamba cintu mbuli cakuti "uulya ngu Yahushua muntu susu, pele kuti “uulya ngu Yahushua wabulemu bwakujulu." Ciimo cilaa zibeela zyobile cokwa Yahushua nca masendekezya, ncakulengelezya. Mu lufu lwa Yahushua muntu (kutali uuli mu ziimo zyobile) aciciingano, kubuka kuzwa kubafu kwa mwaalumi Yahushua, akusumpulwa kwa mwaalumi Yahushua ku janza lya lulyo lwa Singuzuzyoonse Yahuwah mukati ka julu, aayo taali masendekezya pe.

---

Eeci cibalo citali ca-WLC cakalembwa aaba Bill Schlegel.

Twakagwisya mucibalo citaanzi mazina aabakomba mituni ngobayita Taata a Mwana, akubikka mucibaka cangawo mazina mataanzi ngubaapedwe. Kuyungizya waawo twakajokolosya mutumpango ntotulembulude akubikka mazina aa Taata a Mwana, mbuli mbwaakalembedwe kutaanguna abalembi bamu Bbaibbele bakayoyelwa moza. Nkamu ya-WLC